Kukambaukila Bantu Bakatazya Kujana

NOKUBA kuti mulimo wakukambauka kuŋanda aŋanda ucili nenzila mpati Bakamboni ba Jehova njobabelesya kumwaya kasimpe kamu Bbaibbele, akwalo kubelesya matebulu alimwi atwakukubila mabbuku itulibonya kabotu yaba nzila iibeleka kabotu mukukambauka makani mabotu aa Bwami bwa Leza. (Mt. 24:14) Basikukambauka Bwami babelesya tumasitaandi, matebulu alimwi atukkiyosiki kukambaukila bantu mumasena aakubuleya. Kuyungizya waawo, mbungano munyika yoonse zyakapegwa kale twakubikkila mabbuku tusika ku 250,000. Ino nzila eeyi yagwasya buti?

Mu Dar es Salaam ku Tanzania, bantu batandila ku  700 bakalomba kuyiisyigwa Bbaibbele kuzwa ciindi bubambe bwaalubazu bwakukambauka kubuleya nobwakatalika mu  2014. Bantu banji ibajisi luyandisisyo balajanika kumiswaangano alimwi cilongwe cabo a Leza ciyaabuyuma. Mumwaka buyo omwe, bantu bazwa mu Africa amasi aambi aakulamfwu bakaboola kututebulu twakubikkila mabbuku akubweza mabbuku, mabroshuwa, mamagazini amatulakiti aainda ku 250,000.

Mucisi ca Solomon Islands, imuli basikumwaya batandila ku 2,000 ibakambauka mucilawo cipati cipangidwe ansumbu ziinda ku 300, bukambausi bwaalubazu bwakubuleya bwaba nenzila iigwasya kapati mukumwaya kasimpe kubantu. Mudolopo lipati lya Honiara, bakwesu bakaabila mamagazini aainda ku 104,000 alimwi amabroshuwa aainda ku 23,600 kubantu banji ibazwa munsumbu amuminzi yakulamfwu ikutakwe Bakamboni. Mubuzuba buyo bomwe ciindi cakumazuba, bakaabila mabbuku aali 400 aakuti Ino Ncinzi Ciini Bbaibbele Ncoliyiisya? alimwi bantu ibali 60 bakalomba ciiyo ca Bbaibbele.

Buzuba bumwi mafwumofwumo, ba Michael aba Linda ibapainiya baciindi coonse bakali kwiimika kasitaandi kamabbuku kunkomwe yalwizi ku Nsumbu ya Margarita mucisi ca Venezuela. Mwaalumi uutegwa Aníbal wakaboola kusitaandi akubweza bbuku lya Bbaibbele Ncoliyiisya. Wakabaambila kuti myaka iili ciloba iyainda bausyi bakafwida kunkomwe yalwizi njoonya eeyi, alimwi akuti kuzwa ciindi eeco, banyina bacizyingidwe mumizeezo. Mvwiki yakatobela, ba Aníbal bakapiluka akwaambila ba Michael aba Linda kuti oobo mbobuzuba mbobakafwa bausyi. Bakabweza fooni yabo akutumina banyina, mpoonya bakalomba ba Michael kuti baambile banyina majwi aakuumbulizya, eelyo ba Michael bakacita oobo. Kuzwa leelyo, ziindi zinji banyina baba Aníbal inga batumina fooni ba Michael aba Linda alimwi balabala ambabo magwalo aaumbulizya. Mukagwalo kaafooni kamwi, banyina baba Aníbal bakalemba kuti, “Sunu ndilimvwide kabotu akaambo kalugwasyo ndomwali kundipa calo icapa kuti lusyomo lwangu luyume alimwi akuti nduumbulizyigwe.”

Bukambausi bwakubuleya bwaalubazu bulacitwa mumasena aali 127 mumadolopo aali 14 mu United States. Mumyezi yakusaanguna iili ciloba yamwaka wamulimo wa  2015, ziiyo zya Bbaibbele izili 8,445 zyakatalisyigwa! Kuyungizya waawo bukambausi oobu bwagwasya kapati mukupa kuti bantu banji ibakalekede kuyanzana andiswe batalike alimwi kutola lubazu mubukombi bwakasimpe. Mucikozyanyo, mwaalumi umwi uutegwa Terry wakali kulanga-langa mabbuku aakali atebulu lyesu ku Los Angeles, California, aboobo Bakamboni banabukwetene ibakali atebulu eelyo bakamubuzya naa kuli naakaabalide kale mabbuku eesu. Wakapandulula kuti awalo ngu Kamboni pele tanaakacisungweede kwamyaka iitandila kuli yone. Banabukwetene aaba bakabala akubandika anguwe lugwalo lwa Ezekieli 34:11, ooko Jehova nkwaamba kuti: “Mebo lwangu ndiyooziyandaula mbelele zyangu akuzilanganya.” Bakamwaambila kujatikizya webbusaiti yesu alimwi a JW Broadcasting. Buzuba bwakatobela mafwumofwumo, ba Terry bakalembela ba Michael kagwalo kaakkompyuta akupandulula kuti mbobakamanina buyo kupaila kuli Leza kulomba kuti abalekelele akaambo kakuti bakalilekede kuswaangana, bakabona tebulu lyesu. Alimwi bakalombede kuti bagwasyigwe kuba acilongwe ciyumu a Jehova. Ba Terry bakaamba kuti: “Mpoonya nywebo mwakanditambula kabotu akundijuzya. Mwakandibalila lugwalo lukulwaizya alimwi mwakandaambila ncondikonzya kucita kutegwa nditalike alimwi kweendela antoomwe ambunga ya Jehova. Mupailo wangu wakaingulwa.”

Mudolopo lya Addis Ababa ku Ethiopia, kuli masena one ikucitilwa bukambausi bwaalubazu kubuleya. Mumyezi yotatwe buyo bakwesu bakaabila mabbuku aali 37,275 alimwi bantu ibali 629 bakalomba kuti baswaigwe a Bakamboni. Akati kabantu bakatambula bbuku lya Bbaibbele Ncoliyiisya kwakali mudaala umwi iwakatalika kulibala mbwaakalitambwida buyo. Musyule oomu wakaiya kucikolo cabukombi, alimwi wakalaamibuzyo kujatikizya Jesu a Bwami bwa Leza. Aboobo buzuba bwakatobela, wakapiluka kusitaandi kutegwa bakaingule mibuzyo yakwe. Alimwi buzuba bwakatobela, bakazumina ciiyo ca Bbaibbele, mpoonya kumamanino aamvwiki, bakajanika kumiswaangano kwaciindi cakusaanguna. Lino balajanika kumiswaangano ciindi coonse alimwi bazumanana kuyaambele kumuuya.

Ku Mexico, mwaalumi umwi mu Juda wakaboola kusitaandi akubuzya bakwesu bobilo ibakali mpawo kuti naa balijisi magazini iyaamba zyalufwu. Bakamwaambila kuti mamagazini aamba zyalufwu akalimanide, pesi bakamutambika magazini iyaamba zyakumbele. Mwaalumi ooyu wakajata janza lyamukwesu akumwaambila kuti: “Mebo tandiyandi kumvwa zyakumbele. Ncondiyanda buyo nkulijaya.” Mpoonya wakatalika kulila. Bakwesu bakamubuzya icakali kumupa kulimvwa boobu. Wakaamba kumwi kalila kuti: “Ndakafwidwa mwana calino-lino.” Aboobo bakamutondezya cibalo 7 cabbuku lya Bbaibbele Ncoliyiisya. Bakamubalila mincali yobilo yakusaanguna ansi aakatwe kakuti “Imuyandwa Naafwa” alimwi amuncali wamamanino mucibalo walo uupandulula bulangizi buliko kujatikizya bantu bafwide. Majwi aayo akamunjila mumoyo mpoonya wakajata janza lyamukwesu alimwi akubuzya kuti, “Sena eeci ciyakucitika ncobeni?” Bakwesu bakamwaambila kuti masimpe Jehova uyoocizuzikizya ncobeni cisyomezyo eeco. Wakabuzya kuti: “Ncinzi ncondeelede kucita kutegwa ndikamubone mwanaangu alimwi?” Bakabikka bubambe bwakuti bakamuswaye mwaalumi ooyu kuŋanda yakwe. Nobakasika kuŋanda yakwe, bakamujana ngooyu ulikkede ulindila kuti atalike kwiiya Bbaibbele.

Mulangizi umwi weendeenda iwakagwasyilizya kutalisya pulogilamu yabukambausi bwaalubazu bwakubuleya mu New York wakaamba kuti: “Eelo kaka Jehova wailongezya pulogilamu eeyi! Pulogilamu eeyi imbotu kapati tiiyatugwasya buyo kusikila bantu banji amakani mabotu pele alimwi yatupa kujana baabo batacisungweede naa bagwisyidwe mumbungano, nkokuti ‘mbelele zisweekede,’ eezyo izilimukugwasyigwa kupiluka mubutanga.”—Ezekieli 34:15, 16.