Sena Muyakutalisya Ciiyo ca Bbaibbele Mumwezi wa October?
1. Ino mumwezi wa October tunakwaabila nzi?
1 Mabbuku aakwaabila mumwezi wa October mamagazini aa Ngazi Yamulindizi a Sinsimuka! Twajokela kubantu bakatondezya luyandisisyo, tulakonzya kubapa katulakiti kakuti Sena Mulayanda Kuzyiba Bwiinguzi Bwakasimpe? akutalisya ciiyo ca Bbaibbele. Ino mbuti mbotukonzya kucita oobo notupilukila?
2. Ino mbuti mbotukonzya kubelesya katulakiti ka Kuzyiba Bwiinguzi Bwakasimpe kutalisya ciiyo ca Bbaibbele notupilukila kumuntu ngotwakapa mamagazini?
2 Mbomukonzya Kukabelesya Katulakiti: Tulakonzya kwaamba boobu: “Mamagazini ngondakamusiila akulwaizya bantu bamisyobo yoonse azikombelo zyoonse kulilanga-langa Bbaibbele. [Amumupe mwiniŋanda katulakiti kakuti Kuzyiba Bwiinguzi Bwakasimpe, akumutondezya mibuzyo iili atala.] Amubone mibuzyo imwi iikkomanisya Ibbaibbele njoyiingula. Sena kuli nomwakalibuzyide mibuzyo imwi yayeeyi?” Mwiniŋanda ayingula, amulange-lange antoomwe mukatulakiti bwiinguzi bwamubuzyo omwe alimwi amubale lugwalo lubikkidwe. Mwamana amupandulule kuti eeci ncitondezyo buyo comwe cancoliyiisya Bbaibbele alimwi amumupe bbuku lya Bbaibbele Ncoliyiisya. Mpoonya tulakonzya kubandika mincali yakusaanguna yacibalo ncaasala apeeji iijisi zili mukati mubbuku. Naa tulakonzya kubandika makani aayungizyidwe ngotwabandika mukatulakiti. Ngaaya malailile aamwi ngomukonzya kubelesya:
● Sena ncobeni Leza ulatulanganya? (pp. 9-11, minc. 6-10)
● Sena nkondo akupenga kuli noziya kumana? (p. 12, minc. 12-13)
● Ncinzi cicitika kulindiswe twafwa? (pp. 59-60, minc. 7-8)
● Sena kuli ncotukonzya kulangila kujatikizya bafwide? (p. 71, minc. 13-15)
● Mbuti mbondikonzya kupaila mipailo njaswiilila Leza? (pp. 166-167, minc. 5-8)
● Mbuti mbondikonzya kukkomana mubuumi? (p. 9, minc. 4-5)
3. Ino mbuti mbotukonzya kubasikila bantu kweelana abukkale?
3 Ikuti naa tacikonzyeki kutondezya mbocicitwa ciiyo ca Bbaibbele mubbuku lya Bbaibbele Ncoliyiisya mwajokela kumuntu ngomwakakambaukila, mulakonzya kubikka bubambe bwakuti mukaunke alimwi akuzumanana mubandi. Kweelana amuntu mbwayandisisya, mulakonzya kubandika mibuzyo minji mukatulakiti kamutana talika kwiiya mubbuku. Aboobo, atukabelesye katulakiti aaka mumwezi wa October kutalisya ciiyo ca Bbaibbele akugwasya bantu babombe myoyo ‘kuzyiba kasimpe.’—Johane 8:31, 32.