Zitondezyo Zyacikozyanyo

Kutalisya Ziiyo zya Bbaibbele Mubuzuba bwa Mujibelo Bwakusaanguna mu February

“Muziindi eezyi zikatazya, toonse tulasikilwa mapenzi aapa kuti kube buyumuyumu mumikwasyi. Ino muyeeya kuti nkookuli nkotukonzya kujana lulayo lukonzya kutugwasya kuba aalukkomano mumukwasyi?” [Amulindile bwiinguzi.] Mpoonya amumupe mukamwini ŋanda Ngazi Yamulindizi ya January–March akubandika anguwe twaambo tuli ansi aatutwe twamakani tuli apeeji 16 alimwi a 17 kubikkilizya alugwalo lomwe lubikkidwe. Amwaabile mamagazini, akupangana kuti mukapilukile kuzoobandika mubuzyo aumwi.

Ngazi Yamulindizi January–March

“Bamwi bantu babona mbuli kuti ncolyaamba Bbaibbele kujatikizya makani aakoonana tacicibeleki alimwi taciyandiki kutobela. Bamwi balazumina ncolyaamba Bbaibbele. Ino nywebo muyeeya buti? [Amulindile bwiinguzi.] Amubone lugwalo oolu ncolwaamba kujatikizya yooyo wakabikka zyeelelo zyamu Bbaibbele. [Amubale 2 Timoteyo 3:16.] Magazini eeyi ilatondezya Bbaibbele mboliingula mibuzyo iili kkumi iibuzyigwa-buzyigwa abantu kujatikizya koonana. Alimwi ilapandulula mbozikonzya kutugwasya zyeelelo zyamu Bbaibbele.”

Sinsimuka! January–March

Amwaambe ntenda yakacitika ino-ino njobazyi bantu banji. Mpoonya amubuzye kuti: “Ino muyeeya kuti Leza uzumizyila nzi zyintu zili boobu kucitika? [Amulindile bwiinguzi.] Kweelana ancolyaamba Bbaibbele, Leza ulabafwida lweetelelo bantu aabo bapenga. [Amubale Kulonga 3:7.] Ibbaibbele alimwi lilatwaambila Leza ncazumizyila kupenga alimwi akuti ino-ino uyookugwisya kupenga kukabe kutamani. Magazini eeyi ilapandulula mbwayoocita oobo.”