Tulayiisigwaa Jehova
1 Ipulogilamu yalwiiyo yamunyika yoonse iisololelwaa Leza ilacitwa lino mumasi aali 233. Taakwe cikonzya kweelanisigwaa njiyo cinga cajanwa munyika ino. Kunze lyakutuyiisya kutegwa tukajane buumi butamani, Mwiiyi wesu Mupati Jehova ulatuyiisya ambotunga twagwasigwa lino.—Is. 30:20; 48:17.
2 Izikolo Zyalwiiyo lwa Leza: Amulange zikolo izili mukugwasya bantu ba Jehova sunu. Icikolo Camulimo Wateokrasi icicitwa nsondo ansondo mumbungano zili 87,000, ciyiisya tuulunzuma twabasikumwaya ba Bwami kutegwa bacizibe kabotu kuyiisya makani mabotu. Sena mwakalilembya mucikolo eci? Sena muli akati kazyuulu-zyuulu zyabaabo bakajanika ku Cikolo Camulimo Cabapainiya icakacitwa kwansondo zyobile? Ambweni lino mbwaanga akacesegwa mawoola aayandika abapainiya baciindi coonse, ibanji balakonzya kucita bupainiya akweelela kujanika kucikolo eci. Icikolo Cakwiiya Mulimo icitola myezi yobile icicitwa lino mumyaambo mipati yanyika yoonse mbwiizulwa cili mukugwasya baalu batakwete abakutausi kweelela kuyumuna mikuli mipati yateokrasi. Ciindi aciindi baalu abakutausi balatambula lwiiyo lwaalubazu kwiinda mu Cikolo Camulimo Wabwami.
3 Imaanda a Watchtower Educational Center ku Patterson mu New York momuli zikolo zyotatwe zyaalubazu zyakucitya lwiiyo lwaatala lwateokrasi. Ilwiiyo lutola myezi yosanwe ilucitwaa Watchtower Bible School of Gilead lugwasya balanda kulibambila mulimo wabumisyinali mumasi aambi. Aabo bali mu Kkomitii ya Mutabi ibazwa munyika yoonse mbwiizulwa balaitwa kulwiiyo lwamyezi yobile lujatikizya mbokweendelezegwa mutabi. Mu May 1999 kwakatalisigwa lwiiyo lwamyezi yobile lwabalangizi beendeenda. Basicikolo ibasika ku 48 ibazwa ku United States alimwi a Canada bakaitwa mucikolo eci. Kumamanino, ibabelesi ba Jehova boonse balagwasigwa kulwiiyo Jehova ndwapa kwiinda muzikolo ezi zyaandeene-andeene.
4 Kuyiisigwa Amuzeezo nzi? Umwi Wakabunga Keendelezya wakati: “Ilwiiyo lwesu lwasunu ndwakugwasya bantu ba Jehova boonse koonse-koonse kuti basime akuba aciimo cibotu icaambwa ku Tusimpi 1:1-4.” Jehova azumanane kupa umwi aumwi wandiswe “lulimi lwabaiyide.”—Is. 50:4.