Amubelesye Matulakiti Mukumwaya Makani Mabotu
1. Ino matulakiti abelesyegwa buti abantu ba Leza?
1 Matulakiti aamba zyamu Bbaibbele abelesyegwa abantu ba Jehova kwaciindi cilamfwu kumwaya mulumbe mubotu. Mu 1880, ba C. T. Russell abeenzyinyina bakatalika kusimba matulakiti aayo aakapegwa kuli basikubala ba Ngazi Yamulindizi kutegwa baabile kubuleya. Matulakiti akali kuyandika kapati cakuti mu 1884 ciindi ba C. T. Russell nibakalembya mbunga yamumulawo iitapangi mpindu akaambo kakuyanda kutola ambele mulimo wa Bwami, ibbala lyakuti “tract” lyakabikkilizyigwa muzyina lyakuti, Zion’s Watch Tower Tract Society, lino lyaambwa kuti Watch Tower Bible and Tract Society of Pennsylvania. Kuzoosika mu 1918, matulakiti aainda ku 300 miliyoni akaabilwa aba Sikwiiya Bbaibbele. Matulakiti azumanana kuba cibelesyo cigwasya kapati.
2. Nkaambo nzi matulakiti ncaagwasya kapati?
2 Nkaambo Nzi Matulakiti Ncaagwasya Kapati?: Matulakiti aboneka kabotu. Mulumbe mufwaafwi uujanika mumo ulakwelelezya akugwasya bantu kuba aluzyibo. Akkomanisya bamukamwini ŋanda aabo bajisi butolo bwakubala magazini naa bbuku. Matulakiti taakatazyi kwaabila, nobaba basikumwaya bapya alimwi abana balakonzya kwaabila. Kuyungizya waawo, matulakiti taakatazyi kunyamuna nkaambo masyoonto-syoonto.
3. Amwaambe cakuluula ncomujisi naa icakamwaigwa citondezya matulakiti mbwaagwasya.
3 Bantu banji balasaanguna kwiiya kasimpe kwiinda mutulakiti. Mucikozyanyo, umwi mukaintu waku Haiti wakabona tulakiti yesu imwi mumugwagwa. Wakaibweza akwiibala amane wakaamba kuti: “Ndajana kasimpe!” Mukuyakwaciindi, wakaunka ku Ŋanda ya Bwami akutalika kwiiya Bbaibbele mane wakabbapatizyigwa—zyoonse eezyi zyakacitika akaambo kanguzu zya Jwi lya Leza zijanwa mukatulakiti.
4. Ino nimbaakani nzi njotujisi ciindi notwaabila matulakiti mumwezi?
4 Kuŋanda Aŋanda: Mbokunga matulakiti ncibelesyo cigwasya kapati mukupa bumboni, anooli cakwaabila mumwezi ciindi aciindi kutalikila mu November. Mbaakani yesu taili yakupa buyo tulakiti kuli mukamwini ŋanda kufwumbwa aizumina pele kubelesya tulakiti kutalisya mubandi. Ikuti mukamwiniŋanda watondezya luyandisisyo mulweendo lwakusaanguna naa mulweendo lwakupilukila, tulakonzya kutondezya mbocicitwa ciiyo ca Bbaibbele kwiinda mukubelesya bbuku lyakuti Bbaibbele Ncoliyiisya naa bbuku limbi libelesyegwa kucita ciiyo. Ino inga twaabila buti matulakiti mubukambausi bwakuŋanda aŋanda? Matulakiti aliindene-indene, aboobo tweelede kwaazyiba kabotu aayo ngotwaabila.
5. Mbuti mbotukonzya kwaabila matulakiti mubukambausi bwakuŋanda aŋanda?
5 Inzila nzyotubelesya zyeelede kuti kazyeelela mucilawo eeco alimwi amatulakiti ngotubelesya. Tulakonzya kutalisya mubandi kwiinda mukumupa tulakiti mukamwiniŋanda. Mboiboneka kabotu mpoili atala cilakonzya kumupa kuti aikkomanine. Ambweni tulakonzya kumutondezya matulakiti manji kutegwa alisalile njayanda. Twanoobelekela mucilawo oomo bantu mobatayandi kujalula mulyango waŋanda yabo, tulakonzya kujata tulakiti munzila iinga yagwasya mukamwiniŋanda kwiibona mpoili atala, naa kwaatonkela ansi aamulyango waŋanda akuzoomvwa mbobalimvwa ciindi ciboola. Kuti mutwe watulakiti kauli mubuzyo, tulakonzya kumulomba kwaamba mbwayeeya kujatikizya mubuzyo ooyo. Ambweni inga twalipangila mubuzyo uutipe kuti abe aluyandisyo alimwi akuti tutalisye mubandi. Mpoonya tulakozya kubala cibeela cazili mutulakiti amukamwini ŋanda akubuzya mibuzyo iili mucibalo akumulomba kuti aambe mbwayeeya. Magwalo aajisi twaambo tupati-pati alakonzya kubalwa kuzwa mu Bbaibbele. Twamana kubandika cibeela cimwi; inga twamanizya mubandi akupanga bubambe bwakuti tukapilukile. Kuti mbungano kaizyibide kusiya mabbuku mumaanda mobatajaniki bantu, tulakonzya kumusiila katulakiti mukamwiniŋanda abusena mpobatakonzyi kukabona basimweenda nzila ikuti naa tiitwamujana.
6. Ino matulakiti inga abelesyegwa buti mubukambausi bwamumugwagwa?
6 Bukambausi Bwamumugwagwa: Sena kuli nomwakabelesyede matulakiti mubukambausi bwamumugwagwa? Basimweenda nzila bamwi inga balibindide alimwi tabayandi kwiima kuti tubandike ambabo. Cilakonzya kutukatazya kuzyiba naa balijisi luyandisisyo. Muciindi cakubapa mamagazini mapya kakunyina kuzyiba naa bayakwaabala, inga cainda kugwasya kuti twabapa tulakiti. Akaambo kakuti mpoili atala iboneka kabotu alimwi akuti mulumbe uulimumo mufwaafwi cilakonzya kubakulwaizya bantu kwiibala tulakiti ciindi nobabindide. Masimpe, ikuti kabatabindide, tulakonzya kubandika zibeela zimwi zili mutulakiti ambabo.
7. Amwaambe zyakuluula zitondezya mbotukonzya kubelesya matulakiti ciindi notucita bukambausi bwamukwiizya.
7 Bukambausi Bwamukwiizya: Ncuubauba kucita bukambausi bwamukwiizya kwiinda mukubelesya matulakiti. Mukwesu umwi lyoonse ulabwezelezya matulakiti masyoonto azwa aŋanda. Aswaanganya muntu, mbuli uusambala mucintoolo, umwaambila buyo kuti ndiyanda kumupa cakubala mpoonya wamupa katulakiti. Ciindi banabukwetene bamwi nibakaunka kudolopo kuyakweendeenda, bakayeeya kuti bakali kuyooswaanganya abantu bazwa muzisi zisiyene-siyene. Aboobo, bakabwezelezya akabbuku kakuti Nations alimwi amatulakiti aamumyaambo iindene-indene. Mpoonya bamvwa muntu uusambala munzila kaambaula mwaambo uumbi naa uukkede munsi lyabo mubusena bwakusobanina naa muŋanda mobasambalila zyakulya, bakali kumwaabila tulakiti mumwaambo wakwe.
8. Ino muunzila nzi matulakiti mbwaali mbuli mbuto?
8 “Byala Imbuto Zyako”: Matulakiti alakonzya kukozyanisyigwa kumbuto. Mulimi ulaminza mbuto zinji nkaambo tazyi zikonzya kumena akukomena. Lugwalo lwa Mukambausi 11:6 lwaamba kuti: “Cifumofumo byala imbuto zyako, aciindi cagoko utalesyi maanza aako, nkaambo tozi na nzizili zisi kule akati kazyo, na zyoonse zyobile zilaba kabotu.” Aboobo, atuzumanane ‘kumwayaula luzibo’ kwiinda mukubelesya cibelesyo eeci cibeleka kabotu.—Tus. 15:7.
[Majwi aakwelelezya sikubala aali apeeji 3]
Mbokunga matulakiti ncibelesyo cigwasya kapati mukupa bumboni, anooli cakwaabila mumwezi ciindi aciindi kutalikila mu November