1 | Mupailo “Kamuwaala Makatazyo Aanu Oonse Kulinguwe”

BBAIBBELE LYAAMBA KUTI: “Kamuwaala makatazyo aanu oonse kulinguwe, nkaambo ulamubikkila maano.”—1 PETRO 5:7.

Bupanduluzi

Jehova Leza ututamba kuti katumwaambila zintu zituminya mumizeezo yesu alimwi amumoyo. (Intembauzyo 55:22) Tacikwe makani abupati bwapenzi ndyomujisi, mweelede kulipailila. Ikuti kamupenga, nkokuti awalo Jehova ulapenga akaambo kakuti ulatubikkila maano alimwi akubikkila maano mbotulimvwa. Kupaila kulinguwe ninzila iigwasya kujana luumuno lwamumizeezo.—Bafilipi 4:6, 7.

Mbocikonzya Kutugwasya Eeci

Ciindi notupenga abulwazi bwamumizeezo, tulakonzya kulimvwa kulendelelwa kapati. Bantu bamwi tabakonzyi kumvwisya zintu nzyotuli mukwiindamo. (Tusimpi 14:10) Pele ciindi notumwaambila cakuzwa ansi aamoyo Leza kwiinda mumupailo, uyootuswiilila caluzyalo alimwi akutumvwisya. Jehova ulatubona, ulikuzyi kucisa kwesu alimwi amapenzi eesu, aboobo uyanda kuti katupaila kulinguwe kumwaambila kufwumbwa cintu citulibilisya.—2 Makani 6:29, 30.

Kubandika a Jehova mumupailo kuyumya lusyomo lwesu lwakuti ulatubikkila maano. Tulakonzya kulimvwa mbuli sintembauzyo wakapaila kuti: “Wakubona kupenga kwangu; waazyiba mapenzi aangu mapati.” (Intembauzyo 31:7) Kuzyiba buyo kuti Jehova ulakubona kupenga kwesu, cilatugwasya kuliyumya ciindi notujana mapenzi. Pele ulacita zinji kunze buyo lyakubona mapenzi eesu. Kwiinda muntu uuli woonse, ulaamvwisya mapenzi ngotujisi alimwi ulatugwasya kujana luumbulizyo akutukulwaizya kuzwa mu Bbaibbele.

Bbaibbele Mboligwasya Julian

Bulwazi Bwakulibilika Mbobundijatikizya

“Ndiciswa bulwazi bwakulibilika akuyeeya zintu zitali kabotu calo cindipa kupenga kapati. Kulibilika kulaakuboola aciindi nconditayeeyeli. Zimwi ziindi ndili kabotu, pele kwainda buyo kaindi kasyoonto ulajana ndatalika kulibilika kakunyina akaambo. Bunji bwaziindi ndilaakulibilika ciindi nondili akati kabantu. Ndilaakuyeeya kapati kujatikizya mbobandiyeeyela.

“Beenzuma ibazyi kujatikizya kulibilika kwangu balasolekesya kundigwasya. Zimwi ziindi baamba zintu zitagwasyi. Pele ndilalumba kapati akaambo kakusolekesya kwabo.

“Zimwi ziindi, bulwazi bwangu bupa kuti cindiyumine kupaila. Kuyandika kusoleka canguzu kutegwa ndicikonzye kubikkila maano alimwi akwaamba majwi aali kabotu ciindi nondipaila kuli Jehova. Mizeezo yangu ilacinca cakufwambaana cakuti bunji bwaziindi cindipa kunyongana. Ciindi nonditakonzyi kweendelezya mizeezo yangu, cilandikatazya kupandulula kuli Jehova kujatikizya mbondiyeeya alimwi ambondilimvwa.”

Bbaibbele Mbolindigwasya

“Kwiinda mukubala Bbaibbele, ndakaiya kuti mipailo tayeelede kulampa buya naa kubelesya majwi mapati-pati kutegwa Leza ayiingule. Zimwi ziindi nondikakilwa kwaamba mbondilimvwide, ndilaakwaamba buyo kuti: ‘Jehova, ndalomba kondigwasya.’ Nokuba boobo, inga ndilimvwa kuti Jehova ulandimvwisya alimwi ulandipa nzyondiyanda aciindi eeco. Kunze lyakupaila, ndakaunka kucibbadela kutegwa ndikasilikwe. Ndilikkomene kapati akaambo kakuti nzila eezyi zyobilo zyandigwasya, lino ndiyaabupona. Nokuba kuti ciyandika kusolekesya kapati kulomba lugwasyo kuli Taata wakujulu, ndilacita oobo nkaambo ndilisinizyide kuti ulandiyanda alimwi uyanda kundigwasya.”