Muswaangano Mupya wa Buumi Amulimo Wesu wa Bunakristo

LYAMUSWAANGANO waamwaka wa Watch Tower Bible and Tract Society of Pennsylvania mu October 3, 2015, ba Anthony Morris bamu Kabunga Keendelezya bakaambilizya kuti Cikolo Camulimo Weendelezyegwa a Leza, Muswaangano Wamulimo, alimwi a Ciiyo ca Bbaibbele Cambungano zyakali kuyoonjililwa busena amuswaangano mupya uutegwa Buumi Amulimo Wesu wa Bunakristo. Mukwesu Morris alimwi wakapandulula kuti Mulimo Wesu wa Bwami wakali kuyoonjilwa busena akabbuku kanoojisi zifwanikiso zyamibala alimwi kanoojisi mapeeji aali 8 ikanakwiitwa kuti Buumi Amulimo Wesu wa Bunakristo—Kabbuku Kamuswaangano, ikatondezya mulongo wamuswaangano wamvwiki amvwiki alimwi azifwanikiso izibambilidwe kuti kubala Bbaibbele kakukkomanisya.

Muswaangano ooyu mupya waandanizyidwe muzibeela zyotatwe zipati-pati:

1. Mbono Izili mu Jwi lya Leza. Cibeela cakusaanguna mucibeela eeci makani aamaminiti aali kkumi aayeeme akubala Bbaibbele kwansondo ansondo alimwi azifwanikiso izili mukabbuku kamuswaangano. Cibeela cabili, iciitwa kuti “Kuyandaula Mbono Zyakumuuya,” ncibeela camaminiti aali lusele camubandi wakubuzya akwiingula uyeeme akubala Bbaibbele kwansondo ansondo, calo icitobelwa akubalwa kwa Bbaibbele kwamaminiti one.

2. Amusungwaale Mumulimo Wamumuunda. Kanji-kanji mucibeela eeci, basicikolo botatwe balatondezya mbotukonzya kuyiisya mulweendo lwakusaanguna, lwakupilukila alimwi aaciiyo ca Bbaibbele.

3. Kupona Buumi bwa Bunakristo. Cibeela eeci cilanga-langa mbotukonzya kuzibelesya njiisyo zyamu Bbaibbele mubuumi bwesu bwabuzuba abuzuba. Lubazu lupati lwacibeela eeci mubandi wakubuzya akwiingula mucibeela cakuti Ciiyo ca Bbaibbele Cambungano.

Basikumwaya nyika yoonse batondezya kulumba akaambo kalwiiyo ilupegwa mumuswaangano mupya. Mukwesu umwi ku Australia wakalemba kuti: “Muswaangano Wabuumi Amulimo mubotu kapati! Iziyiigwa zilibonya kuti zilayandika kapati mubuumi bwesu, alimwi azitondezyo tazikatazyi. Ciindi cilibonya kuti cilafwambaana kumana kapati nkaambo zibeela nzifwaafwi, zilasalazya kwaamba twaambo, alimwi zilakwelelezya kwaambisya kuti kazijisi mavidiyo alimwi akuti kazibikkilizya abana.”

Kabunga kabaalu ku Italy kakalemba kuti: “Twajana kuti muswaangano ooyu mupya watukulwaizya toonse kulibambila cakulomya, akaambo kakucita boobo, catugwasya kuyaambele mukuyiisya. Muswaangano ooyu mupya ninzila imwi mbotu kapati yakusalazya njabelesya Jehova kuyiisya bantu bakwe. Sikumwaya uujisi myaka iili 15 wakaamba kuti: ‘Kaindi, cakali kukatazya kubikkila maano kumuswaangano woonse. Pele lino muswaangano ooyu mupya wandigwasya kubikkila maano alimwi akulibambila kabotu kuŋanda.’”

Mukwasyi umwi ku Austria wakalemba kuti: “Kubala Bbaibbele kwesu kwansondo ansondo amwaneesu musimbi uujisi myaka iili kkumi kwakali kukatazya. Pele cibeela cakuti ‘Mbono Izili mu Jwi lya Leza’ cakatukulwaizya kutola lubazu cakwaanguluka. Toonse totatwe lino tulakkomana kulibambila mukubala Bbaibbele kwansondo ansondo. Ciinda kubota ncakuti, tulakonzya kubona mwaneesu mbwayaabuya ambele kumuuya.”

Ba Ines baku Germany bakapandulula kuti: “Ndilakulwaizyigwa kulibambila ziyooyiigwa alimwi akuzinzibala kuyeeya kapati kujatikizya zizyo. Kunyina nondakali kuvwuntauzya boobu. Lino ndilikkomene akaambo kacilongwe cibotu ncondijisi a Jehova. Nyika ya Saatani indipa kukatala akulimvwa kubula nguzu. Miswaangano ilandipa nguzu alimwi akundigwasya kuzumanana.”

Mbungano zyaku Solomon Islands zilakkomana kapati akaambo kamuswaangano mupya alimwi zilasolekesya kulibambila kutegwa kazigwasyigwa kapati. Mbungano zinji zili kulamfwu kwalo ikunyina magesi naa Intaneti, alimwi bakwesu bapona buumi buuba-uba. Ino bacikonzya buti kujana zibelesyo zyamavidiyo alimwi amavidiyo aamwezi amwezi aamiswaangano? Basikumwaya mumbungano imwi iili ansumbu ya Malaita bakamvwana kubelekela antoomwe kwiinda mukusambala ma coconut aakayuma. Mali ngobakajana bakaasanga kumbungano kutegwa baule tv yamavidiyo iitaduli iikonzya kubelesya mulilo wa solar. Mpoonya kutegwa bajane mavidiyo mwezi umwi aumwi, bakwesu balaunka kubusena ibuli afwaafwi nkobakonzya kujana Intaneti kutegwa bakonzye kwaakkopa mavidiyo, alo ngobapa abakwesu bamwi mumbungano.

Mukwesu umwi waku United States wakalemba kuti: “Kuboneka kuti cilanduuba-ubila kwiiya kwiinda mukweebelela zifwanikiso, mavidiyo amaccaati. Tiicali cuuba-uba mumyaka iinda ku 40. Cali kunditolela ciindi kuti ndimvwisye ncondibala kutegwa ndicikonzye kupanduluda muntu umwi. Aboobo ndiyanda kubalumba bamu Kabunga Keendelezya akaambo kazibelesyo nzyotujisi izigwasya kwiiya kwiinda mukweebelela. Mavidiyo aamakani aantalisyo aamabbuku aamu Bbaibbele alakkomanisya kapati, alimwi azitondezyo izili mukabbuku kamuswaangano nzyezizyo nzyondiyanda! Tacidoonekwi kuti Jehova wakulongezya kusolekesya kwanu ikugwasya bantu bakwe munzila eeyi. Ndalumba kapati.”