Zitondezyo Zyacikozyanyo

Kutalisya Ziiyo zya Bbaibbele Mubuzuba bwa Mujibelo Bwakusaanguna mu April

“Muziindi eezyi zikatazya, toonse tulasikilwa mapenzi aapa kuti kube buyumuyumu mumikwasyi. Ino muyeeya kuti nkookuli nkotukonzya kujana lulayo lukonzya kutugwasya kuba alukkomano mumukwasyi?” [Amulindile bwiinguzi.] Mpoonya amumupe mukamwini ŋanda Ngazi Yamulindizi akubandika anguwe twaambo tuli ansi aakatwe kamakani komwe akati aatutwe tuli apeeji 16 alimwi a 17 kubikkilizya alugwalo lomwe lubikkidwe. Amwaabile mamagazini, akupangana kuti mukapilukile kuzoobandika mubuzyo aumwi.

Ngazi Yamulindizi January–March

“Mbokunga bantu banji baamba kuti Leza Singuzuzyoonse ngu Leza siluyando, ino majwi aakuti kuli ‘ciindi cakusula’ inga mwaamvwa buti? [Amulindile bwiinguzi. Mpoonya amubale lugwalo lwa Mukambausi 3:8.] Cilakonzya kumukkomanisya kubona nzila ziindene-indene Bbaibbele mbolilibelesya bbala lyakuti ‘kusula’. [Amubikkile maano kutwaambo tuli mumuncali wakusaanguna ansi aakatwe kali apeeji 15.] Cibalo eeci citondezya kuti kuli micito imwi Leza njasulide. Alimwi cilabandika ncakonzya kucita muntu wakacita micito iili boobo kutegwa ayandwe a Leza.”

Sinsimuka! January–March

“Ino nyika noyali buti kuti bantu boonse nibali kutobela majwi aali mulugwalo oolu? [Amubale 2 Bakolinto 10:3. Mpoonya amulindile bwiinguzi.] Magazini eeyi ilaingula mibuzyo iijatikizya kaambo Leza ncaakali kubazumizya bana Israyeli kuunka kunkondo pele ncatabazumizyi Banakristo kucita oobo; alimwi naa wakacinca mbwailanga nkondo naa pe. Bwiinguzi bulasalala notulanga-langa kwiindana kupati kotatwe akati kabana Israyeli alimwi ambungano ya Banakristo bakasimpe.” Amubandike cibalo citalikila apeeji 14.