Mayo

Akxni kgawasaku xwanit, Jesús kakgalhakgaxmatnilh xnatlatni. Nikxni kalakatakilh chu ni lakpuwa pi tlakg skgalala xwanit nixawa xlakan. Ni kaj takgaman liʼakxilhli tuku xlakgaya la xapuxku. Palha skujli xlakata nakatsini tlawa taskujut nema xtlawa xtlat xlakata namakgtaya xfamilia. Xnatlatni max litachuwinankgolh pi Dios tlawalh milagro xlakata nalakachin chu tuku wankgolh ángeles (Luc. 2:8-19, 25-38). Pero Jesús ni kajwatiya makgamakglhtinalh uma tuku masiyanika, xʼakstu xlikgalhtawakga Tatsokgni. ¿Tuku likatsiyaw pi lu tlan xlikgalhtawakga xTachuwin Dios? Xlakata akxni kgawasaku xwanit, makgalhtawakgenanin xalak Jerusalén «kaks xlilakawankgo xlakata lu tlan xʼakgatekgsa chu chuna la xkgalhtinan» (Luc. 2:46, 47). Akxni kajku 12 kata xkgalhi, Jesús liwana xkatsi pi Jehová wa xTlat xwanit (Luc. 2:42, 43, 49). w20.10 29:13, 14

Lu xlakaskinka kanajlanikan xtalakastakwanat Jesús. Akxni Pablo lichuwinalh talakastakwanat wa: «Cristo nilh xpalakata kintalakgalhinkan», «maknuka» chu «malakastakwanika xliʼakgtutu kilhtamaku» (1 Cor. 15:3, 4). ¿La kinkamakgtayayan pi Jesús nilh, maknuka chu malakastakwanika? Palakachuwina Isaías wa pi Mesías “xʼamaka mapanukan kkatiyatni” chu pi xʼamaka maknukan “niku kamaknukanit tiku nitlan likatsikgo”. Pero na lichuwinampa pi xla xʼama niy xpalakata “xtalakgalhinkan lhuwa latamanin”. ¿La makgantaxtilh uma Jesús? Akxni mastalh xlatamat xlakata nakinkalakgmaxtukanan (Is. 53:8, 9, 12; Mat. 20:28; Rom. 5:8). Xlakata Jesús nilh, maknuka chu malakastakwanika liwana kinkamasiyaniyan pi nakinkalakgmaxtukanan ktalakgalhin chu klinin, chu pi nakaʼakxilhparayaw tiku lu xkapaxkiyaw tiku nikgonita. w20.12 2, 3:4-6; 5:11

Apóstol Pablo ankgalhin xlichuwinan Dios ksinagogas. Akgtum liʼakxilhtit, katachuwinalh judíos ksinagoga xalak Tesalónica chu «akgtutu Sábados kalimaʼakgatekgsnilh Tatsokgni» (Hech. 17:1, 2). Max xlipaxuwa xtawila ksinagoga. Xmakgastakkanit la judío (Hech. 26:4, 5). Xkaʼakgatekgsni judíos, wa xlakata ni xpekuan akxni xkalitachuwinan Dios (Filip. 3:4, 5). Akxni xtalamakgasitsin tlawakgolh pi xtaxtulh kTesalónica chu kBerea, alh kʼAtenas. Akxni anta xwi «kamakgtayaputulh naʼakgatekgskgo judíos anta ksinagogajkan chu nachuna latamanin tiku xkakninanikgo Dios» (Hech. 17:17). Pero akxni lichuwinalh Dios kmercado katatanokglhli atanu latamanin. Anta xwilakgolh filósofos chu tiku ni judíos, wa xlakata xtachuwin Pablo xliʼakxilhkgo la «xasasti tamasiy». Wanikgolh: «Makgapitsi tuku lichuwinampat nikxni kkgaxmatnitaw» (Hech. 17:18-20). w20.04 9:5, 6

Ni kalakpuwaw pi nitu litaxtuyaw. Kimputumkan tlawayaw tuku nitlan, pero Jehová kinkatapatiyan xlakata kinkalakgalhamanan chu xlakata talakgmaxtut (Efes. 1:7; 1 Juan 4:10). Akxni maklakaskinaw kakinkamakgpuwantinikan, tlan nakaskiniyaw tamakgtay kinatalankan. Xlakan nakinkamakgpuwantinikgoyan chu nakinkakgaxmatnikgoyan (Prov. 12:25; 1 Tes. 5:14). Joy, chatum tala xalak Nigeria tiku liskujma xlakata namakgatlaja taxlajwanit, wan: «¿Tuku xaktlawalh komo ni xʼanalh natalan? Wa tuku kilimasiyani pi Jehová kgaxmata kiʼoraciones. Asta kimasiyanikgonit la tlan nakkamakgpuwantini tiku lipuwamakgolh». Xlikana pi natalan ni ankgalhin katikatsikgolh akxni maklakaskimaw pi kakinkamakgpuwantinikan. Wa xlakata max natalakaskin pi akinin pulana natachuwinanaw chatum tala xlakata naskiniyaw pi kakinkamakgtayan. w20.12 23, 24:7, 8

Xlakata chatiy latamanin tlan amigos nalitaxtukgo, talakaskin nalalimaxtunikgo kilhtamaku, nalawanikgo tuku lakpuwankgo, tuku makgkatsikgo chu tuku tlawakgonit. Pero akxni lilakpuwanaw pi xʼamigos Jesús nawanaw, max tuwa namakgkatsiyaw. ¿Tuku xlakata? Pulana xlakata akinin ni akxilhnitaw Jesús. Lhuwa kstalaninanin Cristo kxapulana siglo nachuna titaxtukgolh. Maski chuna, apóstol Pedro kawanilh: «Maski wixin nikxni akxilhtit, paxkiyatit. Maski ni akxilhpatit uku, limasiyayatit pi kanajlaniyatit» (1 Ped. 1:8). Chuna, ni talakaskin naʼakxilhaw Jesús xlakata xʼamigos nawanaw. Nachuna, nila tachuwinanaw Jesús. Akxni tlawayaw oración, wa tachuwinanaw Jehová. Xlikana pi akxni tlawayaw oración, maklakaskinaw xtukuwani Jesús, pero ni wa tachuwinanaw. Asta Jesús ni lakaskin pi wa natlawaniyaw oración, xlakata oración wa tuku limastayaw kakni chu kajwatiya nakakninaniyaw Jehová (Mat. 4:10). Maski chuna, tlan nalimasiyayaw pi paxkiyaw Jesús. w20.04 20:1-3

Kxamakgan Grecia, tiku xkgosnankgo xtalakaskin natayanikgo tuku tuwa la komo akxni xtlakgwankgo chu akxni wi tuku xkakatsani. Pero kaj xlitamakgtayakgo xlitliwakgakan chu la xlakgtawakgakgonit. Chuna la xlakan, na kinkamalakgtawakgekanan xlakata nakgosnanaw. Pero kilitliwakgakan nikxni sputa, xlakata wa kinkamaxkiyan Jehová. Komo wa nalipawanaw, kinkamalaknuniyan pi nakinkamalakgtawakgeyan chu nakinkamatliwakglhan. Apóstol Pablo lhuwa taʼakglhuwit titaxtulh. Ni kajwatiya xlikgalhkgamanankan chu xputsastalanikan, lakgachunin lu xtaxlajwani chu xtalakaskin natayani tuku xla limapakuwilh «xtachuna la lhtukun» (2 Cor. 12:7). Maski tuwa tuku titaxtulh ni lakpuwa pi anta natamakgxtakga, wata akxilhli pi xtalakaskin tlakg nalipawan Jehová (2 Cor. 12:9, 10). Wa xlakata Jehová ankgalhin makgtayalh. w20.04 29:13, 14

Kgalhiyaw tuku lu lanka xtapalh: akxtum nakataskujaw Jehová, Jesús chu ángeles (2 Cor. 6:1). Kinkamakgtayakgoyan akxni kaputsayaw tiku kstalaninanin Cristo nalitaxtukgo. Pablo wa: «Akinin xtaskujnin Dios» (1 Cor. 3:9). Akxni lichuwinanaw Dios na akxtum taskujaw Jesús. Akxni Jesús kawanilh kstalaninanin pi xkamasiyanikgolh latamanin kxlikalanka katiyatni, wa: «Kkatawilan chali chali» (Mat. 28:19, 20). Na lu paxtikatsiniyaw Jehová pi ángeles kinkapulalinkgoyan akxni anaw kalitachuwinanaw «xatlan tamakatsinin [...] tiku lamakgolh kkatiyatni» (Apoc. 14:6). ¿Tuku kitaxtunit xlakata uma tamakgtay? Akxni chanaw xatalhtsi Tamapakgsin, makgapitsi umakgolh talhtsi chankgo kxnakujkan latamanin tiku makgamakglhtinankgo tamakatsinin chu uma talhtsi tsuku pun (Mat. 13:18, 23). ¿Tiku tlawa pi umakgolh talhtsi napunkgo chu namastakgo xtawakat? Jesús lichuwinalh ktexto xala uku. w20.05 30:14, 15

Lhuwa familias ni makxtum wilakgolh xlakata lakxtlawakgonit xtamakgaxtokgatkan. Na wilakgolh tiku akxtum wilakgo, pero ni latalalinkgo. Chatum tiku kamakgtaya familias wan: «Xatse, xatlat chu xalakkamanan ni latachuwinankgo, wata lhuwa kilhtamaku limaklakaskinkgo xcomputadoraskan, xtabletaskan, xteléfonoskan o likgamanankgo videojuegos. Maski akxtum wilakgolh, ni lalakgapaskgo». Ni likatsiputunaw la uma kakilhtamaku chu nialh nalimasiyayaw tapaxkit. Talakaskin nakapaxkiyaw kifamiliajkan chu kinatalankan xalak congregación (Rom. 12:10). ¿Tuku kilhchanima uma? Kilhchanima tapaxkit nema kakgalhiniyaw kifamiliajkan, tiku kiʼamigoskan kaliʼakxilhaw. Uma tapaxkit kilikgalhinitkan kinatalankan xalak congregación, kifamiliajkan xaʼespiritual. Komo nalalimasiyaniyaw tapaxkit, chuntiya akxtum naskujnaniyaw Jehová (Miq. 2:12). w21.01 20:1, 2

Equipo xla fútbol tlan nakitaxtuni komo makxtum lakgo. Kinakujkan na tlan nakitaxtuni komo tuku lakpuwanaw, tlawaputunaw chu tuku makgkatsiyaw «makxtum» nalakgo chuna la skujnanimaw Jehová. Satanás tlawaputun pi kinakujkan nalakgaputiyunan. Lakaskin pi tuwa namakgkatsiyaw natlawayaw xtalakaskin Jehová chu natlawaputunaw tuku nitlan. Komo skujnaniputunaw Jehová, talakaskin xatakgatsin kinakujkan nakgalhiyaw (Mat. 22:36-38). Nikxni kamakgxtakgwi pi Satanás natlawa pi kinakujkan nalakgaputiyunan. Kaskiniw Jehová tuku wa David: «Kimaxki akgtum naku nema ni nalakgaputiyunan xlakata napekuani mintukuwani». Kaliskujwi namakgantaxtiyaw uma. Tuku laksakaw chali chali, maski kaj aktsu o lanka, kalimasiyalh pi maxkiyaw kakni xtukuwani Jehová. Komo chuna natlawayaw, nalimasiyayaw pi kinkalakgchanan nalinaw xtukuwani Jehová (Prov. 27:11). Chu putum tlan nawanaw la palakachuwina Miqueas: «Nikxni ktimakgxtakgwi xtukuwani Jehová» (Miq. 4:5). w20.06 13:17, 18

Xtaputsastalanit mapakgsina xalak norte chu amakgapitsin mapakgsinanin natlawa pi Jehová nasitsi chu natsuku Armagedón (Apoc. 16:14, 16). Mapakgsina xalak norte «nachin xlisputni, chu ni katiʼanalh tiku namakgtaya» (Dan. 11:45). Kʼatanu versículo klibro xla Daniel tlakg liwana lichuwinan la namalakgsputukan mapakgsina xalak norte chu tiku tatayakgo, chu la nakinkalakgmaxtuyan Jehová (Dan. 12:1). ¿Tuku kilhchanima uma versículo? Miguel wa atanu tukuwani nema lilakgapaskan kiMapakgsinakan, Cristo Jesús. Xla ankgalhin «katataya» xkachikin Dios lata kkata 1914, akxni tsukulh Mapakgsinan kʼakgapun. Kaj nialh makgas kilhtamaku, «nataya», uma kilhchanima pi nakamalakgsputu xtalamakgasitsin kʼguerra xla Armagedón. Uma guerra wa xlikgalhsputni tuku Daniel limapakuwilh kilhtamaku akxni natsuku «lhuwa tapatin» nema nikxni chuna lanit (Apoc. 6:2; 7:14). w20.05 15, 16:15-17

José nila tuku xtlawa xlakata nalakgpali tuku xtitaxtuma, chu chuna xtamaknukanit kpulachin. ¿Tuku tlawalh xlakata ni nataxlajwani? Liskujli natlawa taskujut nema xlakgayawakanit chu ni lilakgaputsalh tuku nila xtlawa. Ankgalhin wa pulana wililh Jehová kxlatamat, chu wa xlakata xla ankgalhin sikulunatlawalh (Gén. 39:21-23). Tuku titaxtulh José kinkamalakapastakayan pi kʼuma kakilhtamaku anan latamanin tiku nakinkatlawanikgoyan tuku nitlan. Asta max chatum kintalakan chuna nakinkalikatsiniyan. Pero komo akxilhaw Jehová la akgtum lanka chiwix nema nalitatsekgaw, ni katitaxlajwaniw chu chuntiya naskujnaniyaw (Sal. 62:6, 7; 1 Ped. 5:10). José kajku kgawasa xwanit akxni limanaxnalh tuku Jehová xʼama tlawa. Jehová kalipawan xlakskujnin tiku lakgkgawasanku. La uku, anan lhuwa lakgkgawasan tiku kanajlanikgo Jehová chuna la José, chu makgapitsin katamaknukanit kpulachin xlakata ni makgatsankgananiputunkgo Jehová (Sal. 110:3). w20.12 16:3; 17:5, 7

Apóstol Pedro chu Juan lanka talakgalhaman liʼakxilhkgolh pi kaputsastalani xlakata kstalanikgo Jesús chu xkamasiyanikgo amakgapitsin (Hech. 4:18-21; 5:27-29, 41, 42). Xapulana kstalaninanin Cristo ni xʼanan tuku xlimaxanankgolh. Xlakan lu kamakgtayakgolh latamanin nixawa tuku katlawanikgolh xtalamakgasitsinkan. Katsiyaw uma xlakata libros nema makgapitsi tsokgwilikgolh chuntiya kamakgtayama latamanin. Chu Tamapakgsin nema xlichuwinankgo ni kajwatiya xlikana wi la uku, wata nialh makgas nakamapakgsi putum latamanin (Mat. 24:14). Pero lanka kachikin nema xkaputsastalanima lakgsputli chu kajwatiya lichuwinankan. Nachuna, kstalaninanin Cristo tiku ni makgxtakgkgolh, la uku mapakgsinanin litaxtukgo kʼakgapun. Pero xtalamakgasitsinkan nikgolh, chu komo nalakastakwanankgo nakamapakgsi Tamapakgsin nema xlichuwinankgo kstalaninanin Cristo tiku putsastalanikgolh (Apoc. 5:10). w20.07 15:4

Abrahán xkanajlani xtamalaknun Dios, xtachuna la komo xʼakxilha xTalaksakni Dios tiku Mapakgsina xʼama litaxtu. Wa xlakata, Jesús kawanilh judíos: «Mintlatkan Abrahán lipaxuwalh xlakata lu xʼakxilhputun akxni xakama min. Xla akxilhlakachalh ama kilhtamaku chu lipaxuwalh» (Juan 8:56). Chuna la akxilhaw, Abrahán xkatsi pi xkamanan xʼamakgo makgtapakgsikgo kʼakgtum Tamapakgsin nema Jehová lakkaxwilinit chu xatapaxuwan xʼama kgalhkgalhi asta akxni xmakgantaxtilh xtamalaknun. ¿La limasiyalh Abrahán pi xkgalhkgalhima kachikin o Tamapakgsin nema xlakkaxwilinit Dios? Pulana, ni makgtapakgsilh ktamapakgsin xalak katiyatni. Laksakli ni lakatum natawila chu ni tatayalh chatum mapakgsina. Ni lakpuwa namalakatsuki akgtum tamapakgsin. Wata ankgalhin kgalhakgaxmatli Jehová chu kgalhkgalhilh xmakgantaxtilh xtamalaknun. Chuna limasiyalh pi lu xkanajlani Dios. w20.08 3:4, 5

Jehová malaknu pi kxtamapakgsin Cristo niti katiwa: «Ktatatla» (Is. 33:24). Wa xlakata, akxni Dios nakamalakastakwani tiku nikgonita, nialh katikgalhikgolh tajatat. Pero chuntiya nakgalhikgo talakgalhin. Komo nialh xkgalhikgolh talakgalhin, xfamiliajkan nila xkalakgapaskgolh. Akxni namapakgsinan Cristo Akgtum Mil Kata latamanin tsinu tsinu nialh katikgalhikgolh talakgalhin. Akxni nasputa uma kilhtamaku Jesús namakamaxki Tamapakgsin xTlat. Chu makgantaxtinita nawan xtalakaskin Dios, nema makgtanuma pi latamanin nialh nakgalhikgo talakgalhin (1 Cor. 15:24-28; Apoc. 20:1-3). Kalilakpuwaw la namakgkatsiyaw akxni nakaʼakxilhparayaw tiku lu xkapaxkiyaw. ¿Napaxuwayaw? ¿Natasayaw xlakata paxuwayaw? ¿Lu napaxuwayaw chu asta nakilhtliniyaw Jehová? Tuku liwana katsiyaw wa pi lu napaxkiyaw xalakgalhamanina kinTlatkan chu xapaxkina xKgawasa xlakata tlawakgolh pi naʼanan talakastakwanat. w20.08 16, 17:9, 10

Apóstol Pablo kamakgpuwantinilh kstalaninanin Cristo nalilakpuwankgo komo tlan kskujnanikgolh Jehová maski nina xmakgaxtokgkgo (1 Cor. 7:8, 9). Pablo ni kalakgmakgalh tiku nina xmakgaxtokgkgo. Laksakli Timoteo, tiku nina xmakgaxtokga, xlakata xmakgantaxtilh lu xlakaskinka taskujut (Filip. 2:19-22). Lu nitlan nalakpuwanaw pi chatum tala kaj xlakata makgaxtokga o ni, tlan o nila wi tuku namakgantaxti (1 Cor. 7:32-35, 38). Jesús chu Pablo nikxni masiyakgolh pi xtalakaskin natamakgaxtokgkan o ni. Wa xlakata, ¿tuku tlan nawanaw xlakata tamakgaxtokgat chu xlakata tiku nina makgaxtokgkgo? Revista La Atalaya 1 xla octubre kata 2012 liwana lichuwinalh: «Akgtum xtamaskiwin Dios tamakgaxtokgat chu xlakata tiku nina makgaxtokgkgo. [...] Jehová ni lakpuwan pi tiku nina makgaxtokgkgo xlimaxanatkan o xlilipuwanatkan kaj xlakata nina makgaxtokgkgo». Uma masiya pi talakaskin nakamaxkiyaw kakni natalan tiku nina makgaxtokgkgo. w20.08 28:8, 9

Kmakgapitsi países, latamanin xatapaxuwan makgamakglhtinankgo xalaktlan tamakatsinin. Uma wa tuku maklakaskinkgo. Kmakgapitsi kachikinin latamanin ni lu katsiputunkgo tuku wan Biblia. Maski niku lichuwinanaw Dios latamanin ni kgaxmatputunkgo, Jehová lakaskin pi chuntiya kalichuwinaw asta akxni xla nawan pi nialh natlawayaw uma taskujut. Akxni nachin kilhtamaku nema Jehová lakkaxwilinit, nialh katilichuwinaw xalaktlan tamakatsin chu «namin lisputni» (Mat. 24:14). Jesús wa tuku xʼama la kxaʼawatiya kilhtamaku chu la xʼamakgo likatsikgo latamanin. Na lichuwinalh pi putum umakgolh xtlawalh pi kstalaninanin nialh xlichuwinamputunkgolh Dios. Wa xlakata kawanilh: «Skgalalh katawilatit» (Mat. 24:42). La uku, na anan tuku xʼanan kxkilhtamaku Noé nema tlawalh pi latamanin ni xkgaxmatnikgolh (Mat. 24:37-39; 2 Ped. 2:5). Wa xlakata, chuntiya tlawaputunaw taskujut nema Jehová kinkalakgayawanitan. w20.09 8:1, 2, 4

Satanás «lu sitsima» chu nitlan komo xlakpuwaw pi nitu kintikatlawanin (Apoc. 12:12). Kilhtamaku nema aku mima, nakinkaliʼakxilhkanan komo ni namakgxtakgaw Dios. Nialh makgas «naʼanan lhuwa tapatin». Biblia wan: «Chuna la ni makgstum chuna lanit lata kxkilhtsukut kakilhtamaku» (Mat. 24:21). Max tiku xalak kifamiliajkan nakinkatalatlawakgoyan chu max nialh katimastaka talakaskin natlawayaw kintaskujutkan (Mat. 10:35, 36). Kalilakpuwaw uma: «¿Nakstalani xliʼakxilhtit mapakgsina Asá chu naklipawan pi Jehová nakimakgtaya chu nakinkuentajtlawa?» (2 Crón. 14:11). Jehová lakaskin nakatsiyaw tuku natlawayaw kkilhtamaku nema talakatsuwima chu la uku matliwakglhma kintakanajlakan. Maklakaskima «skujni xatalipaw chu xaskgalala» xlakata nakinkamaxkiyan “taway kxkilhtamaku” chu tliwakglh natawilayaw (Mat. 24:45). Pero akinin kinkalakgchanan namatliwakglhaw kintakanajlakan (Heb. 10:38, 39). w20.09 18, 19:16-18

Akxni tatalakxtumi xtalakaskin Jehová limaklakaskin xʼespíritu santo xlakata natlawa pi tiku kgalhi limapakgsin natlawakgo xtalakaskin. Chuna la latamanin pawaxlinkgo kgalhtuchokgo anta niku xlakan lakaskinkgo, Jehová limaklakaskin xʼespíritu xlakata nakalakgpalini xtalakapastaknikan mapakgsinanin chu namakgantaxtikgo xtalakaskin. Akxni chuna la, umakgolh latamanin laksakkgo tuku nakamakgtaya xkachikin Dios (katamalakxtupi Esdras 7:21, 25, 26). ¿Tuku tlan natlawayaw akinin? Natlawayaw oración xpalakatakan «mapakgsinanin chu putum tiku kgalhikgo limapakgsin» akxni wi tuku laksakkgo nema makgtanuma taskujut xla kintakanajlakan (1 Tim. 2:1, 2, nota; Neh. 1:11). Chuna la tlawakgolh xapulana kstalaninanin Cristo, lu tasaskiniyaw Dios kʼoración xpalakatakan kinatalankan tiku wilakgolh kpulachin (Hech. 12:5; Heb. 13:3). w20.11 15:13, 14

Akxni tamunu tiku xlimakgalhtawakgemaka Biblia, lu paxuwayaw, liwaka komo akinin xmakgalhtawakgemaw (1 Tes. 2:19, 20). Kstalaninanin Cristo tiku aku tamunukgonit litaxtukgo la “cartas nema tlan lichuwinan” xatlan xtaskujutkan xmakgalhtawakgenakan, chu xtaskujut putum congregación (2 Cor. 3:1-3). Lu lipaxuwayaw akxilhaw pi max kʼakgtati kata, akgatunu papaʼ liwaka 10,000,000 la xlimakglhuwa kamakgalhtawakgeka latamanin xlikalanka katiyatni. Chu akgtati kata nema titaxtunit, akgatunu kata tamunukgolh liwaka 280,000 latamanin. Uma limasiya pi lhuwaku tiku max tlan natamunukgo. ¿La nakamakgtayayaw? Jehová lu xakgalhkgalhina chu kamaxkimajku talakaskin kstalaninanin Cristo nalitaxtukgo. Nialh lhuwa kilhtamaku anan, wa xlakata kamakgtayaputunaw lakapala namatliwakglhkgo xtakanajlakan chu natamunukgo (1 Cor. 7:29a; 1 Ped. 4:7). w20.10 6:1, 2

Mapakgsina Saúl ni kgalhakgaxmatli Jehová. Chu akxni palakachuwina Samuel stakyawalh, ni litayalh tuku nitlan xtlawanit. Wata atanu tuku likilhalh chu chuna limasiyalh pi ni lu xlakaskinka xliʼakxilha tuku nitlan kitaxtu komo ni kgalhakgaxmatnankan, chu na kalimawakalh amakgapitsin tuku xla xtlawanit (1 Sam. 15:13-24). Ni xlimakgtumku chuna xtlawanit (1 Sam. 13:10-14). Lu nitlan pero mastalh talakaskin pi xnaku tlankajwa xwa. Xlakata ni lakgpalilh xtapuwan, Jehová palha stakyawalh chu lakgmakgalh. Tlan nalitamakgtayayaw tuku titaxtulh Saúl komo nalilakpuwanaw umakgolh takgalhskinin: «¿Wi tuku klikilhan xlakata ni naklilatama xtastakyaw kBiblia? ¿Ni xlakaskinka kliʼakxilha tuku nitlan kitaxtu akxni ni kgalhakgaxmatnankan? ¿Kkalimawaka amakgapitsin tuku akit ktlawa?». Komo chuna, talakaskin nalakgpaliyaw kintapuwankan. Komo nichuna natlawayaw, kinakujkan tlankajwa nawan chu Jehová nialh xʼamigo kintikaliʼakxilhni. w20.11 20:4, 5

Kalaksakti tiku naskujnaniya. Talakaskin miʼakstu nalakputsananiya tiku Jehová, tuku xtalakaskin chu la tlan namakgantaxtiya (Rom. 12:2). Komo chuna natlawaya tlan nalaksaka tuku tlakg xlakaskinka kmilatamat: naskujnaniya Jehová (Jos. 24:15). Komo ankgalhin nalikgalhtawakgaya Biblia chu nalilakpuwana tuku lichuwinan, tapaxkit nema kgalhiniya chu mintakanajla tlakg natatliwakglhkgo. Wa pulana kawili kmilatamat natlawaya xtalakaskin Jehová. Xkakilhtamaku Satanás malaknu pi komo nalimaklakaskina tuku tlan tlawaya xlakata miʼakstu nalitamakgtayaya, nakgalhiya tapaxuwan. Pero tiku liskujkgo lhuwa tuku nakgalhikgo lu nitlan kakitaxtuni (1 Tim. 6:9, 10). Pero komo nakgalhakgaxpata Jehová chu nalaksaka wa pulana nawiliya xtalakaskin, tlan nakitaxtuniyan chu nakgalhiya liskgalala (Jos. 1:8). w20.10 30:17, 18

Kxapulana siglo, tamakatsinin nema Jesús lichuwinalh kamaxkilh takgalhkgalhin latamanin. Kawanilh kstalaninanin pi xtlawakgolh taskujut nema xla xmatsukinit chu xlichuwinankgolh kxlikalanka kkatiyatni (Hech. 1:8). Nila xʼakstukan xtlawakgolh, xmaklakaskinkgo espíritu santo, «makgtayana» nema xkamalaknuninit (Juan 14:26; Zac. 4:6). Makglhtinankgolh espíritu santo kPentecostés kkata 33 chu tunkun tsukukgolh lichuwinankgo Dios, ni makgas kilhtamaku titaxtulh lhuwa tiku makgamakglhtinankgolh xalaktlan tamakatsinin (Hech. 2:41; 4:4). Akxni tsukuka kaputsastalanikan, ni pekuankgolh. Wata skinikgolh tamakgtay Dios chu wanikgolh: «Kamasta talakaskin pi milakskujnin chuntiya ni xatapekua nalichuwinankgo mintachuwin». Kamaxkika espíritu santo chu «ni xpekuankgo akxni xlichuwinankgo xtachuwin Dios» (Hech. 4:18-20, 29, 31). w20.10 20, 21:4, 5

¿Tuku xlakata liwana katsiyaw pi Jehová maxkipa xlatamat? Lhuwa latamanin akxilhkgolh Jesús akxni xlakastakwananita (1 Cor. 15:5-7). Xapulana tiku lichuwinalh apóstol Pablo pi akxilhli Jesús akxni xlakastakwananita, wa Cefas, o apóstol Pedro. Makgapitsin xtamakgalhtawakgen na lichuwinankgolh pi Pedro akxilhli Jesús akxni xlakastakwananita (Luc. 24:33, 34). Nachuna, «kgalhkutiy» xʼapóstoles akxilhkgolh. Alistalh, «katasiyanilh liwaka akgkitsis ciento natalan tiku lakatum niku xtamakxtumikgonit», max kʼGalilea nema talichuwinan kMateo 28:16-20. Na «tasiyanilh Santiago», max xtutala, tiku ni xkanajla pi Jesús wa Mesías xwanit (Juan 7:5). Pero akxni akxilhli pi xlakastakwananita, liwana katsilh pi wa Mesías xwanit. Akxni Pablo tsokgli uma carta, max kkata 55, chuntiya xlamakgolh lhuwa tiku xʼakxilhkgonit Jesús akxni xlakastakwananita. Wa xlakata, tiku ni liwana xkanajlakgo uma tlan xkatachuwinankgolh. w20.12 3:5, 7, 8

Tuwa tamakgkatsi nakgalhiyaw tlan talakapastakni akxni tatatlayaw, liwaka komo kgalhiyaw tuwa tajatat. Wa xlakata kaskiniw Jehová tamakgtay, xla ni kintikamakglhtin kintajatatkan, pero nakinkamakgoxamixiyan chu nakinkamaxkiyan litliwakga (Sal. 94:19). Max namaklakaskin chatum tala xlakata nakinkamakgtayayan kchiki. Max na nakamaklakaskin xlakata nakinkatatlawakgoyan oración. Asta max natlawa pi nalakapastakaw tuku min kxTachuwin, chuna la takgalhkgalhin xlakata latamat niku nialh katiʼanalh takatsanajwat chu tajatat (Rom. 15:4). Max namakgkatsiyaw pi nila lhuwa skujnaniyaw Dios, chu uma nakinkamaxlajwaniyan. Laurel, chatum tala puskat tiku 37 kata maklakaskilh akgtum máquina xlakata tlan xjaxanalh, xkgalhi cáncer, makglhuwa chukuka, chu xkgalhi tajatat kxtiyatliwa. Pero chuntiya xlichuwinan Dios. Xkalitachuwinan Dios enfermeros chu xmakgtayananin makuchinanin tiku xʼankgo makgtayakgo kxchik. Kamakgtayalh 17 latamanin. w20.12 24:9; 25:12

Apóstol Pablo xmaklakaskin tamakgtay. Max kkata 56, lhuwa latamanin xwataxtukgolh kxtemplo Jerusalén chu xmakgniputunkgo. Lichali, akxni linka kxlakatin xanaPuxkun Jueces, xtalamakgasitsin atsinu ni makgnikgolh (Hech. 21:30-32; 22:30; 23:6-10). Ama kilhtamaku, max xlakapastaka: «¿La xlilhuwa kilhtamaku chuntiya naktayani?». Tasiya pi xmaklakaskin tamakgtay. ¿Tuku tamakgtay makglhtinalh? Akxni tamaknuka kpulachin, kkatsisni Malana Jesús tasiyanilh chu wanilh: «¡Katatliwakglhti! Xlakata chuna la liwana lichuwinampat kimpalakata kJerusalén, nachuna nakilichuwinana kRoma» (Hech. 23:11). Uma wa tuku xlikana xmaklakaskima. Jesús wanilh lakwan tachuwin xlakata xlichuwinanit xpalakata kJerusalén chu wanilh pi nitu xʼama akgspula chu xʼama chan kRoma. Akxni kgaxmatli umakgolh tachuwin, max lu tlan makgkatsilh xtachuna la chatum aktsu skgata tiku chaxnit xtlat. w20.11 12:1; 13:3, 4

Takgalhkgalhin nema kinkamaxkiyan xTamapakgsin Dios kinkamakgtayayan ni lu nalakgaputsayaw maski nakgalhiyaw taʼakglhuwit. Kalilakpuwanti tuku Jehová malaknunit, pi kkilhtamaku nema aku mima nialh katikgalhiw nixatlan talakapastakni (Is. 65:17). Kalilakpuwanti pi wilapi kxasasti kakilhtamaku niku anan takaksni chu nialh anan tuku nitlan (Miq. 4:4). Na nalimatliwakglha mintakgalhkgalhin komo nakalitachuwinana amakgapitsin. Katlawa putum tuku matlaniya xlakata nalichuwinana Dios chu namakgalhtawakgenana. Komo chuna natlawaya “liwana nalipawana asta kxlisputni pi nakgantaxtu tuku kgalhkgalhipat” (Heb. 6:11). Akxni natalakatsuwitilha lisputni, tlakg natitaxtuyaw tuku tuwa, chu max lu nalakgaputsayaw. Komo nalipawanaw Jehová, natayaniyaw taʼakglhuwit chu ni lu nalakgaputsayaw. Kalimasiyaw pi lipawanaw uma xtamalaknun: «Lakgtliwakgan nawanatit komo kaks natayayatit chu nakilipawanatit» (Is. 30:15). w21.01 7:17, 18

Kaʼakxilhwi pi Santiago 5:11 tamalakxtumi xtapaxkit Jehová atanu xtayat nema lu lakgatiyaw: xtalakgalhaman (Éx. 34:6). Pulaktum la limasiya uma tayat wa akxni kinkatapatiyan kintalakgalhinkan (Sal. 51:1). Akxni Biblia wan pi wi tiku lakgalhamanan ni kaj kilhchanima pi tapatinan. Talakgalhaman akgtum tayat nema taxtuyacha kxnaku chatum lataman chu makgpuwantini namakgtaya tiku patinama. Biblia wan pi tuku makgpuwantini Jehová nakinkamakgtayaputunan tlakg tliwakga nixawa tuku makgkatsi chatum tse xpalakata kskgata (Is. 49:15). Akxni patinanaw, Jehová kinkamakgtayaputunan xlakata kinkalakgalhamanan (Sal. 37:39; 1 Cor. 10:13). Na tlan nalakgalhamananaw chuna la Jehová komo nakatapatiyaw kinatalankan chu nialh nakasitsiniyaw komo kinkatlawanikgon tuku nitlan (Efes. 4:32). Tlakg nakalimasiyaniyaw pi kalakgalhamanaw komo nakamakgtayayaw akxni natitaxtukgo taʼakglhuwit. Chuna tlawayaw la Jehová, tlakg xatlan liʼakxilhtit xlakata tiku paxkinan (Efes. 5:1). w21.01 21:5

Chatum xʼakgxakga familia ni lu lhuwa kilhtamaku xlimaxtut xlakata naskuja, xlakata max uma natlawa pi nialh kuenta natlawa xtakanajla xfamilia, tuku makgkatsi, la namasiyani chu nastakyawa. Jehová kinkamasiyaniyan chu kinkastakyawayan xlakata tlan nakinkakitaxtuniyan (Heb. 12:7-9). Xtachuna la xTlat, Jesús kalimasiyanilh tapaxkit akxni kamasiyanilh chu kastakyawalh tiku xtapakgsinikgo (Juan 15:14, 15). Xla palha stakyawanan, pero na limasiya tapaxkit (Mat. 20:24-28). Katsi pi makglakgalhinanin akinin chu tlawayaw tuku nitlan (Mat. 26:41). Xʼakgxakga familia tiku stalani xliʼakxilhtit Jehová chu Jesús katsi pi xpuskat chu xkamanan makglakgalhinanin chu ni lu kasitsini (Col. 3:19). Wata tlawa tuku lichuwinan Gálatas 6:1 akxni kastakyawa limasiya pi kgalhi «tsatata naku», chu ni patsankga pi xla na makglakgalhina. Xtachuna la Jesús, katsi pi tlakg tlan nakitaxtu komo wa nawili xaliʼakxilhtit akxni namasiya. w21.02 6, 7:16-18

Jehová maklakaskilh talakgmaxtut xlakata natamawaxtu xlatamatkan putum tiku makgtapakgsikgo kcongregación chu tiku kanajlanikgo Jesús (Mar.10:45; Hech. 20:28; 1 Cor. 15:21, 22). Xlakata Cristo nilh kimpalakatakan, lakgchan pi Jehová xʼakgxakga congregación xlimaxtulh. Wa xlakata, Jesús lakgchan nawili limapakgsin la nalikatsikgo latamanin, familias chu putum congregación, chu lakgchan nawan pi kamakgantaxtika (Gál. 6:2). Pero ni kaj kinkawiliniyan limapakgsin: kinkakuentajtlawayan chu kinkamaxkiyan tuku maklakaskinaw (Efes. 5:29). Natalan lakpuskatin limasiyakgo pi maxkikgo kakni xlimapakgsin Cristo akxni stalanikgo xtapulalit tiku kalakgayawakanit congregación. Natalan lakchixkuwin limasiyakgo pi akgatekgskgo tuku kilhchanima kgalhikan limapakgsin akxni kamaxkikgo kakni natalan lakpuskatin. Akxni putum tiku xalak congregación liwana akgatekgsaw chu kamaxkiyaw kakni tiku kalakgayawakanit limapakgsin, tawila takaksni. Chu tuku tlakg xlakaskinka wa pi malankiyaw kinTlatkan Jehová. w21.02 18, 19:14-17

Akgtum kilhtamaku, akxni David chu ksoldados xtsalanimakgolh Saúl, makgxtakgkgolh xfamiliaskan chu ankgolh talatlawanankgo. Pero makgapitsin xtalatlawananinkan ankgolh kxchikkan chu kachilinkgolh xfamiliaskan. David tlan xtilakpuwa pi komo xla chatum soldado tiku lu xkatsi talatlawanan wi tuku tlan xlakkaxwililh xlakata xʼalh kalakgmaxtu. Pero nichuna tlawalh, wata putsalh xtapulalit Jehová, kgalhskilh: «¿Kkastalani umakgolh talatlawananin?». Jehová wanilh pi xkastalanilh chu pi tlan xʼama kitaxtuni (1 Sam. 30:7-10). ¿Tuku tlan nakatsiniyaw xlakata uma? Kaputsa tastakyaw akxni wi tuku nina laksaka. Kgawasa, kakatakgalhchuwinanti minatlatni o lakgkgolotsin xalak congregación xlakata xlakan namaxkikgoyan laktlan tastakyaw. Jehová kalaksaknit chu kalipawan, wix na tlan nakalipawana. Jehová kawilinit kcongregación xlakata akgtum tamaskiwin nalitaxtukgo (Efes. 4:8). Tlan tuku nalaksaka komo na nakgalhiya takanajla chuna la xlakan chu komo nalilatapaya xtastakyawkan. w21.03 4, 5:10, 11

Jesús wa pi komo ni nalilatamayaw tuku katsiniyaw, litaxtuyaw xtachuna la chixku tiku tlawa xchik kxkgalhni muntsaya. Palha skuja, pero nitu litaxtu. Xlakata akxni min lanka unisen, xchik lakxla (Mat. 7:24-27). Nachuna, komo ni lilatamayaw tuku katsininitaw, nitu katilitaxtulh tuku tlawanitaw. Akxni natitaxtuyaw tuku tuwa o nakinkaputsastalanikanan, kintakanajlakan ni kintikamakgtayan. Pero komo nalakputsananiyaw chu nalilatamayaw tuku katsiniyaw, tlan tuku nalaksakaw, nakgalhiyaw takaksni chu kintakanajlakan natatliwakglha (Is. 48:17, 18). Xlakata ni namakgxtakgaw Jehová akxni natitaxtuyaw tuku tuwa, talakaskin natlawaniyaw oración chu ankgalhin nalikgalhtawakgayaw xTachuwin. Ni kilipatsankgatkan pi tuku tlakg xlakaskinka wa namalankiyaw Jehová. Liwana katsiyaw pi xla nikxni kintikamakgxtakgni chu nila tiku natlawa pi xla nialh nakinkalimasiyaniyan xtapaxkit (Heb 13:5, 6). w21.03 15:6; 18:20