Septiembre

Pedro tanu tachuwin maklakaskilh akxni lichuwinalh tuku xwanit Joel (Hech. 2:16, 17). Jehová tlawalh pi Pedro xmaklakaskilh «kxaʼawatiya kilhtamaku» chu ni wa tachuwin «alistalh». Uma kilhchanima pi kxaʼawatiya xkilhtamaku Jerusalén chu xtemplo, Dios xʼama kamaxki xʼespíritu «latamanin tiku tanu tanu xlakatsukutkan». Titaxtulh lhuwa kilhtamaku asta akxni kgantaxtulh tuku xlichuwinanit Joel. Alistalh akxni Dios kamaxkilh xʼespíritu santo kstalaninanin Cristo kxapulana siglo, lu tlan tsukulh kitaxtu akxni xlichuwinankgo Dios. Akxni Pablo katsokgnanilh natalan xalak Colosas, lakatsu kkata 61, wa pi xatlan tamakatsinin xlichuwinankanit «kxlikalanka kakilhtamaku» (Col. 1:23). Akxni wan «kxlikalanka kakilhtamaku», Pablo xkilhchanima kachikinin nema xlakgapaskan ama kilhtamaku. La uku, xlakata xʼespíritu santo Jehová, xtachuwin Dios tlakg talakgatuminit chu kichanit «asta niku kgalhsputa katiyatni» (Hech. 13:47). w20.04 6:15, 16

Jehová kinkapaxkiyan kinchatunukan, asta tiku tamakgatlinikgonit (Mat. 18:12-14). Dios malaknulh pi xʼama kaputsa xborregos tiku xtsankgakgonit chu xʼama kamakgtaya xlakata tlan xtawilapa xtakanajlakan. Chu lichuwinalh pi xʼama tlawa chuna la xtlawalh chatum mapuchwayanina israelita komo xmakgatsankgalh tantum xborrego (Ezeq. 34:12-16). Pulana, mapuchwayanina putsa xborrego, lhuwa kilhtamaku chu litliwakga limaxtu. Alistalh, akxni natekgsa, namaspitpara niku kamakikan. Nachuna, komo borrego lanilh tuku nitlan o lu tsinksma xatapaxuwan namakgtaya, naswitni niku laninit tuku nitlan, nachaxlin chu namawi. Xlakata xmapuchwayaninanin «xborregos Dios», lakgkgolotsin na wa uma tuku xlitlawatkan akxni namakgtayakgo tiku tamakgatlinikgonit congregación (1 Ped. 5:2, 3). Kaputsakgo, kamakgtayakgo xlakata tlan nataspitparakgo kcongregación chu kalimasiyanikgo tapaxkit akxni kamakgtayakgo xlakata tlan natawilapara xtakanajlakan. w20.06 20:10

¿Jesús wa pi kkapukuxtun tlantiya xmakika xatawakat xlakata xlakaskin pi putum latamanin kstalanikgolh? Nichuna. Biblia xlichuwinanit pi ni lhuwa tiku xʼamakgolh kanajlanikgo (Juan 12:37, 38). Jesús na tlan xkatsi tuku xwi kxnakujkan latamanin (Mat. 9:4). Maski chuna, kalitachuwinalh Dios putum latamanin, pero tlakg kalilakgaputsalh tiku kanajlanikgolh. Xlakata ni katsiyaw tuku wi kxnakujkan latamanin, kaliskujwi xlakata ni tunkun nalakpuwanaw pi ni katitalakgpalikgolh. Kalakapastakwi tuku kawanilh Jesús kstalaninanin. Wa pi kapukuxtun snapapata, uma wamputun pi tlantiya namakikan tachanan. Latamanin tlan lakgpalikgo xlatamatkan. Jehová “lhuwa xtapalh kaliʼakxilha” umakgolh latamanin (Ageo 2:7). Komo nakaʼakxilhaw la Jehová chu Jesús, nakaʼakgatekgsniyaw tuku lilakgaputsakgo. Ni katilakpuwaw pi nikxni katitalakgpalikgolh, wata nakaʼakxilhaw la tiku kinatalankan nalitaxtukgo. w20.04 13:18, 19

Biblia liwana kinkamasiyaniyan pi talakaskin napaxkiyaw Jesús komo makgapaxuwaputunaw Jehová. Xlakata nalakgapasaw Jesús talakaskin nalikgalhtawakgayaw libros xla Mateo, Marcos, Lucas chu Juan. Akxni nalilakpuwanaw xlatamat Jesús chu naʼakxilhaw la kalimasiyanilh talakgalhaman latamanin, tlakg napaxkiyaw chu namaxkiyaw kakni. Akgtum liʼakxilhtit, ni kalikatsinilh kstalaninanin la lakskujnin, maski xla xMalanakan xwanit. Wata la xʼamigos kalikatsinilh chu kawanilh tuku xmakgkatsi chu tuku xlakpuwan. Xmakgkatsi tuku nitlan xtitaxtukgo chu xkatatasa (Juan 11:32-36). Asta xtalamakgasitsin akxilhkgolh pi tiku makgamakglhtinankgolh xtamakatsinin, xʼamigos litaxtukgolh (Mat. 11:19). Komo nachuna nakalikatsiniyaw amakgapitsin chuna la xla kalikatsinilh kstalaninanin, tlakg tlan nakatalalinaw, tlakg napaxuwayaw, napaxkiyaw chu chuna tlakg namaxkiyaw kakni Cristo. w20.04 22:9, 10

Kkata 1870, Gran Bretaña xkgalhi lhuwa lakgtliwakgan soldados nixawa atanu kachikin. Daniel wa pi uma kachikin xlitaxtu aktsu akgalokgot nema katlajalh pulaktutu tamapakgsin, Francia, España chu Países Bajos (Dan. 7:7, 8). Gran Bretaña wa mapakgsina xalak sur xlitaxtu asta akxni xlama xaPulana Guerra kxLikalanka Katiyatni. Pero uma kilhtamaku, Estados Unidos de América wa tiku tlakg xkgalhi tumin nixawa amakgapitsin kachikin chu tsukulh taskuja Gran Bretaña. Akxni xlama xaPulana Guerra, Estados Unidos chu Gran Bretaña akxtum lakgolh chu wa tiku tlakg lakgtliwakgan mapakgsinanin litaxtukgolh. Chuna la lichuwinalh Daniel, uma mapakgsina kamamakxtumilh «lakgtliwakgan chu lhuwa soldados». Kʼuma xaʼawatiya kilhtamaku, Estados Unidos chu Gran Bretaña wa mapakgsina xalak sur litaxtukgo. w20.05 4:7, 8

Kkatiyatni anan chuchut xlakata ni lu lakgamakgat chu ni lu lakatsu wilanilh Chichini. Komo kaj tsinu tlakg lakatsu xtitawilanilh, putum chuchut nema anan kKatiyatni xlakgmixli, chu Katiyatni kaj akgtum lanka chiwix xlitaxtulh. Pero, komo kaj tsinu lakgamakgat xtawilanilh, putum chuchut hielo xlalh. Xlakata Jehová ni tlakg lakgamakgat chu ni tlakg lakatsu wilinilh Katiyatni Chichini, tlan sastimpara chuchut. Chichini makgalhchichi chuchut nema anan kpupunu chu nema kgalhi tiyat, chu chuchut nema lakgmixa wa puklhni litaxtu. Akgatunu kata, chuchut nema lakgmixa tlakg lhuwa nixawa chuchut nema anan kputum kgalhtuchokgo. Chuchut nema lakgmixa tamakgxtakga kʼatmósfera akgkaw kilhtamaku, chu alistalh taktapara akxni min sen o takta miki, chu uma chuchut tamakgxtakgpara kpupunu o kkgalhtuchokgo. Alistalh tsukupara uma. Chuna la sastimpara chuchut limasiya xliskgalala chu xlitliwakga Jehová (Job 36:27, 28). w20.05 22:6

Jesús kinkamakgpuwantinin ankgalhin naskinaw espíritu santo (Luc. 11:9, 13). Jehová maklakaskin espíritu santo xlakata nakinkamaxkiyan «litliwakga tuku latamanin nila kgalhikgo» (2 Cor. 4:7). Espíritu santo tlan nakinkamakgtayayan natayaniyaw tuku tuwa natitaxtuyaw. Tlan nakinkamakgtayayan namakgantaxtiyaw tuku kinkalakgayawakanitan kxkachikin Dios chu tlan natlawa pi tlakg tlan namakgantaxtiyaw kintaskujutkan. Katsiyaw pi tuku tlan kitaxtu chuna la skujnanimaw Jehová wa xlakata xtamakgtay espíritu santo. Tlan nalimasiyayaw pi lanka xtapalh liʼakxilhaw akxni naskiniyaw Jehová pi kakinkamakgtayan nalakgmakganaw putum nixatlan talakapastakni (Sal. 139:23, 24). Jehová nalimaklakaskin xʼespíritu santo xlakata tlan naʼakxilhaw komo wi tuku kililakgpalitkan. Wa xlakata kaskiniw xʼespíritu santo xlakata nakgalhiyaw litliwakga, chuna nalimasiyayaw pi ni tlawaputunaw tuku max natlawa pi Jehová nialh nakinkalimakgtayayan xʼespíritu santo (Efes. 4:30). w20.05 28, 29:10, 12

Akxni kgalhmakgtayayaw xtukuwani Jehová, stalanimaw xliʼakxilhtit Jesucristo. Akxni Jesús masiyalh xtukuwani xTlat ni kaj limaklakaskilh, wata nachuna masiyalh la likatsi. Jesús kamakgtayalh latamanin xlakata naʼakxilhkgo pi xTlat kinkaʼakgatekgsniyan, ni lakapala sitsi, xapaxkina chu xalakgalhamanina. Chuna la kalikatsinilh latamanin kamakgtayalh nalakgapaskgo xtayat Jehová (Juan 14:9). Akinin na tlan nakamasiyaniyaw amakgapitsin tuku katsiniyaw xlakata Jehová chu tlan nakawaniyaw pi xla lu xapaxkina. Namasantujliyaw xtukuwani Jehová chu nakamakgtayayaw latamanin xasanto naliʼakxilhkgo Jehová. Kintachuwinkan chu tuku tlawayaw limasiya la likatsi Jehová. Makgtayanamaw natamaskulunki xtukuwani Jehová akxni kamakgtayayaw latamanin namakgxtakgkgo nixatlan talakapastakni. Nachuna, masantujliyaw xtukuwani Jehová akxni ni makgxtakgaw maski makglakgalhinanin akinin. w20.06 6:17, 18

Redes sociales kinkamakgtayayan, pero talakaskin liwana namaklakaskinaw. ¿Akxilhnitaw pi tuku latamanin wilikgo kredes sociales chuna tlawakgo kaj xlakata xlakaskinka nakaliʼakxilhkan? Lakaskinkgo pi latamanin naʼakxilhkgo tuku tlawakgo. Makgapitsi wilikgo laklixkajni tachuwin chu kawanikgo tuku xalixkajnit amakgapitsin xlakata xfotoskan. Uma ni tatalakxtumi tayat nema kilikgalhitkan, la tataktujut chu makgkatsikan tuku makgkatsikgo amakgapitsin (1 Ped. 3:8). Komo namaklakaskinaw redes sociales, kalilakpuwaw: «¿La tasiyakgo fotos, videos chu tuku ktsokgwili anta kredes sociales? ¿Klimasiya pi kaj lanka kilimakgkatsikan?». Akinin kstalaninanin Cristo ni lakaskinaw pi amakgapitsin xlakaskinka nakinkaʼakxilhkgoyan. Stalaniyaw tastakyaw xalak Biblia nema tekgsaw ktexto xala uku. Komo taktujuyaw, ni katikgalhiw tayat nema kgalhi uma kakilhtamaku (1 Juan 2:16). w20.07 6:14, 15

Akxni apóstol Pablo nina kstalanina Cristo xlitaxtu, xkaputsastalani kstalaninanin Jesús (Hech. 7:58). Pero wa Jesús tiku tachuwinalh, tlawalh pi nialh xlakawanalh chu nialh maxkilh talakaskin chuntiya nakaputsastalani kstalaninanin. Xlakata tlan xlakawanampa, xtalakaskin pi xkalakgalh tiku xkaputsastalaninit xlakata xmakgtayakgolh. Taktujulh chu makgamakglhtinalh xtamakgtay Ananías, tiku tlawalh pi xlakawanampa (Hech. 9:3-9, 17, 18). Titaxtulh kilhtamaku, Pablo lu xlakaskinka litaxtulh kcongregación xla kstalaninanin Cristo, chu ankgalhin xlakapastaka tuku Jesús masiyanilh akxni tachuwinalh kxtiji Damasco. Taktujulh chu xatapaxuwan makgamakglhtinalh xtamakgtaykan xnatalan. Liwana katsilh pi xmakgtayakgonit chu lu xmatliwakglhkgonit (Col. 4:10, 11, nota). w20.07 18:16, 17

Maski Jehová kgalhi putum litliwakga, kamaxki limapakgsin amakgapitsin. Lakgayawalh Jesús xlakata Mapakgsina xlitaxtulh kxTamapakgsin chu na nakamaxki tsinu limapakgsin 144,000 natalan. Masiyanilh Jesús la Mapakgsina chu xaPuxku Sacerdote nalitaxtu (Heb. 5:8, 9). Na kamasiyani tiku natamapakgsinankgo xKgawasa, pero akxni nakamaxki taskujut ni katikatsiputulh putum tuku natlawakgo. Wata nakalipawan pi natlawakgo xtalakaskin (Apoc. 5:10). Maski kinTlatkan xalak akgapun ni maklakaskin tamakgtay xla kamaxki limapakgsin amakgapitsin. ¿La tlan nachuna natlawakgo tiku pulalinkgo familias chu lakgkgolotsin xalak congregación? Nakalakgayawakgo taskujut amakgapitsin chu ni nakatsiputunkgo putum tuku natlawakgo. Komo chuna natlawakgo, ni kajwatiya katitlawakgolh pi namakgantaxtikgo taskujut, wata nakamasiyanikgo amakgapitsin, chu nakamakgtayakgo nakatsikgo pi tlan taskujut natlawakgo (Is. 41:10). w20.08 9:5, 6

¿La lakaskin Jehová pi nakaʼakxilhaw xborregos tiku tamakgatlinikgonit? Jesús xkatsi pi Dios lanka xtapalh kaʼakxilha xborregos. Wa xlakata, lu liskujli nakamakgtaya «tiku xalak Israel» xlakata nalakgtaspitkgo Jehová (Mat. 15:24). Nachuna liskujli xlakata ni nakamakgatsankga xborregos xTlat (Juan 6:39). Apóstol Pablo kawanilh lakgkgolotsin xalak Éfeso pi xtalakaskin nastalanikgo xliʼakxilhtit Jesús. Kawanilh: «Nakamakgtayakgoyatit tiku maklakaskinkgo tamakgtay chu na mililakapastakatkan tuku tilichuwinalh Malana Jesús, akxni xla wa: “Tlakg anan tapaxuwan akxni mastakan nixawa akxni makglhtinankan”» (Hech. 20:17, 35). Lakgkgolotsin lanka taskujut lakgayakgolh. Salvador, chatum kgolotsin xalak España wan: «Akxni klilakpuwan pi Jehová lu kapaxki xborregos tiku tamakgatlinikgonit, kimakgpuwantini naktlawa putum tuku kmatlani xlakata nakkamakgtaya. Liwana kkatsi pi Jehová lakaskin nakkakuentajtlawa». w20.06 23:15, 16

Jehová nakgalhkgalhi asta akxni nasputa akgtum mil kata xlakata nialh nakgalhiyaw talakgalhin. Asta ama kilhtamaku, xla chuntiya nakinkatapatiyan. Wa xlakata, kastalaniw xliʼakxilhtit chu wa kaʼakxilhwi xalaktlan xtayatkan amakgapitsin chu kakalimasiyaniw pi kgalhkgalhinanaw. Kalilakpuwaw la napaxuwakgo ángeles chu Jesús akxni naʼakxilhkgo pi katiyatni litsama nawan latamanin tiku nialh nakgalhikgo talakgalhin. Kalilakpuwaw la napaxuwakgo tiku natamapakgsinankgo Cristo anta kʼakgapun akxni naʼakxilhkgo pi litamakgtayamaka xtaskujutkan (Apoc. 4:4, 9-11; 5:9, 10). Kalilakpuwaw la nawan akxni natasayaw kaj xlakata napaxuwayaw, akxni nialh katiʼanalh tajatat, talipuwan chu linin. Kalakkaxwiliw nalimasiyayaw tapaxkit, liskgalala, chu pi kgalhkgalhinanaw. Komo chuna natlawayaw, chuntiya napaxuwayaw maski natitaxtuyaw tuku tuwa (Sant. 1:2-4). Lu paxtikatsiniyaw Jehová pi «nakamalakastakwani [tiku nikgonita]» (Hech. 24:15). w20.08 19:18, 19

Biblia akgtum tamaskiwin nema limasiya xtapaxkit Dios. Xla tlawalh pi lakchixkuwin xala makgasa xtsokgwilikgolh xlakata xla kalilakgaputsa xlakkamanan xalak Katiyatni. Anta kxTachuwin, Jehová kgalhti lhuwa xlakaskinka takgalhskinin: ¿tuku xlakata lamaw? chu ¿tuku nala kkilhtamaku nema aku mima? Chuna la titaxtunit kilhtamaku tlawanit pi namatitaxtikan Biblia ktanu tanu tachuwin. La uku, xamaktuminika Biblia o maski ni takgatsi, matitaxtikanit kliwaka akgtutu mil tanu tanu tachuwin. Wa libro nema tlakg malakgatumikanit chu matitaxtikanit ktipalhuwa tachuwin. ¿La tlan nalimasiyayaw pi lanka xtapalh akxilhaw Biblia? Chali chali nalikgalhtawakgayaw, nalilakpuwanaw tuku kinkamasiyaniyan chu naliskujaw xlakata nalilatamayaw tuku katsinimaw. Na limasiyaniyaw Jehová pi lanka xtapalh akxilhaw akxni tlawayaw putum tuku matlaniyaw xlakata nakalitachuwinanaw Biblia putum latamanin tiku nakatekgsaw (Sal. 1:1-3; Mat. 28:19, 20). w20.05 24, 25:15, 16

Palakachuwina Jeremías xlichuwinan Dios niku ni lu xkgaxmatniputunkan. Lu taxlajwanilh chu asta nialh xtlawaputun uma taskujut. Pero chuntiya tlawalh. ¿Tuku xlakata? Wa pi xtachuwin Jehová litaxtulh kxnaku xtachuna la lhkuyat nema nila lakgmixa (Jer. 20:9). Nachuna nakinkaʼakgspulayan komo nalimatsamayaw kintalakapastaknikan chu kinakujkan xTachuwin Dios. Uma pulaktum tuku kinkamakgpuwantiniyan chali chali nalikgalhtawakgayaw chu nalilakpuwanaw Biblia. Chu uma natlawa pi tlakg nalipaxuwayaw la lichuwinanaw Dios chu max tlakg tlan nakinkakitaxtuniyan (Jer. 15:16). Wa xlakata, akxni taxlajwaniyaw, kawaniw Jehová tuku makgkatsiyaw chu kaskiniw xtamakgtay. Xla nakinkamakgtayayan akxni tatatlayaw, nakinkamakgtayayan naʼakxilhaw chuna la xlilat akgtum talakgatay, chu nakinkamakgtayayan nakgalhiyaw tlan talakapastakni akxni nalichuwinanaw xtachuwin chu la namakgatlajayaw taxlajwanit. w20.12 27:20, 21

Makgapitsi natalan lakpuskatin kajwatiya ktamakxtumit tlan akxtum katatawilakgo natalan. Wa xlakata maklakaskimputunaw uma kilhtamaku xlakata tlan nakatachuwinanaw chu nakalimasiyaniyaw pi kalilakgaputsayaw (Luc. 10:38-42). Max tlan nakawaniyaw pi kaʼankgolh kkinchikkan xlakata wi tuku nakatawayaw, kakalitachuwinaw tuku nakamatliwakglha (Rom. 1:11, 12). Lu xlakaskinka pi lakgkgolotsin nalikatsikgo la xlikatsi Jesús. Xla xkatsi pi makgapitsi tiku nina makgaxtokgkgo tuwa xʼamakgo titaxtukgo. Pero liwana lichuwinalh pi xlakata napaxuwayaw ni lu xlakaskinka pi natamakgaxtokgaw, wata wa tlakg xlakaskinka pulana nawiliyaw la skujnaniyaw Jehová (Mat. 19:12; Luc. 11:27, 28). Lakgkgolotsin xliʼakxilhatkan natalan lakpuskatin chuna la xnatsetnikan chu xnatalankan. Lu tlan taskujut tlawakgo akxni limaxtukgo kilhtamaku xlakata nakatachuwinankgo natalan lakpuskatin akxni nina tsuku o akxni sputnita tamakxtumit. w20.09 21, 22:7-9

Anta kʼIsrael, chanana xchan talhtsi akxni xlimakgtumku ksenanit papaʼ octubre chu xmaki xtachanan akxni xaʼawatiya ksenan papaʼ abril (Mar. 4:28). Limasiyayaw liskgalala komo stalaniyaw xliʼakxilhtit chanana. Pero xlakata makglakgalhinanin akinin lakapala akxilhputunaw la nakitaxtu kintaskujutkan. Komo wi tiku lakaskin pi xtachanan nastaka chu namasta xtawakat, talakaskin ankgalhin nakuentajtlawa: nalakgkuxtu chu namunuwili. Nachuna kitaxtu akxni kamasiyaniyaw latamanin. Akxni nakinkalakgmakgankgoyan, komo kgalhkgalhinanaw nakinkamakgtayayan ni nataxlajwaniyaw. Pero na talakaskin nalimasiyayaw pi kgalhkgalhinanaw akxni latamanin tlan kinkakgaxmatnikgoyan, xlakata nila tlawayaw pi lakapala nastaka xtakanajla. Milh kilhtamaku, asta xtamakgalhtawakgen Jesús tuwa makgkatsikgolh naʼakgatekgskgo tuku xla xmasiya (Juan 14:9). Kalakapastakwi pi akinin tlan nachanananaw chu namunuwiliyaw, pero Dios wa tiku mastaka (1 Cor. 3:6). w20.09 11:10, 11

Kimputumkan lakaskinaw pi tiku kamakgalhtawakgemaw natamunukgo. Pulaktum tuku tlan nakamakgtaya wa pi nakamakgpuwantiniyaw naʼankgo ktamakxtumit. Tiku tunkun ankgo ktamakxtumit wa tiku tlakg lakapala staka xtakanajlakan. Makgapitsi natalan kawanikgo pi tlakg nakatsinikgo xlakata Biblia ktamakxtumit chu ni kaj xman wa akxni kamakgalhtawakgekan akgatunu semana. Kalitakgalhtawakgaw Hebreos 10:24, 25 chu kalitachuwinaw tuku tlan nakitaxtuni. Xatapaxuwan kalitachuwinaw tuku katsiniw ktamakxtumit nema aku kilaw. Uma tlakg namakgpuwantini nixawa komo kajwatiya nawaniyaw pi kaʼalh ktamakxtumit. Tuku naʼakxilha o nakgaxmata akxni xlimakgtumku naʼan ktamakxtumit nipara tsinu tatalakxtumi tuku akxilhnit o kgaxmatnit knixaxlikana takanajla (1 Cor. 14:24, 25). Nakalakgapasa latamanin tiku nawilinikgo tlan liʼakxilhtit chu tiku namakgtayakgo xlakata tlan natamunu. w20.10 10, 11:14, 15

Espíritu santo nakinkamakgtayayan nalilatamayaw tuku likgalhtawakgayaw kBiblia. Kaskiniw chuna la salmista: «Oh Jehová, kakimasiyani mintiji. Akit naklilatama tuku xaxlikana. Kimaxki xatakgatsin naku xlakata nakpekuani mintukuwani» (Sal. 86:11). Chuntiya kalitamakgtayaw liwat xaʼespiritual nema kinkamaxkiyan Jehová kBiblia chu xkachikin. Kamakiw tuku xaxlikana kkinakujkan chu kalilatamaw. Xʼespíritu Jehová nakinkamakgtayayan chuna natlawayaw. Na kakamakgpuwantiniw kinatalankan, xlakan kifamiliajkan xaʼespiritual litaxtukgo (Heb. 10:24, 25). Katlawaniw oración Jehová xlakata xʼespíritu nakinkamakgtayayan namastayaw kintakgalhtinkan ktamakxtumit chu xlakata natlawayaw putum tuku matlaniyaw akxni wi tuku kinkalakgchanan namatitaxtiyaw anta. Chuna, nalimasiyaniyaw Jehová chu xKgawasa pi kapaxkiyaw xborregos (Juan 21:15-17). Wa xlakata kakgalhakgaxmatwi xaLanka kiMakgalhtawakgenakan chu kalitamakgtayaw liwat xaʼespiritual nema kinkamaxkiyan. w20.10 24, 25:15-17

¿La kalikatsinilh Jesús akxni taxlajwanikgolh? Kaʼakxilhwi tuku tlawalh akxni xlakastakwananita. Kawanilh makgapitsin xtamakgalhtawakgen lakpuskatin pi xkamakatsinikgolh xʼapóstoles pi xlakastakwananita. Kawanilh: «¡Ni kapekuantit! Kapitit, kakawanitit kinatalan» (Mat. 28:10a). Maski makgxtakgkgolh, kaʼakxilhwi pi Jesús ni kalakgmakgalh, wata chuntiya kalimapakuwilh «kinatalan». Jesús chuna likatsilh la Jehová, lakgalhamaninalh chu ankgalhin tapatinalh (2 Rey. 13:23). Akinin na lu kalilakgaputsayaw tiku nialh lichuwinankgo Dios. Chuntiya kinatalankan litaxtukgo chu kapaxkiyaw. Ni patsankgayaw putum tuku tlawakgolh makgasa xpalakata Jehová, chu max akglhuwa kata chuna tlawakgolh (Heb. 6:10). Lu kalakapastakaw (Luc. 15:4-7). Wa xlakata kakamakgpuwantiniw tiku nialh lichuwinankgo Dios pi kaʼankgolh ktamakxtumit. Chu akxni naʼankgo ktamakxtumit, tlan kakamakgamakglhtinaw. w20.11 6:14-17

Santiago chu Juan skinikgolh Jesús pi xtawilakgolh kxpaxtunin anta kxTamapakgsin. Xla kgalhtinalh pi kajwatiya Jehová lakgchan nalaksaka tiku tlan nakgalhi uma talakgalhaman (Mat. 20:20-23). Chuna limasiyalh pi ni xlakatsala xTlat. Limasiyalh pi ni putum xmatlani chu nikxni lakatsalalh tuku xlimapakgsinit Jehová (Juan 12:49). ¿La tlan nastalaniyaw xliʼakxilhtit? Limasiyayaw pi ni putum matlaniyaw akxni kgalhakgaxmataw limapakgsin nema min ktexto xala uku. Wa xlakata, akxni wi tiku nakinkaskiniyan akgtum tastakyaw, nikxni kawaniw tuku kiʼakstukan lakpuwanaw, chu ni kawaniw tuku pulana namin kkintalakapastaknikan. Wata kawaniw tuku lichuwinan xtastakyaw Biblia chu kilikgalhtawakgakan. Chuna nalimasiyayaw pi ni putum matlaniyaw, xlakata katsiyaw pi nila tlawayaw tuku ni kinkalakgchanan chu pi xtastakyaw Jehová tlakg tlan nixawa tastakyaw nema akinin xmastaw (Apoc. 15:3, 4). w20.08 11:14, 15

Komo namin kilhtamaku akxni nalakpuwanaw pi chatum kiʼamigojkan maklakaskin akgtum tastakyaw, ¿tuku kuentajkilitlawatkan? Akxni nina tachuwinanaw, kalakpuwaw: «¿Klakpuwan pi nikxni ktlawa tuku nitlan?». Tiku lakpuwan pi nikxni tlawa tuku nitlan kalakputsanani amakgapitsin chuna la xla lakpuwan pi xlilat, chu ni wa tuku lakpuwan Jehová, chu ni kalimasiyani talakgalhaman. Komo chuntiya lakpuwanaw pi talakaskin nastakyawayaw kiʼamigojkan, lakatitum katachuwinaw chu katlawaniw takgalhskinin xlakata nakatsi tuku nitlan tlawama. Putum tuku nawanaw kakilhtiyaw kBiblia, chu kalakapastakwi pi wa Jehová tiku nalakputsanani chu ni akinin (Rom. 14:10). Kalitamakgtayaw xliskgalala Biblia chu, akxni wi tiku nastakyawayaw, kalakgalhamaninaw la Jesús (Prov. 3:5; Mat. 12:20). Kalakapastakwi pi Jehová nakinkalikatsiniyan chuna la kalikatsiniyaw amakgapitsin (Sant. 2:13). w20.11 21:13

¿Nixlikana pi nitlan makgkatsiyaw akxni wi tiku kinkaputsananiyan kaj xlakata kincolorkan, la lakawanaw chu la tasiyayaw? Wa xlakata, lu tlan makgkatsiyaw pi Jehová ni kinkaputsananiyan kaj xlakata la tasiyayaw. Akxni Samuel kaʼakxilhli xkamanan Jesé, ni wa akxilhli tuku Jehová akxilhli. Dios xwaninit pi chatum xkgawasa Jesé mapakgsina xʼama litaxtu kʼIsrael. Pero ¿tiku? Akxni akxilhli Eliab, xapuxku, Samuel wa: «Xlikana kxlakatin Jehová ya tiku xla laksaknit». Eliab xtasiya pi tlan mapakgsina xlitaxtulh. «Pero Jehová wanilh Samuel: “Ni kaʼakxilhti la tasiya nipara la xlilanka, xlakata klakgmakganit”». ¿Tuku kinkamasiyaniyan? Jehová wampara: «Chixku kaj akxilha tuku tasiya; pero Jehová, xla akxilha tuku wi knaku» (1 Sam. 16:1, 6, 7). Lu tlan tuku tlawamaw komo nastalaniyaw xliʼakxilhtit Jehová akxni nakatachuwinanaw natalan. w20.04 14:1; 15:3

Jesús xʼama kʼGalilea, makglhuwa titaxtulh klhuwa kapukuxtun niku xchankanit cebada, nema xaxtakniku xtasiya o aku xpuma (Juan 4:3-6). Xlakata xtsankga akgtati papaʼ xlakata xmakika tachanan, kstalaninanin Jesús kaks lilakawankgolh akxni kawanilh: «Katalakayawatit chu kaʼakxilhtit snapapa kapukuxtun, tlantiya namakikan tachanan» (Juan 4:35, 36). ¿Tuku xkilhchanima? Jesús xkakilhchanima latamanin. Kalilakpuwaw tuku lalh. Maski judíos ni xtalalinkgo samaritanos, Jesús tachuwinalh chatum puskat xalak Samaria, chu puskat liwana kgaxmatnilh. Akxni Jesús xlichuwinama pi “kapukuxtun snapapata chu tlantiya xmakika tachanan” lhuwa samaritanos talakatsuwinikgolh Jesús xlakata tlakg nakatsikgo (Juan 4:9, 39-42). Maktum libro nema lu lakgapaskan wan: «Xlakata uma latamanin lu xkatsiputunkgo, limasiyalh pi xtachuna talhtsi xwankgonit nema xtalakaskin namakikan». w20.04 8:1, 2

Ktamakxtumit katsiniyaw la nalichuwinanaw Dios chu la tlakg tlan namasiyayaw. Kinkamasiyanikanan la tlan nakamaklakaskinaw kilikgalhtawakgakan chu videos xla kit de enseñanza. Liwana kalakkaxwiliw tuku naʼakxilhkan ktamakxtumit, kuentajkatlawaw tuku wankan anta chu kalilatamaw. Chuna, liwana nakatsiyaw tuku natlawayaw (2 Tim. 2:3). Na kgalhiyaw xtamakgtaykan lhuwa millones ángeles, chu katsiyawa tuku tlan tlawa kaj chatum ángel (Is. 37:36). Ni anan nipara chatum chixku chu demonio tiku tlan nakamakgatlaja ksoldados Jehová. Wankanit pi maski kiʼakstukan wilaw, komo Jehová kinkatawilan, niti kintikatlajan; tlakg lhuwa litaxtuyaw nixawa kintalatlawanakan (Juec. 6:16). ¡Uma lu xlikana! Ankgalhin kalakapastakwi uma akxni makgkatsiyaw pi nialh kgalhiyaw litliwakga xlakata tuku tlawakgo o tuku wankgo tiku kataskujaw, tiku kataʼanaw kʼescuela, o chatum kintalilakgapasnikan. Kalakapastakwi pi ni kiʼakstukan talatlawanamaw. w21.03 29:13, 14

Apóstol Pablo max xlichuwinama tuku wan Isaías 22:13, niku talichuwinan pi israelitas kajwatiya xlipaxuwakgo xlatamatkan nixawa naskujnanikgo Dios. Xtachuna la lhuwa latamanin la uku, umakgolh israelitas xlakpuwankgo: «Kapaxuwa, xlakata latamat nasputa». Talakaskin pi chuna la kanajlaniyaw talakastakwanat nakinkapulalinan akxni nalaksakaw tiku nakatalalinaw. Kstalaninanin Cristo xalak Corinto xlitamakgatlinitkan xwanit tiku ni xkanajlanikgo talakastakwanat. ¿Tuku kinkamasiyaniyan? Pi katalalinkan latamanin tiku kajwatiya lipaxuwaputunkgo latamat ni tlan kitaxtu. Komo nakatalalinaw natlawa pi nalakgmakganaw xalaktlan tastakyaw chu talismanin. Asta max nakinkamatlawikgoyan tuku Dios xkajni. Wa xlakata, Pablo mastalh uma tastakyaw: «Liwana kalakapastaknantit chu katlawatit tuku tlan chu ni kalismanitit natlawayatit talakgalhin» (1 Cor. 15:33, 34). w20.12 9:3, 5, 6

Uma versículo lichuwinan la lakkaxwilinit Jehová xfamilia kʼakgapun chu kKatiyatni. Jehová wa tiku kgalhi putum limapakgsin, wa xlakata kamaxkinit limapakgsin amakgapitsin. Pero Jehová nakaskini kuenta la nalimaklakaskinkgo uma limapakgsin (Rom. 14:10; Efes. 3:14, 15). Jehová lakgayawanit Jesús namapakgsi congregación; pero na naskini kuenta xlakata la kinkalikatsiniyan (1 Cor. 15:27). Jehová na maxkinit limapakgsin chixku xlakata napulalin xpuskat chu xkamanan. ¿La tlakg tlan xpulalina familia nalitaxtu? Pulana xlikatsit tuku Jehová lakaskin katlawalh. Na xlikatsit tuku xlakata Jehová lakkaxwililh uma limapakgsin, chu la tlan nastalani xliʼakxilhtit Jehová chu Jesús. ¿Tuku xlakata uma lu xlakaskinka? Xlakata Jehová kamaxkinit limapakgsin tiku pulalinkgo familia chu lakaskin pi liwana kamaklakaskinkgolh (Luc. 12:48b). w21.02 2:1-3

Na tlan namaklakaskinaw kintalakapastaknikan chuna la tlawa Jehová. Akgtum liʼakxilhtit, maski xtalakapastakni ni kgalhi talakgalhin, tapatinan chu nialh lakapastaka tuku nitlan tlawanitaw komo naskiniyaw pi kakinkatapatin (Sal. 25:7; 130:3, 4). Chu xla lakaskin pi nachuna kakalikatsiniw tiku nitlan kinkamamakgkatsinin (Mat. 6:14; Luc. 17:3, 4). Akxni nalimaklakaskinaw kiʼakskititkan chuna la namalanki Jehová nalimasiyaniyaw pi paxtikatsiniyaw xtamaskiwin. Makgapitsi latamanin laksakkgo nitlan nalimaklakaskinkgo chu xʼakstukan laksakkgo tuku tlan o tuku nitlan. Pero, xlakata Jehová kinkamalakatsukin, xlikana pi xtastakyaw tlakg laktlan nixawa tuku akinin nalakpuwanaw (Rom. 12:1, 2). Akxni lilatamayaw xtastakyaw kgalhiyaw takaksni (Is. 48:17, 18). Chu wi tuku liwana lakpuwanitaw natlawayaw: namaxkiyaw kakni chu namakgapaxuwayaw kiMalakatsukinakan chu kinTlatkan (Prov. 27:11). w20.05 24:13, 14

¿Tuku kilitlawatkan xlakata nakapaxkiyaw kinatalankan? Tlakg nakalakgapasaw. Chuna tlakg ni tuwa katimakgkatsiw nakaʼakgatekgsniyaw chu nakapaxkiyaw. Xkatakan chu niku xala kinatalankan ni xlitlawat pi ni nakapaxkiyaw. Kalakapastakwi pi Jonatán xʼamigo litaxtulh David maski 30 kata tlakg lankata xwanit nixawa xla. ¿Tlan xlilakpuwanti chatum tala xalak mincongregación tiku tlakg lankata o tlakg aktsujku nixawa wix, chu xʼamigo nalitaxtuya? Komo chuna natlawaya, nalimasiyaya pi kapaxkiya «putum natalanin» (1 Ped. 2:17). Akxni lichuwinanaw pi nakapaxkiyaw kinatalankan, ¿wamputun pi putum lu tlan nakatalalinaw? Ni. Xlakata max wi tiku tlakg tlan talalinaw xlakata watiya tuku lakgatiyaw chu uma ni talakgalhin. Jesús xʼamigos xkaliʼakxilha putum xʼapóstoles, pero tlakg xpaxki Juan (Juan 13:23; 15:15; 20:2). Maski chuna, Jesús ni tlakg tlan likatsinilh Juan nixawa amakgapitsin (Mar. 10:35-40). w21.01 23:12, 13

Apóstol Pablo nichuna kalitachuwinalh xtachuwin Dios latamanin xalak Atenas la kalitachuwinalh judíos xalak sinagoga. Lu kuentajtlawalh tuku xʼanan anta chu xtalismaninkan (Hech. 17:23). Alistalh, kuentajtlawalh tuku xkanajlakgo chu putsalh la nakalitachuwinan xTachuwin Dios. Kawanilh latamanin xalak Atenas pi tamakatsinin nema xlichuwinan wa xla chatum Dios tiku «ni lakgapaskan», tiku xlakan xkakninaniputunkgo. Maski tiku ni judíos ni xlakgapaskgo Tatsokgni, Pablo ni lakpuwa pi nila kstalaninanin Cristo xlitaxtukgolh. Kaʼakxilhli xtachuna la talhtsi xakatlata nema xlitamakita chu kuentajtlawalh la xkalitachuwinalh xalakwan tamakatsinin. Chuna la Pablo, liwana kaʼakxilhwi tuku anan. Kaʼakxilhwi tuku kgalhikgo latamanin niku lichuwinanaw Dios xlakata nakatsiyaw tuku kanajlakgo. ¿Wi tuku anan kxchik? ¿Xtukuwani, xtalhakgan, la takaxtaya o la chuwinan kinkamasiyaniyan tuku takanajla kgalhi? w20.04 9, 10:7, 8