Ino Bantu Baiya Nzi Nobalangilila Bukkale Bwenu?
1. Ino ncinzi basikwiiya ba Jesu ncobakaiya nobakali kulangilila nzyaakali kucita?
1 Jesu wakaamba kuti: “Amulikulike ijokwe lyangu, mwiiye kwangu.” (Mt. 11:29) Cilisalede kuti Jesu wakali kuyiisya bantu kwiinda mukupa citondezyo cibotu, ikutali buyo mumajwi. Amuyeeye zyintu nzyobakaiya basikwiiya bakwe nobakali kulangilila nzyaakali kucita alimwi ambwaakali kuzicita. Wakali mutete moyo, siluzyalo alimwi siluyando. (Mt. 8:1-3; Mk. 6:30-34) Wakali kulibombya ncobeni. (Joh. 13:2-5) Nobakali kubeleka a Jesu mumulimo wakukambauka, basikwiiya bakwe bakabona mbwaakali muyumu ambwaakali muntu uucizyi kuyiisya bantu kasimpe. (Lk. 8:1; 21:37, 38) Ino ncinzi bamwi ncobaiya kulindiswe, nobalangilila mbotukambauka?
2. Ino mbotulilemeka ambotulibonya ciindi notuli mubukambausi zibajatikizya buti bantu mbotukambaukila?
2 Bamukamwini Ŋanda: Bamukamwini ŋanda balakulwaizigwa kapati nobabona nsamino yesu mbotu alimwi akubona mbotubabikkila maano bantu. (2 Kor. 6:3; Flp. 1:27) Balabona kuti lyoonse tubelesya Bbaibbele. Bamwi balakkomana nobabona kuti tulaswiilila cabulemu ciindi nobaambaula. Lyoonse kamuyeeya kuti ikupa cikozyanyo cibotu mumbazu eezyi kulakonzya kukulwaizya bantu kuutambula mulumbe wa Bwami.
3. Ino mbuti mbotukonzya kubakulwaizya bakwesu abacizyi?
3 Bakwesu: Alimwi, amuyeeye bukkale bwesu mbobukonzya kubakulwaizya bakwesu abacizyi. Ikuti katuli basungu mumulimo wamumuunda, abalo balakonzya kuba basungu. Mbuli lubulo mbolunona naa kukwenga lubulonyina, ciindi notubelesya nzila nzyotwalibambila mumulimo wamumuunda, ibamwi mbotubeleka limwi balakonzya kukulwaizigwa kuti abalo kabalibambila kabotu. (Tus. 27:17) Ikuba basungu mukulemba mazyina aabaabo ibatondezya luyandisisyo alimwi akupanga nyendo zyakupilukila kuli mbabo cilakonzya kukulwaizya bamwi kuti abalo kabacita oobo. Tulakonzya kubakulwaizya bakwesu abacizyi kwiinda mukukondezesya naa kuzuzikizya mulimo ngotupedwe.—2 Tim. 4:5.
4. Ino nkaambo nzi ncotweelede kulingula bukkale bwesu ciindi aciindi?
4 Ciindi aciindi, mulakonzya kulilingula kutegwa mubone mbuli micito alimwi aŋambawido yenu mbozibajatikizya bamwi. Jehova ulakkomana ciindi notupa citondezyo cibotu alimwi tulakonzya kulimvwa mbuli mbwaakalimvwa mwaapostolo Paulo naakaamba kuti: “Amwiiye ndime, mbubonya mbuli ambebo mbundaiya Kristo.”—1 Kor. 11:1.