Amucite Zibotu Akugwasyanya
1 Dorika “wakalizywide milimo mibotu, aluzyalo.” (Inc. 9:36, 39) Muuya wakwe wabwaabi wakapa kuti ayandwe abantu bakalimuzyi alimwi a Jehova Leza. Bahibulu 13:16, mu Cizuminano Cipya yaamba kuti: “Mutalubi kucita zibotu akugwasyanya, nkaambo eezi nzezipaizyo zibotezya Leza.” Mbuti mbotunga twacita zibotu akugwasya bamwi mazubaano?
2 Nzila imwi motunga twagwasya bamwi nkwiinda mukubaabila ‘mbono zyesu.’ (Tus. 3:9) Kusanga kwesu kumulimo wanyika yoonse kupa kuti cikonzyeke kuyaka Maanda aa Bwami, Maanda Aamiswaangano Mipati alimwi amitabi nyika yoonse mbwiizulwa. Ibwaabi bwesu bwapa kuti tuulunzuma twabantu tugwasyigwe anjiisyo zizwa kuli Leza akuyanzana kwakumuuya kuyaka.
3 Kuumbulizya Akugwasya: Ciindi nokucitika ntenda, bantu ba Jehova balilibambide kucitila “milimo mibotu” basyominyina alimwi abaabo batali balusyomo lwesu. (Gal. 6:10) Nokwakabboloka cintu cimwi mufakitale ipanga misamu ku France, banabukwetene ibakali kukkala munsi-munsi afakitale eeyi bakaamba kuti: “Bakwesu Banakristo bakafwambaana kuboola kuzootugwasya kusalazya ŋanda yesu amaanda aabantu bamwi aakali muŋanda mpati eeyo. Basimukoboma bakagambwa kapati nobakabona bantu banji ibakaboola kuzikugwasya.” Mucizyi umwi wakayungizya kwaamba kuti: “Baalu bakaboola kuzikutugwasya. Bakatukulwaizya. Mubwini, eeci ncencico ncotwakali kuyanda, kwiinda kupegwa zintu zyakumubili.”
4 Nokuba kuti kuli nzila zinji mbotunga twacita zibotu kuli basimukoboma, nzila iinda kugwasya mbotunga twacita boobo nkwaabila luzyibo luyandika kapati lwakasimpe kajatikizya ‘bulangizi bwabuumi butamani’ mbwaakasyomezya Jehova. (Tit. 1:1, 2) Mulumbe wamu Bbaibbele ulapa luumbulizyo lwini-lwini kuli baabo ibalila akaambo kabukkale bwamunyika alimwi akaambo kakuti mbasizibi. (Mt. 5:4) Atucite zibotu akugwasya bamwi ikuti katucikonzya kucita oobo.—Tus. 3:27.