Kubelesya Makani Ngomupedwe

IBBAIBBELE likozyanisya mbungano ya Bunakristo kumubili wamuntu. Cizyo acimwi cilayandika, pele ‘zizyo zyoonse tazijisi mulimo omwe.’ Kweelana aceeci, tweelede kucita mulimo uuli woonse ngotupedwe. Eeci caamba kuti tweelede kumvwisya akulibambila kabotu kufwumbwa makani, ikutali kuubya-ubya twaambo tuyandika akaambo kakuyeeya kuti twaambo tumwi tulakonzya kwiinda kukondelezya. (Rom. 12:4-8) Ibaciinga camuzike musyomesi uucenjede bali amukuli wakutupa cakulya cakumuuya “kuciindi ceelede.” (Mt. 24:45) Notubelesya busongo mbotujisi ikulibambila makani kweelana amalailile ngotwapegwa, tupa bulemu kububambe oobo. Eeci cipa kuti zintu kazyeenda kabotu mumbungano.

Izyeelede Kubikkilizyigwa. Nomwapegwa makani mucikolo, amubone kuti mwalibambila makani aayo ikutali ambi. Muziindi zinji kuyoopegwa mabbuku aagaminide mujanika makani. Ikuti tiimwaambilwa twaambo tusimbidwe ntomweelede kubelesya mumakani aanu, mulakonzya kuliyandauda twaambo. Nokuba boobo, nomulibambila makani amubone kuti imakani aanu oonse aleendelana amutwe ngomwapegwa. Nomulanga nzyomweelede kubikkilizya, muyooyandika akubabikkila maano baswiilizi.

Amwaabale camoyo omwe makani ngomwapegwa akwaalanga-langa magwalo aali mumo. Mwamana amubone mbomunga mwaabelesya kabotu ikutegwa bagwasyigwe baswiilizi. Amusale twaambo tobilo naa totatwe kuzwa mutwaambo tusimbidwe tube ntotwaambo tupati-pati twamakani aanu. Mbubwenya buyo, kuzwa mutwaambo ntomupedwe amusale magwalo ngomuyanda kuyoobala akubandika.

Ino manji buti makani ngomweelede kulibambila? Alikke aayo ngomukonzya kukanana kabotu. Mutaubyi-ubyi kuyiisya kwanu kwiinda mukubikkilizya makani manji. Ikuti twaambo tumwi katuteendelani amakanze ngomujisi mumakani aanu, amubikkile maano kuzibeela ziyoomugwasya kuzuzikizya makanze aayo. Kuzwa mumakani ngomupedwe, amubelesye twaambo ntobakonzya kubelesya alimwi tuyoobagwasya kapati baswiilizi. Makanze aanu mukaambo aaka kalulayo lwakukanana, taali aakubona nzyomukonzya kwaamba, pele ngakubelesya twaambo ntomwapegwa kutegwa mulibambile makani.

Makani aanu taabambilidwe kwiile kwaamba twaambo mubufwaafwi ntomwapegwa. Mweelede kulibambila kuyoopandulula twaambo tumwi, akutusalazya, kupa cikozyanyo ambweni akutondezya mbotukonzya kubelesyegwa. Itwaambo atumwi tweelede kubelesyegwa mukupandulula twaambo tuyandika kapati tuli mutwaambo ntomwapegwa ikutali kutubikka ambali akuleta tumbi.

Ibakwesu bali azyeelelo ziyandika mukuba baiyi, mukuya kwaciindi balakonzya kulombwa ikupa malailile lya Muswaangano Wamulimo. Balizyi mbociyandika ikubelesya kabotu twaambo tupedwe muciindi cakubelesya tumbi. Ncimwi buyo, ibakwesu bakanana makani aabuleya balapegwa pepa lyamakani lyakutobela. Mapepa aaya alakonzya kubelesyegwa kweelana ambwayanda muntu, pele alijisi twaambo tupati-pati tweelede kupandululwa, twaambo tupa bumboni amagwalo aawo ayeeme makani. Ikucizyiba mbokubelesyegwa twaambo ntomupedwe ncintu ciyandika kapati mukulibambila makani aali oonse.

Lwiiyo oolu lulakonzya kumugwasya amukweendelezya ziiyo zya Bbaibbele zyaaŋanda. Luyoomugwasya kubikkila maano kutwaambo tuyiigwa ikutali kuzwa kukaambo nkomubandika akutalika kukankaizya zintu zimbi eezyo zikondelezya pele zitagwasyi mukumvwisya kaambo kabandikwa. Pele ikuti mwakamvwisya kaambo kali muciiyo eeci, tamukabi bantu bayuminina kukaambo kayiigwa cakuti tamukonzyi kubikkilizya amakani amwi ngayanda kuzyiba sikwiiya.