Kumana Mazwanga Mumakani Aajatikizya Makwebo

Kweelana ambokulembedwe kulugwalo lwa 1 Bakorinto 6:1-8, mwaapostolo Paulo wakaamba zyabasyomi ibakali kutolana kunkuta. Wakatyompwa naakamvwa kuti Banakristo bamwi baku Korinto bakali kutola milandu “kunkuta kubantu bataluleme.” (Kapango 1) Paulo wakaamba twaambo tumvwika Banakristo ncobeelede kutubambila mumbungano twaambo muciindi cakutolana kunkuta. Atulange-lange twaambo tumwi ncolwakapedwa lulayo oolu ilwakasololelwa amuuya, alimwi akubona bukkale bumwi butabikkilizyidwe mumalailile aaya.

Ikuti naa twakatazyanya amusyomima mumakwebo, cakusaanguna tweelede kujana nzila mbotukonzya kulimana penzi eelyo kwiinda mukusaanguna kutobela lulayo lwa Jehova ikutali kweelana ambotuyeeya. (Tusimpi 14:12) Mbuli mbwaakaamba Jesu, cilainda kubota ikufwambaana kwaamana mazwanga kaatanakomena. (Matayo 5:23-26) Pele cilausisya kuti Banakristo bamwi balazumanana kucita nkazi mane akutolana kunkuta. Paulo wakaamba kuti: “Eeci ncomutolana kunkuta caamba kuti mwazundwa kale cakumaninina.” Nkaambo nzi? Kaambo kapati nkakuti eeci cilakonzya kuleta mpuwo mbi kumbungano akusampaula Leza ngotukomba. Aboobo, tweelede kukkala ansi kuyeeya mubuzyo ngwaakabuzya Paulo wakuti: “Nkaambo nzi ncomutalekeli buyo kuti nywebo lwanu muuninwe?”—Kapango 7.

Paulo alimwi wakaamba kuti mumbungano kuli bubambe bubotu mbwaakabikka Leza ibukonzya kutugwasya kumana mazwanga aaindene-indene. Baalu Banakristo mbaalumi basongo akaambo kaluzyibo lwamu Magwalo ndobajisi, aboobo Paulo wakaamba kuti balakonzya “kubeteka makani akati kababunyina” caboola kumakani “aamubuumi oobu.” (Kapango 3-5) Jesu wakatondezya kuti mazwanga aajatikizya twaambo tupati, mbuli tooto tujatikizya kubejekezya abumpelenge, ayelede kumanizyigwa kwiinda mukutobela nzila zyotatwe: yakusaanguna, aabo bajisi kaambo beelede kubandika naa koombolozyanya mulicabo; yabili, ikuti naa nzila yakusaanguna tiiyabeleka, balakonzya kwiita muntu omwe naa bobilo kuti babe bakamboni; yatatu, ikuti ntaamu yabili tiiyagwasya, balakonzya kutola kaambo aako kumbungano yiimininwa abaalu.—Matayo 18:15-17.

Mubwini, baalu Banakristo tabali basimilawo naa basimakwebo alimwi mulimo wabo tauli wakuyiisya milawo yamfwulumende naa yamakwebo. Tababikkili babunyina milawo yaamba mbobeelede kumana mazwanga mumakwebo. Muciindi caboobo, balasola kubagwasya boonse bajatikizyidwe mukaambo ikubona mbobanga babelesya Magwalo kutegwa bamane penzi lyabo muluumuno. Ikuti twaambo twabakomenena, balakonzya kubuzya mulangizi wabbazu naa kubuzya kuofesi yamutabi ya Bakamboni ba Jehova. Nokuba boobo, kuli bukkale butabikkilizyidwe mululayo ndwaakapa Paulo. Ino mbukkale nzi bumwi?

Zimwi ziindi, muntu inga wayandika kuunka kunkuta kutegwa akagwasyigwe mukaambo kamwi naa kutobela mulawo wamfwulumende katajisi makanze aakubusya mazwanga alimwi katajisi muuya wabusyaacivwulemwangu. Mucikozyanyo, ikuunka kunkuta inga kaili njenzila ilikke iiyandika kuti bantu balekane mumulawo wamfwulumende, kuti kuzyibwe naa nguni akati kabo weelede kubweza mwana naa bana, ikutegwa kuzyibwe mali mulumi naa mukaintu ngayelede kunakupa yooyo ngobalekana limwi, ikutegwa muntu apegwe mali kukkampani iibbadala zintu zinyonyooka (Insurance), kuti muntu atondezye kuti ngumwi wabaabo beelede kujosyelwa mali ikuti kkampani yawa, alimwi akutondezya kuti cipepa caamba bwaapauzi bwalubono lwamufwu ncamasimpe. Zimwi ziindi, kutegwa alikwabilile, mukwesu ulakonzya kuunka kunkuta akumuula saimoni ooyo wakasaanguna kumuula saimoni.a

Ikuti muntu watola makani aali boobo kunkuta ikutali akaambo kakuti uyanda kuzwangana, takonzyi kwaambwa kuti tatobeli lulayo ndwaakapa Paulo kwiinda mukusololelwa amuuya.b Nokuba boobo, ncayelede kubikkila maano kapati Munakristo nkusalazyigwa kwazina lya Jehova akuti luumuno alukamantano luzumanane mumbungano. Cintu cipati alimwi cakusaanguna cipa bantu kuzyiba basikutobela Kristo nduyando ndobatondezya, alimwi “luyando . . . talubikkili buyo maano kuzintu nzyoluyanda.”—1 Bakorinto 13:4, 5; Johane 13:34, 35.