Zintu Ziyandika Kapati Amuzibikke Ambele
1 Nzintu nzi zipati zimwi iziyandika kapati kutegwa katuciya ambele munzila yakumuuya? Zintu eezi zijatikizya kulibalila, kujanika kumiswaangano, kupaila lyoonse, kuyanzanaa bantu balikabotu, alimwi akucita mulimo wa Bunakristo wakukambauka. Tatukonzyi kuyaambele munzila yakumuuya kuti naa tatubikki ambele zintu zipati mubuumi bwesu.
2 Toonse tujisi nkondo yakulwana zisusi zyakumubili, elyo tuyandika kulyeendelezya. (Gal. 5:17) Kutabi notuyeeya kuti tulajana mpindu mukucita zintu nzyotuyanda. (Jer. 17:9) Aboobo, kutegwa tukwabilile myoyo yesu akutalicenga, kulilingula lyoonse kulayandika kapati.—Tus. 4:23; 2 Kor. 13:5.
3 Amulingule Moyo Wanu Nobeni: Inga mwacita obo kwiinda mukulibuzya mibuzyo yaantangalala yakuti: Sena ndilayanda kubala Jwi lya Leza? (1 Pet. 2:2) Sena ndilibwene mbokuyandika kujanika kumiswaangano yoonse? (Heb. 10:24, 25) Sena ndilapaila lyoonse? (Rom. 12:12) Sena ndiyanzanaa bantu bayanda zintu zyakumuuya? (Rom. 1:11, 12) Sena ndilizi kuti ndeelede kukambauka makani mabotu? (1 Kor. 9:16) Ikuti naa mulakonzya kuyiingula cakuzuminizya mibuzyo eyi, citondezya kuti mulayanda kubikka zintu zipati kumbele.
4 Amulange Milimo Yanu Yabuzuba-Abuzuba: Kunze lyakulingula moyo wanu ikubona nzyouyanda, muyandika kubona zintu zyeelede kusaanguna kucitwa. Eeci cijatikizya kujana ciindi cakubala Bbaibbele lyoonse alimwi amamagazini oonse aatambulwa mwezi amwezi aa Ngazi Yamulindizi a Awake!, alimwi akujana ciindi cakulibambila miswaangano. Alimwi kulayandika kujana ciindi cakuti kamwiiya antoomwe amukwasyi alimwi akupaila antoomwe. Lyoonse mutanoonga nkweebela TV, kukutauka akkompyuta, kuswiilila wailesi naa kusobana buyo. Amuzumanane kujanika kumiswaangano yoonse, zyoonse zintu zicitwa zitasinkili miswaangano. Nsondo ansondo kamulibambila nzila yakugwasya mukwasyi woonse kutola lubazu mumulimo wamumuunda.
5 Cakutadooneka, kubikka zintu zipati ambele mubukkale bwesu kulatuletela lukkomano.