Junio

Makgalhtawakgenananin xlilat nakalilakgaputsakgo xtamakgalhtawakgenkan. Xlakan tuwa makgkatsikgo nakamakgxtakgkgo xʼamigoskan chu nalakgpalikgo xlatamatkan xlakata naskujnanikgo Jehová. Xalaktlan makgalhtawakgenanin kamalakgapasnikgo natalan tiku nakawilinikgo xatlan liʼakxilhtit. Chuna tlan nakamaxkikan tamakgtay xaʼespiritual nema kajwatiya masta xkachikin Dios. Lakaskinaw pi tiku kalimakgalhtawakgekan Biblia namakgkatsikgo pi makgtapakgsikgo kcongregación chu makgtapakgsikgo kkifamiliajkan xaʼespiritual. Komo nakamakgtayayaw nalakgatikgo xkachikin Jehová, tlakg ni tuwa nakamakgxtakgkgo xʼamigoskan tiku ni skujnanikgo Jehová (Prov. 13:20). Komo xapulana xʼamigoskan nakalakgmakgankgo, liwana nakatsikgo pi tlan nakatekgskgo xaxlikana amigos kxkachikin Jehová (Mar. 10:29, 30; 1 Ped. 4:4). w20.10 17:10, 11

Talakaskin pi xʼamigos Jesús nawanaw xlakata tlan natalalinaw Jehová. ¿Tuku xlakata chuna wanaw? Kaʼakxilhwi pulaktiy. Pulana, Jesús kawanilh kstalaninanin: «XaTlat kapaxkiyan, xlakata wixin kimpaxkinitantit» (Juan 16:27). Chu wampa: «Kaj kimpalakata tlan lakgankan xaTlat» (Juan 14:6). Komo ni xʼamigos Jesús akinin nila xʼamigos Jehová katilitaxtuw, xtachuna la komo xtanuputuw kʼakgtum chiki chu ni xlaktanuputuw kmalakcha. Jesús maklakaskilh atanu liʼakxilhtit akxni wa pi xtachuna «malakcha niku laktanukgo borregos» (Juan 10:7). Xlipulaktiy wa pi Jesús liwana masiyalh xtayat xTlat. Kawanilh kstalaninanin: «Putum tiku kiʼakxilhnit akit, na akxilhnit xaTlat» (Juan 14:9). Xlakata liwana nalakgapasaw Jehová talakaskin nalakgapasaw Jesús. Akxni tlakg nakatsiyaw xpalakata, tlakg napaxkiyaw. Chu akxni tlakg nalakgtalakatsuwiyaw Jesús, tlakg napaxkiyaw xTlat. w20.04 21:5, 6

¿Nialhla takiya kmimputama, wila ksilla de ruedas, nialh kgalhiya litliwakga chu nialh liwana lakawanana? ¿Tlan nakatakgosnana tiku ni tatatlakgo? Chuna. Lhuwa tiku linkgoya kata chu makgapitsi tiku tatatlakgo na makgkgosnamakgolh niku nakamaxkikan latamat, pero ni kaj xʼakstukan xlitliwakgakan, wata wa Jehová kamakgtaya. Kgaxmatkgo tamakxtumit kteléfono o kʼInternet. Makgtayanankgo xlakata nakamakgalhtawakgekgo latamanin, tiku xalak xfamilia chu makuchinanin. Ni xlajwananaw kaj xlakata nila lhuwa tuku tlawayaw chu ni lakpuwanaw pi nila chuntiya nakgosnanaw ktiji nema linan klatamat. Jehová kinkapaxkiyan xlakata kanajlaniyaw chu xlakata nikxni makgxtakgnitaw. Akxni chuna titaxtuyaw tlakg lakaskinaw xtamakgtay chu xla nikxni kintikamakgxtakgni (Sal. 9:10). Xla ankgalhin lakatsu kinkatawilan. w20.04 29, 30:16, 17

¿Tuku tlan nalitachuwinanaw chatum lataman tiku kgalhiya xtakanajla? Kaputsaw tuku nalichuwinanaw. Max xla kanajlani chatum Dios, katsi pi Jesús kinkalakgmaxtun ktalakgalhin o lakpuwan pi namasputukan tuku nitlan lama. Kalimaklakaskiw tuku na kanajlayaw xlakata tlakg tlan nalitachuwinanaw Biblia. Kalilakpuwaw pi max lataman ni kanajla putum tuku masiyakan kxtakanajla. Wa xlakata akxni nakatsiyaw niku tapakgsi, kaliskujwi nakatsiyaw tuku kanajla. Chatum tala tiku misionero litaxtu wan pi makgapitsi kanajlanikgo trinidad pero ni kanajlakgo pi xaTlat, xaKgawasa chu espíritu santo kaj chatum litaxtu. Chu wampara: «Komo nakatsiya uma, namakgtayayan tlakg ni tuwa nalitachuwinana Dios». Wa xlakata, kaliskujwi nakatsiyaw tuku xlikana kanajlakgo latamanin. Chuna, nalitaxtuyaw la apóstol Pablo tiku “tanu tanu tuku litaxtulh” xpalakatakan tanu tanu latamanin (1 Cor. 9:19-22). w20.04 10:9, 10

Daniel chu Juan lichuwinankgo pi tiku skujnanikgo Jehová chu Jesús nalakgtaxtukgo kʼuma xakatuwa kilhtamaku. Wa xlakata ni napekuaniyaw kilhtamaku nema talakatsuwima. Daniel lichuwinan pi xtukuwanikan tiku nalakgtaxtukgo «tsokgwilikanit klibro». ¿Tuku kilitlawatkan xlakata kintukuwanikan anta natawila? Talakaskin nalimasiyayaw pi kanajlaniyaw Jesús, xBorrego Dios (Juan 1:29). Talakaskin natamakamastaniyaw Dios chu natamunuyaw (1 Ped. 3:21). Nachuna talakaskin pi nakamakgtayayaw amakgapitsin xlakata nalakgapaskgo Jehová. Talakaskin pi la uku namatliwakglhaw la lipawanaw Jehová chu xkachikin nema xla pulalima. La uku talakaskin natatayayaw xTamapakgsin Dios. Komo chuna natlawayaw, nalakgtaxtuyaw akxni xTamapakgsin Dios nakamalakgsputu mapakgsina xalak norte chu mapakgsina xalak sur. w20.05 16:18, 19

Adán chu Eva xkatsikgo xtukuwani Jehová chu lhuwa tuku xkatsikgo xlakata Jehová, la komo xla wa Malakatsukina chu wa kamaxkilh latamat, lu xastlan paraíso niku xlatamakgolh chu xtamakgaxtokgatkan (Gén. 1:26-28; 2:18). Pero, ¿chuntiya xlilakpuwankgo tuku Jehová xtlawanit xpalakatakan? ¿Chuntiya matliwakglhkgolh tapaxkit nema xkgalhinikgo? Takgalhtilh uma akxni xtalamakgasitsin Dios litsakgsalh xtakanajlakan. Satanás limaklakaskilh tantum luwa chu wanilh Eva: «¿Xlikana Dios kawanin pi ni nawayatit xtawakat putum kiwi nema wilakgolh kjardín?» (Gén. 2:16, 17; 3:1). Satanás tlawalh akgtum takgalhskinin nema xlimasiya pi xlimawakama Dios akgtum taʼakgsanin. Dios wa pi tlan xwakgolh xtawakat putum kiwi nema xwilakgolh, pero kajwatiya xtawakat kgantum kiwi ni xliwatkan xwanit (Gén. 2:9). Satanás maʼakgatekgsninalh pi Dios nitu xkalimasiyaninit xtalakgalhaman. Eva max xlakpuwan pi Dios wi tuku ni xkamaxkima. w20.06 3:8, 9

Wilakgolh kskujnin Jehová tiku lakpuwankgo pi nitlan tuku katlawaninit chatum tala. Apóstol Pablo lichuwinalh pi max namin kilhtamaku lakgchan nawanaw pi nitlan tuku kinkatlawanin. Max asta kinkatlawanikanitan tuku ni xaʼakgstitum. Pero komo ni kuenta natlawayaw max nasitsiniyaw chu asta natamakgatliniyaw xkachikin Jehová. Pablo, chatum tala xalak Sudamérica limawakaka tuku nitlan chu uma tlawalh pi xmakglhtika tuku xlakgaya kcongregación. ¿Tuku tlawalh? Xla wan: «Lu xaksitsinit chu asta ktsukulh tamakgatlini congregación». Tiku tlawakgolh lanka talakgalhin makgasa max lakpuwankgo pi chuntiyaku linkgo kuenta chu asta lakpuwankgo pi ni kalakgchan pi Dios nakapaxki. Asta maski nitlan limakgkatsikgolh xtalakgalhinkan chu kalimasiyanika talakgalhaman max lakpuwankgo pi nialh xlilat namakgtapakgsikgo kxkachikin Dios. ¿Tuku lakpuwanaw xpalakata natalan tiku chuna titaxtukgo? w20.06 19:6, 7

Talakaskin nakatsiyaw akxni nala tuku nitlan chu nakatsiyaw tuku natlawayaw (Heb. 5:14). Liwana kililaksakatkan tuku nalilakgastananaw. Ktelevisión taxtukgo programas chu películas nema liminkgo talakgxtumit xalimaxana. Kstalaninanin Cristo lakgmakganaw umakgolh lilakgastan nema max tsinu tsinu namaxlajwani chuna la paxkiyaw Jehová (Efes. 5:5, 6). Na talakaskin naʼakgatekgsaw pi tuku malakgatumikgo apóstatas lu nitlan tuku tlawaninan, natlawaputunkgo pi ni nakanajlaniyaw xkachikin Jehová chu kinatalankan (1 Tim. 4:1, 7; 2 Tim. 2:16). Umakgolh taʼakgsanin max namaxlajwani kintakanajlakan. Ni kamastaw talakaskin pi nakinkaʼakgskawikgoyan «tiku taxkajwanikgonit xtalakapastaknikan chu tiku nialh akgatekgskgo xaxlikana» chu kaj wiliputunkgo taʼakglhuwit (1 Tim. 6:4, 5). Xlakan lakaskinkgo pi kakanajlaw xtaʼakgsaninkan chu ni kakalipawaw kinatalankan. w20.09 29:13, 15

Talakaskin pi tiku makgaxtokgkgo nalapaxki chu nalamaxki kakni (Efes. 5:33). Biblia masiya pi tlakg kalilakgaputsaw nakamaxkiyaw tuku maklakaskinkgo amakgapitsin (Hech. 20:35). Xlakata nalalimasiyanikgo tapaxkit chu kakni, xlitaktujutkan. Lhuwa paxuwakgo xlakata taktujukgo. Steven wan: «Komo xchatiykan nalaʼakxilhkgo la tiku akxtum tapakgsikgo, nalamakgtayakgo, liwaka akxni naʼanan taʼakglhuwit. Chuna ni katilakpuwankgolh “¿tuku tlakg tlan kinkitaxtuni?” wata nalakpuwankgo “¿tuku tlakg tlan nakinkankitaxtuniyan?”». Xpuskat, Stephanie, nachuna lakpuwan. Xla wan: «Niti lakgati akxtum natatawila tiku talatlawa. Akxni ni akxtum tuku klakpuwanaw, ktsukuyaw lilakpuwanaw tuku xlakata. Ktlawayaw oración, kputsayaw tamakgtay klikgalhtawakga chu klatachuwinanaw. Kinchatiykan klakkaxtlawayaw taʼakglhuwit». Ktamakgaxtokgat tlakg naʼanan tapaxuwan komo taktujukgo. w20.07 4:5, 6

Akxni naskujnaniyaw Jehová ni nalipawanaw kilitliwakgakan chu tuku tlan tlawayaw. Apóstol Pablo lu xkgalhtawakganit, xlakata wa Gamaliel tiku xmakgalhtawakgena xwanit, chatum pulalina judío (Hech. 5:34; 22:3). Chu milh kilhtamaku, Pablo na lu xlakaskinka litaxtulh nixawa atanu judíos (Hech. 26:4). Pero uma ni tlawalh pi xʼakstu xlipawanka. Pablo xatapaxuwan lakgmakgalh tuku xtlawa pi lanka nalitaxtu (Filip. 3:8; nota). Chu wi tuku tlawalh xlakata kstalanina Cristo xlitaxtulh. Asta kxkachikin lakgmakganka (Hech. 23:12-14). Chu asta romanos tiku xtachiki xwankgonit, wilinikgolh chu tamaknukgolh kpulachin (Hech. 16:19-24, 37). Lu nitlan xlimakgkatsi pi wi tuku nila xtlawa (Rom. 7:21-25). Nikxni mastalh talakaskin pi xtalamakgasitsin o tuku nila xtlawa xmalakgachokgolh, wata wa: «Klipaxuwa pi xaxlajwani akit». Xlakata akxni kxlajwanan xʼakxilha la xmakgtaya xlitliwakga Dios (2 Cor. 4:7; 12:10). w20.07 16:7, 8

La uku, lu talakaskin naliskujaw xlakata nalichuwinanaw xalaktlan tamakatsinin xla Tamapakgsin. Jesús lichuwinalh pi uma taskujut xʼama talakgatumi chu chuntiya xʼamaka tlawakan. Akxni xlakastakwananita, maklakaskilh xlitliwakga xlakata makgapitsin xtamakgalhtawakgen xchipakgolh lhuwa skiti. Limaklakaskilh uma xlakata nakamasiyani pi kskitinanin lakchixkuwin nalitaxtukgo wa tuku tlakg xlakaskinka taskujut (Juan 21:15-17). Akxni xʼamaja kʼakgapun, kawanilh pi taskujut nema xmatsukinit ni kajwatiya kʼIsrael xʼamaka tlawakan (Hech. 1:6-8). Alistalh, maʼakxilhnilh apóstol Juan tuku xʼama kgantaxtu «kxkilhtamaku Malana». Juan akxilhli pi ángeles xpulalimakgo taskujut xlakata xkamakatsinika «xatlan tamakatsinin [...] tiku chuwinankgo tipalhuwa tachuwin chu kachikinin» (Apoc. 1:10; 14:6). Jehová lakaskin pi kamakgtlawaw uma lu xlakaskinka taskujut asta kxlisputni kakilhtamaku. w20.09 9:5

Xfamilia Abrahán titaxtulh tuku lu tuwa. Sara nila xkgalhi kamanan. Akglhuwa kata lu nitlan limakgkatsikgolh uma. Akgtum kilhtamaku, Sara makamaxkilh Abrahán xlakskujni, Agar, xlakata xpuskat xlitaxtulh. Chuna Sara chu Abrahán tlan xkgalhikgolh kamanan. Pero akxni Agar xʼama malakachini Ismael, tsukulh lakgmakgan Sara. Lu tuwa tuku kitaxtulh chu asta Sara tlawalh pi Agar xtsalataxtulh kxchik (Gén. 16:1-6). Milh kilhtamaku Sara xʼama malakachini skgata, tiku Abrahán limapakuwilh Isaac. Abrahán xkapaxki xlakgkgawasan. Pero xlakata Ismael nitlan likatsinilh Isaac, Abrahán katamakxtulh Ismael chu Agar anta kxchik (Gén. 21:9-14). Titaxtulh kilhtamaku, Jehová skinilh Abrahán pi xmakamastalh Isaac (Gén. 22:1, 2; Heb. 11:17-19). Akxni titaxtulh uma, xtalakaskin pi Abrahán xlipawa pi Jehová xʼama makgantaxti tuku xmalaknuninit xpalakata xkamanan. w20.08 4:9, 10

Kalilakpuwaw la napaxuwakgo tiku nalakastakwanankgo akxni namakgxtakgkgo xamakgan xtayatkan chu nalilatamakgo xlimapakgsin Dios. Tiku natlawakgo uma talakgpalit nalakastakwanankgo xlakata nalatamakgo, pero tiku nalakatsalakgo xlimapakgsin Dios ni katikamaxkika talakaskin nawilikgo taʼakglhuwit kParaíso (Is. 65:20; Juan 5:28, 29). Anta kxTamapakgsin Dios, putum naʼakxilhkgo pi tuku wan Proverbios 10:22 xlikana: «Xtasikulunalin Jehová wa tuku tlawa pi lhuwa tuku nakgalhikan, chu xla ni kinkamaxkiyan takatsanajwat». Xlakata xtamakgtay espíritu santo, tsinu tsinu nakgalhikgo xtalakapastakni Cristo chu tsinu tsinu nialh katikgalhikgolh talakgalhin (Juan 13:15-17; Efes. 4:23). Chali chali tlakg tlan nalikatsikgo chu xtiyatliwakan tlakg natatliwakglha. ¡Lu napaxuwakgo! (Job 33:25). w20.08 17:11, 12

Kililakapastakatkan pi makgapitsi natalan nina makgaxtokgkgo xlakata chuna laksakkgonit. Amakgapitsin tamakgaxtokgputunkgo, pero nina tekgskgo tiku natatamakgaxtokgkgo. Amakgapitsin max nikgonita tiku xtamakgaxtokgkgo. Maski chuna, ni xlilat nakakgalhskinaw tuku xlakata, na ni nakawaniyaw pi nakaputsaniyaw. Kalilakpuwaw la nakamamakgkatsiniyaw komo wi tuku nakawaniyaw chu ni kinkaskinikgonitan tamakgtay (1 Tim. 5:13). Kinatalankan tiku nina makgaxtokgkgo, paxtikatsininankgo pi xtapalh kaliʼakxilhaw xlakata kgalhikgo lakwan tayat chu ni xlakata makgaxtokgkgo o ni. Ni kakamamakgkatsiniw pi lilakgalhamanat litaxtukgo. Wata xtapalh kaʼakxilhwi pi ni makgatsankgananikgo Dios. Komo chuna natlawayaw, nikxni katimakgkatsikgolh pi kawanimaw «Ni kkamaklakaskinan» (1 Cor. 12:21). Wata nakatsikgo pi kamaxkiyaw kakni chu xlakaskinka akxilhaw tuku tlawakgo kcongregación. w20.08 29, 30:10, 14

Alistalh, Jesús tasiyanilh apóstol Pablo (1 Cor. 15:8). Pablo, xʼama kxtiji Damasco akxni kgaxmatli xtachuwin Jesús tiku xlakastakwananit chu akxilhli kʼakgapun (Hech, 9:3-5). Uma na limasiyanilh pi Jesús xlakastakwananit (Hech. 26:12-15). Lhuwa latamanin max lu kaks xkamalakawanilh tuku lichuwinalh Pablo, xlakata xla xkaputsastalaninit kstalaninanin Cristo. Akxni katsilh pi Jesús xlikana xlakastakwananit, liskujli xlakata nakamakgtaya amakgapitsin na nakanajlakgo. Akxni xmakatsininama pi Jesús xlakastakwananit, patilh akxni tlawanika tuku nitlan, tamaknuka kpulachin chu makglhuwa atsinu ni xmuxtu kpupunu (1 Cor. 15:9-11; 2 Cor. 11:23-27). Liwana xkanajla pi Jesús xlakastakwananit chu asta tlan xmastalh xlatamat xpalakata tuku xkanajla. ¿Nixlikana pi uma kinkamakanajliyan pi Jesús lakastakwanalh? ¿Chu nixlikana pi matliwakglha kintakanajlakan xlakata naʼanan talakastakwanat? w20.12 3:8-10

Tlan xlilakpuwaw: «¿Kkan kputum tamakxtumit?». Anta kinkamakgpuwantinikanan chuntiya naskujnaniyaw Jehová chu lipaxuwayaw pi akxtum katatawilayaw kinatalankan (Mat. 11:28). Na tlan nalilakpuwanaw uma: «¿Liwana klakkaxwilinit kiʼakstu nakkgalhtawakga?». Komo akxtum katawilaw kifamiliajkan, ¿akgatunu semana kakninaniyaw Dios kfamilia? O komo kiʼakstukan wilaw, ¿limaxtuyaw kilhtamaku nakgalhtawakgayaw chuna la tlawakgo familias? ¿Tlawayaw putum tuku matlaniyaw xlakata nalichuwinanaw Dios chu nakamasiyaniyaw amakgapitsin? ¿Tuku xlakata nalilakpuwanaw uma? Biblia wan pi Jehová lakputsanani tuku wi kkintalakapastaknikan chu kkinakujkan. Nachuna kilitlawatkan (1 Crón. 28:9). Komo talakaskin nalakgpaliyaw tuku tlawaputunaw, kintayatkan o kintalakapastaknikan kaskiniw xtamakgtay Jehová. La uku talakaskin naliskujaw xlakata nakatsiyaw tuku natlawayaw kkilhtamaku nema aku mima. w20.09 19:19, 20

Jesús maklakaskilh liʼakxilhtit xlakata namasiya tuku xlitlawat tiku kstalanina litaxtuputun. Lichuwinalh chatum tiku tlawaputun torre chu chatum mapakgsina tiku natalatlawanan. Wa pi tiku tlawaputun torre pulana xliʼakxilhat komo naʼakchani xtumin chu namasputu, chu mapakgsina pulana xliʼakxilhat komo ksoldados tlan natlajanankgo (Luc. 14:27-32). Nachuna, putum tiku kstalanina Jesús litaxtuputun liwana xlilakapastakat tuku tlan natlawa xlakata namakgantaxti. Xlakata tiku kgalhtawakgama tlan namakgantaxti tuku wa Jesús, talakaskin namakgpuwantiniya nakgalhtawakga akgatunu semana. Xlakaskinka pi makgalhtawakgena liwana nalakkaxwili tuku nalimakgalhtawakgenan. Kalilakpuwanti tuku titaxtuma tiku makgalhtawakgepat, chu la tlan liwana chu ni tuwa namaʼakgatekgsniya xlakata tlan nalilatama (Neh. 8:8; Prov. 15:28a). w20.10 7:5; 8:7

Jesús masiyalh pi kinkalimasiyanitkan latamanin tuku xla limapakgsinalh. Pero, lu xlakaskinka kuentajnatlawayaw pi Jesús ni kajwatiya wa «Kakamasiyanitit putum tuku kkalimapakgsinitan». Wata xla wa «Kakamasiyanitit namakgantaxtikgo putum tuku kkalimapakgsinitan». Komo makgantaxtiputunaw uma, talakaskin nakamasiyaniw tiku kamakgalhtawakgeyaw tuku xlitlawatkan, chu la natlawakgo (Hech. 8:31). “Makgantaxtikan” akgtum limapakgsin kilhchanima kgalhakgaxmatkan. Akxni wi tiku limakgalhtawakgeyaw Biblia, masiyaniyaw tuku lakaskin Dios. Kilimasiyanitkan la nalilatama tuku katsinima (Juan 14:15; 1 Juan 2:3). Xatlan kiliʼakxilhtitkan nalimasiyaniyaw la tlan nalilatama xtastakyaw Biblia kʼescuela, kxtaskujut o la nalaksaka tuku nalilakgastanan. Akxni akxtum tatlawayaw oración tiku makgalhtawakgemaw, tlan naskiniyaw Jehová pi kalipulalilh xʼespíritu santo (Juan 16:13). w20.11 2, 3:3-5

Kstalaninanin Jesús titaxtukgolh tuku tuwa. Ni xʼanan maklhuwa xaSanto Tatsokgni. Ni xkgalhikgo tuku xkamakgtayalh nalikgalhtawakgakgo la akinin. Xtalakaskin xlichuwinankgolh Dios ktanu tanu tachuwin. Maski chuna, xatapaxuwan tlawakgolh tuku xtasiya pi nila xʼamakgo tlawakgo: ni xlimakgas, xkamakatsinikgonit xatlan tamakatsinin putum latamanin (Col. 1:6, 23) La uku, Jehová chuntiya pulalima xkachikin chu maxki litliwakga nema maklakaskin. Jehová maklakaskin Biblia xlakata napulalin xkachikin. Anta talhkatawilanit la Jesús lichuwinalh Dios chu limapakgsin nema kamaxkilh kstalaninanin xlakata xtlawakgolh taskujut nema xmatsukinit (Mat. 28:19, 20). Jehová ni laksakpaxkinan chu wa pi xʼama talichuwinan «xliputum laklanka kachikinin, laklanka familias, [chu] tiku chuwinankgo tipalhuwa tachuwin» (Apoc. 14:6, 7). Lakaskin pi putum latamanin nakgaxmatkgo xlakata Tamapakgsin. w20.10 21:6-8

David chatum chixku tiku xpaxki «xlimapakgsin Jehová» (Sal. 1:1-3). David xkatsi pi Jehová kalakgmaxtu tiku taʼaktujukgo pero kalakgmakgan tiku tlankajwa likatsikgo. Mastalh talakaskin pi xlimapakgsin Jehová nalakgpalini xtapuwan. Tsokgli: «Nakmalanki Jehová, tiku kimaxkinit tastakyaw. Asta kkatsisni kintalakapastakni kistakyawakgo» (Sal. 16:7). Komo taktujuyaw, namastayaw talakaskin pi Biblia nalakgpali nixatlan kintalakapastaknikan. Wa xTachuwin Dios nalitaxtu la akgtum tachuwin nema nakinkawaniyan: «Wa uma tiji. Anta katlawanti». Nakinkamakatsiniyan niku kiliʼanatkan (Is. 30:21). Komo nakgalhakgaxmataw Jehová, lu tlan nakinkakitaxtuniyan (Is. 48:17). Limaxana kitaxtu akxni kinkastakyawakanan, pero komo nakgalhakgaxmataw ni katitalakaskilh pi chuna natitaxtuyaw. Namakgkatsiyaw pi tlakg lakatsu wilaniw Jehová xlakata naʼakxilhaw pi kinkalikatsiniyan la xkamanan tiku kapaxki (Heb. 12:7). w20.11 20:6, 7

Max natalan xalak Corinto na tsukukgolh kgalhikgo uma talakapastakni (1 Cor. 15:12). Max makgapitsin xliʼakxilhkgo talakastakwanat la komo kaj wi tuku xkilhchanima: pi akxni nina kstalaninanin Cristo xlitaxtukgo, la xanin xtatekgskgo; pero akxni kstalaninanin Cristo litaxtukgolh, xtachuna la komo xlakastakwanamparakgolh. Komo ni xkanajlanikgolh talakastakwanat, xtakanajlakan nitu xlitaxtu. Komo Dios ni xtimalakastakwanilh Jesús, nila xtikatapatika xtalakgalhinkan. Tiku ni xkanajlanikgo talakastakwanat nila xkgalhikgo takgalhkgalhin (1 Cor. 15:13-19; Heb. 9:12, 14). Apóstol Pablo akxilhli pi Cristo “xmalakastakwanikanit kkalinin”. Xtalakastakwanat tlakg tlan xwanit, xlakata tiku xkamalakastakwanikanit makgasa niparakgolh. Pablo na lichuwinalh xlakata Jesús pi wa «xapulana lakastakwanalh kkalinin chuna la xapulana tawakat». Wa tiku xapulana lakastakwanalh xlakata chatum espíritu xlitaxtulh chu alh kʼakgapun (1 Cor. 15:20; Hech. 26:23; 1 Ped. 3:18, 22). w20.12 5:11, 12

Kxapulana siglo, Lakgkgolotsin tiku xPulalinankgo, akxtum kskujkgo xlakata lakatitum tuku xtlawakgolh chu xʼanalh takaksni kxkachikin Dios (Hech. 2:42). Akxni xtitaxtuma kata 49 chu analh akgtum taʼakglhuwit xlakata circuncisión, akxilhkgolh tuku xlama chu mastakgolh talakaskin pi espíritu santo xkapulalilh. Komo xʼanalh tapapitsit, nialh tlan xkitaxtulh la xlichuwinankan Dios. Maski apóstoles chu lakgkgolotsin judíos xwankgonit, ni mastakgolh talakaskin pi xtalismaninkan o tiku xkamasiyanikgo xkamatlawilh tuku ni xlilat. Putsakgolh xtapulalit xTachuwin Dios chu xʼespíritu santo (Hech. 15:1, 2, 5-20, 28). Tuku kitaxtulh wa pi Jehová sikulunatlawalh tuku laksakkgolh, chuntiya analh takaksni chu chuntiya lichuwinankgolh Dios (Hech. 15:30, 31; 16:5). La uku, xkachikin Jehová liskujnit xlakata ni akglakgwa tuku natlawakan chu naʼanan takaksni. w20.10 22, 23:11, 12

Max lu lakaskinaw pi kakinkalakgayawakan akgtum taskujut kcongregación o kcircuito. Pero max pulaklhuwa tuku xlakata ni kinkamaxkikanan. Xliʼakxilhtit mapakgsina David lu nakinkamakgtayayan. Lu xtlawaputun xtemplo Dios; pero akxni katsilh pi ni wa xlaksakkanit xlakata natlawa uma taskujut, makgtayalh tiku Dios xlaksaknit. Asta mastalh lhuwa oro chu plata. ¡Lu tlan liʼakxilhtit kinkawilinin! (2 Sam. 7:12, 13; 1 Crón. 29:1, 3-5). Chatum tala xalak Francia tiku wanikan Hugues nialh kgolotsin litaxtulh xlakata lu xtatatla. Nipara tlan xtlawa kxchik nixatuwa taskujut. Xla wan: «Xapulana, lu ktaxlajwanilh chu kmakgkatsilh pi nitu xaklitaxtu. Pero titaxtulh kilhtamaku kkatsinilh nakpaxuwa maski lhuwa tuku nila xaktlawa chu naklipaxuwa tuku tlan xaktlawa chuna la kskujnani Jehová. Akit chuna la Gedeón chu 300 ksoldados: maski lu ktlakgwanit, ni ktitaxlajwanilh» (Juec. 8:4). w20.12 25:14, 15

Klibros nema tsokgli Juan, liwana lichuwinan pi kstalaninanin Cristo kilalimasiyanitkan tapaxkit. Chu kʼEvangelio nema tsokgli tlakg makglhuwa lichuwinan tapaxkit nixawa maktutu Evangelios. Tuku tsokgli, liwana masiya pi tapaxkit xlimakgpuwantinit chatum kstalanina Cristo akxni wi tuku natlawa (1 Juan 4:10, 11). Asta Juan linilh kilhtamaku nakatsini uma. Akxni kgawasaku xwanit, Juan ni putum kilhtamaku limasiyalh tapaxkit. Akgtum kilhtamaku, Jesús chu kstalaninanin xʼamakgo kJerusalén chu titaxtukgolh kSamaria, chu kʼakgtum aktsu xkachikin Samaria ni liwana kamakgamakglhtinanka. Apóstol Juan xlakaskin pi xtaktalh lhkuyat kʼakgapun chu xkamasputulh latamanin xalak uma kachikin (Luc. 9:52-56). Atanu kilhtamaku, xla chu xtala, Santiago, wanikgolh xtsekan pi kskinilh Jesús pi tlan xpaxtutawilakgolh kTamapakgsin. Akxni amakgapitsin katsikgolh, lu sitsikgolh (Mat. 20:20, 21, 24). Maski Juan lhuwa tuku nitlan tlawalh, Jesús xpaxki (Juan 21:7). w21.01 9:3, 4

Akxni wi tuku Jehová laksaka kalilakpuwan amakgapitsin. Xla malakatsukilh latamat, ni kaj xlakata tlan nakitaxtuni, wata xlakata amakgapitsin nalipaxuwakgo latamat. Niti mafuerzajlinilh xmakamilh xKgawasa chu xnilh kimpalakatakan, chuna tlawalh kaj kimpalakatakan. Jesús na wi tuku laksakli xlakata xkamakgtayalh amakgapitsin. Akxni lu xtlakgwanit, ni lakpuwa kaj najaxa, wata laksakli nakamasiyani (Mar. 6:31-34). Chatum tlan xʼakgxakga familia katsi pi tuku tlakg tuwa kitaxtu wa nalaksaka tuku tlan nakitaxtuni xfamilia, wa xlakata ni kaj takgaman liʼakxilha. Lu liskuja ni wa nalaksaka tuku kaj xʼakstu lakaskin chu ni lakapala tuku tlawa. Wata masta talakaskin Jehová namasiyani tuku nalaksaka (Prov. 2:6, 7). Chu chuna nalilakpuwan tuku tlakg tlan xpalakatakan amakgapitsin chu ni kajwatiya xpalakata (Filip. 2:4). Komo chatum chixku naliskuja xlakata nastalani xliʼakxilhtit Jehová chu Jesús, tlan xʼakgxakga familia nalitaxtu. w21.02 7:19-21

Akxni kgawasaku xwanit, mapakgsina Asá xtaktuju chu ni xpekuan. Akxni xtlat nilh, Abías, wa Asá tsukulh mapakgsinan, chu kamasputulh ídolos nema xʼanankgo kpaís. Nachuna, “wanilh Judá pi xputsakgolh Jehová, xDioskan xnatlatnikan xalamakgasa chu xmakgantaxtikgolh limapakgsin” (2 Crón. 14:1-7). Chu akxni Zérah, chatum etíope, limilh akgtum millón ksoldados xlakata natalatlawa Judá, Asá masiyalh liskgalala chu putsalh Jehová. Tasaskinilh: «Oh, Jehová, wix lakxtum kamakgtayaya tiku kgalhikgo litliwakga chu maski tiku ni lakgtliwakgan. Kakilamakgtayaw, Jehová kiDioskan, xlakata xlikana kkalipawanan». Umakgolh tachuwin limasiya pi Asá lu xlipawan Jehová, xlipawan pi xʼama kalakgmaxtu. Chuna, Asá lipawa xTlat xalak akgapun, chu «Jehová kamasputulh etíopes» (2 Crón. 14:8-12). Lu tuwa xwanit akxni akgtum millón soldados minkgolh talatlawakgo Judá. Pero xlakata Asá lipawa Jehová, tlan kitaxtunilh. w21.03 5:12, 13

Biblia kalichuwinan lhuwa latamanin tiku lalimasiyanikgolh tapaxkit. Kaʼakxilhwi xliʼakxilhtitkan Jonatán chu David. Biblia lichuwinan pi «Jonatán lu tlan tsukulh talalin David, chu Jonatán tsukulh paxki xtachuna la xlatamat» (1 Sam. 18:1). Jehová laksakli David xlakata wa xtsukulh mapakgsinan xlakgxokgo Saúl, xtlat Jonatán. Saúl lu lisitsilh chu asta xmakgniputun David. Pero Jonatán ni tatayalh xtlat xlakata xmakgnilh David. Jonatán chu David lamalaknunikgolh pi ankgalhin amigos xʼamakgo litaxtukgo chu xʼamakgo lamakgtayakgo (1 Sam. 20:42). Chuna la xlatalalinkgo Jonatán chu David tlakg kaks malakawaninan akxni lilakpuwanaw tuku max xtitlawalh pi ni xlatalalinkgolh. Akgtum liʼakxilhtit, Jonatán 30 kata tlakg lankata xwanit nixawa David. Uma max xtitlawalh pi xlakpuwa pi nila xtalalilh tiku tlakg kgawasaku xwanit chu ni lhuwa tuku xkatsini xlakata latamat. Pero maski chuna, Jonatán nikxni lakpuwa pi David nitu xlitaxtu. w21.01 21, 22:6, 7

Jesús kawanilh kstalaninanin pi xlikana xʼamakgolh paxuwakgo. Pero na kawanilh pi xʼamakgolh titaxtukgo lhuwa taʼakglhuwit (Mat. 10:22, 23; Luc. 6:20-23). Lu lipaxuwayaw xlakata kstalaninanin Cristo akinin. Pero max lilakgaputsayaw akxni tiku xalak kifamiliajkan nakinkaputsastalanikgoyan, ni nakinkaʼakxilhputunkgoyan mapakgsinanin, o tiku kataʼanaw kʼescuela o kataskujaw max nakinkawanikgoyan pi katlawaw tuku Jehová ni lakgati. Niti lipaxuwa akxni putsastalanikan, pero Biblia kinkawaniyan pi kilipaxuwatkan maski nakinkaputsastalanikanan. Santiago tsokgli pi taʼakglhuwit ni xlitlawat pi nalakgaputsayaw, wata napaxuwayaw (Sant. 1:2, 12). Jesús na lichuwinalh pi kilipaxuwatkan asta maski nakinkaputsastalanikanan (Mat.5:11). Jehová lipulalilh Santiago xʼespíritu santo xlakata xkatsokgnanilh natalan chu xkamaxkilh tastakyaw nema xkamakgtayalh napaxuwakgo maski tuwa tuku xtitaxtukgolh. w21.02 26:1, 2; 27:5

Kxkilhtamaku Timoteo, makgapitsin kstalaninanin Cristo ni xtapalh liʼakxilhkgolh talakgalhaman pi akxtum nataskujkgo Dios. Chuna la Demas, Figelo chu Hermógenes, Himeneo, Alejandro chu Fileto (1 Tim. 1:19, 20; 2 Tim. 1:15; 2:16-18; 4:10). Milh kilhtamaku tliwakga xkgalhikgo xtakanajlakan, pero nialh xtapalh liʼakxilhkgolh tuku tlakg xlakaskinka. ¿Tuku maklakaskin Satanás xlakata nialh xtapalh naliʼakxilhaw tuku kinkamaxkinitan Jehová? Limaklakaskin lilakgastan, televisión, Internet, películas, periódicos, libros chu revistas. Na kamaklakaskin amakgapitsin latamanin xlakata nakinkamatlawiputunkgoyan tuku ni xlilat o taputsastalanit xlakata napekuanaw chu nialh nalichuwinanaw Dios. Kinkaʼakgskgawiputunan xlakata wa kuenta nakatlawaniyaw tiku wankgo pi «lakgskgalalan», pero masiyakgo xtalakapastaknikan apóstatas. Komo ni kuenta natlawayaw, max tsinu tsinu nialh xlakaskinka katiliʼakxilhwi xaxlikana (1 Tim. 6:21). w20.09 27:6-8

¿Tlawaninitan tuku nitlan chatum miʼamigo o tiku xalak mifamilia? Komo chuna, namakgtayayan nakatsiya tuku tlawalh mapakgsina David akxni xkgawasa, Absalón (2 Sam. 15:5-14, 31; 18:6-14). Kalilakpuwaw tuku nalikgalhtawakgayaw chu liwana kawaniw Jehová la makgkatsiyaw xlakata kinkatlawanikan tuku nitlan (Sal. 6:6-8). Alistalh, kaʼakxilhlakachaw tuku makgkatsilh David. Xpaxki Absalón chu xlipawan Ahitofel. Maski chuna, xlakan akgskgawikgolh. Nitlan mamakgkatsinikgolh chu asta xmakgniputunkgo. David tlan xtilakpuwa pi amakgapitsin xʼamigos xtatayakgonit Absalón chu max xtitlawalh pi nialh xkalipawa. Tlan kajwatiya xtililakpuwa tuku xmakgkatsi chu xʼakstu xtsalataxtulh kpaís. O max tlan xtitaxlajwanilh, pero tlawanilh oración Jehová xlakata naskini xtamakgtay. Na kaskinilh tamakgtay xʼamigos chu akxni wi tuku xlaksaka, lakapala chuna xtlawa. Chuntiya kalipawa Jehová chu xʼamigos. w21.03 15:7, 8; 17:10, 11