Sena ‘Mulaapobwe Lyoonse’?

INO majwi aaya apandulula nzi? Apandulula mizeezo alimwi ambwalimvwa muntu. ‘Muntu uupengede’ uyeeya kapati zyintu zitali kabotu calo cipa kuti mazuba aakwe ‘kaakatazya’ naa kaatakkomanisyi. Mukwiimpana, muntu “uukondwa mumoyo” ulasola kuyeeya zyintu zili kabotu, ibube bumupa lukkomano alimwi akuba ‘aapobwe lyoonse.’

Toonse tulijisi mapenzi aakonzya kutupa kubula lukkomano. Aboobo, tulakonzya kucita zyintu zimwi zinga zyatupa kukkomana nomuba muziindi zikatazya. Amubone ncolyaamba Bbaibbele.

• Mutanoolekeli kulibilika zyajuunza kumumanina lukkomano. Jesu Kristo wakaamba kuti: “Mutani kulibiliki zyabuzuba butobela, nkaambo buzuba butobela bunooli azyakulibilika zyambubo. Buzuba buli boonse bulijisi mapenzi aambubo.”—Matayo 6:34.

• Amusole kubikkila maano kuzyintu zibotu zyakamucitikila. Aboobo, ciindi nomwatyompwa, inga cagwasya kulemba mulongo wazyintu eezyo zibotu zyakamupa kukkomana akuzinzibala kuyeeya aali nzizyo. Alimwi tamweelede kubikkila kapati maano kukulubizya nkomwakacita naa zyintu zibyaabi zyakamucitikila. Amwiiye kuzwa kuzyintu eezyo alimwi akuzumanana kukkomana. Mweelede kwiiya cikozyanyo canamutekenya uubelesya gilazi lyakumbele kulanga zyintu zicitika musyule pele tabikkili kapati maano kuzyintu eezyo. Alimwi kamuyeeya kuti, ‘Leza ulalekelela ncobeni.’—Intembauzyo 130:4.

• Ciindi nomwausa akaambo kamapenzi, amwaambile muntu uukonzya kumuyumya-yumya. Lugwalo lwa Tusimpi 12:25 lwaamba kuti: “Buusu” bulakonzya kupa moyo ‘kulemenwa, pele ijwi ibbotu lilamusekelezya.’ Eelyo “ijwi bbotu” lilakonzya kuzwa kumusazima naa kumulongwe uutubikkila maano alimwi ‘uutuyandisya kuziindi zyoonse.’—Tusimpi 17:17.

Majwi aabusongo aajanika mu Bbaibbele akabagwasya bamwi kujana lukkomano mubuumi, nomuba muziindi zikatazya. Tusyoma kuti andinywe majwi aaya ayoomugwasya.