Kabbokesi Kamubuzyo

◼ Sena basikumwaya beelede kubelesya Intaneti kukambaukila bantu naa kubayiisya Bbaibbele ibakkala kucisi cimbi mbobatazyi kabotu?

Basikumwaya bamwi babelesya Intaneti kutegwa bajane ziiyo zya Bbaibbele muzisi zimbi ooko mulimo wesu nkoukasyidwe naa ikuli basikumwaya basyoonto. Zimwi ziindi, kuli bubotu ibujanika akaambo kakucita boobo. Nokuba boobo, kuli ntenda ziliko ikuti basikumwaya kabatuminana tugwalo a Intaneti naa kuba amibandi abantu mbobatazyi kabotu. Nokuba kuti makanze ngotujisi ngakuti tusikile babombemyoyo amulumbe wa Bwami, mibandi iili boobu ilakonzya kupa kuti mukwesu naa mucizyi atalike kuyanzana abantu batali kabotu kubikkilizya abasiluleyo. (1Kor. 1:19-25; Kol. 2:8) Kuyungizya waawo, muzisi oomo mulimo wa Bwami moukasyidwe, mibandi eeyo ilakonzya kuzyibwa amfwulumende calo cikonzya kubikka bakwesu abacizyi bakucisi eeco muntenda. Aboobo, basikumwaya tabeelede kubelesya Intaneti kuyandaula bantu bakucisi cimbi kutegwa babaambile makani mabotu.

Ikuti ofesi yamutabi tiiyamwaambila kuzumanana kubandika amuntu wakazwa kucisi cimbi ngomwakakambaukila mubukambausi bwamukwiizya, tamweelede kuzumanana kumukambaukila muntu ooyo ciindi najokela kucisi nkwazwa. Muciindi caboobo, mulakonzya kumutondezya mbwakonzya kubelesya jw.org kutegwa ajane makani manji naa azyibe mbwakonzya kujana kkeyala ya ofesi yamutabi yakucisi nkwazwa. Alimwi tulakonzya kumukulwaizya kuunka ku Ŋanda ya Bwami iili afwaafwi ankwakkala. Masimpe kuti, muzisi zimwi kunyina Maanda aa Bwami. Ikuti kayanda kuswaigwa a Bakamboni bakooko, tweelede kulemba foomu yakuti Amuzumanane a Muntu Ooyu (S-43) akwiipa mulembi, walo uyakwiituma kwiinda mukubelesya jw.org. Ofesi yamutabi iilanganya mulimo wakucisi ooko nkwazwa muntu ooyo uulaaluyandisisyo ilizyi bukkale bwakooko alimwi njiikonzya kumugwasya kabotu kumuuya.—Amubone Mulimo Wesu wa Bwami wamu June 2014, peeji 7, alimwi awamu November 2011, peeji 2.

Ikuti muntu ngotuswaya kutegwa katubandika makani aamu Bbaibbele walongela kucisi cimbi naa ikuti katwiiya amuntu uukkala kucisi cimbi walo ngotwakazyibila a Intaneti, tweelede kutobela malailile aambwa atala aawa. Nokuba boobo, tulakonzya kuzumanana kwiiya amuntu ooyo kusikila kwajanika sikumwaya wakucisi eeco uukonzya kuzumanana anguwe. Pele kuti kakkala kucisi mulimo wesu nkoukasyidwe, mweelede kucenjela kapati ciindi nomubandika makani aamu Bbaibbele kwiinda mukubelesya magwalo, fooni, naa zibelesyo zimbi buyo.—Mt. 10:16.