Noviembre

Xlakata ni liwana katsiyaw putum tuku titaxtulh, max xlakpuwaw pi Jonás chatum chixku tiku nila lipawankan chu makgxtakgnan. Jehová xlimapakgsinit pi xmastalh akgtum nixatlan tamakatsinin kNínive. Pero Jonás ni kgalhakgaxmatli Jehová chu alakatanu niku alh (Jon. 1:1-3). Max akinin nialh xmaxkiw talakaskin xmasputulh xtaskujut, pero Jehová nichuna lakpuwa (Jon. 3:1, 2). Tlan nakatsiyaw la xlikatsi Jonás xlakata oración nema tlawalh kxpan skiti (Jon. 2:1, 2, 9). Uma oración kinkamakgtayayan naʼakxilhaw pi xla ni kaj chatum chixku xwanit tiku tsalanilh tuku xlakgayawakanit. Xtachuwin limasiya xtaktujut, xtapaxtikatsinit chu pi xlikana xkgalhakgaxmatputun Jehová. Wa xlakata Jehová ni wa akxilhli tuku nitlan tlawalh, kgaxmatli xʼoración chu chuntiya limaklakaskilh. Lu xlakaskinka pi lakgkgolotsin pulana liwana nakgaxmatkgo putum tuku lama chu alistalh namastakgo tastakyaw. w20.04 15:4-6

Xapulana kstalaninanin Cristo makgamakglhtinankgolh uma tamasiy chu putsakgolh xtamakgtay espíritu santo xlakata naʼakgatekgskgo xTachuwin Dios. Lakputsananikgolh komo kTatsokgni xtakilhtikgonit uma tamasiy (Hech. 17:11, 12; Heb. 5:14). Ni xkanajlakgo chu ni kskujnanikgo Dios kaj xlakata tuku xmakgkatsikgo. Wata xtakanajlakan anta xtakilhtinit “kxatakgatsin takatsin [...] xla Dios” (Col. 1:9, 10). Xaxlikana xlakata xTachuwin Dios nikxni talakgpali (Sal. 119:160). Ni talakgpali komo chatum tala nitlan nakinkamamakgkatsiniyan o natlawa akgtum lanka talakgalhin. Na ni talakgpali maski titaxtumaw taʼakglhuwit. Talakaskin lu nalakputsananiyaw Biblia chu nakanajlayaw pi xaxlikana. Xtachuna la kgantum kiwi nema lu pulhman aknukgo xtankgaxekg makgtaya xlakata nitu natlawani lanka unisen, komo liwana nakanajlayaw tuku masiya Biblia, ni katimakgxtakgwi Jehová akxni natitaxtuyaw tuku tuwa. w20.07 9:6, 7

Jesús wan pi akxni kamakgtayayaw xnatalan tiku xatalaksakni xtachuna la komo wa makgtayayaw (Mat. 25:34-40). Niku tlakg tlan nakamakgtayayaw xnatalan Cristo wa akxni nalichuwinanaw Dios (Mat. 28:19, 20). Xtamakgtaykan «amakgapitsi borregos» xlakaskinka xlakata xnatalan Cristo tlan namakgantaxtikgo xtaskujutkan la uku kxlikalanka kakilhtamaku (Juan 10:16). Komo akinin litaxtuyaw amakgapitsi borregos, akxni lichuwinanaw Dios limasiyayaw pi kapaxkiyaw tiku xatalaksakni chu nachuna Jesús. Na xʼamigos Jehová chu Jesús litaxtuyaw akxni maklakaskinaw kintuminkan xlakata nalimakgtayananaw (Luc. 16:9). Akgtum liʼakxilhtit, tlan xatapaxuwan namastayaw kintuminkan xlakata nalimakgtayananaw tlakg tlan nalichuwinankan Dios akxni titaxtu tuku masputunan. Na tlan xatapaxuwan namastayaw kintuminkan kkincongregacionkan chu nakamakgtayayaw natalan tiku ni kgalhikgo tuku maklakaskinkgo (Prov. 19:17). w20.04 24:12, 13

Chuna la xlichuwinanit Daniel, mapakgsina xalak norte ni maxkilh «takaknin nema lakgchan xDioskan xnatlatnikan». Unión Soviética xmalakgachokgoputun putum takanajla nema xʼanan anta xlakata xkamasputuputun. Wa xlakata, kkata 1918 xtamapakgsin Unión Soviética mastalh limapakgsin pi kʼescuelas xmasiyaka pi ni anan chatum Dios. ¿Chu la maxkilh «takaknin dios tiku kgalhi litliwakga»? Laktlawalh lhuwa tumin xlakata namatliwakglha lhuwa ksoldados chu tlawalh lhuwa tuku limakgninankan xlakata tlakg nakgalhi limapakgsin. Alistalh, mapakgsina xalak norte chu mapakgsina xalak sur maʼakgstokgwilikgolh lhuwa tuku limakgninankan xlakata nakamalakgsputu lhuwa millones latamanin. Mapakgsina xalak norte chu mapakgsina xalak sur wi tuku akxtum lakkaxwilikgonit natlawakgo: lakkaxwilikgonit «tuku xalixkajni chu tuku malakgsputunan», uma wa Organización de las Naciones Unidas (Dan. 11:31). w20.05 6, 7:16, 17

¿Tiku tlan namakgtayanankgo xlakata nakaputsakan tiku tamakgatlinikgonit Jehová? Putum congregación, lakgkgolotsin, precursores chu publicadores. ¿Wi tiku xalak kifamiliajkan o kiʼamigojkan tamakgatlininit Jehová? ¿Tekgsnitaw tiku tamakgatlininit Jehová akxni lichuwinanaw Dios o akxni anaw kʼakgatunu chiki? Kawaniw pi komo nalakaskin nalakgapaxialhnankan, tlan nakawaniyaw lakgkgolotsin. Chatum kgolotsin tiku wanikan Thomas wan: «Pulana, kkakgalhskin natalan tiku max katsikgo niku wi xchikkan tiku tamakgatlinikgonit Jehová. O kkakgalhskin publicadores komo lakapastakkgo chatum tala tiku nialh an ktamakxtumit. Alistalh, akxni klakgapaxialhnan tiku tamakgatlininit Jehová, kkgalhskin xpalakata xkamanan o xtalilakgapasni. Makgapitsin tiku tamakgatlikgonit xkalinkgo xkamanankan ktamakxtumit, chu max na xlichuwinankgo Dios. Na tlan nakamakgtayakan nalakgtaspitparakgo Jehová». w20.06 24:1; 25:6, 7

Latamanin tlan tuku katsiniyaw xlakata tuku titaxtunitaw makgasa. Akxni lakapastakaw chu lilakpuwanaw kinkamakgtayayan wi tuku nakatsiniyaw xlakata la nalinaw kilatamatkan chu nastakyawayaw kintalakapastaknikan (1 Cor. 6:9-11; Col. 3:9, 10). Tlan nastakyawayaw kintalakapastaknikan xlakata tlan nakatsiyaw tuku xatlan chu tuku nixatlan (Heb. 5:14). Tlan katsiniyaw la nalimasiyayaw tapaxkit chu talakgalhaman, chu nakatsiyaw tuku xaʼakgstitum. Kaliskujwi nalilakpuwanaw la kinkamakgtayanitan Jehová chu la kinkamakgoxamixinitan. Chuna namatliwakglhaw la lipawanaw pi xla nakinkamakgtayaparayan (Sal. 77:12; 78:4, 7). Atanu la tlan nalimasiyayaw pi lanka xtapalh liʼakxilhaw uma tamaskiwin wa pi ankgalhin nalakapastakaw tuku tlawakgonit amakgapitsin kimpalakatakan chu nakapaxtikatsiniyaw. Tiku lu katsinikgo, wankgo pi tiku kapaxtikatsini amakgapitsin tlakg paxuwakgo. w20.05 23, 24:12, 13

Kalilakpuwaw la makgkatsilh Moisés akxni xwi kʼakgtum chiwix ksipi Horeb chu maʼakxilhnika xlilanka Jehová. Perspicacia para comprender las Escrituras lichuwinan pi uma «max wa tuku tlakg kaks malakawaninan nema nipara chatum chixku xʼakxilhnit akxni nina xmin Jesucristo». Moisés kgaxmatli umakgolh tachuwin: “Jehová, Jehová, chatum Dios tiku xalakgalhamanina, tiku tlan likatsi, ni lakapala sitsi, kgalhi lhuwa tapaxkit nema ni makgxtakgnan chu xaxlikana; tiku chuntiya lhuwa mil kalimasiyani tapaxkit nema ni makgxtakgnan chu tapatinan» (Éx. 33:17-23; 34:5-7). Moisés max ankgalhin xlakapastaka uma akxni xlimaklakaskin xtukuwani Jehová chu wa tuku wan texto xala uku. Akxni lilakpuwanaw xtukuwani Jehová, lilakpuwanaw la likatsi. Talakaskin nalakapastakaw xtayat, chuna la xtapaxkit, xlitliwakga, xliskgalala, chu pi xaʼakgstitum. Komo nalilakpuwanaw uma tlakg namaxkiyaw kakni (Sal. 77:11-15). w20.06 8, 9:3, 4

Jesús wa pi latamanin xʼamakgolh katsikgo tiku kstalaninanin xlakata tapaxkit nema lakgalhinikgo (Juan 13:34, 35). Pero ni kajwatiya tliwakga xliwanat kintakanajlakan kaj xlakata akxilhaw pi natalan lapaxkikgo. ¿Tuku xlakata? Xlakata komo chuna xwa, max lakapala namakgatsankgayaw kintakanajlakan. Max nialh katiskujnaniw Jehová komo chatum tala, kgolotsin o precursor, natlawa akgtum lanka talakgalhin. O komo chatum tala nakinkatlawaniyan tuku nitlan o chatum apóstata nalitaxtu chu nakinkawaniyan pi nixaxlikana tuku kanajlayaw. Wa xlakata, komo kgalhiputunaw tliwakga takanajla, talakaskin liwana natalalinaw Jehová. Xtachuna la chiki ni kajwatiya litlawakan tuku ni tliwekglh wi wata nachuna tuku tliwekglh nayawa, nachuna kintakanajlakan ni kajwatiya nastaka kaj xlakata tuku makgkatsiyaw wata nachuna tuku tlawayaw chu tuku lakpuwanaw. Kilikanajlatkan pi tuku masiya Biblia wa tuku xaxlikana xlakata Jehová (Rom. 12:2). w20.07 8:2, 3

Wi lhuwa liʼakxilhtit nema limasiya pi ángeles kinkamakgtayakgoyan nakatekgsaw tiku tamakgatlinikgonit Jehová (Apoc. 14:6). Silvio, tiku xalak Ecuador, tasaskinilh Jehová pi xmakgtayalh xlakata nataspitpara kcongregación. Akxni xtlawamajku xʼoración, makasanalh xtimbre. Chatiy lakgkgolotsin lakgapaxialhnankgolh chu xatapaxuwan maxkikgolh tamakgtay nema xmaklakaskima. Lu napaxuwayaw komo nakamakgtayayaw tiku taxlajwanikgonit xlakata nalakgtaspitparakgo Jehová. Kaʼakxilhwi tuku lichuwinan Salvador, chatum precursor tiku lu liskuja xlakata nakamakgtaya tiku tamakgatlinikgonit Jehová: «Lakgachunin nila ktayani chu ktsuku tasa xlakata lu kpaxuwa. Lu tlan klimakgkatsi pi Jehová lakgmaxtunit kxkakilhtamaku Satanás tantum xborrego chu pi kkgalhinit talakgalhaman nakmakgtaya». Komo tamakgatlininita Jehová, liwana kakatsi pi xla chuntiya paxkiyan chu lakaskin pi kalakgtaspitti. Jehová kgalhkgalhima pi wix nataspita kxfamilia chu namakglhtinanan. w20.06 29:16-18

Xlakata Jehová wa “Tlakg xaLanka kiMakgalhtawakgenakan”, anta kxTachuwin matsokgninalh liʼakxilhtit nema lhuwa tuku kinkamasiyanikgoyan (Is. 30:21). Tlan nakalilakpuwanaw tiku kalichuwinan Biblia nema limasiyakgolh tayat nema Dios lakgati. Nachuna tuku kaʼakgspulalh tiku ni limasiyakgolh uma tayat (Sal. 37:37; 1 Cor. 10:11). Kalilakpuwaw mapakgsina Saúl. Akxni kgawasaku xwanit, limasiyalh pi nila putum xmatlani chu xmakgkatsi pi nitu xlitaxtu. Tuwa makgkatsilh namakglhtinan xlakaskinka taskujut (1 Sam. 9:21; 10:20-22). Pero ni xlimakgas, tsukulh tlankajwanan chu asta tlawalh tuku ni xlakgchan. Nialh kgalhkgalhiputulh asta akxni xchilh palakachuwina Samuel chu tlawalh tamakamastan maski ni xlakgchan. Wa xlakata, Jehová lakgmakgalh chu nialh mapakgsina wa (1 Sam. 13:8-14). Lu tlan kitaxtu akxni katsiniyaw xlakata uma liʼakxilhtit, chu ni natlawayaw tuku ni kinkalakgchanan. w20.08 10:10, 11

Jehová maklakaskinit Cristo xlakata nakalaksaka lakchixkuwin tiku litaxtukgo la «akgtum tasikulunalin» (Efes. 4:8). Nachuna tiku makgtapakgsikgo Lakgkgolotsin tiku Pulalinkgo xtatayananin Jehová, kComités de Sucursal, superintendentes de circuito, tiku kamakgalhtawakgekgo tiku tlakg nalichuwinankgo Dios, lakgkgolotsin xalak congregación chu siervos ministeriales. Putum kalilaksakkanit espíritu santo xlakata nakakuentajtlawakgo xborregos Jehová (1 Ped. 5:2, 3). Kalilaksakkan espíritu santo xlakata natlawakgo tanu tanu taskujut. Chuna la makan, tantun chu atanu tuku litakgatsi makni tlawakgo taskujut nema makgtaya putuminika makni, natalan na tlawakgo taskujut nema makgtaya putum congregación. Ni putsakgo pi nakamaxkikan kakni, wata liskujkgo xlakata nakamatliwakglhkgo xnatalankan (1 Tes. 2:6-8). Lu paxtikatsiniyaw Jehová xlakata wilakgolh natalan tiku tliwakga kgalhikgo xtakanajlakan. w20.08 21:5, 6

Pulaktum tuku tlawa pi nalichuwinanaw Dios wa pi latamanin lixkajni kalikatsinikan chu talakaskin nakatsinikgo xlakata Tamapakgsin (Mat. 9:36). Jehová lakaskin pi putum latamanin kakgalhikgolh xatakgatsin takatsin xlakata xaxlikana chu kalakgtaxtukgolh (1 Tim. 2:4). Tuku nakinkamakgpuwantiniyan nalichuwinanaw Dios wa pi nalilakpuwanaw tuku nakitaxtu komo natlawayaw uma taskujut. Nakalakgmaxtuyaw latamanin (Rom. 10:13-15; 1 Tim. 4:16). Na kilikgalhitkan tuku namaklakaskinaw akxni nalichuwinanaw Dios. Jesús liwana kawanilh xtamakgalhtawakgen tuku xlitlawatkan xwanit. Kawanilh tuku xlinkgolh, niku xlichuwinankgolh Dios chu tuku xwankgolh (Mat. 10:5-7; Luc. 10:1-11). La uku, xkachikin Jehová kinkamaxkiyan kit de enseñanza nema limin tuku kinkamakgtayayan xlakata tlan nalichuwinanaw Dios chu kinkamasiyaniyan la nakamaklakaskinaw. Uma kinkamakgtayayan ni napekuanaw chu tlakg tlan natlawayaw kintaskujutkan (2 Tim. 2:15). w20.09 4:6, 7, 10

¿Lilakpuwanaw la paxuwalh apóstol Juan akxni katsilh pi tiku kamakgtayalh nalakgapaskgo xaxlikana chuntiyaku ni xmakgxtakgkgo Jehová? Juan xkaliʼakxilha la xkamanan. Xlakata xkgalhikgo lhuwa taʼakglhuwit, Juan tlawalh tuku xmatlani xlakata xkamatliwakglhnilh xtakanajlakan. Na lu lipaxuwayaw akxni kinkamanankan, chu tiku kamakgtayaw nalakgapaskgo tuku xaxlikana, tamakamastanikgo Jehová chu skujnanikgo (3 Juan 3). Max kkata 98, xʼespíritu santo Jehová malakpuwanilh Juan natsokgwili maktutu cartas. Katsokgwililh xlakata nakamakgpuwantini kstalaninanin Cristo chuntiya nakanajlanikgo Jesús chu chuntiya nalatamakgo kxaxlikana. Juan lu xmakgalipuwan xlakata nixaxlikana makgalhtawakgenanin xtlawamakgo tuku nitlan kcongregaciones (1 Juan 2:18, 19, 26). Umakgolh apóstatas xwankgo pi xlakgapaskgo Dios, pero xlakgmakgankgo xlimapakgsin. w20.07 20:1-3

Xlakata kanajlayaw tamakatsinin nema lichuwinanaw, lakaskinaw pi lhuwa latamanin kakgaxmatkgolh. Lipawanaw tamalaknun nema min kBiblia (Sal. 119:42; Is. 40:8). Akxilhnitaw la kgantaxtunit kkinkilhtamakujkan tuku xtalichuwinanit kBiblia. Na akxilhnitaw la tlan kakitaxtuni latamanin akxni lilatamakgo xtastakyaw. Putum uma kinkamasiyaniyan pi talakaskin pi latamanin nakgaxmatkgo xalaktlan tamakatsinin. Na kanajlaniyaw Jehová, tiku masta tamakatsinin nema linaw, chu Jesús, tiku limapakuwinit pi xMapakgsina Tamapakgsin nalitaxtu. Maski kalalh tuku nala, Jehová ankgalhin kilitatsekgnikan nalitaxtu chu nakinkamaxkiyan litliwakga (Sal. 46:1-3). Nachuna, liwana katsiyaw pi Jesús pulalima taskujut xlakata la lichuwinankan Dios, xlakata Jehová maxkinit litliwakga chu limapakgsin (Mat. 28:18-20). Takanajla matliwakglha la lipawanaw Jehová pi nasikulunatlawa kintaskujutkan. w20.09 12, 13:15-17

Namin kilhtamaku, makgapitsi natalan lakpuskatin namaklakaskinkgo pi nakamakgtayakan chu nakakgalhmakgtayakan (Is. 1:17). Chatum tala tiku ninita xchixku o lakxtlawanita xtamakgaxtokgat max maklakaskin pi wi tiku nalimakgtaya makgapitsi taskujut tuku xtlawa xchixku. Chu chatum precursora tiku atanu la makgtayanan kxkachikin Jehová max natalakaskin pi wi tiku nakgalhmakgtaya komo nalichuwinankan pi ni lu lhuwa kilhtamaku lichuwinan Dios chuna la amakgapitsin precursoras. Jesús kakgalhmakgtayalh xnatalan lakpuskatin akxni nitlan kalichuwinanka. Akgtum liʼakxilhtit, kgalhmakgtayalh María akxni Marta nitlan lichuwinalh (Luc. 10:38-42). Chu na kgalhmakgtayalh akxni amakgapitsin wankgolh pi nitlan tuku xtlawanit (Mar. 14:3-9). Jesús xkatsi tuku xlakata chuna tlawalh, wa xlakata wanilh laktlan tachuwin. Asta lichuwinalh: «Kaniwa niku natalichuwinan xatlan tamakatsinin kxlilakgatum katiyatni, na natalichuwinan tuku tlawalh uma puskat». w20.09 24:15, 16

Chatum tlan mapuchwayanina liwana xkatsi pi borregos tsankgakgo. Kaʼakxilhwi tuku tlawalh Jehová akxni makgapitsi xlakskujnin ni tlawakgolh xtalakaskin. Jonás tsalalh xlakata ni xtlawaputun tuku xlakgayawakanit. Pero Jehová ni lakgmakgalh. Chuna la xatlan mapuchwayanina, Jehová makgtayalh xlakata tlan xmakgantaxtilh tuku xlakgayawanit (Jon. 2:7; 3:1, 2). Alistalh, Jehová limaklakaskilh mayak nema xtachuna la xla puwa xlakata nalimasiyani pi xlatamatkan chatunu chatunu latamanin lu lanka xtapalh (Jon. 4:10, 11). ¿Tuku katsiniyaw? Lakgkgolotsin ni tunkun nalakpuwankgo pi tiku tamakgatlinikgonit Dios nialh katitaspitkgolh, wata talakaskin nakatsikgo tuku xlakata tamakgatlinikgolh xkachikin Jehová. Chu akxni xborregos Jehová nalakgtaspitparakgo, talakaskin pi chuntiya tlan nakalikatsinikgo chu nakalimasiyanikgo tapaxkit. w20.06 20, 21:10-12

Akxni Unión Soviética nialh mapakgsinalh kkata 1991, xlakskujnin Dios tiku xlamakgolh anta nialh kaputsastalanika. Tlan tsukuparakgolh lichuwinankgo Dios, chu ni makgas kilhtamaku tsukuparakgolh talhuwikgo kkachikinin nema xmakgtayakgonit Unión Soviética. Pero, tsinu tsinu Rusia chu tiku tatayakgo, mapakgsina xalak norte litaxtukgolh. Xlakata akgtum tamapakgsin mapakgsina xalak norte o mapakgsina xalak sur nalitaxtu wi pulaktutu tuku xlitlawat: Pulana, wi tuku katlawani xkachikin Jehová; xlipulaktiy, limasiya pi ni akxilhputun Dios chu xkachikin; chu xlipulaktutu, talatlawa atanu mapakgsina. Rusia chu tiku tatayakgo wa mapakgsina xalak norte. Nitlan tuku katlawaninit xkachikin Jehová chu kaputsastalaninit lhuwa mil natalan. Putum tuku tlawanit limasiya pi ni akxilhputun Jehová chu xkachikin. Chu xlakata talatlawakgonit mapakgsina xalak sur, nema la uku wa Gran Bretaña chu Estados Unidos. w20.05 12, 13:3, 4

Xlakata latamanin kstalaninanin Cristo nalitaxtukgo, talakaskin liwana nakamasiyaniyaw. Akgatunu semanas, masiyayaw tuku xaxlikana xalak Biblia. Xlakata lu lakgatiyaw masiyayaw, max namin kilhtamaku kajwatiya nachuwinamputunaw. Pero akxni nakinkalakgchanan napulalinaw Takgalhtawakga xla Makatsinina, Takgalhtawakga nema takilhtinit kBiblia kcongregación o akxni wi tiku makgalhtawakgemaw, talakaskin ni lhuwa nachuwinanaw. Kamastaw talakaskin pi wa Biblia namasiya. Wa xlakata, tiku makgalhtawakgenama xlimachokgot tuku nawan chu ni namasiyaputunkgo putum tuku xla katsi (Juan 16:12). Katamalakxtupi tuku wix katsiniya la uku chu tuku xkatsiniya akxni tamunu. Kajwatiya xkatsiya tuku masiya Biblia nema ni xalaktuwa (Heb. 6:1). Komo talakaskilh akglhuwa kata xlakata nakatsiniya tuku katsiya la uku, ni kalakpuwanti pi makgtum namasiyanikgoya tiku makgalhtawakgepat. w20.10 14, 15:2-4

Jehová laksakli lu xalaktlan natlatni nema kgalhilh Jesús (Mat. 1:18-23; Luc. 1:26-38). Xtachuwin María nema likgalhtawakgayaw kBiblia limasiya la xpaxki Jehová chu xTachuwin (Luc. 1:46-55). Chu tuku tlawalh José xlakata Jehová xpulalilh limasiya pi lu xpaxki chu xmakgapaxuwaputun (Mat. 1:24). Kaʼakxilhwi pi Jehová ni kalaksakli natlatni tiku xkgalhikgo lhuwa tumin xlakata wa xmakgastakkgolh Jesús. Tamakamastan nema mastakgolh José chu María akxni xlakachinita Jesús limasiya pi ni xkgalhikgo tumin (Luc. 2:24). Max ni lhuwa tuku xkgalhikgo, liwaka xlakata max kgalhikgolh kgalhtujun kamanan (Mat. 13:55, 56). Jehová kuentajtlawalh xKgawasa xlakata nitu xlanilh, pero nachuna mastalh talakaskin pi xtitaxtulh tuku tuwa (Mat. 2:13-15). Akgtum liʼakxilhtit, makgapitsi tiku xalak xfamilia xwankgonit ni xkanajlakgo pi Jesús wa Mesías xwanit (Mar. 3:21; Juan 7:5). Max na lu nitlan tuku titaxtulh akxni nilh José. w20.10 26, 27:4-6

¿Minit kilhtamaku makgkatsinita pi miʼakstu wila? Ni miʼakstu chuna makgkatsiya. Makgapitsi xlakskujnin Jehová xala makgasa tiku ni xmakgxtakgkgo chuna makgkatsikgolh (1 Rey. 19:14). Komo chuna natitaxtuya kalakapastakti uma xtachuwin Jehová: «Nikxni ktimakgxtakgni chu ankgalhin nakmakgtayayan». Wa xlakata tlan nawanaw: «Jehová kimakgtayana. Ni ktipekualh» (Heb. 13:5, 6). Apóstol Pablo katsokgnanilh umakgolh tachuwin natalan tiku xlamakgolh kJudea max kkata 61. Tuku lichuwinalh na watiya tuku lichuwinan Salmo 118:5-7. Xtachuna tiku tsokgli uma salmo, Pablo liwana xkatsi pi Jehová ankgalhin xʼama makgtaya. Akgtum liʼakxilhtit, liwaka akgtiy kata akxni nina xkamalakgachani xcarta Hebreos, Pablo katuwa wililh xlatamat akxni alh kbarco chu xlama lanka unisen kpupunu (Hech. 27:4, 15, 20). Jehová ankgalhin makgtayalh Pablo xtachuna la akxni xʼama kbarco chu kkata nema xtitaxtukgonita. w20.11 12:1, 2

¿Tuku xlakata nitlan komo ankgalhin nalakpuwanaw pi kilatamatkan nema titaxtunita tlakg tlan xwanit nixawa la uku? Xlakata talipuwan max natlawa pi kajwatiya nalilakpuwanaw tuku tlan titaxtunitaw. Kalilakpuwaw tuku titaxtukgolh israelitas: akxni taxtukgolh kʼEgipto tunkun patsankgakgolh tuku tuwa xtitaxtukgonit kxlatamatkan chu kajwatiya xlakapastakkgo liwat nema xkgalhikgo anta. Xlakan xwankgo: «¡Lu klakapastakaw skiti nema kaj xachunata xakwayaw kʼEgipto, pepinos, sandías, cebollas chu axux!» (Núm. 11:5). Pero ¿xlikana pi kaj xachunata xwayankgo? Nichuna. Wata lhuwa xtapalh kxokgokgo, xlakata kʼEgipto lu palha xkamaskujukan (Éx. 1:13, 14; 3:6-9). Pero ni makgas titaxtulh patsankgakgolh taʼakglhuwit nema xkgalhikgo chu tsukukgolh lakapastakkgo tuku xkgalhikgo. Ni wa kaks akxilhkgolh putum tuku Jehová tlawalh xpalakatakan, wata wa kaks lakglakankgolh tuku xkgalhikgo. Chu Jehová lu nitlan akxilhli uma (Núm. 11:10). w20.11 25:5, 6

Min kilhtamaku makgkatsiyaw pi taxlajwaniyaw akxni lilakpuwanaw pi “ni lhuwa kilhtamaku latamayaw chu lhuwa taʼakglhuwit kgalhiyaw” (Job 14:1). Lhuwa xlakskujnin Jehová xala makgasa nachuna makgkatsikgolh. Asta makgapitsi xniputunkgo (1 Rey. 19:2-4; Job 3:1-3, 11; 7:15, 16). Pero Dios tiku xlipawankgo, Jehová, ankgalhin kamakgpuwantinilh chu kamatliwakglhli. Nachuna, tlawalh pi tuku xlakan titaxtukgolh xtalhkatawilalh kBiblia xlakata nalitamakgtayayaw (Rom. 15:4). Kalilakpuwanti José, xkgawasa Jacob, kaj xalan nialh xtawi xtlat tiku lu xpaxki chu kskujni litaxtulh chatum chixku tiku ni xkakninani Jehová (Gén. 37:3, 4, 21-28; 39:1). Nachuna, xpuskat Potifar limawakalh José pi xʼama likgamanan. Akxni Potifar katsilh, ni pulana lakputsanalh komo uma xlikana xwanit, wata tunkun matamaknuninalh José kpulachin (Gén. 39:14-20; Sal. 105:17, 18). Xlikana, putum uma tlawalh pi José xtaxlajwanilh. w20.12 16, 17:1-4

Jesús lichuwinalh pi kkioracioneskan kiliskinatkan katamasantujlilh xtukuwani Dios. ¿Tuku kilhchanima? Masantujlikan kilhchanima pi namaskulunkikan. Pero max wi tiku nalakpuwan: «¿Pero ni xaskulunku xtukuwani Dios? ¿Tuku xlakata talakaskin namasantujliyaw?». Talakaskin pi pulana nalilakpuwanaw tuku kilhchanima kgalhikan akgtum tukuwani. Akgtum tukuwani ni kaj akgtum tachuwin nema tlan tsokgwilikan kmaktum kapsnat. Biblia lichuwinan pi tlakg tlan «akgtum xatlan tukuwani nixawa nakgalhikan lhuwa tuku xtapalh» (Prov. 22:1; Ecl. 7:1). Lu xlakaskinka xlakata kilhchanima tuku lakpuwankgo amakgapitsin xpalakata lataman tiku kgalhi uma tukuwani. Wa xlakata, tuku tlakg xlakaskinka ni wa chuna la tatsokgtawila akgtum tukuwani o la wankan, wata wa tlakg xlakaskinka tuku lakpuwankgo latamanin akxni kgaxmatkgo o likgalhtawakgakgo. Akxni wi tiku liʼakgsaninan Jehová, nitlan lichuwinama o maxkajwiputun xtukuwani. w20.06 2, 3:5-7

Akxni lu lakgaputsamaw, max namakgkatsiyaw pi talakgaputsit kinkamakgatlajaman. Max nalilakgaputsayaw xlakata ni lhuwa tumin tlajamaw chu nila katitamawaw tuku namaklakaskinaw, o max natatatlayaw chu nila katiskujwi, o asta max namakgatsankgayaw kintaskujutkan. Na lilakgaputsayaw xlakata ni makgatsankgananiputunaw Dios akxni nakinkamatlawiputunkanan tuku nitlan. Chu max na lilakgaputsayaw akxni Satanás natlawa pi tiku tatayakgo natlawaniputunkgo tuku nitlan xkachikin Dios. Max nalakpuwanaw: «¿Nitlan xlakata klilakgaputsa putum umakgolh?». Jesús kawanilh kstalaninanin pi “nialh xlakgaputsakgolh” (Mat. 6:25). ¿Xwamputun pi nipara tsinu kililakgaputsatkan? Nichuna. Asta makgapitsi xlakskujnin Jehová xala makgasa lakgaputsakgolh chu Jehová ni kalakgmakgalh xlakata uma (1 Rey. 19:4). Jesús xkinkamakgoxamiximan. Ni xlakaskin pi lu xlilakgaputsaw taʼakglhuwit nema kgalhiyaw kkilatamatkan xlakata ni xlaktlawalh chuna la skujnaniyaw Dios. w21.01 3:4, 5

Chuna la chatum chixku nalikatsini xfamilia namasta kuenta kxlakatin Jehová chu Jesús (1 Ped. 3:7). Jehová wa xʼakgxakga xfamilia anta kʼakgapun chu kKatiyatni, wa xlakata kgalhi limapakgsin nakawani xlakkamanan tuku xlitlawatkan chu lakgchan nakawani pi kamakgantaxtikgolh (Is. 33:22). Jesús wa xʼakgxakga congregación, chu na kgalhi limapakgsin xlakata tlan nawan tuku xlitatlawat (Gál. 6:2; Col. 1:18-20). Chuna la Jehová chu Jesús, chatum xʼakgxakga familia kgalhi limapakgsin xlakata wi tuku nalaksaka xpalakata xfamilia (Rom. 7:2; Efes. 6:4). Pero ni kgalhi putum limapakgsin. Anta kBiblia xlikilhtiyat tuku nawan pi xlitatlawat (Prov. 3:5, 6). Nachuna, chatum xʼakgxakga familia ni kgalhi limapakgsin xlakata nakawani tiku ni xalak xfamilia tuku xlitlawatkan (Rom. 14:4). Chu akxni xkamanan stakkgo chu nialh anta kxchikkan wilakgolh, chuntiya maxkikgo kakni, pero nialh wa kamapakgsi (Mat. 19:5). w21.02 2, 3:3-5

Xlikana pi pulaktum la limasiya tiku pulalin familia pi kapaxki tiku xalak xchik wa akxni kamaxki tuku maklakaskinkgo. Pero nikxni xlipatsankgat pi tuku tlakg xlakaskinka wa xtakanajla xfamilia (Mat. 5:3). Akxni Jesús xwaka kkiwi, chuntiya xlilakgaputsa pi María xkgalhilh tuku xmaklakaskilh. Maski lu xpatinama, Jesús wanilh apóstol Juan pi xkuentajtlawalh xtse (Juan 19:26, 27). Tiku pulalinkgo familias na max kgalhikgo lhuwa xlakaskinka talakgatay. Lu xliskujatkan xlakata xtayatkan natlawa pi tlan nalichuwinankan Jehová (Efes. 6:5, 6; Tito 2:9, 10). Chu max na kgalhikgo taskujut kcongregación, nakapulalinkgo natalan chu lu nalichuwinankgo Dios. Pero na xlakaskinka ankgalhin nakatalikgalhtawakga Biblia xpuskat chu xlakkamanan. Xlakan lu napaxtikatsinikgo putum tuku xla tlawa xlakata kamakgtaya tlan natawilakgo, napaxuwakgo chu chuntiya tlan naskujnanikgo Jehová (Efes. 5:28, 29; 6:4). w21.01 12:15, 17

Anta kxTachuwin Dios wan pi puskat tiku skulujwa, kuentajtlawa la wi xchik, sta chu tamawa putawilh, chu katsini tlawa negocios (Prov. 31:15, 16, 18). Ni chatum skujni litaxtu, tiku nila nawan tuku lakpuwan. Xchixku lipawan chu kgalhakgaxmata tuku lakpuwan (Prov. 31:11, 26). Akxni chatum chixku chuna maxki kakni xpuskat, xla ni tuwa makgkatsi nakgalhakgaxmata. Maski lhuwa tuku tlawanit Jesús, ni makgkatsi pi xlakata kgalhakgaxmata limapakgsin nema kgalhi Jehová maktuju (1 Cor. 15:28; Filip. 2:5, 6). Nachuna, lakpuskatin tiku lakskulujwan chu stalanikgo xliʼakxilhtit Jesús ni makgkatsikgo pi akxni kgalhakgaxmatkgo limapakgsin nema kgalhikgo xchixkukan kamaktuju. Makgtayakgo xchixkukan xlakata paxkikgo, pero liwaka xlakata paxkikgo chu maxkikgo kakni Jehová. Puskat tiku kstalanina Cristo litaxtu ni katitatayalh xchixku komo naskini pi katlawalh tuku lakatsala xlimapakgsin Biblia. w21.02 11:14, 15; 12:19

Xlakata paxkikgo Dios xlakskujnin ankgalhin tayanikgonit taputsastalanit. Akxni mapakgsinanin judíos kawanikgolh apóstoles pi nialh xlichuwinankgolh Dios, xlakata xpaxkikgo Jehová tlawalh “nakgalhakgaxmatkgo chuna la xmapakgsinakan nixawa lakchixkuwin” (Hech. 5:29; 1 Juan 5:3). Xlakata paxkikgo Dios na kamakgtayanit lhuwa kinatalankan chuntiya naskujnanikgo Jehová maski mapakgsinanin kaputsastalanikgonit. Akxni kakilhtamaku kinkasitsiniyan ni taxlajwaniyaw (Hech. 5:41; Rom. 5:3-5). Pulaktum tuku tuwa tayanikan wa akxni tiku xalak kifamiliajkan kinkaputsastalaniyan. Akxni akxilhkgo pi skujnaniputunaw Jehová, max makgapitsi kintalilakgapasnikan nalakpuwankgo pi kaj kinkaʼakgskgawikan o kaj akgwitimaw (katamalakxtupi Marcos 3:21). Asta max nakinkatlawaniputunkgoyan tuku nitlan. Pero ni kaks lilakawanaw uma. Jesús wa: «Xtalatlawananin chixku anta kxfamilia naminkgoyacha» (Mat. 10:36). w21.03 21:6, 7

Akxni anaw tamakgalhtawakgenanaw chatum tala, kuenta katlawaw tuku wan chu tiku makgalhtawakgemaka. Chuna tlan namakgtayananaw. Ni namakgtanuyaw akxni chuwinama tiku makgalhtawakgenama chu ni atanu tuku nalichuwinanaw. Pero tlan nawiliyaw akgtum liʼakxilhtit o natlawaniyaw akgtum takgalhskinin tiku kgalhtawakgama xlakata nalakapastaka tuku maʼakgatekgsnika. Max lakgachunin namakgkatsiyaw pi ni lu lhuwa la makgtayanamaw. Pero komo nawaniyaw lakwan tachuwin tiku makgalhtawakgemaka chu nalimasiyaniyaw pi lilakgaputsayaw, namakgtayayaw tlakg nastaka xtakanajla. Komo tlan akxilhaw, tlan nalitachuwinanaw tiku makgalhtawakgemaka la lakgapaswi xaxlikana, la tayaniw tuku tuwa titaxtuw chu la kinkamakgtayanitan Jehová kkilatamatkan (Sal. 78:4, 7). Max wa uma tuku kgaxmatputun tiku limakgalhtawakgemaka Biblia. Max namakgtaya nastaka xtakanajla chu namakgpuwantini natlawa tuku talakaskin xlakata natamunu. w21.03 10:9, 10

¿Tiku lakgchan namalankikan akxni tlan kinkakitaxtuniyan la lichuwinanaw Dios? Pablo kgalhtilh uma akxni kawanilh corintios: «Akit kchalh, Apolos munuwililh, pero Dios tlawatilhalh pi chuntiya kstakli, wa xlakata, ni wa xlakaskinka litaxtu tiku chan, nipara tiku munuwili, wata Dios tiku tlawa pi nastaka» (1 Cor. 3:6, 7). Akxni tlan nakinkakitaxtuniyan la lichuwinanaw Dios, wa lakgchan namalankiyaw Jehová. ¿La tlan nalimasiyayaw pi lanka xtapalh liʼakxilhaw pi akxtum kataskujaw Jehová, Jesús chu ángeles? (2 Cor. 6:1). Nakalitachuwinanaw xtamakatsinin putum lataman tiku nakatekgsaw. Ni kajwatiya talakaskin nachanaw talhtsi xla Tamapakgsin, wata nachuna talakaskin namunuyaw. Akxni chatum lataman katsiputun, lu liskujaw xlakata tlakg nakatsini xlakata Biblia. Akxni chatum lataman tlakg tsuku staka xtakanajla, lu lipaxuwayaw akxni akxilhaw la makgtaya Jehová xlakata nakgalhi tlan naku chu xatlan talakapastakni. w20.05 30:14, 16-18