Abril

¿Titaxtumaw tuku lu tuwa? Max chatum tala xalak congregación kinkatlawaninitan tuku nitlan (Sant. 3:2). O max tiku taʼanaw kʼescuela o tiku taskujaw kinkalikgalhkgamananan xlakata skujnaniyaw Jehová (1 Ped. 4:3, 4). O max tiku xalak kifamiliajkan tlawaputunkgo pi nialh kaʼaw ktamakxtumit o nialh kalichuwinaw tuku kanajlayaw (Mat. 10:35, 36). Komo tuku titaxtumaw lu tuwa max uma nakinkamaxlajwaniyan. Pero tlan liwana nakatsiyaw pi kaxatukawa tuku natitaxtuyaw, Jehová nakinkamaxkiyan liskgalala chu litliwakga xlakata natayaniyaw. Anta kBiblia, Jehová matsokgninalh tuku tuwa titaxtukgolh makgapitsin latamanin chu chuna tlawalh xlakata wi tuku nakatsiniyaw. Komo nakalikgalhtawakgayaw, tlan nakinkamakgoxamixiyan chu nakinkamaxkiyan takgalhkgalhin. Pero ni kajwatiya talakaskin nalikgalhtawakgayaw Biblia, kilimastatkan talakaskin nalakgpali kintalakapastaknikan chu nalakgchan kinakujkan. w21.03 14:1, 2

¿Kaʼakxilhaw latamanin chuna la talhtsi nema katlata xlakata namakikan? Komo chuna, pulaktutu tuku tlan nakitaxtu. Pulana, tlakg xlakaskinka naʼakxilhaw nalichuwinanaw Dios. Xlakata xakatla tachanan ni lhuwa kilhtamaku makgapala, talakaskin lu namalakapaliyaw. Xlipulaktiy, nalipaxuwayaw akxni natlawayaw uma taskujut. Biblia wan: «Latamanin paxuwakgo akxni xlitamakita tachanan» (Is. 9:3). Chu xlipulaktutu, nakaʼakxilhaw latamanin la xasasti kstalaninanin Cristo. Jesús ni lakpuwa pi samaritanos nikxni kstalaninanin xʼamakgo wankgo, chuna la xlakpuwankgo makgapitsi kstalaninanin. Wata kaʼakxilhli la tiku kstalaninanin xlitaxtukgolh. Nachuna kiliʼakxilhatkan latamanin. Apóstol Pablo kinkawilinin lu tlan liʼakxilhtit. Xkatsi tuku xkanajlakgo tiku xkgaxmatnikgo, xʼakgatekgsa tuku xlilakgaputsakgo chu xkaʼakxilha la tiku kstalaninanin Cristo xʼamakgo litaxtukgo. w20.04 8, 9:3, 4

Ni kalakputsananiw chatum lataman, kaliskujwi xlakata nakatsiyaw tuku makgkatsi. Tiku liwana kinkaʼakgatekgsniyan wa Jehová. Wa xlakata kaskiniw pi kakinkamakgtayan naʼakxilhaw la xla kaʼakxilha amakgapitsin chu la nakalimasiyaniyaw talakgalhaman. Nila laksakaw tiku kalakgchan nakalimasiyaniyaw talakgalhaman. Putum natalan kgalhikgo taʼakglhuwit, lhuwa xtaʼakglhuwitkan xtachuna nema titaxtukgolh Jonás, Elías, Agar chu Lot. Max makgapitsin natalan putsakgonit xtaʼakglhuwitkan. Pero kalilakpuwaw, ¿nixlikana pi minit kilhtamaku wi tuku tlawanitaw nema kinkalimininitan taʼakglhuwit? Wa xlakata Jehová kinkawaniyan pi namakgkatsiyaw la makgkatsikgo amakgapitsin (1 Ped. 3:8). Akxni kgalhakgaxmataw, makgtayananaw makxtum natawila kifamiliajkan xaʼespiritual. Kaliskujwi nakalilakgaputsayaw chu nakalakgalhamanaw kinatalankan. w20.04 18, 19:15-17

Jesús kinkawilinin liʼakxilhtit xlakata nakgalhakgaxmataw Jehová. Wa xlakata pulaktum la nakgalhakgaxmataw Jehová wa pi nastalaniyaw xliʼakxilhtit Jesús (Juan 8:29). Xlakata chuntiya nalilatamayaw xaxlikana, kilikatsitkan pi Jehová xaxlikana Dios chu xlikana tuku kinkawaniyan kBiblia. Na liwana kilikatsitkan pi Jesús wa Mesías tiku xwankanit pi namin. Lhuwa latamanin ni kanajlakgo pi Jesús wa tiku laksakkanit xlakata Mapakgsina nawan kxTamapakgsin Dios. Juan wa pi xʼanan «lhuwa akgskgawinanin», tiku xkaʼakgskgawikgolh tiku ni liwana xkatsikgolh tuku xaxlikana xlakata Jehová chu Jesús (2 Juan 7-11). Juan tsokgli: «¿Tiku akgsanina? ¿Ni wa akgsanina tiku wan pi Jesús ni xaxlikana Cristo?» (1 Juan 2:22). Xlakata ni nakinkaʼakgskgawikanan talakaskin nalikgalhtawakgayaw Biblia. Komo chuna natlawayaw nalakgapasaw Jehová chu Jesús (Juan 17:3). Chu liwana nakatsiyaw pi kgalhiyaw xaxlikana. w20.07 21:4, 5

Komo ni kamaʼakgchakgxniputunaw kinatalankan tiku na kgosnamakgolh kamastaw talakaskin pi katlawakgolh tuku xlakan tlan lakpuwankgo chu ni wa tuku akinin lakpuwanaw (Rom. 14:19-21; 1 Cor. 8:9, 13). Uma ni xtachuna la akxni kgosnankgo tiku liskujkgo xlakata natlajanankgo. Ni kalilakgaputsakgo amakgapitsin, wata liskujkgo wa napulakgo. Akinin ni katalatlajayaw kinatalankan (Gál. 5:26; 6:4). Kamakgtayaputunaw xlakata na nachankgo niku kilichanatkan chu namakglhtinanaw latamat. Wa xlakata liskujaw namakgantaxtiyaw uma xtastakyaw Jehová pi “ni kajwatiya kalilakpuwaw tuku tlakg tlan kitaxtu kimpalakatakan, wata na kalilakpuwaw tuku tlakg tlan xpalakatakan amakgapitsin” (Filip. 2:4). Xlakata Jehová kinkapaxkiyan, kinkamalaknuniyan pi putum tiku namasputu uma takgosni natlaja o namaxkikan latamat nema ni kgalhi xlisputni, kʼakgapun o kKatiyatni. w20.04 28:10; 29:12

Lhuwa millón kstalaninanin Cristo nalakgtaxtukgo chu natanukgo kxasasti kakilhtamaku. Umakgolh lakchixkuwin chu lakpuskatin naʼakxilhkgo atanu la namakgatlajakan linin: nalakastakwanankgo lhuwa millón tiku xnikgonita makgasa. ¡Uma lu lipaxuw nawan! (Hech. 24:15). Chu putum tiku ni katimakgxtakgkgolh Jehová na namakgatlajakgo linin chu nalatamakgo xliputum kilhtamaku. Putum kstalaninanin Cristo lu paxtikatsiniyaw Jehová xlakata laktlan tachuwin nema Pablo katsokgnanilh tiku xalak Corinto. Anan lhuwa tuku xlakata nakgalhakgaxmataw xtastakyaw Pablo xlakata ankgalhin namalhuwiyaw tuku kilitlawatkan «kxtaskujut Malana» (1 Cor. 15:58). Komo ni namakgxtakgaw Jehová chu ankgalhin natlawayaw putum tuku matlaniyaw kʼuma taskujut, nakgalhiyaw lu xalipaxuw latamat kkilhtamaku nema aku mima. Naʼakxilhaw pi kintaskujutkan ni kaj paxkat lama. w20.12 13:16, 17

Tuku lichuwinan Ezequiel 38:10-23; Daniel 2:43-45; 11:44-12:1 chu Apocalipsis 16:13-16, 21 watiya kilhtamaku lichuwinankgo chu watiya tuku nala. Komo chuna, tlan nakgalhkgalhiyaw pi chuna nakgantaxtu la xlichuwinankanit. Akxni tsukunita nawan lanka takatsanajwat, «putum mapakgsinanin kxliputum katiyatni» akxtum nalakgo (Apoc. 16:13, 14). Biblia kalimapakuwi «Gog xalak kxtiyat Magog» (Ezeq. 38:2). Umakgolh mapakgsinanin natalatlawakgo xkachikin Dios chu namalakgsputuputunkgo. Apóstol Juan akxilhli pi kʼakgapun xtaktama laklanka chijit nema xkamalakgsputuma xtalatlawananin Dios. Uma chijit max wa kilhchanima tamakatsinin nema namastakgo xkachikin Jehová chu natlawa pi Gog xalak Magog naʼakgchipaputun xkachikin Dios xlakata namalakgsputuputun (Apoc. 16:21). w20.05 15:13, 14

Xʼespíritu santo Dios akgtum tamaskiwin. Komo nalilakpuwanaw tuku tlawama xʼespíritu santo Jehová, tlakg lanka xtapalh naliʼakxilhaw. Akxni Jesús nina xʼan kʼakgapun wa: «Namakglhtinanatit litliwakga akxni espíritu santo nakalakgminan, chu nalichuwinanatit kimpalakata [...] kxlikalanka katiyatni» (Hech. 1:8). Xlakata xtamakgtay espíritu santo, kkatiyatni liwaka 8 millones aitat latamanin xlakskujnin Jehová litaxtukgonit. Lamaw kʼakgtum kachikin xaʼespiritual, xlakata espíritu santo kinkamakgtayayan nakgalhiyaw lakwan tayat «nema espíritu tlawa pi latamanin nakgalhikgo», chuna la tapaxkit, tapaxuwan, takaksni, lu kgalhkgalhinankan, tlawakan tuku tlan, tlan likatsikan, takanajla, ni lakapala sitsikan chu machokgokan tuku nitlan tlawaputunkan (Gál. 5:22, 23). Espíritu santo akgtum tamaskiwin nema kgalhi lanka xtapalh. w20.05 28:10; 29:13

Lhuwa tuku likatsiyaw pi tiku nakamakgamakglhtinankgo tiku nalakastakwanankgo tlan nakalakgapaskgo xfamiliajkan. Pulana, ktalakastakwanat nema kalichuwinan Biblia, limasiya pi Jehová nakatlawapara la xtasiyakgo, la xchuwinankgo chu la xlakapastaknankgo akxni nina xnikgo. Kalakapastakwi pi Jesús lichuwinalh pi akxni nikan xtachuna la lhtatakan, chu lakastakwanankan kkalinin xtachuna la akxni lakgawankan xlakata klhtatakanit (Mat. 9:18, 24; Juan 11:11-13). Akxni latamanin lakgawankgo xlakata klhtatakgonit, chuntiya tasiyakgo, chuwinankgo chu watiya talakapastakni kgalhikgo lata akxni ankgo lhtatakgo. Kalilakpuwaw Lázaro, akxni Jesús malakastakwanilh, akgtatita kilhtamaku lata xninit, wa xlakata xtiyatliwa xlaklamaja. Pero xnatalan lakapala lakgapaskgolh, chu xla na kalakgapasli (Juan 11:38-44; 12:1, 2). w20.08 14:3; 16:8

Tiku xatalaksakni chu amakgapitsi borregos, Dios xlakaskinka kaʼakxilha. Lakxtum kapaxki akgtiy grupo. Chu watiya lixokgolh xlatamat xKgawasa, xlakata xkatamawaxtulh xatalaksakni chu amakgapitsi borregos. Tuku litalakgpalikgo wa xtakgalhkgalhinkan, pero talakaskin ni namakgatsankgananikgo Dios chu Cristo (Sal. 31:23). Kalakapastakwi pi Dios tlan tlawa pi putum kskujnin nalitamakgtayakgo espíritu santo. Jehová tlan namaxki xʼespíritu santo chatum lataman la maklakaskin. Jehová kamaxkinit chatunu xlakskujnin akgtum lu stlan takgalhkgalhin (Jer. 29:11). Akxni talakapastaka akxni nilh Cristo kgalhiyaw talakaskin nakamalankiyaw Jehová chu Cristo xlakata tuku tlawakgonit xlakata tlan ankgalhin nalatamayaw. Xlikana pi akxni talakapastaka akxni tinilh Cristo wa tlakg xlakaskinka tamakxtumit kimpalakatakan. w21.01 18:16; 19:19

Lhuwa tiku ankgo akxni lakapastakkan akxni tinilh Cristo kgalhikgo takgalhkgalhin xlakata nalatamakgo kKatiyatni. ¿Pero tuku xlakata ankgo? Xtachuna akxni latamanin ankgo akxni tamakgaxtokgma xʼamigokan. Ankgo xlakata nalimasiyanikgo xtapaxkitkan. Nachuna, tiku makgtapakgsikgo kʼgrupo xla amakgapitsi borregos ankgo akxni lakapastakkan Cristo xlakata kalimasiyanikgo Cristo chu xatalaksakni pi kapaxkikgo chu katatayakgo. Atanu tuku xlakata amakgapitsi borregos ankgo akxni lakapastakkan Cristo wa xlakata nakgalhakgaxmatkgo xlimapakgsin Jesús. Akxni xla katalakkaxwililh xʼapóstoles uma taway, wa: «Chuntiya katlawatit uma xlakata nakililakapastakatit» (1 Cor. 11:23-26). Wa xlakata amakgapitsi borregos chuntiya naʼankgo akxni nalakapastakkan akxni tinilh Cristo xlakata lamakgolhku kKatiyatni tiku xatalaksakni. w21.01 17:13, 14

Xaxlikana tapaxkit limasiyakan tuku tlawakan (katamalakxtupi Santiago 2:17, 26). Jehová kinkapaxkiyan (1 Juan 4:19). Chu kinkalimasiyaniyan xtapaxkit tachuwin nema tatekgsa kBiblia (Sal. 25:10; Rom. 8:38, 39). Pero katsiyaw pi kinkapaxkiyan ni kaj xlakata tuku wan, nachuna xlakata tuku tlawa. Jehová mastalh talakaskin pi xKgawasa xpatinalh chu xnilh (Juan 3:16). Wa xlakata katsiyaw pi kinkapaxkiyan. Limasiyayaw pi paxkiyaw Jehová chu Jesús akxni kakgalhakgaxmataw (Juan 14:15; 1 Juan 5:3). Chu Jesús kinkalimapakgsin nalapaxkiyaw (Juan 13:34, 35). Uma tapaxkit ni kaj kintachuwinkan nakalimasiyaniyaw kinatalankan, nachuna tuku tlawayaw (1 Juan 3:18). w21.01 9:6; 10:8

Kstalaninanin Cristo tiku kalilaksakkanit espíritu santo kgalhkgalhimakgo akxtum natatawilakgo Jesús putum kilhtamaku chu natamapakgsinankgo kxTamapakgsin Dios. Naʼakxilhkgo, natachuwinankgo chu akxtum natatawilakgo (Juan 14:2, 3). Tiku kgalhkgalhimakgo nalatamakgo unu kKatiyatni nachuna nalipaxuwakgo xtapaxkit chu la nakakuentajtlawa Jesús. Maski ni naʼakxilhkgo, tlakg tlan natalalinkgo chu nalipaxuwakgo xatlan latamat nema Jehová chu Jesús nakamaxki (Is. 9:6, 7). Akxni xʼamigos Jesús litaxtuyaw, makglhtinanaw lhuwa tasikulunalin. Akgtum liʼakxilhtit, kgalhiyaw xtapaxkit chu xtamakgtay la uku. Nachuna, kgalhiyaw talakaskin nalatamayaw putum kilhtamaku. Chu tuku tlakg xlakaskinka, xlakata talalinaw Jesús natlawa pi tlan natalalinaw tiku tlakg xlakaskinka: xTlat, Jehová. Akgtum lanka talakgalhaman pi xʼamigos Jesús nalitaxtuyaw. w20.04 25:15, 16

Apóstol Pablo kamalakgachanilh xcarta kstalaninanin Cristo xalak Corinto, tiku xatalaksakni xwankgonit chu xʼamakgolh kʼakgapun. Xlakan “Dios xkalaksaknit xlakata xasantos nalitaxtukgo”. Pablo na kalichuwinalh «kstalaninanin Cristo tiku nikgonita» (1 Cor. 1:2; 15:18; 2 Cor. 5:17). Chu kʼatanu carta, wa: «Komo akinin naniyaw chuna la [Jesús] nilh, xlikana pi nachuna nakinkamalakastakwanikanan» (Rom. 6:3-5). Jesús lakastakwanalh chuna la chatum espíritu chu alh kʼakgapun. Chu putum tiku xatalaksakni nachuna nakgalhikgo uma latamat. Pablo tsokgli pi Cristo wa tiku «xapulana lakastakwanalh kkalinin chuna la xapulana tawakat» (1 Cor. 15:20). Jesús wa tiku pulana lakastakwanalh chuna la chatum espíritu chu makglhtinalh latamat nema ni kgalhi xlisputni. w20.12 5, 6:15, 16

La uku, kstalaninanin Cristo tiku xatalaksakni tiku nikgo tunkun ankgo kʼakgapun. ¿Tuku likatsiyaw? Xlakata tuku wa Pablo k1 Corintios 15:51, 52. Akxni lakastakwanankgo, kgalhikgo xatakgatsin tapaxuwan. Biblia lichuwinan tuku natlawakgo kʼakgapun tiku «kaj xalakapala» kalakgpalikan. Jesús kawani: «Tiku natlajanan chu chuntiya natlawan kkintiji asta klisputni, nakmaxki limapakgsin xlakata nakamapakgsi kachikinin, chu xla nalimaklakaskin lixtokgo xla likan xlakata nakamapakgsi latamanin. Nakamalakgsputukan xtachuna la kalakgpakglhmikan vasos xatiyat» (Apoc. 2:26, 27). w20.12 12:14, 15

Akxni limapakuwilh Jesús «xapulana tawakat», apóstol Pablo xlichuwinama pi alistalh amakgapitsin na xʼamakgolh lakastakwanankgo kʼakgapun (1 Cor. 15:18). Chu alistalh, tiku xatalaksakni, la apóstoles, nalakastakwanankgo xlakata naʼankgo kʼakgapun, la Jesús. Akxni Pablo katsokgnanilh corintios, nina xtsukukgo lakastakwanankgo tiku xʼamakgolh kʼakgapun. Chu lichuwinalh pi uma xʼama kgantaxtu kkilhtamaku nema aku xmima. Xla wa: «Chatunu chatunu chuna la kalakgchan: Cristo xapulana tawakat, alistalh tiku tapakgsinikgo Cristo akxni kinkatawilan nawan» (1 Cor. 15:23; 1 Tes. 4:15, 16). Apóstoles chu tiku xatalaksakni xtalakaskin xkgalhkgalhikgolh asta akxni Cristo “xkinkatatawilan” xlakata xʼankgolh kʼakgapun chu «tiku akxtum tawilakgolh Cristo» xlakastakwanankgolh la xla. Uku lamaw kkilhtamaku akxni “kinkatawilan Cristo” (Rom. 6:5). w20.12 5:12; 6:16, 17

Apóstol Pablo xkakilhchanima tiku nakgalhikgo akgtum makni xaʼespiritual akxni nalakastakwanankgo (1 Cor. 15:43, 44). Akxni Jesús xlama kKatiyatni, xkgalhi akgtum makni nema xtasiya. Pero akxni lakastakwanalh, «litaxtulh espíritu nema masta latamat» chu taspitli kʼakgapun. Chuna la uma, tiku xatalaksakni nalakastakwanankgo la espíritus. Pablo lichuwinalh: «Akinin xtachuna uma chixku tiku Dios litlawalh pokgxni, wa xlakata nawanaw xtachuna la uma chixku tiku alh kʼakgapun» (1 Cor. 15:45-49). Pablo wa: «Liwa chu kgalhni nila tanukgo kxTamapakgsin Dios» o kʼakgapun (1 Cor. 15:50). Apóstoles chu atanu xatalaksakni ni xkgalhikgolh akgtum tiyatliwa akxni xʼankgolh kʼakgapun, nema tlan masa. w20.12 10, 11:10-12

Dios kamakatsinilh makgapitsi xtamakgalhtawakgen Jesús xlakata talakastakwanat kʼakgapun. Apóstol Juan lichuwinalh: «Maski xkamanan Dios litaxtuyaw, nina kinkamakatsinikanan tuku nalitaxtuyaw. Katsiyaw pi akxni xla nalimasiya xlitliwakga, nalitaxtuyaw chuna la xla» (1 Juan 3:2). Tiku xatalaksakni ni katsikgo la nalatamakgo kʼakgapun chu ni katsikgo la kgalhikan makni xaʼespíritu. Tuku katsikgo wa pi akxni namakglhtinankgo xtatlajakan naʼakxilhkgo Jehová. Biblia tsinu lichuwinan. Xatalaksakni akxtum natatawilakgo Cristo akxni xla nakamalakgsputu «putum tiku mapakgsinankgo chu putum tiku lakapuxkunankgo», chu «xaʼawatiya kintalamakgasitsinkan, [...] linin». Alistalh, Jesús chu tiku natamapakgsinankgo natapakgsinikgo chu natlawakgo pi putum natapakgsini Jehová (1 Cor. 15:24-28). ¡Uma lu tlan nawan! w20.12 8:2

Kstalaninanin Cristo tiku ni naʼankgo kʼakgapun, na kgalhikgo takgalhkgalhin nalakastakwanankgo. Biblia wan pi apóstol Pablo chu amakgapitsin nalitamakgtayakgo «xapulana talakastakwanat» (Filip. 3:11). ¿Ni limasiya uma pi xʼama anan talakastakwanat alistalh? Uma tatalakxtumi tuku lichuwinalh Job pi xʼama kgantaxtu kkilhtamaku nema aku xmima (Job 14:15). «Tiku tapakgsinikgo Cristo» akxtum natatawilakgo kʼakgapun akxni nakamalakgsputu «putum tiku mapakgsinankgo». Chu «linin, namalakgsputukan». Liwana tasiya pi tiku naʼankgo kʼakgapun nikxni katinikgolh (1 Cor. 15:23-26). Tiku kgalhkgalhikgo nalatamakgo kKatiyatni tlan nawankgo la wa Pablo ktexto xala uku. Liwana katsiyaw pi kʼakgapun nila tanukgo tiku ni xaʼakgstitum. Umakgolh tachuwin kilhchanima talakastakwanat kKatiyatni. w20.12 6, 7:18, 19

Max lakpuwanaw: «¿Tuku naklikatsi pi Jehová ni kilakgmakganit?». Akxni chuna lakpuwanaw kinkamaxkimakana xatakgalhtin. ¿Tuku xlakata? Makgasa, revista Makatsinina lichuwinalh: «Lakgachunin, anan atanu taʼakglhuwit akxni watiya liʼakgchakgxaw talismanin nema xkgalhiyaw makgasa chu nitu xʼakxilhnitaw». Chu wampa: «Ni wix kalaksakti pi tlawanita talakgalhin nema nila katitapatikanti. Satanás lakaskin chuna kalakpuwanti. Xlakata wix lu nitlan limakgkatsiya tuku tlawa, limasiya pi tlan likatsiya chu Jehová tlan natapatiyan. Ankgalhin kalimasiya tataktujut chu kamalakkini minaku Dios, kaskini pi katapatin chu kamakgtayan». Apóstol Pablo tlawalh laklanka talakgalhin akxni nina kstalani Cristo. Xlakapastaka tuku xtlawanit, pero ni tantaku (1 Tim. 1:12-15). Akgtum xtamaskiwin Dios xliʼakxilha talakgmaxtut. Makgtayalh nialh lu nalakapastaka tuku xtlawanit chu liskujli namaxki Jehová tuku tlakg tlan. w20.11 27:14; 29:17

Satanás nalimaklakaskin atanu taputsan nema natlawa pi nalakgalhinanaw. Max tlan nalakpuwanaw: «Ni kintitamakxtuka kcongregación xlakata ktlawama uma, wa xlakata nitu wamputun». Uma nitlan tapuwan. Tlakg tlan nalilakpuwanaw uma: «¿Maklakaskima uma Satanás xlakata natlawa pi kinaku nalakgaputiyunan? Komo nakmasta talakaskin pi nitlan tapuwan nakimatlawi tuku nitlan, ¿nakmaxkajwi xtukuwani Jehová? ¿Natlawa uma pi tlakg naktalakatsuwini Jehová o ni?». Kalilakpuwaw umakgolh takgalhskinin. Kaskiniw liskgalala Jehová xlakata nakgalhtiyaw umakgolh takgalhskinin chu ni nakinkaʼakgskgawikanan. Uma lu nakinkamakgtayayan xlakata nalakgmakganaw taputsan la Jesús tlawalh akxni wa: «¡Kapit Satanás!» (Mat. 4:10). Kalakapastakti, akgtum naku nema lakgaputiyunan ni lu lhuwa xtapalh. w20.06 12, 13:16, 17

Xlakskujnin Jehová taktujuyaw chu kgalhakgaxmataw xlimapakgsin, xlakata liwana katsiyaw pi xla katsi tuku tlakg tlan (Efes. 4:22-24). Tataktujut tlawa pi pulana natlawayaw tuku xla lakaskin nixawa tuku lakaskinaw chu amakgapitsin tlakg xlakaskinka nakaʼakxilhaw. Uma tlawa pi tlakg tlan natalalinaw Jehová chu kinatalankan (Filip. 2:3). Komo ni kuenta natlawayaw, max natsukuyaw likatsiyaw la latamanin xalak kakilhtamaku tiku xʼakstukan kapaxkikan. Makgapitsin kstalaninanin Cristo kxapulana siglo chuna xtatakgskgo, wa xlakata apóstol Pablo kamaxkilh uma tastakyaw: «Kkawaniyan minchatunukan pi ni kalakpuwantit pi lu xlakaskinka litaxtuyatit, wata kalakpuwantit chuna la nalimasiyayatit pi kgalhiyatit xatlan talakapastakni». Chuna la akxilhaw, Pablo wa pi nitu wamputun tsinu akstu nakinkapaxkikanan. Pero tataktujut kinkamakgtayayan ni natlankajwananaw. w20.07 2:1, 2

Kxkilhtamaku mapakgsina Asá, takaksni nema xʼanan kJudá ni ankgalhin makgapalalh, xlakata lhuwa soldados etíopes ankgolh katalatlawakgo. Zérah tiku xkapulalin soldados, xlakpuwanit namasputu Judá. Pero Asá xlipawan Jehová. Wa xlakata tasaskinilh: «Kakilamakgtayaw Jehová kiDioskan xlakata xlikana kkalipawanan, chu kmintukuwani kminitanchaw xlakata nakkatatlawayaw guerra umakgolh lhuwa latamanin» (2 Crón. 14:11). Maski xtalatlawanakan tlakg lhuwa soldados xkgalhikgo, Asá xkatsi pi Jehová xkgalhi litliwakga. Chu Jehová makgtayalh. Soldados etíopes kamakgatlajaka (2 Crón. 14:8-13). Maski ni katsiyaw tuku nakaʼakgspula chatunu chatunu xlakskujnin Jehová, katsiyaw pi takaksni nema max kgalhiyaw, ni ankgalhin katitawi. Jesús lichuwinalh pi kxaʼawatiya kilhtamaku «putum kachikinin» ni xkaʼakxilhputunkgolh kstalaninanin (Mat. 24:9). w20.09 18:14-16

Niti lakgati nalikgalhkgamanankan, pero komo lu nalilakgaputsayaw pi kintalamakgasitsinkan nakinkalikgalhkgamanankgoyan, nataxlajwaniyaw (Prov. 24:10). ¿Tuku tlan natlawayaw? Tlan natlawayaw la apóstol Pablo chu nalipaxuwayaw akxni “nitlan tuku nakinkawanikanan”. ¿Tuku xlakata? Xlakata akxni kinkalikgalhkgamanankanan chu kinkaputsastalanikanan limasiya pi akinin xaxlikana kstalaninanin Cristo (1 Ped. 4:14). Jesús xwanita pi chuna xʼama la (Juan 15:18-20). Chu wa uma tuku lalh kxapulana siglo. Tiku tsukukgolh lakpuwankgo la griegos, xwankgo pi kstalaninanin Cristo nitu xkatsikgo chu nitu xlitaxtukgo. Judíos xwankgo pi xlakan «lakchixkuwin tiku ni xlakaskinka xlitaxtukgo chu nitu xkgalhtawakgakgonit», la kawanika Pedro chu Juan (Hech. 4:13). Lhuwa xlakpuwankgo pi ni xkgalhikgo litliwakga xlakata ni xkgalhikgo limapakgsin chu tiku xkamakgtayakgolh. ¿Mastakgolh talakaskin pi uma xkamachokgolh? Nichuna. w20.07 14, 15:3, 4

Apóstol Juan lu xkapaxki xnatalan chu xlilakgaputsa xtakanajlakan. Uma liwana tasiya kxcartas. Lu kinkamakgpuwantiniyan akxni katsiyaw pi lakchixkuwin chu lakpuskatin tiku naʼankgo kʼakgapun na lu xapaxkinanin la Juan (1 Juan 2:27). Kuenta katlawaw xtastakyaw. Kalakkaxwiliw ankgalhin nalatamayaw kxaxlikana chu nakgalhakgaxmataw Jehová. Kalikgalhtawakgaw xTachuwin chu wa kalipawaw. Kamatliwakglhwi kintakanajlakan nema kgalhiniyaw Jesús. Kalakgmakgaw xtalakapastaknikan latamanin chu apóstatas. Kaliskujwi ni nalakgaputiyunanaw chu ni nalakgalhinanaw. Kakgalhakgaxmatwi xtastakyaw Jehová xlakata la linkan latamat. Chu komo nakatapatiyaw kinatalankan tiku kinkatlawanikgoyan tuku nitlan nakamakgtaya tliwakga nawankgo chu nakamakgtayayaw tiku maklakaskinkgo. Komo chuna natlawayaw, maski tuwa tuku natitaxtuyaw, chuntiya nalatamayaw kxaxlikana. w20.07 24, 25:15-17

Xlakata Jehová kapaxki kskujnin tiku ni makgxtakgkgo wi tuku kalakgayawa kcongregación. Maski tanu tanu taskujut tlawayaw, kimputumkan xtapalh litaxtuyaw chu lamaklakaskinaw. Apóstol Pablo wa pi ni nakaʼakxilhaw amakgapitsi kskujnin Jehová chu nalakpuwanaw: «Ni kkamaklakaskinan» (1 Cor. 12:21). Xlakata naʼanan takaksni kcongregación, xlakaskinka xtapalh nalaʼakxilhaw chu akxtum naskujaw (Efes. 4:16). Akxni makxtum layaw, natalan tatliwakglhkgo chu makgkatsikgo pi kapaxkikan. Putum lakgkgolotsin kalilaksakkanit xʼespíritu santo Jehová, pero chatunu chatunu tanu tuku tlan tlawakgo (1 Cor. 12:17). Max makgapitsi nina makgas kamaxkika uma taskujut chu nina lhuwa tuku titaxtukgonit, chu amakgapitsin nialhla lhuwa tuku tlawakgo xlakata linkgoya kata o xlakata tatatlakgo. Pero ni xlilat pi chatum kgolotsin naʼakxilha achatum chu nawan «Ni kmaklakaskinan». Wata putum xlistalanitkan xtastakyaw Pablo nema wi kRomanos 12:10. w20.08 26:1, 2; 27:4

Jehová maklakaskin xkachikin xlakata nakinkapulalinan ktiji xla latamat. Akxni lichuwinan xasasti taʼakgatekgsni xlakata tuku masiya Biblia o kinkawaniyan la nalinaw kilatamatkan, tunkun makglhtinanaw. Pero ¿tuku tlawayaw akxni wi tuku laksakkgo nema tuwa namakgkatsiyaw namakgantaxtiyaw, chuna la akxni stakan Pukgalhtawakga niku tamakxtumiyaw? Komo nalakapastakaw pi wa skujnanimaw Jehová chu xla pulalima xkachikin, uma nakinkamakgtayayan chuntiya napaxuwayaw (Col. 3:23, 24). Mapakgsina David kinkawilinin tlan liʼakxilhtit chuna la limakgtayanalh tumin xlakata xtlawaka templo. Xla wa: «¿Tiku akit chu tiku kinkachikin, xlakata ni nakmastayaw tamakamastan nema xatapaxuwan mastakan? Xlakata putum wix kilamaxkiyaw chu kaj kkamaxkiyan tuku kilamaxkinitaw» (1 Crón. 29:14). Akxni xatapaxuwan mastayaw kintuminkan, maxkimaw Jehová tuku tapakgsini. Maski chuna, xla paxtikatsini kilhtamaku, litliwakga chu putum tuku limakgtayananaw ktaskujut nema lakaskin natlawayaw (2 Cor. 9:7). w20.11 22, 23:14-16

Ni lakpuwanaw pi tlan kinkakitaxtuniman xlakata kamakgtayamaw lhuwa latamanin naminkgo kxkachikin Dios (Luc. 8:11-15). Komo chuntiya nalichuwinanaw Dios chu nakamasiyaniyaw latamanin, Jehová lu napaxuwa, xlakata kgalhakgaxmatmaw xla chu xKgawasa (Mar. 13:10; Hech. 5:28, 29). Lu xlakaskinka nalichuwinanaw Dios la uku xlakata xlisputni kakilhtamaku lakatsu wi. Nialh lhuwa kilhtamaku anan xlakata namakgtlawayaw uma taskujut. Ni kalakpuwanti pi xlakata namakgtlawaya uma, nakgalhkgalhiya asta akxni tlan natawila kilhtamaku. La uku kamatliwakglhti tuku makgpuwantiniyan namakgantaxtiya uma taskujut, tlakg kakatsini tuku wan Biblia, ni kapekuanti chu lu kaliskujti. Akxtum kakataskujti liwaka akgtsayan millones tiku kskitinanin lakchixkuwin litaxtukgo chu nakgalhiya «tapaxuwan nema masta Jehová» (Neh. 8:10; Luc. 5:10). Kalaksakti namakgtlawaya uma xlakata Jehová nina wan pi nialh katlawaw. w20.09 7:18-20

Ni kamastaw talakaskin pi tuku lhuwa xtapalh nakinkalaktlawayan. Komo nalipawanaw tumin max nialh katipaxkiw Jehová, nialh xtapalh katiliʼakxilhwi Biblia chu nialh katilichuwinamputuw (Mat. 13:22). Komo kuentajtlawaputunaw tuku kinkalakgayawakanitan, lakapala wi tuku natlawayaw akxni nakinkalitsakgsaputunkanan. Tlan nalakkaxwiliyaw tuku lakapala natlawayaw komo akxni maskujumaw Internet, akxilhmaw película o televisión, nataxtu tuku masiyakgo apóstatas, talakgxtumit xalimaxana o niku latlawanikan tuku nitlan. Komo lakkaxwilinitaw tuku natlawayaw, nitu katimaxkajwilh kintakanajlakan chu skulunku natawilayaw (Sal. 101:3; 1 Tim. 4:12). Kuentajkatlawaw tuku xtapalh kinkalakgayawanitan Jehová: tuku xaxlikana xalak Biblia chu talakgalhaman xlakata tlan nalichuwinanaw. Chuna kintalakapastaknikan tlan natawila, nakgalhiyaw tlan latamat chu tapaxuwan xlakata tlan nakamakgtayayaw amakgapitsin nalakgapaskgo Jehová. w20.09 30:16-19

Komo tamununitawa, limasiyanitaw kxlakatin amakgapitsin pi kanajlaniyaw Jehová chu pi akxtum taskujputunaw xkachikin. Chuna la Jehová pulalima xkachikin, limasiya la likatsi, xtalakaskin chu xlimapakgsin. Pulaktutu xtayat Jehová limasiya la pulalin xkachikin. Pulana, «Dios ni laksakpaxkinan» (Hech. 10:34). Tapaxkit tlawalh pi Jehová namakamasta xKgawasa xlakata nalakgtaxtuyaw (Juan 3:16; 1 Tim. 2:6). Chu xlakata lhuwa latamanin nalitamakgtayakgo uma, maklakaskin xkachikin xlakata nakamakatsini xalaktlan tamakatsinin. Xlipulaktiy, Jehová chatum Dios tiku ni akglakgwa tuku tlawa chu lakgati takaksni (1 Cor. 14:33, 40). Wa xlakata, xkachikin ni akglakgwa tuku tlawa chu lakgati takaksni. Xlipulaktutu, Jehová wa “Tlakg xaLanka Makgalhtawakgena” (Is. 30:21). Wa xlakata, xkachikin liskuja namasiya xTachuwin kcongregación chu akxni lichuwinankgo Dios. w20.10 20:1-3