Kulibambila Kulayandika Kutegwa Tuyiisye Kabotu

Ziindi zyobilo, Jesu wakabuzyigwa mubuzyo uukozyenye kujatikizya buumi butamani, pele ciindi aciindi wakali kwiingula kweelana anzyayandika sikubuzya. (Lk. 10:25-28; 18:18-20) Nokuba kuti inga katucizyi kabotu cibalo cakwiiya muciiyo ca Bbaibbele, tweelede kusaanguna kulibambila kumwi katumubikkide mumizeezo sikwiiya. Ino ntwaambo nzi tukonzya kumukatazya kumvwisya naa kuzumina? Ino magwalo nzi aabikkidwe ngotukonzya kubala anguwe? Ino tweelede kubandika makani manji buti? Inga twayandika kulibambila cikozyanyo, bupanduluzi, naa kumubuzya mibuzyo iikonzya kumugwasya kumvwisya twaambo sikwiiya. Kuyungizya waawo, mbwaanga ngu Jehova uupa kuti mbuto yakasimpe ikomene mumoyo, tweelede kumulomba Jehova kuti atugwasye ciindi notulibambila ciiyo kutegwa tumugwasye sikwiiya kuyaambele kumuuya.—1 Kor. 3:6; Jak. 1:5.