Cilayandika Kubweza Ntaamu Cakufwambaana

Kuzwa ciindi noyakatalisyigwa Web site yesu yakabambululwa, aabo ibalomba kuba aziiyo zya Bbaibbele kubelesya intaneti bavwula kapati. Bubambe bupya bwakukambauka kubuleya bwapa kuti mweelwe wabaabo ibalomba ziiyo zya Bbaibbele uvwule. Ofesi yamutabi ilafwambaana kubelekela akulomba ooku. Mucikozyanyo, kuti kulomba ciiyo kwazwa a jw.org, baalu ibali mucilawo muli muntu walomba ciiyo kanji-kanji balazyibisyigwa amutabi kwainda buyo mazuba obilo. Nokuba boobo, malipooti kuzwa mumuunda atondezya kuti bamwi ibakalomba kuba aciiyo ca Bbaibbele, inga kulainda mvwiki zili mbozibede kakunyina kuswaigwa. Ino mbuti mbotukonzya kusinizya kuti twabagwasya kalutanamana luyandisisyo lwabo?—Mk. 4:14, 15.

Ikuti muntu uutakkali mucilawo canu watondezya luyandisisyo, cakufwambaana amulembe afoomu ya Amuzumanane a Muntu Ooyu (S-43) akupa mulembi kaitanainda miswaangano yamvwiki eeyo. Mubuzuba bomwe naa obilo, mulembi weelede kupa twaambo ootu kumbungano yeelela naa kutuma foomu eeyi ku ofesi yamutabi kubelesya akkaunti yambungano yaa jw.org. Baalu beelede kuba acilengwa cakulanga-langa a Web site yesu ciindi aciindi. Ikuti bazyibisyigwa kuti bakaswaye muntu ujisi luyandisisyo, beelede kufwambaana kubweza ntaamu. Sikumwaya uuli woonse iwalombwa kuyooswaya muntu uuli boobu weelede kucibikka mubusena butaanzi. Ikuti muntu katali aŋanda, inga mwasiya kapepa kajisi makani aakonzya kumugwasya kuti amujane.