Agosto

Kajwatiya tiku tlan talalinkgo Jesús nalitamakgtayakgo tamakamastan nema xla tlawalh. Jesús wa pi xʼama masta «xlatamat xpalakata xʼamigos» (Juan 15:13). Xlakskujnin Dios tiku latamakgolh akxni Jesús nina xmin kKatiyatni natalakaskin nalakgapaskgo chu napaxkikgo. Umakgolh lakchixkuwin chu lakpuskatin nalatamaparakgo, pero na natalakaskin xʼamigo Jesús nalitaxtukgo xlakata tlan namakglhtinankgo latamat nema ni kgalhi xlisputni (Juan 17:3; Hech. 24:15; Heb. 11:8-12, 24-26, 31). Kgalhiyaw talakgalhaman akxtum nataskujaw Jesús la lichuwinanaw chu masiyayaw xalakwan tamakatsinin xla Tamapakgsin. Akxni xlama kKatiyatni, masiyalh tuku xaxlikana xlakata Dios. Chu alistalh taspitpa kʼakgapun, la xʼakgxakga congregación, chu chuntiya pulalima uma taskujut. Lhuwa xtapalh liʼakxilha taskujut chuna la kamasiyaniyaw latamanin xpalakata chu xpalakata xTlat. Nachuna, tlan tlawayaw uma taskujut xlakata kinkamakgtayayan Jehová chu Jesús (Juan 15:4). w20.04 22:7, 8

Makgasa, tiku xkalilakgapaskan «mapakgsina xalak norte» chu «mapakgsina xalak sur» wa tiku xwilakgo kxnorte Israel chu tiku xwilakgo ksur (Dan. 10:14). Israel xkachikin Dios litaxtulh asta kPentecostés kkata 33. Pero lata uma kilhtamaku, Jehová lichuwinalh pi wa xkachikin xʼamakgo litaxtukgo tiku kstalanikgolh Jesús. Wa xlakata, tuku xlichuwinankanit kcapítulo 11 xla Daniel ni wa kilhchanima kachikin Israel, wata wa kakilhchanima kstalaninanin Cristo (Hech. 2:1-4; Rom. 9:6-8; Gál. 6:15, 16). Nachuna, chuna la titaxtutilhanit kilhtamaku mapakgsina xalak norte chu mapakgsina xalak sur talakgpalitilhakgonit. Pero umakgolh mapakgsinanin pulaktutu tuku tlawakgonit. Pulana, wi tuku katlawanikgonit xkachikin Jehová. Xlipulaktiy, chuna la kalikatsininit xkachikin Dios, limasiyakgonit pi ni akxilhputunkgo xaxlikana Dios. Chu xlipulaktutu, umakgolh chatiy mapakgsinanin latalatlawakgonit. w20.05 3:3, 4

Jehová nalitaxtu tuku talakaskin xlakata namakgantaxti xtalakaskin. Nachuna, Jehová tlan tlawa pi xlakskujnin, maski kgalhikgo talakgalhin, namakgantaxtikgo xtaskujutkan chu natlawakgo xtalakaskin (Is. 64:8). Chuna, Jehová tlawa pi kakgantaxtulh xtalakaskin. Nitu katimalakgachokgolh xlakata nakgantaxtu tuku xla lakaskin (Is. 46:10, 11). ¿Tuku natlawa pi tlakg lanka xtapalh naliʼakxilhaw chu namaxkiyaw kakni kinTlatkan xalak akgapun? Komo nalilakpuwanaw putum tuku tlawanit chu la kinkamakgtayanitan wi tuku natlawayaw. Akgtum liʼakxilhtit, lu kaks lilakawanaw akxni lilakpuwanaw putum tuku xla malakatsukinit (Sal. 8:3, 4). Chu akxni lilakpuwanaw tuku tlawanit xlakata tlan namakgantaxtiyaw xtalakaskin, tlawa pi namaxkiyaw kakni. Xlikana pi xtukuwani Jehová lu kaks malakawaninan. Tuku kilhchanima xtukuwani kinkamasiyaniyan la likatsi, putum tuku tlawanit chu tuku natlawa (Sal. 89:7, 8). w20.06 9, 10:6, 7

Oxígeno akgtum gas nema latamanin chu animales maklakaskinkgo xlakata nalatamakgo. Chuna la lakputsananikanit, wankan pi kaj akgtum kata putum tuku staknankgo lijaxanankgo 100 mil millones toneladas oxígeno. Pero, akxni jaxanankgo, maxtukgo dióxido de carbono. Maski chuna, oxígeno nikxni sputa chu atmósfera nikxni litatsama dióxido de carbono. ¿La tlan chuna la? Xlakata un sastimpara (ciclo del oxígeno). Jehová malakatsukilh lhuwa tuku staknankgo, chuna la xalaktsu tuwan nema tajumakgo kchuchut asta lu xalaklanka kiwi, nema lijaxanankgo dióxido de carbono chu maxtukgo oxígeno. Chuna la sastimpara un limasiya pi lu xlikana tuku lichuwinan texto xala uku. ¿La tlakg lanka xtapalh naliʼakxilhaw Katiyatni chu putum tuku anan? (Sal. 115:16). Pulaktum wa akxni nalilakpuwanaw putum tuku tlawanit Jehová. Uma nakinkamakgpuwantiniyan ankgalhin napaxtikatsiniyaw xlakata putum tuku kinkamaxkinitan. Chu nachuna, limasiyayaw pi paxtikatsiniyaw Jehová akxni kaskulunku wiliyaw niku lamaw. w20.05 22:5, 7

Chuna la Jehová lakkaxtlawalh tuku Satanás limawakalh limasiyalh pi skgalala, ni lakapala sitsi chu pi xaʼakgstitum. Na pulaklhuwa la limasiyanit xlitliwakga. Chu ankgalhin limasiya xtapaxkit akxni wi tuku tlawa (1 Juan 4:8). Ankgalhin liskujnit xlakata namasantujli xtukuwani. La uku, Satanás chuntiya limawakama taʼakgsanin xtukuwani Jehová. Kaʼakgskgawi latamanin akxni kamalakpuwani pi Dios ni kgalhi litliwakga, ni xaʼakgstitum, ni xaskgalala chu ni paxkinan. Tlawaputun pi latamanin kakanajlakgolh pi Jehová ni wa malakatsukinanit. Chu komo wi tiku kanajlani, tlawa pi kakanajlakgolh pi xtastakyaw lu laktuwa chu pi nila makgantaxtikan xlakata lhuwa tuku ni masta talakaskin natlawakan. Chu asta wan pi Jehová chatum Dios tiku nitlan likatsi chu kalhkuyu latamanin kpupatin. Max tiku kanajlakgo uma taʼakgsanin na lakgmakgankgo xlimapakgsin Dios. Satanás chuntiya natlawa pi kamakgxtakgti Jehová. ¿Namaxkiya talakaskin? w20.06 5:13-15

Klakalhuwa congregaciones wilakgolh natalan tiku liskujkgo xlakata nakatsinikgo akgtum tachuwin. Max tuwa makgkatsikgo nachuwinankgo, pero komo ni wa nakuentajtlawayaw tuku nila tlawakgo, naʼakxilhaw la paxkikgo Jehová chu pi lu skujnaniputunkgo. Uma natlawa pi nakamaxkiyaw kakni chu xtapalh nakaliʼakxilhaw. Ni kalakpuwaw pi ni kamaklakaskinaw kaj xlakata ni liwana chuwinankgo kintachuwinkan (1 Cor. 12:21). Lu paxtikatsiniyaw Jehová xlakata kinkamaxkinitan talakaskin namakgtapakgsiyaw kxcongregación. Maski akinin lakchixkuwin o lakpuskatin, maski makgaxtokgaw o nina, o komo linawa kata o ni, o komo liwana chuwinaw akgtum tachuwin o ni: kimputumkan xtapalh litaxtuyaw kxlakatin Jehová chu natalan (Rom. 12:4, 5; Col. 3:10). Putum kilhtamaku kaputsaw la tlan nalimasiyayaw pi lu xlakaskinka li’akxilhaw pi akinin chu amakgapitsin makgtapakgsiyaw kxcongregación Jehová. w20.08 31:20-22

Apóstol Pablo ni lakpuwa pi tiku xalak Atenas nila kstalaninanin Cristo xlitaxtukgolh maski xkakninanikgo nixaxlikana dioses, xtlawakgo talakgxtumit xalimaxana chu xkanajlakgo nixaxlikana xtamasiykan filósofos; ni litaxlajwanilh maski mamaxanikgolh. Xla kstalanina Cristo litaxtulh maski pulana “lixkajni lichuwinalh Dios, putsastalanilh xkachikin chu tlankajwanalh” (1 Tim. 1:13). Chuna la Jesús akxilhli tuku tlan xtlawa Pablo, Pablo nachuna kaʼakxilhli xalak Atenas. Xlakata uma, tlan tuku kitaxtukgolh (Hech. 9:13-15). Kxapulana siglo, kaxatikawa latamanin kstalaninanin Jesús litaxtukgolh. Akxni Pablo katsokgnanilh natalan xalak Corinto, lichuwinalh pi xapulana makgapitsi kgalhananin xwankgonit chu xtlawakgo talakgxtumit xalimaxana. Chu alistalh wampa: «Pero wixin kachakgekanitantit» (1 Cor. 6:9-11). ¿Xlakpuwaw pi tlan xlakgpalikgolh xlatamatkan chu kstalaninanin Cristo xlitaxtukgolh? w20.04 12:15, 16

Lakgkgolotsin ni lakapala nakalakpuwanikgo tuku nitlan tiku lakpuwankgo pi ni nitlan kitaxtu skujnanikan Jehová. Wata talakaskin naliskujkgo xlakata naʼakgatekgskgo tuku xlakata chuna lakpuwankgo. Chu alistalh tlan nalimaklakaskinkgo Biblia xlakata nakamaʼakgpuwantinikgo. Palakachuwina Elías tsalanilh mapakgsina Jezabel (1 Rey. 19:1-3). Xlakpuwan pi xtaskujut nitu xlitaxtunit chu asta xniputun (1 Rey. 19:10). Jehová ni lakgmakgalh Elías. Wata liwana wanilh pi ni xʼakstu xwi, pi tlan xlipawa xlimakgatliwakga Jehová chu tlakg lhuwa taskujut xʼama tlawa. Liwana kgaxmatnilh akxni Elías xwanima tuku xlilakgaputsama, chu wi tuku lakgayawapa (1 Rey. 19:11-16, 18). ¿Tuku kinkamasiyaniyan? Pi putum akinin, chu nachuna lakgkgolotsin, tlan nakalikatsiniyaw kskujnin Jehová. Komo chatum tala xatasitsi nawan tuku makgkatsi o lakpuwan pi ni lakgchan xtalakgalhaman Jehová, lakgkgolotsin liwana nakgaxmatnikgo akxni uma tala nawan tuku makgkatsi. Chu alistalh namalakpuwanikgo pi Jehová lanka xtapalh akxilha. w20.06 22:13, 14

Jehová lakaskin pi kakatapaxuwaw kiʼamigoskan chu kifamiliajkan (Sal. 133:1). Jesús kgalhilh laktlan amigos (Juan 15:15). Biblia na lichuwinan pi lu tlan kitaxtu nakgalhiyaw xaxlikana amigos (Prov. 18:24). Nachuna, kinkawaniyan pi ni natamakgatliyaw (Prov. 18:1). Lhuwa tiku lakpuwankgo pi maklakaskinkan redes sociales makgtayanan nakgalhiyaw lhuwa amigos. Pero kuenta kilitlawatkan akxni maklakaskinaw. Chuna la lakputsanankanit, makgapitsi wankgo pi tiku lhuwa kilhtamaku limaxtukgo naʼakxilhkgo fotos chu tuku wankgo amakgapitsin kredes sociales, kamalakpuwani pi xʼakstukan wilakgo chu lipuwankgo. ¿Tuku xlakata? Pulaktum wa pi lhuwa latamanin wilikgo xfotoskan akxni wi tuku xlakaskinka titaxtukgo kxlatamatkan: niku tlakg tlan tasiyakgo, niku katawilakgolh xʼamigoskan chu anta niku paxialhnamakgo. Tiku akxilhkgo umakgolh fotos max lakpuwankgo pi ni lu tlan xlatamatkan chu nitu lipaxuwakgo. w20.07 5, 6:12, 13

Revista La Atalaya 1 xla octubre kata 1988 wa: «Lakgkgolotsin katsikgo pi Cristo tlan namaklakaskin espíritu santo xlakata napulalin xtalakapastakni chatum kgolotsin nema makgtapakgsi kʼakgtum congregación xlakata nalakapastaka tastakyaw xalak Biblia nema nakamakgtaya nakatsikgo tuku natlawakgo o tuku nalaksakkgo (Hechos 15:7-15). Espíritu santo kamakgtaya putum lakgkgolotsin chu ni kaj chatum». Komo chatum kgolotsin kamaxki kakni amakgapitsin lakgkgolotsin, ni wa pulana nawan tuku lakapastaka akxni tlawakgo xtamakxtumitkan. Ni wa tiku lu nachuwinan chu ni katilakpuwa pi ankgalhin tuku wan tlan kitaxtu. Wata akxni wi tuku nawan, nalimasiya pi taktuju chu pi ni putum matlani, chu liwana nakakgaxmatni amakgapitsin. Tuku tlakg xlakaskinka wa pi nalakputsanani tuku wan Biblia chu na natlawa tuku wan «skujni xatalipaw chu xaskgalala» (Mat. 24:45-47). Akxni lakgkgolotsin lalimasiyanikgo tapaxkit chu kakni, xʼespíritu santo Dios kamakgtaya nalaksakkgo tuku xlilat (Sant. 3:17, 18). w20.08 27:5, 6

Xtalamakgasitsin apóstol Pablo tlakg lakgtliwakga xwankgonit nixawa xla. Lakgachunin xtlawakgo pi xwilinika chu xtamaknuka kpulachin. Chu tiku xʼamigos xwankgonit, putsastalanikgolh. Asta tiku xalak congregación nitlan lichuwinankgolh (2 Cor. 12:11; Filip. 3:18). Pero xla ni litaxlajwanilh uma. Chuntiya xlichuwinan Dios maski xputsastalanikan. Nikxni kamakgxtakgli xnatalan maski nitlan xlikatsinikgo. Chu nikxni makgxtakglhli Jehová (2 Tim. 4:8). Maski lhuwa tuku nitlan titaxtulh, tayanilh xlakata lipawa Jehová. ¿Nitlan kinkalichuwinankanan o kinkaputsastalanikanan? Limaklakaskimputunaw xTachuwin Dios xlakata nakalakgchanaw xtalakapastaknikan chu xnakujkan tiku kgalhikgo tlan tayat. ¿La tlan natlawayaw? Nalimaklakaskinaw Biblia xlakata nakgalhtiyaw xtakgalhskininkan, nakalimasiyaniyaw talakgalhaman chu nakamaxkiyaw kakni tiku nitlan nakinkalikatsinikgoyan, chu putum tlan nakalikatsiniyaw, asta kintalamakgasitsinkan (Mat. 5:44; 1 Ped. 3:15-17). w20.07 17, 18:14, 15

¿Xlikana tlan nawanaw pi Jehová taktuju? Chuna. Tlan nawanaw chuna la David wa ktexto xala uku (Sal. 18:35). Akxni tsokgli umakgolh tachuwin, max David xlakapastakma akxni palakachuwina Samuel kilalh kxchik xlakata nalaksaka tiku mapakgsina xʼama litaxtu kʼIsrael. David xlikgalhtsayan xkamanan Jesé xwanit chu maski wa tiku tlakg xaʼaktsujku xlitaxtu, Jehová laksakli xlakata xlakgxokgo xtawi mapakgsina Saúl (1 Sam. 16:1, 10-13). David nachuna xlakpuwan tuku tsokgli chatum salmista xlakata Jehová: «Xla takilhputa xlakata naʼakxilha akgapun chu katiyatni, xlakata namaki ktiyat tiku taktuju [chu] nawili niku wilakgolh tiku mapakgsinankgo» (Sal. 113:6-8). Chuna la kalikatsini Jehová xlakskujnin tiku kgalhikgo talakgalhin limasiya pi xla taktuju. Ni kajwatiya makgamakglhtinan kintakakninkan, wata na xʼamigos kinkaliʼakxilhan (Sal. 25:14). Tlan talalinaw xlakata xla pulana makamastalh xKgawasa xpalakata kintalakgalhinkan. ¡Lu limasiyalh xtalakgalhaman! w20.08 8:1-3

Jehová lakkaxwilinita kilhtamaku chu hora akxni namasputu uma kakilhtamaku (Mat. 24:36). Maski kamalakastakwaniputuna tiku nikgonita, chuntiya nakgalhkgalhi kilhtamaku nema lakkaxwilinit (Job 14:14, 15). Kgalhkgalhima kilhtamaku akxni chuna natlawa (Juan 5:28). Lhuwa tuku xlakata tlan nalipaxtikatsiniyaw Jehová xlakata xla xakgalhkgalhina. Akgtum liʼakxilhtit, lhuwa latamanin kgalhikgonit kilhtamaku xlakata nalakgpalikgo xtayatkan, asta akinin chuna tlawanitaw. Jehová lakaskin pi lhuwa latamanin kakgalhikgolh latamat putum kilhtamaku. Wa xlakata, kalimasiyaw pi paxtikatsiniyaw pi xla xakgalhkgalhina chu lu kaliskujwi xlakata nakatekgsaw latamanin “tiku kxnakujkan makgamakglhtinamputunkgo xaxlikana tuku masta latamat” chu kakamakgtayaw xlakata napaxkikgo chu naskujnanikgo Jehová (Hech. 13:48). Chu xlakan na nalitamakgtayakgo pi xla xakgalhkgalhina. w20.08 18:17

Tuku katsinima tiku makgalhtawakgemaw ni kaj xlitawilat kxtalakapastakni, na xlilakgchanat kxnaku. ¿Tuku xlakata? Xlakata naku, nema na kilhchanima tuku lakaskinaw chu tuku makgkatsiyaw, wa tuku kinkamakgpuwantiniyan wi tuku natlawayaw. Jesús xkalakgchani xtalakapastaknikan latamanin xlakata lu tlan tuku xmasiya. Pero latamanin kstalanikgo xlakata xkalakgchani kxnakujkan (Luc. 24:15, 27, 32). Tiku makgalhtawakgemaw xliʼakxilhat pi Jehová xlikana lama, tlan natalalin chu naliʼakxilha la xTlat, xDios chu xʼAmigo (Sal. 25:5). Akxni natakgalhtawakgayaw, kalitachuwinaw laktlan tayat nema kgalhi kiDioskan (Éx. 34:5, 6; 1 Ped. 5:6, 7). Kamasiyaniw la likatsi. Kamakgtayaw xtapalh naliʼakxilha xtapaxkit, xtalakgalhaman chu la kinkalakgkatsanan. Jesús wa pi «tlakg xlakaskinka chu xapulana limapakgsin» wa uma: «Milipaxkit Jehová miDios» (Mat. 22:37, 38). Lu kaliskujwi xlakata tiku makgalhtawakgemaw napaxki Jehová. w20.10 10:12

Jesús xtapalh kaliʼakxilhli putum lakpuskatin (Juan 4:27). Lu xlakaskinka xkaʼakxilha tiku xtlawakgo xtalakaskin xTlat. Kaks malakawaninan pi akxni lichuwinalh xfamilia xaʼespiritual, kalichuwinalh lakchixkuwin chu lakpuskatin (Mat. 12:50). Na limaxtulh kilhtamaku xlakata akxtum nakatatawila xnatalan lakpuskatin, chu xlikana x’amigoskan litaxtulh. Kalilakpuwaw la tlan xkatalalin María chu Marta, tiku nina xmakgaxtokgkgo (Luc. 10:38-42). Liwana tasiya pi chuna la xkatachuwinan chu xkalikatsini xtlawa pi tlan xmakgkatsikgolh. María tlan makgkatsilh akxni tawilalh lakatsu kxtantun Jesús xlakata tlakg nakatsi xpalakata. Jesús maklakaskilh uma kilhtamaku xlakata wi tuku lu xlakaskinka nakamasiyani. Nachuna, xlakata makglhuwa kalakgapaxialhnalh limasiyalh pi xkalilakgaputsa Marta, María chu Lázaro (Juan 12:1-3). Wa xlakata ni kaks kinkamalakawaniyan pi María chu Marta skinikgolh tamakgtay Jesús akxni Lázaro xtatatla (Juan 11:3). w20.09 20:3; 21:6

Xtamakgalhtawakgen Jesús «xlakpuwankgo pi xTamapakgsin Dios lakapala xʼama min». Chu akinin kgalhkgalhimaw akxni xTamapakgsin Dios namapanu putum tuku nitlan chu nalimin xasasti kakilhtamaku niku naʼanan tuku xaʼakgstitum (2 Ped. 3:13). Talakaskin nakgalhkgalhiyaw asta akxni Jehová nalimin kilhtamaku nema lakkaxwilinit. Jehová maxkilh Noé lhuwa kilhtamaku xlakata xtlawalh arca chu xlichuwinalh «tuku xaʼakgstitum» (2 Ped. 2:5; 1 Ped. 3:20). Kgaxmatnilh Abrahán akxni makglhuwa kgalhskilh tuku xlakata xkamalakgsputuputun tiku xalak Sodoma chu Gomorra (Gén. 18:20-33). Akglhuwa kata, Jehová limasiyalh pi ni lakapala ksitsini kachikin Israel (Neh. 9:30, 31). Chu la uku chuntiya akxilhaw pi limasiya pi kgalhkgalhinan xlakata kamaxkima kilhtamaku namakgxtakgkgo xtalakgalhinkan putum tiku kalimin xlakata xʼamigos nalitaxtukgo (2 Ped. 3:9; Juan 6:44; 1 Tim. 2:3, 4). Xliʼakxilhtit Jehová kinkamakgtayayan nakgalhkgalhinanaw chu chuntiya nalichuwinanaw Dios chu nakamasiyaniyaw amakgapitsin. w20.09 10:8, 9

Jehová nakamalakastakwani latamanin, nakamaxkipara xtalakapastaknikan chu la xlikatsikgo akxni nina xnikgo. Kalilakpuwaw tuku kilhchanima uma. Jehová lu kinkapaxkiyan chatunu akinin, wa xlakata kuentajtlawa putum tuku lakpuwanaw, tuku makgkatsiyaw, tuku wanaw chu tuku tlawayaw. Komo xkinkamalakastakwanin, ni tuwa xkinkamaxkiparan kintalakapastaknikan, kintayatkan chu tuku lakpuwanaw. Mapakgsina David liwana xkatsi pi Jehová liwana kinkalakgapasan chatunu akinin (Sal. 139:1-4). ¿La makgkatsiyaw akxni katsiyaw pi lu kinkapaxkiyan? Ni kililakgaputsatkan akxni nalilakpuwanaw pi Jehová liwana kinkalakgapasan. ¿Tuku xlakata? Xlakata xla lu kinkapaxkiyan chu lu xtapalh kinkaliʼakxilhan chatunu akinin. Nachuna, lu kuenta tlawa tuku titaxtunitaw kkilatamatkan nema tlawa nalikatsiyaw chuna la likatsiyaw la uku. Uma lu tlan kinkamamakgkatsiniyan. Nikxni kamakgkatsiw pi kiʼakstukan wilaw, Jehová ankgalhin kinkatawilan, chu skgalalh wi xlakata nakinkamakgtayayan (2 Crón. 16:9). w20.08 17:13, 14

Jehová lu lakgati kamasiyani xkachikin. Lakaskin pi xlakkamanan nalakgapaskgo, napaxkikgo chu nalatamakgo putum kilhtamaku. Putum uma tlan nakgantaxtu xlakata tuku kinkamasiyaniyan (Juan 17:3). Kxapulana siglo, limaklakaskilh congregación xla kstalaninanin Cristo xlakata nakastakyawa xkachikin (Col. 1:9, 10). Chu limaklakaskilh xʼespíritu xlakata nakamakgtaya «chuna la Jesús xkamalaknuninit (Juan 14:16). Espíritu santo kamakgtayalh liwana xʼakgatekgsnikgolh xTachuwin Dios chu kamalakapastakalh putum tuku Jesús lichuwinalh chu tuku tlawalh, nema alistalh talhkatawilalh kʼEvangelios. Uma kamatliwakglhnilh xtakanajlakan, tapaxkit nema xkgalhinikgo Dios, xKgawasa chu la xlapaxkikgo. Jehová lichuwinalh pi «kxaʼawatiya kilhtamaku», latamanin xalak putum kachikinin xʼamakgo ankgo kxsipi Jehová xlakata xkamasiyanika xtiji (Is. 2:2, 3). La uku akxilhmaw la kgantaxtunit uma tuku xlichuwinankanit. w20.10 24:14, 15

¿Tuku max natlawa pi wi tiku nalakgmakgan xtastakyaw chatum tlan amigo? Wa tatlankit. Tiku tlankajwa, lakaskinkgo pi kajwatiya nakawanikan «tuku xlakan kgaxmatputunkgo». Ni kgaxmatputunkgo «tuku xaxlikana» (2 Tim. 4:3, 4). Niti kakgaxmatniputunkgo xlakata lakpuwankgo pi tlakg lakgskgalalan chu tlakg xlakaskinka litaxtukgo ni xawa amakgapitsin. Pero apóstol Pablo wa: «Komo wi tiku lakpuwan pi xlakaskinka litaxtu pero nichuna, xʼakstu taʼakgskgawima» (Gál. 6:3). Mapakgsina Salomón wa: «Tlakg tlan chatum aktsu kgawasa tiku xaskgalala maski limaxkgen nixawa chatum mapakgsina tiku kgolota pero ni kgalhi liskgalala, tiku nialh kgalhi liskgalala xlakata namakglhtinan tastakyaw» (Ecl. 4:13). Apóstol Pedro kinkawilinin akgtum lu tlan liʼakxilhtit akxni apóstol Pablo stakyawalh kxlakatin amakgapitsin (Gál. 2:11-14). Max tlan xtisitsinilh Pablo xlakata la tachuwinalh chu niku stakyawalh. Pero xlakata Pedro skgalala xwanit, makgamakglhtinalh xtastakyaw Pablo chu ni sitsinilh. Titaxtulh kilhtamaku limapakuwilh «kintalakan [...] tiku lu paxkiyaw» (2 Ped. 3:15). w20.11 21:9, 11, 12

Lu xlakaskinka pi tiku makgalhtawakgemaw naʼan ktamakxtumit xlakata nastaka xtakanajla. Tuku anta nakgaxmata natlawa pi tlakg nakatsini, namatliwakglha xtakanajla chu namakgtaya tlakg napaxki Dios (Hech. 15:30-32). Chatum tala tlan nawani xtamakgalhtawakgen pi xlakata tlakg tsukulh paxki Jehová, uma tlawalh pi nakgalhakgaxmata xtastakyaw Biblia (2 Cor. 7:1; Filip. 4:13). Chu akxni tiku kgalhtawakgama kalakgapasa natalan tiku ni makgxtakgkgo Dios, tlan akxilha tuku kilhchanima kgalhakgaxmatkan xlimapakgsin Cristo xlakata napaxkiyaw Dios chu latamanin (Juan 13:35; 1 Tim. 4:12). Kaʼakxilha natalan tiku nachuna titaxtumakgolh la xla. Naʼakxilha pi tlan tlawakan talakgpalit xlakata tlan kstalanina Cristo litaxtukan (Deut. 30:11). Putum xalak congregación tlan namakgtayanankgo xlakata nastaka xtakanajlakan tiku kamakgalhtawakgemaka (Mat. 5:16). w20.11 5:10-12

Max apóstol Pablo xlichuwinama la xkatalatlawakan «xalakluku animales kʼÉfeso». Max xwamputun pi xkatalatlawanit animales niku xwilakgolh kʼuma kachikin (2 Cor. 1:8; 4:10; 11:23). O max xkilhchanima la xputsastalanikgo judíos chu xtalamakgasitsin tiku xlitaxtukgo la «xalakluku animales» (Hech. 19:26-34; 1 Cor. 16:9). Maski chuna, ankgalhin tayanilh tuku tuwa chu nikxni taxlajwanilh (1 Cor. 15:30, 31; 2 Cor. 4:16-18). Na lamaw kkakilhtamaku niku lu katuwa. Makgapitsin kinatalankan ni xaʼakgstitum kalikatsinikanit, o lamakgolh niku katuwa wilikgo xlatamatkan xlakata anan guerras. Chu kmakgapitsi kachikinin niku ni mastakan talakaskin nakakninaniyaw Dios kinatalankan katuwa wilikgo xlatamatkan xlakata naskujnanikgo Jehová. Maski chuna, putum chuntiya kakninanimakgolh Jehová chu kinkawilinikgoyan akgtum lanka liʼakxilhtit. Ni pekuankgo xlakata katsikgo pi maski nanikgo, Jehová malaknu pi nakamaxki tuku tlakg xatlan. w20.12 9:3, 4

¿Taxlajwaniyaw akxni lichuwinanaw Dios xlakata ni lu katekgsaw latamanin kxchikkan o ni lu kinkakgaxmatnikanan? ¿Tuku natlawayaw xlakata chuntiya napaxuwayaw? Lu xlakaskinka naliʼakxilhaw chuna la xlilat la lichuwinanaw Dios. ¿Tuku wamputun uma? Pi tuku tlakg xlakaskinka wa nalichuwinanaw xtukuwani Dios chu Tamapakgsin. Jesús lichuwinalh pi ni lhuwa tiku xʼamakgolh tekgskgo tiji nema linan klatamat (Mat. 7:13, 14). Akxni lichuwinanaw Dios kgalhiyaw talakgalhaman akxtum nakataskujaw Jehová, Jesús chu ángeles (Mat. 28:19, 20; Apoc. 14:6, 7). Nachuna, Jehová tiku kalimin kxkachikin tiku xlikana skujnaniputunkgo (Juan 6:44). Wa xlakata max akxni wi tiku xapulana natachuwinanaw ni katikgaxmatputulh, pero alistalh akxni natachuwinamparayaw nakinkakgaxmatniyan. Deborah wan: «Satanás limaklakaskin taxlajwanit xlakata nakinkatlawaniyan tuku nitlan». Pero xla chu tuku limaklakaskin nila makgatlajakgo Jehová. w20.12 26:18, 19; 27:21

Lhuwa kstalaninanin Cristo tiku ni makgxtakgkgo Dios lu xliskujatkan xlakata nakgalhikgo tuku maklakaskinkgo xfamiliajkan. Chu chuntiya makgtayakgo xkachikin Dios chuna la matlanikgo. Makgapitsi makgtayanankgo niku wi tuku masputunanit, amakgapitsi makgtlawakgo kimpukgalhtawakgakan chu kimputumkan tlan xatapaxuwan namastayaw kintuminkan xlakata nalitlawakan kintaskujutkan kxlikalanka katiyatni. Chuna limasiyakgo pi paxkikgo Dios chu xtalatamankan. Nachuna, akgatunu semana kalimasiyaniyaw tapaxkit kinatalankan akxni anaw ktamakxtumit maski tlakgwanitaw, akxni mastayaw kintakgalhtinkan maski pekuanaw chu akxni kamakgpuwantiniyaw kinatalankan akxni nina tsuku chu akxni sputa tamakxtumit maski na kgalhiyaw kintaʼakglhuwitkan (Heb. 10:24, 25). Lu kapaxtikatsiniyaw putum tuku tlawakgo kinatalankan. w21.01 10:11

Tiku tlankajwa likatsikgo tuwa makgkatsikgo nakawani amakgapitsin pi lu tlan taskujut tlawamakgo, chu kgalhkgalhikgo pi kakawanika laktlan tachuwin. Ankgalhin tamalakxtumikgo tuku tlawakgo chu tuku tlawakgo amakgapitsin, chu latlajaputunkgo. Putum tlawaputunkgo chu ni kamasiyaniputunkgo amakgapitsin xlakata lakpuwankgo pi tuku tlawakgo tlakg tlan kitaxtu. Na mastakgo talakaskin pi wa nakamakgatlaja tuku kgalhiputunkgo chu la kalakgkatsalakankgo amakgapitsin. Komo akxilhaw pi tlankajwa akinin, katasaskiniw Jehová pi kakinkamakgtayan nalakgpaliyaw kintalakapastaknikan xlakata uma tayat ni natamakgxtakga kkinakujkan (Rom. 12:2). Lu paxtikatsiniyaw Jehová xlakata kinkawiliniyan lu tlan liʼakxilhtit xlakata taktuju (Sal. 18:35). Tlan naʼakxilhaw la limasiya uma tayat la kalikatsini xlakskujnin, chu stalaniputunaw xliʼakxilhtit. Na stalaniputunaw xliʼakxilhtitkan tiku kalichuwinan Biblia nema limasiyakgolh pi ni putum xmatlanikgo. Ankgalhin kamaxkiw kakni chu lilanka nema lakgchan Jehová (Apoc. 4:11). w20.08 13:19, 20

Tamakgaxtokgat akgtum lu tlan xtamaskiwin Dios, pero putum latamanin makglakgalhinanin (1 Juan 1:8). Wa xlakata, xTachuwin Dios kawani putum tiku makgaxtokgkgo pi «nakgalhikgo taʼakglhuwit kxlatamatkan». Jehová kgalhkgalhi pi lakchixkuwin nakamaxkikgo xfamilia tuku xla xtakanajlakan, tuku maklakaskinkgo chu tlan nakamamakgkatsinikgo (1 Tim. 5:8). Nachuna, lakpuskatin tiku makgaxtokgkgo xlimaxtutkan kilhtamaku nalikgalhtawakgakgo xTachuwin Dios, nalilakpuwankgo chu natlawanikgo oración Jehová. Max lu tuwa nawan, xlakata lakpuskatin lhuwa tuku xlitlawatkan, pero talakaskin nalimaxtukgo kilhtamaku. ¿Tuku xlakata? Xlakata Jehová lakaskin pi chatunu kskujnin tlan natalalinkgo (Hech. 17:27). Talakaskin pi xapuskat lu naliskuja xlakata nakgalhakgaxmata chu namaxki kakni xchixku. Ni tuwa katimakgkatsilh namakgantaxti tuku lakgayawanit Jehová komo naʼakgatekgsa tuku wan Biblia xlakata limapakgsin nema maxkikanit xchixku. w21.02 9:3, 6, 7

Tuku tuwa titaxtuyaw xtachuna lhkuyat nema limachichikan kgantum espada. Akxni lu chichin chu alistalh maskgawiwikan, likan tlakg tliwakga wan. Xtachuna la uma, akxni lhuwa tuku tuwa titaxtuyaw, kintakanajlakan tlakg tatliwakglha. Santiago wa pi komo natayaniyaw, “xatakgatsin nawanaw chu putum tlan natlawayaw chu nitu kintikatsankganin” (Sant. 1:4). Akxni akxilhaw pi tuku tuwa titaxtuyaw matliwakglha kintakanajlakan, xatapaxuwan tayaniyaw. Santiago lichuwinalh makgapitsi tuku max natlawa pi nialh napaxuwayaw. Pulaktum wa akxni ni katsiyaw tuku natlawayaw. Akxni titaxtuyaw taʼakglhuwit, putsayaw xtamakgtay Jehová xlakata nalaksakaw tuku makgapaxuwa, nema nakamakgtaya kinatalankan chu nakinkamakgtayayan ni namakgatsankgananiyaw (Jer. 10:23). Talakaskin liskgalala xlakata nakatsiyaw tuku natlawayaw chu la nakakgalhtiyaw kintalamakgasitsinkan. Komo ni katsiyaw tuku natlawayaw, max lu nalakgaputsayaw, chu nialh napaxuwayaw. w21.02 28:7-9

Jehová kinkawiliniyan xaliʼakxilhtit. Xla lu kinkapaxkiyan chu komo ni namakgxtakgaw, nitu katitlawalh pi nialh nakinkapaxkiyan (Rom. 8:38, 39). Tachuwin xagriego «xliputum», kilhchanima pi lu naliskujaw xlakata nalimasiyayaw tapaxkit, chu uma tuku kilitlawatkan xpalakata makgapitsi natalan. Akxni wi tiku nakinkatlawaniyan tuku nitlan xlakaskinka nalatatayaniyaw chu nalalimasiyaniyaw tapaxkit “lu naliskujaw xlakata chuntiya makxtum natawilayaw, ni nakatakgalhiyaw taʼakglhuwit” amakgapitsin (Efes. 4:1-3). Naliskujaw xlakata nakaʼakxilhaw kinatalankan chuna la kaʼakxilha Jehová (1 Sam. 16:7; Sal. 130:3). Min kilhtamaku tuwa makgkatsiyaw nakalimasiyaniyaw tapaxkit kinatalankan, liwaka akxni kuentajtlawayaw tuku nitlan tlawakgo. Uma nachuna xlama kxapulana siglo. Chuna titaxtukgolh Evodia chu Síntique, Apóstol Pablo kawanilh pi “watiya talakapastakni xkgalhikgolh akxni kskujnanikgolh Malana” (Filip. 4:2, 3). w21.01 22:10, 11

Kgawasa, natalan tiku laklankata xalak congregación lanka xtapalh akxilhkgo pi akxtum kataskujnaniya Jehová (Sof. 3:9). Lu lakgatikgo akxilhkgo pi xatapaxuwan makgantaxtiya taskujut nema lakgayawakana. Maxkikgoyan kakni chu lipawankgoyan. Kalakapastakti pi Jehová paxkiyan chu lipawanan. Lata makgasa tiwa pi kxaʼawatiya kilhtamaku xʼamakgo tawilakgo lhuwa lakgkgawasan tiku xʼamakgo skujnanikgo (Sal. 110:1-3). Xla katsi pi paxkiya chu maxkiputuna tuku tlakg tlan. Wa xlakata, kakalimasiyani amakgapitsin pi kgalhkgalhinana chu ni kamalakatsali tuku natlawaputuna. Akxni natlawaya tuku nitlan, kakgaxpatti chu kamakgamakglhtinanti tastakyaw. Kalakapastakti pi wa Jehová tiku stakyawaman (Heb. 12:6). Liwana kamakgantaxti taskujut nema nalakgayawakana. Chu tuku tlakg xlakaskinka, kaliskujti xlakata namakgapaxuwaya minTlat xalak akgapun (Prov. 27:11). w21.03 7:17, 18

Max lhuwa tuku nakinkamaxlajwaniyan. Makgapitsi max wa tuku nitlan tlawanitaw, tuku nila tlawayaw o tajatat, max xlakata ni kinkalakgayawakanan taskujut nema kgalhiputunaw kxkachikin Jehová o max xlakata lichuwinanaw Dios niku ni lu kinkakgaxmatnikanan. Komo kajwatiya lu nalilakpuwanaw tuku nitlan tlawayaw, max lu nitlan katimakgkatsiw chu asta nalakpuwanaw pi Jehová nikxni kintikamaxkin talakaskin natanuyaw kxasasti kakilhtamaku. Uma talakapastakni lu nitlan tuku nakinkatlawaniyan. Putum akinin makglakgalhinanin chu kajwatiya Jesucristo ni kgalhi talakgalhin (Rom. 3:23). Pero Jehová ni wa kuentajtlawa tuku nitlan tlawayaw chu ni kgalhkgalhi pi putum tlan natlawayaw. Xla kinTlatkan tiku lu xapaxkina chu ni lakapala sitsi. Katsi la liskujaw xlakata natlawayaw tuku tlan chu tlan namakgkatsiyaw, chu xla ankgalhin kinkatawilan xlakata nakinkamakgtayayan (Rom. 7:18, 19). w20.12 22:1-3

Kilatamatkan xtachuna la akxni wi niku ankan. Champutunaw kxasasti kakilhtamaku niku namapakgsinan xapaxkina kiDioskan, Jehová. Chali chali tlawamputunaw ktiji nema linan klatamat. Pero chuna la wa Jesús, tiji lu titsu chu lakgachunin tuwa ankan anta (Mat. 7:13, 14). Xlakata makglakgalhinanin akinin, pataxtutayayaw (Gál. 6:1). Xlakata chuntiya natlawanaw niku linan klatamat, talakaskin nalakgpaliyaw kintayatkan, tuku tlawayaw, chu la likatsiyaw. Apóstol Pablo kinkamakgpuwantiniyan “chuntiya nalakkaxwiliyaw kintapuwankan”. Tuwa kitaxtu liwana naʼakxilhaw tuku lakpuwanaw chu tuku makgkatsiyaw, xlakata kinakujkan kinkaʼakgskgawiyan, chu tuwa nakatsiyaw niku nakinkalinan (Jer. 17:9). Ankgalhin litaʼakgskgawiyaw “ni xaxlikana talakapastakni” (Sant. 1:22). Wa xlakata kalimaklakaskiw xTachuwin Dios xlakata naʼakxilhaw la likatsiyaw. Uma kinkamakgtayayan naʼakxilhaw tuku wi kkinakujkan, «tuku lakpuwan chu tuku tlawaputun» (Heb. 4:12, 13). w20.11 18:1-3

Komo taktujuyaw chu limasiyayaw pi ni putum matlaniyaw, uma natlawa pi napaxuwayaw. ¿Tuku xlakata? Xlakata akxni katsiyaw pi nila putum matlaniyaw, napaxtikatsiniyaw tamakgtay nema nakinkamaxkikanan. Kalakapastakwi akxni Jesús kamapaksalh kgalhakaw tiku xkgalhikgo lepra. Kajwatiya chatum taspitli xlakata napaxtikatsini pi xmapaksanit. Uma chixku xkatsi pi nila xʼakstu xpaksli, wa xlakata paxtikatsinilh chu malankilh Dios (Luc. 17:11-19). Latamanin tiku taktujukgo chu katsikgo pi ni putum matlanikgo tlan katalalinkgo amakgapitsin chu kgalhikgo laktlan amigos. ¿Tuku xlakata? Xlakata katsikgo pi amakgapitsin kgalhikgo laktlan tayat chu kalipawankgo. Nachuna, lipaxuwakgo akxni akxilhkgo pi amakgapitsin tlan kakitaxtunima la skujnanimakgo Jehová chu kawanikgo pi tlawamakgo lu tlan taskujut chu kamaxkikgo kakni. w20.08 12:17, 18