Kuyungizya Luzyibo Lwesu Mumulimo Wakukambauka—Kwiingula Bantu Bakonzya Kusinkilizya Mubandi

Ikaambo Ncociyandika: Amweezyeezye kuti mulizyi kuti kuyanda kucitika ntenda iilicitikila. Bantu balakonzya kufwa kuti tiibatijila kubusena nkobakonzya kukwabililwa. Mpoonya mwaunka kuŋanda yasimukobonyoko kuti mumucenjezye, pele walo wamwiingula kuti ujisi bubi. Masimpe, inga tiimwacileka mpoonya-mpoonya kusoleka kumugwasya! Bantu banji mucilawo cesu tabatutambuli akaambo kakuti tabazyi kuti mulumbe wesu ulakonzya kupa kuti bafwutuke. Ciindi notwabaswaya, ambweni balakonzya kabajisi bubi ncobeni. (Mt. 24:37-39) Alimwi ambweni balakonzya kuba atwaambo twakubeja ntobakamvwa kujatikizya ndiswe. (Mt. 11:18, 19) Balakonzya kuyeeya kuti tatwiindene azikombelo izijisi micelo mibi. (2 Pe. 2:1, 2) Ikuti mukamwini ŋanda tanaatondezya luyandisisyo ciindi cakusaanguna, tatweelede kufwambaana kutyompwa.

Mbotukonzya Kucita Oobo:

Kamutanaunka mumulimo wakuŋanda aŋanda, amujane ciindi cisyoonto cakuyeeya nzyobakonzya kwaamba bantu basinkilizya mubandi alimwi ambomukonzya kubaingula.
Ikuti mukamwini ŋanda wakakazya kaambo kamwi, mubuteteete amusoleke kuzumanana amubandi. Ambweni mulakonzya kucita oobo kwiinda mukumulumba. Mucikozyanyo, naa waamba kuti ulijisi cikombelo nkwakomba, mulakonzya kwaamba kuti, “Ndalikulombozya kujana muntu uuli mbuli ndinywe uukkomanina zintu zyakumuuya.” Zimwi ziindi, ikutondezya kuti mulabikkila maano kujatikizya mbwalimvwa mukamwini ŋanda naa bukkale bwakwe ciyakumugwasya kuzumanana kupa bumboni. Mucikozyanyo, naa waamba kuti ujisi bubi, mulakonzya kwaamba kuti: “Masimpe, pele kanditanaunka, kuli ncendiyanda kumupa.” Nzila imwi nkumubuzya mubuzyo mukamwini ŋanda ikuti naa waamba kuti ujisi cikombelo nkwakomba. Mulakonzya kwaamba kuti, “Ndalikulombozya kujana muntu uuli mbuli ndinywe uukkomanina zintu zyakumuuya. Ino mulimvwa buti kujatikizya cisyomezyo cili mu Bbaibbele cakuti Leza uyoogwisya bubi boonse akupa kuti nyika eeyi kainookkalwa buyo abantu bayanda bululami? Sena cilamukkomanisya eeci?”
Amubelesye bupampu. Kamuyeeya kuti Jehova tabasinikizyi bantu kumuswiilila. (Dt. 30:19) Umwi aumwi weelede kunyamuna mukuli wakumuuya uumugeme. (Gal. 6:5) Ikuti naa mukamwini ŋanda watondezya kuti tayandi naaceya, inga cabota kumusiya buyo. Kwiinda mukutondezya bulemu kujatikizya makani ngaamba, tulakonzya kupa kuti sikumwaya uumbi akacikonzye kupa bumboni kumbele.—1 Pe. 3:15.

Amusole Kucita Eeci Mwezi Uuno:

Ikuti mwajana mukamwini ŋanda iwasinkilizya mubandi, mwazwa aŋanda yakwe, amubandike asikumwaya ngomubeleka limwi nzila mbotu njomwali kukonzya kubelesya mukumwiingula.