Amulibambile Kabotu Kujatikizya Ciibalusyo
Cilakkomanisya kaka ikuti basikumutobela Kristo balibambila kabotu kujatikizya buzuba mbotuyeeya lufwu lwa Jesu Kristo imasiku! (Luka 22:19) Nzyintu nzi nzyotweelede kucita notulibambila Ciibalusyo?
◼ Busena Aciindi: Boonse beelede kucizyiba kabotu ciindi abusena nkociyoocitilwa Ciibalusyo. Ikuti kakuli mbungano zinji ziya kubelesya Ŋanda ya Bwami, cilayandika kufwambaana kusika alimwi akuzwa kabotu-kabotu muciindi cipedwe wamana muswaangano kutegwa mbungano iitobela itamuki. Kuyandika kuzicita kabotu zyintu kutegwa kutakabi kwaatikizyanya amulyango, mutuzila alimwi aabusena busiilwa myootokala.
◼ Tupepa Twakutamba Bantu: Sena basikumwaya boonse bakapegwa tupepa twakutamba bantu tweelede alimwi sena bakaabala makani aali mumo? Sena mwakalibambila kale mbomuya kwaabila tupepa ootu? Mbaani mbomuya kutamba? Kuyandika kusolekesya kutegwa tupepa toonse tumane.
◼ Zyakweendela: Bakwesu abacizyi abantu bamwi bajisi luyandisisyo inga bayandika zyakweendela naa lugwasyo lumbi. Ino mbubambe nzi bwabikkwa bwakubagwasya?
◼ Zitondezyo: Zitondezyo tazyeelede kwiinzyigwa kalitana kubbila zuba. Ibubambe bweelede kucitwa bwakubatolela zitondezyo zyamulalilo ibananike aabo batakonzyi kujanika akaambo kakuciswa. Mweelede kupangila limwi cinkwa akujanina limwi waini weelede.—Amubone Ngazi Yamulindizi ya March 1, 2003, peeji 10, 11 muncali 14, 17.
◼ Ŋanda ya Bwami: Ŋanda ya Bwami yeelede kusalazyigwa kakucili ciindi. Imbale, matambula, tebulu lyeelede alimwi akasani kaatebulu zyeelede kuletwa kubusena bucitilwa Ciibalusyo akuzyibikkila limwi kakucili ciindi. Ikuti naa muya kubelesya busena bumbi bwakuswaanganina, mweelede kujana mincini yakwaambawida yeelede kutegwa boonse banakuliko bakaamvwe makani ngaya kukanana mwaambi. Mweelede kusalila limwi basikugwasyilizya abasikwiinzya zitondezyo zyamulalilo akubalailila kabotu ncobeelede kucita kakucili ciindi alimwi ambobayandika kusama akulibamba bweelede munzila iipa bulemu.
Kumuswaangano ooyu uuyandika kapati wa Ciibalusyo calufwu lwa Jesu Kristo, tuyandika kuti toonse mumbungano katulibambilide. Cakutadooneka, Jehova uya kubalongezya boonse aabo bamulumba camoyo woonse akaambo kazyintu zyoonse nzyaakabacitila kwiinda mucituuzyo ca Mwanaakwe, Jesu Kristo.