Kabbokesi Kamubuzyo

◼ Mbaani beelede kulemba tupepa naa kubelesya Intaneti kulomba ciiyo naa mabbuku?

Mabbuku eesu kanji-kanji alijisi tupepa tukonzya kulembwa akutumwa kuofesi yamutabi ikulomba mabbuku naa kuswaigwa a Bakamboni ba Jehova. Kuyungizya waawo, kkeyala yesu ya www.watchtower.org ilakonzya kubelesyegwa kulomba ciiyo ca Bbaibbele. Bubambe oobu bulabagwasya bantu banji kwiiya kasimpe. Nokuba boobo, kuli buyumuyumu bwajanika ciindi basikumwaya nobabelesya bubambe oobu kutegwa basazinyina naa bantu bamwi batambule lugwasyo lwakumuuya.

Bamwi ibakatuminwa mabbuku kuzwa kuofesi yamutabi ngobatakalomba balatongooka, balimvwa kuti mbunga yesu ilabapenzya alimwi bayeeya kuti mazyina aabo ali amulongo wabaabo batuminwa mabbuku lyoonse. Basikumwaya ibakaambilwa kuyooswaya muntu umwi watakalilombela kuswaigwa bakafwa nsoni muntu ooyo naakabanyemena. Aboobo, kulomba kwiinda mukubelesya Intaneti naa kulemba tupepa, kweelede kuzwa kumuntu ulaaluyandisisyo mwini kumugama ikutali kuzwa kuli sikumwaya uuyanda kuti mweenzinyina naa musazinyina aswaigwe. Ikuti ofesi yamutabi yazyiba kuti sikumwaya ngookalomba kuti muntu umwi aswayigwe, taikakubikkili maano kulomba ooko.

Aboobo, mbuti mbotukonzya kumugwasya kumuuya musazima naa mweenzuma? Ikuti naa muyanda kuti katambula mabbuku, amumutumine nobeni akumwaambila kuti ncipego. Ikuti watondezya luyandisisyo alimwi kayanda kuswayigwa a Bakamboni, pele kamutazyi mbomukonzya kubabona baalu bamumbungano iili afwaafwi ankwabede, amupe mulembi wamumbungano yanu foomu ya Amuzumanane a Muntu Ooyu (S-43), walo uyooyilanga-langa akwiituma kuofesi yamutabi. Nokuba boobo, kuti muntu ulaaluyandisisyo kali muntolongo naa mucibbadela, tamweelede kumulombela kuofesi yamutabi. Muciindi caboobo, mulakonzya kumukulwaizya kuzyibya bakwesu baswaya ooko nkwabede naa kulilembela alikke kuofesi yamutabi.