Cintu Citaliboteli Icakacitika Akaambo Kakumweta-mweta

BAMAKAINTU bobilo ibacili bana-bana bakali kweenda mubusena mucitilwa makwebo mudolopo lya Baguio, ku Philippines. Bakabona kakkocci kakubikkila mabbuku kakukuba, pele tiibakaswena afwaafwi. Aboobo mucizyi iwakaimvwi munsi-munsi akakkocci, wazina lya Helen, wakamweta-mweta kapati naakababona. Bamakaintu aaba bakazumanana alweendo lwabo, pele bakakkomana kapati kubona Helen mbwaakamweta-mweta.

Kumbele, aaba bamakaintu nobakali mubbaasi kuunka kuŋanda, munzila bakabona Ŋanda ya Bwami yakajisi cikwankwani cakalembedwe mabala mapati aakuti jw.org. Mpoonya bakayeeya kuti aaya ngamabala aakalembedwe akakkocci kakubikkila mabbuku kakukuba nkobabwene. Bakaseluka mubbaasi. Kumane ageedi bakajana mulongo waziindi amazuba aakuswaangana aambungano ziindene-indene zibelesya Ŋanda ya Bwami eeyo.

Bamakaintu aaba bakajanika kumuswaangano wakatobela. Eelo kaka bakagambwa kapati kumubona Heleni nibakanjila mu Ŋanda ya Bwami! Bakamuzyiba mpoonya-mpoonya nkaambo ngomuntu uulya wakabamwetela. Helen wakaamba kuti “Ndakalibilika asyoonto, nkaambo tiindakazyi ncibakaboolela kulindime. Amana ndakayeeya kuti ndiza ndakapanga mulandu.” Pele bamakaintu bakamupandulwida Helen zyakacitika.

Aaba bamakaintu bakaukkomanina kapati muswaangano, alimwi bakalimvwa kutambulwa. Ciindi nibakabona bamwi kabasalazya mu Ŋanda ya Bwami nowakamana muswaangano bakalomba naa abalo inga bagwasyilizye. Mukaintu omwe wakalonga kuzwa mucisi, pele umwi wakatalika kujanika kumiswaangano alimwi akwiiya Bbaibbele, akaambo buyo kakumweta-mweta.