Makanzeesu—Ikupona Munzila Njayanda Jehova
1 Icintu cimwi cipati kujatikizya Miswaangano ya “Kupona Munzila Njayanda Leza” akali makanze aakazuminwa mumakani aamamanino. Akatalika akwaambilizya kwakuti: “Swebo . . . tulazumina camoyo woonse kuti kupona mbwayanda Leza nenzila yabukkale iyiinda zyoonse kubota.” Amuyeeye twaambo tupati-pati twamakanze ayo ntotwakaingula kuti, “INZYA!”
2 Mmakanzeesu aakuti tuzumanane katusalala kuli Jehova, katutajisi kabala nokaba komwe kanyika. Tulazumanana kusaanguna kucita kuyanda kwa Leza mubukkale bwesu. Akaambo kakubelesya Jwi lyakwe Bbaibbele kuti kalitusololela, tatukooleya kulumwensi naa kululyo, munzila eyi tulasinizya kuti kupona munzila njayanda Leza ncibotu kapati kwiinda kupona bukkale bwanyika.
3 Ibantu banyika tabayandi kupona munzila njayanda Leza, elyo balinjizya mumapenzi. (Jer. 10:23) Aboobo atuzumanane kuyiisigwaa Mwiiyi Mupati Jehova iwaamba kuti: “Njeeyi inzila, amweende mulinjiyo.” (Is. 30:21) Ikupona munzila njayanda Jehova kweelana abwaamba Magwalo cilagwasya munzila zyoonse. Ikutegwa tutobele nzila eyo, tweelede kutobela zintu zyoonse Jehova nzyatuyiisya.
4 Ipulogilamu ya Jehova Yalwiiyo Lubotu Kwiinda: Jehova utuyiisya mpindu iini-ini yabuumi alimwi ambotunga twakkala munzila iigwasya kapati. Utuyiisya mbotunga twapona kabotu munzila iijatikizya mizeezo, bukkale alimwi akumuuya. Utuyiisya mbokukkalwa muluumuno abakwesu, abamukwasyi alimwi abantuma. Ulacita oobo kwiinda mubbuku lyakwe Bbaibbele alimwi amumbunga yakwe.
5 Aboobo miswaangano yesu yambungano ilayandika kapati. Twanoojanika alimwi akutola lubazu mumiswaangano iili yosanwe yoonse, tunoopegwa lwiiyo lunji mumulimo wesu wabulanda bwamakani mabotu alimwi alwiiyo lweelede mubukkale bwa Bunakristo. (2 Tim. 3:16, 17) Mwiiyi wesu Mupati alimwi ulatuyiisya kwiinda mumiswaangano mipati aminiini. Makanzeesu ayelede kubaa kutalovwa kumuswaangano nouba omwe naa cibeela camuswaangano kufwumbwa kuti katuli kabotu alimwi kakunyina penzi litukasya kujanika.
6 Atusungwaale alimwi tuzumanane kupona munzila njayanda Leza akumbele aamazuba kutegwa atembaulwe Jehova alimwi tugwasigwe kukabe kutamani!—Is. 48:17.