Amwiibelesye jw.org Mumulimo Wanu—“Amube Balongwe ba Jehova”

Cibeela cakuti “Njiisyo Zyamu Bbaibbele” ca jw.org cilijisi acibeela cabana cijisi mutwe wakuti “Amube Balongwe ba Jehova” calo icibikkilizya anyimbo, mavidiyo alimwi azyakucita. Sena kuli nomwakacibelesyede kale cibeela eeci mumulimo? Ikuti naa mweendelezya ciiyo ca Bbaibbele kumuzyali uujisi bana baniini, mbuti kuti mwamutondezya cibeela eeci? Eeci cilakonzya kumupa kuti alange-lange azintu zimbi zijanika a Webbusaiti yesu.

Ciindi nokwakali kwaabilwa katulakiti ka Makani Mabotu Na. 38, mukwesu umwi wakaswaanganya mukaintu umwi walo iwakatalika kukabala katulakiti aaka mbwaakakatambwida buyo. Mukaintu ooyu wakajisi bana bacili baniini banji ibakali kukayanda kapati katulakiti aaka. Mukwesu wakabandika mubufwaafwi izili mukati akumutondezya kkeyala ya Webbusaiti yesu katulakiti nkokali kunze. Akaambo kakuti mukaintu ooyu wakatondezya luyandisisyo, mukwesu wakaba acoolwe cakutondezya kavidiyo komwe ka Caleb kumukaintu ooyu antoomwe abana bakwe kwiinda mukubelesya fooni yakwe.

Mucizyi umwi wakaambila muntu ngobabeleka limwi uujisi bana baniini kujatikizya Webbusaiti yesu alimwi amakani aajanika mumo aamikwasyi. Mukaintu ooyu wakalanga a jw.org antoomwe abana bakwe. Mpoonya, wakaambila mucizyi kuti bana bakwe bakali kuzinguluka ŋanda kabayaabwiimba lwiimbo lwakuti “Mwaya Jwi,” lwiimbo lomwe luzwa mucibeela ca “Amube Balongwe ba Jehova.”

Amuzyibe mboibelesyegwa webbusaiti ya jw.org, alimwi amukkope vidiyo yomwe, nyimbo naa izyakucita afooni yanu. Aboobo munoolibambilide kubelesya cibeela eeci ca jw.org mumuunda. Eelo kaka eeci ncibelesyo cibotu cikonzya kutugwasya kubelekela Mwami!—Mil. 20:19.