Mayo

Jehová lu kinkapaxkiyan chu wa xlakata matsokgninalh pulaktati Evangelios xlakata nakinkamakgtayayan tlakg nalakgapasaw xKgawasa. Umakgolh libros lichuwinankgo xlatamat Jesús chu chuna la lichuwinalh Dios, tuku wa, tuku tlawalh chu tuku makgkatsilh, chu kinkamakgtayayan nalilakpuwanaw xliʼakxilhtit. Anta akxilhaw xtatukit Jesús. Komo nakalikgalhtawakgayaw Evangelios, tlakg liwana nalakgapasaw chu liwana nastalaniyaw xtatukit. Pero ni kajwatiya nakalikgalhtawakgayaw, talakaskin nalimaxtuyaw kilhtamaku nakalilakpuwanaw (katamalakxtupi Josué 1:8). Kalilakpuwaw pi akxilhmaw, kgaxmatmaw chu makgkatsimaw tuku talichuwinama anta. Kamaklakaskiw tuku tlawanit xkachikin Jehová xlakata tlakg nalakputsananiyaw. w21.04 4, 5:11-13

Akxni Jesús nina xmin kKatiyatni, Jehová xlichuwinanita pi Mesías xʼamaka listamakgankan 30 tumin xaplata (Zac. 11:12, 13). Xʼama stamakgan xʼamigo (Sal. 41:9). Zacarías na lichuwinalh: «Kamakgni xkuentajtlawana borregos, chu putum borregos natakgawanikgo» (Zac. 13:7). Tiku kgalhikgo tlan naku ni xlakgmakgankgolh Jesús xlakata uma, wata xtatliwakglhli xtakanajlakan akxni xʼakxilhkgolh pi putum tuku xlichuwinankanit wa Jesús makgantaxtikgolh. La uku, makgapitsi tiku xtatayananin Jehová xwankgonit makgxtakgkgonit xaxlikana, apóstatas litaxtukgonit chu litsakgsakgonit pi amakgapitsin nachuna katlawakgolh. Maklakaskinkgonit Internet, periódicos, radio chu televisión xlakata namalakgatumikgo taʼakgsanin kimpalakatakan. Pero tiku kgalhikgo tlan naku, ni mastakgo talakaskin nakaʼakgskgawimikan, wata katsikgo pi Biblia wan pi chuna xʼama kgantaxtu (Mat. 24:24; 2 Ped. 2:18-22). w21.05 11:12; 12, 13:18, 19

Xtachuwin Dios liwana kinkawaniyan pi xaxlikana tsinu tsinu xʼamaka akgatekgstilhakan (Col. 1:9, 10). Jehová tsinu tsinu masiyatilha xaxlikana. Akxni natalan tiku pulalinkgo kintaskujutkan akxilhkgo pi kililakgpalitkan la wi tuku akgatekgsaw o la tlawayaw, lakapala tlawakgo talakgpalit. Lhuwa takanajla tlawakgo akgtum talakgpalit kaj xlakata namakgapaxuwakgo tiku anta ankgo o xlakata tlan nakaʼakxilhkan. Pero akxni xtatayananin Jehová wi tuku lakgpaliyaw, chuna tlawayaw xlakata tlakg natalakatsuwiniyaw Dios chu nakakninaniyaw chuna la kinkamasiyanin Jesús (Sant. 4:4). Akxni wi tuku lakgpaliyaw, nichuna tlawayaw kaj xlakata xtalakapastaknikan latamanin talakgpalinit, wata chuna tlawayaw xlakata tlakg liwana akgatekgsaw tuku wan Biblia (1 Tes. 2:3, 4). w21.10 22:12

Komo nalilakpuwanaw la kinkamakgtayaman Jehová, ni katimakgkatsiw pi kiʼakstukan wilaw (Sal. 55:22). Chu kalilakpuwaw la Jehová kamakgtayama natalan tiku xʼakstukan makgkatsikgo (1 Ped. 5:9, 10). Hiroshi, chatum tala tiku makgasata kaj xla xtatayana Jehová kxfamilia, wan: «Akxni katsiyaw pi tlawamaw putum tuku matlaniyaw xlakata naskujnaniyaw Jehová, kinkamakgpuwantiniyan, maski kifamiliajkan ni xtatayananin Jehová». Lu kaliskujwi kintakanajlakan, kawaniw Jehová tuku makgkatsiyaw, kalikgalhtawakgaw xTachuwin chu kalilakpuwaw liʼakxilhtit nema nakinkamalakapastakayan la xlilhuwa kinkapaxkiyan Jehová. Makgapitsi natalan lilakpuwankgo textos chuna la Salmo 27:10 chu Isaías 41:10. Amakgapitsi lakkaxwilikgo tuku nataʼakxilha ktamakxtumit o maklakaskinkgo grabaciones xalak Biblia. Uma kamakgtaya ni namakgkatsikgo pi xʼakstukan wilakgo. w21.06 9, 10:5-8

¿Nilh chatum tiku lu xpaxkiya? Kalikgalhtawakga tiku kalichuwinan Biblia pi kamalakastakwanika, uma namatliwakglha chuna la kanajlaniya talakastakwanat. ¿Lakglipuwana chatum xalak mifamilia tiku tamakxtukanit kcongregación? Kakgalhtawakga xlakata nakanajlaya pi akxni Dios stakyawanan tlakg tlan kitaxtu. Kaxatukawa taʼakglhuwit nema natitaxtuya, kaliʼakxilhti chuna la tuku tlan namatliwakglha mintakanajla. Kawani Jehová tuku wi kminaku. Ni katamakgatli, wata lakatsu kakatawilani natalan (Prov. 18:1). Maski lu lipuwana, chuntiya kamakgtlawa taskujut nema namakgtayayan natayaniya (Sal. 126:5, 6). Ni kamakgxtakgti tamakxtumit, chuna la lichuwinana Dios chu la likgalhtawakgaya Biblia. Chu chuntiya kalilakpuwanti lakstlan tasikulunalin nema Jehová malaknunit. Akxni naʼakxilha la Jehová makgtayaman, mintakanajla tlakg natatliwakglha. w21.11 23:11; 24:17

¿Tuku tlawa pi kstalaninanin Jesús “laktsu kamanan nawankgo”? ¿Tiku tlakg xlakaskinka kaʼakxilha uma kakilhtamaku? Tiku kgalhikgo lhuwa tumin, limapakgsin chu tiku lu kalakgapaskan. Pero lhuwa kstalaninanin Jesús nichuna tatekgskgo. Wa xlakata, latamanin ni xlakaskinka kaliʼakxilhkgo (1 Cor. 1:26-29). Pero Jehová nichuna kaʼakxilha. ¿Tuku xlakata Jesús lichuwinalh uma? Kstalaninanin xkgalhskinkgonit: «¿Tiku xlikana tlakg xalanka litaxtu kTamapakgsin xalak akgapun?» (Mat. 18:1). Lhuwa judíos xlakaskinkgo pi amakgapitsin xlakpuwankgolh pi xlakan tlakg xlakaskinka xlitaxtukgo. Chatum tiku lakputsanani Biblia wan: «Latamanin xlakaskinkgo pi xkamaxkika kakni chu xlakaskinka xkaʼakxilhka». Jesús xlakaskin pi kstalaninanin nichuna xlakpuwankgolh. w21.06 21:6, 8; 22:9

Apóstol Pablo kawilinilh lu tlan liʼakxilhtit lakgkgolotsin. Akgtum liʼakxilhtit, xla kastakyawalh natalan xalak Tesalónica akxni xmaklakaskinkgo. Pero kxcartas, pulana kawanilh lakwan tachuwin xlakata tlan taskujut xtlawamakgo, xlakata tapaxkit wa xkamakgpuwantini akxni wi tuku xtlawakgo chu xlakata xtayanimakgo. Lilakpuwa tuku xtitaxtumakgo chu kawanilh pi xkatsi la xtayanimakgo tuku tuwa chu taputsastalanit (1 Tes. 1:3; 2 Tes. 1:4). Na kawanilh pi lu tlan liʼakxilhtit xlitaxtukgo xpalakatakan amakgapitsi natalan (1 Tes. 1:8, 9). ¡Max lu lipaxuwakgolh uma laktlan tachuwin! Xkatsikgo pi Pablo lu xkapaxki. Wa xlakata, tastakyaw nema kamaxkilh kmaktiy xcartas lu kamakgpuwantinilh (1 Tes. 4:1, 3-5, 11; 2 Tes. 3:11, 12). w22.02 15:6

Satanás kalimaklakaskin xpulalinanin takanajla xlakata nawankgo pi Jehová lixkajni likatsi chu wa xkuenta xlakata anan tapatin. Akxni niy chatum skgata, makgapitsi wankgo pi Dios lilh xlakata xmaklakaskima achatum ángel kʼakgapun. ¡Limawakakgo Jehová tuku lu nitlan! Pero akinin katsiyaw xaxlikana. Wa xlakata, akxni lu tatatlayaw o niy tiku lu paxkiyaw, nikxni limawakayaw Dios. Kanajlayaw pi namin kilhtamaku namapanu tuku kinkamakgapatinanan. Kawaniw putum tiku nakinkakgaxmatniyan pi Dios xapaxkina. Chuna Jehová tlan nakgalhti tiku limawakama tuku nitlan (Prov. 27:11). Xla xalakgalhamanina Dios. Wa xlakata nitlan limakgkatsi akxni akxilha pi patinanaw, kinkaputsastalanikanan, tatatlayaw chu kgalhiyaw talakgalhin (Sal. 22:23, 24). Makgkatsi kintakatsanajwatkan. Masputuputun, chu chuna natlawa (katamalakxtupi Éxodo 3:7, 8; Isaías 63:9). w21.07 9, 10:9, 10

Tiku kgalhakgaxmatnankgo tlan napaxkikgo chu nakakninanikgo Jehová putum kilhtamaku. Jesús namasputu taʼakglhuwit nema lakatsukulh akxni Adán chu Eva ni kgalhakgaxmatkgolh Dios. Jehová nakamalakastakwani latamanin chu nalatamakgo niku nialh katitatatlakgolh (Luc. 23:42, 43). Akxni kskujnin Jehová nialh nakgalhikgo talakgalhin, xchatunukan nalimasiyakgo «lilanka chu kakni» nema lichuwinalh David. Komo makgtapakgsiya “xalhuwa latamanin”, lu tlan takgalhkgalhin kgalhiya (Apoc. 7:9). Dios paxkiyan chu lakaskin kamakgtapakgsi kxfamilia. Wa xlakata kaliskujti namakgapaxuwaya. Ankgalhin kalakapastakti xtamalaknun Dios. Xlakaskinka kaliʼakxilhti mintakgalhkgalhin chu xtapalh kaliʼakxilhti nakakninaniya Jehová. w21.08 7:18, 19

Jeremías lichuwinalh Dios maski latamanin ni kgaxmatniputunkgolh. Taxlajwanilh akxni likgalhkgamananka chu wanika laklixkajnit tachuwin, chu asta nialh xmakgantaxtiputun xtaskujut (Jer. 20:8, 9). ¿Tuku makgtayalh ni xmakgatlajalh nitlan tapuwan chu chuntiya xatapaxuwan xlichuwinalh Dios? Pulana, lilakpuwa pi tamakatsin nema xkalini latamanin tlan xkamaxkilh latamat chu «takgalhkgalhin» (Jer. 29:11). Chu xlipulaktiy, lilakpuwa pi Jehová xlaksaknit xlichuwinalh xtukuwani (Jer. 15:16). Akinin na lichuwinanaw akgtum tamakatsin nema kamaxki takgalhkgalhin latamanin chu lichuwinanaw Jehová. Akxni lilakpuwanaw uma, lipaxuw lichuwinanaw Dios maski latamanin ni kgaxmatkgo. Wa xlakata ni kataxlajwaniw komo kintamakgalhtawakgenkan ni lakapala staka xtakanajla. Talakaskin nakgalhkgalhinanaw (Sant. 5:7, 8). w21.10 27:12, 13

Maski lhuwata kata skujnanimaw Jehová, chuntiya kilimatliwakglhatkan kintakanajlakan xlakata ni naxlajwanan. Kalakapastakwi pi takanajla kilhchanima pi wi tuku xlikana, maski ni tasiya. Chu tuku ni tasiya lakapala patsankgakan. Wa xlakata Pablo wa pi akxni ni kgalhikan takanajla litaxtu «talakgalhin nema lakapala kinkachipayan». ¿Tuku kilitlawatkan? (2 Tes. 1:3). Pulana, kaskiniw Jehová pi kakinkamaxkin xʼespíritu santo. Xlakata espíritu santo kinkamakgtayayan nakgalhiyaw takanajla (Gál. 5:22, 23). Komo ni kgalhiyaw espíritu santo nila katimatliwakglhwi kintakanajlakan. Wa xlakata chuntiya kaskiw (Luc. 11:13). Tlan nawaniyaw: «Tlakg kakinkamaxki takanajla» (Luc. 17:5). Chu ankgalhin kalikgalhtawakgaw Biblia (Sal. 1:2, 3). w21.08 18, 19:16-18

Natalan tiku laklankata lhuwa tuku tlan tlawakgo. Maski nialh kgalhikgo litliwakga, lhuwa tuku katsinikgonit. Jehová tlan chuntiya nakamaklakaskin xlakata naskujnanikgo. Akgtum liʼakxilhtit, Biblia kalichuwinan tiku chuntiya skujnanikgolh Jehová maski xlinkgoya kata. Moisés max xkgalhi 80 kata akxni palakachuwina litaxtulh chu xpulalima kachikin Israel. Daniel max liwaka 90 kata xkgalhi chu chuntiya xpalakachuwina Jehová xlitaxtu. Chu apóstol Juan xkgalhi liwaka 90 kata akxni Dios malakpuwanilh natsokgwili Apocalipsis. Biblia ni lhuwa tuku wan xpalakata «chatum chixku tiku xwanikan Simeón», tiku «xaʼakgstitum xwanit chu kskujnani Dios», pero Jehová liwana xlakgapasa chu maxkilh talakgalhaman naʼakxilha Jesús akxni skgataku xwanit, chu maxkilh talakaskin nawan tuku xʼama kgantaxtu xpalakata Jesús chu xpalakata xtse (Luc. 2:22, 25-35). w21.09 3, 4:5-7

Natlatni ni xlitamalakxtumitkan tuku tlawa xkgawasakan chu tuku tlawa atanu, chu ni xliskinitkan tuku ni matlani. Nitlan katimamakgkatsinikgolh (Efes. 6:4). Sachiko wan: «Kintse xlakaskin pi putum tlan xakmaxtucha kiʼexámenes, pero ni chuna lalh. Maski makgasata la kmasputunit escuela, min kilhtamaku klakpuwan pi tuku ktlawa xpalakata Jehová, ni lhuwa liʼakxilha». Mapakgsina David wa: «Ni klakpuwan nakkgalhiputun tuku lu laklanka chu tuku nikxni la ktikgalhilh». Xlakata xtaktuju chu ni xlakpuwan pi putum tlan xtlawa «tlan xmakgkatsi chu nitu xlilakgaputsa» (Sal. 131:2). Natlatni tlan nataktujukgo chu ni nalakpuwankgo pi putum tlan tlawakgo, chu nichuna nalakpuwankgo xpalakata xkamanankan. Xliʼakxilhatkan tuku tlan chu tuku nila tlawakgo xkamanankan akxni nakalakkaxwilinikgo tuku nalakgchankgo, uma nakamakgtaya tlan namakgkatsikgo. w21.07 21, 22:5, 6

Jehová kimputumkan kinkamaxkinitan talakaskin kiʼakstukan nalaksakaw tuku natlawayaw. Kinchatunukan nalaksakaw komo nakgalhakgaxmatniyaw. Makgapitsi ni kgalhikgolh natlatni tiku xkawilinilh tlan liʼakxilhtit, pero laksakkgolh naskujnanikgo Jehová chu ni makgxtakgkgonit. Amakgapitsin kgalhikgolh natlatni tiku lu liskujkgolh xkamakgastakkgolh chuna la wan Biblia, pero akxni stakkgolh makgxtakgkgolh Jehová. Kinchatunukan kililaksakatkan komo naskujnaniyaw Jehová o ni (Jos. 24:15). Natlatni, komo minkamanankan namakgxtakgkgo Jehová, ni kalakpuwantit pi wixin lipinatit kuenta. Min kilhtamaku, wa xatlat o xatse tiku makgxtakga xaxlikana chu asta max na makgxtakga xfamilia (Sal. 27:10). Uma lu nitlan nakamamakgkatsini xkamanankan. Kgawasa o tsumat, komo mintlat o mintse tamakxtukanit kcongregación, liwana kakatsi pi Jehová na katsi tuku makgkatsiya. Xla paxkiyan chu lu paxuwa xlakata ni makgxtakga. w21.09 27:5-7

Tlan nawanaw pi tiku tamakxtukan kcongregación xtachuna borrego tiku tatatla (Sant. 5:14). Chuna la akgtum tajatat, tajatat xla takanajla na lamapasikan. Wa xlakata, min kilhtamaku alakatanu nawilikan tiku tatatla kxtakanajla. Akxni wi tiku chuna tlawakan, limasiyanikan tapaxkit nema Jehová kakgalhini tiku ni makgxtakgkgo, chu na tlan natlawa pi tiku makglakgalhinanit xlikana nitlan nalimakgkatsi xtalakgalhin. Maski tamakxtukanit, tlan naʼan ktamakxtumit, niku tlan namakglhtinan taway xaʼespiritual chu namatliwakglhpara xtakanajla. Na tlan namakglhtinan likgalhtawakga nema namakgtaya chu naʼakxilha JW Broadcasting^®. Chu akxni lakgkgolotsin naʼakxilhkgo pi tlawama talakgpalit, namin kilhtamaku namaxkikgo tastakyaw xlakata namakgtayakgo tlan natalalimpara Jehová, chu namakgamakglhtinamparakan la xtatayana. w21.10 10:9, 11

Akxni kakninaniyaw Dios na tlawayaw la xtlawakgo xapulana kstalaninanin Cristo. Talakkaxwilinitaw chuna la xtalakkaxwilikgonit apóstoles. Kgalhiyaw superintendentes viajantes, lakgkgolotsin chu siervos ministeriales (Filip. 1:1; Tito 1:5). Kgalhakgaxmataw tuku wan xlimapakgsin Jehová xlakata talakgxtumit chu tamakgaxtokgat, la natamaklakaskin kgalhni chu chuna la kuentajtlawayaw congregación xlakata ni anankgo tiku tlawakgo lanka talakgalhin chu ni makgxtakgputunkgo (Hech. 15:28, 29; 1 Cor. 5:11-13; 6:9, 10; Heb. 13:4). Biblia wan pi Dios kaj akgtum takanajla makgamakglhtinan (Efes. 4:4-6). Akgtum lanka talakgalhaman makgtapakgsikan kxkachikin Dios, katsikan tuku xaxlikana xlakata Jehová chu xlakata tuku lakapastaknit natlawa. Wa xlakata, chuntiya liwana kakanajlaw pi tekgsnitaw xaxlikana. w21.10 22, 23:15-17

Mapakgsina Jehosafat lu tuwa tuku titaxtulh. Ksoldados Ammón, Moab chu tiku xwilakgolh kkasipijni xla Seír minkgolh katalalakatawakakgo mapakgsina, xfamilia chu kachikin (2 Crón. 20:1, 2). ¿Tuku tlawalh Jehosafat? Skinilh Jehová tamakgtay chu litliwakga. Xʼoración nema tatekgsa k2 Crónicas 20:5-12, masiya la xlipawan Jehová. Jehová maklakaskilh chatum levita tiku xwanikan Jahaziel, xlakata xkgalhtilh Jehosafat chu wanilh tachuwin nema min ktexto xala uku. Jehosafat lu lipawa Dios, wa xlakata kgalhakgaxmatli. Akxni mapakgsina chu kachikin ankgolh talatlawakgo xtalatlawanakan, xla ni pulana kayawalh ksoldados, wata pulana kayawalh lakchixkuwin tiku kaj xkilhtlimakgo chu ni xlinkgo tuku nalitalatlawanankgo. Chuna la Jehová xmalaknuninit Jehosafat, katlajalh xtalamakgasitsin (2 Crón. 20:18-23). w21.11 15:6, 7

Liwana katsiyaw pi Jehová nakinkamakgtayayan akxni titaxtuyaw tuku tuwa chu nakinkamaxkiyan tuku maklakaskinaw xlakata ni namakgxtakgaw (2 Cor. 4:7-9). Jehová chuntiya nakinkalimasiyaniyan xtapaxkit nema ni makgxtakgnan xlakata, chuna la wa chatum salmista, «Jehová kaʼakxilhma tiku pekuanikgo, tiku kgalhkgalhimakgo xtapaxkit nema ni makgxtakgnan» (Sal. 33:18-22). Maski nina kskujnaniyaw Jehová, xkinkalimasiyaninitan tapaxkit. Pero akxni tsukuw kakninaniyaw, tsukun kinkalimasiyaniyan xtapaxkit nema ni makgxtakgnan. Uma tapaxkit tlawa pi nakinkakuentajtlawayan. Ankgalhin lakatsu nakinkatawilaniyan chu namakgantaxti tuku lakkaxwilinit kimpalakatakan. Lakaskin pi tlan kakinkakitaxtunin (Sal. 46:1, 2, 7). Maski nakgalhiyaw taʼakglhuwit, Jehová nakinkamaxkiyan litliwakga xlakata ni namakgxtakgaw. w21.11 7:17, 18

Kimputumkan lakgapasaw tiku maski lhuwata kata titaxtunita, chuntiya sitsini tiku akxtum xtaskuja, tiku lakxtum xtaʼan kʼescuela, o xtalilakgapasni. Kalakapastakwi pi kgalhakaw xtunatalan José lu ksitsinikgonit chu uma tasitsi kamatlawilh tuku lu nitlan (Gén. 37:2-8, 25-28). Pero xla ni kamalakgaxokgelh. Akxni xkgalhi limapakgsin chu tlan xkamalakgaxokgelh nichuna tlawalh, wata kalimasiyanilh talakgalhaman. Ni kasitsinilh, wata makgantaxtilh tuku alistalh tsokgwilika kLevítico 19:18 (Gén. 50:19-21). Tiku makgapaxuwaputun Dios xlistalanit xliʼakxilhtit José chu natapatinan, ni nasitsi chu ni namalakgaxokgenan. Jesús lichuwinalh pi nakatapatiyaw amakgapitsin tiku kinkatlawanikgoyan tuku nitlan (Mat. 6:9, 12). Apóstol Pablo kamaxkilh uma tastakyaw xnatalan: «Wixin tiku lu kkapaxkiyan, niti katamakgapuspitnitit» (Rom. 12:19). w21.12 11:13, 14

Katsisni 14 xla nisán kkata 33, Jesús alh kʼGetsemaní chu anta wanilh Jehová putum tuku xmakgkatsi (Luc. 22:39-44). Uma kilhtamaku akxni xtitaxtuma tuku lu tuwa, «xliputum xnaku skinilh» tamakgtay Jehová, «tasalh chu pixlanka takgaxmatli» (Heb. 5:7). Jesús skinilh Jehová pi xmaxkilh litliwakga xlakata ni xmakgxtakgli chu xtlawalh xtalakaskin. Xla kgaxmatli xʼoración xKgawasa chu malakgachalh chatum ángel xlakata xmatliwakglhli. Jesús xkatsi tuku xlakgaya: namasantujli o namaskulunki xtukuwani xTlat. Jehová kgaxmatli tuku tasaskinilh xKgawasa. ¿Tuku xlakata? Xlakata tuku tlakg xlakaskinka xliʼakxilha Jesús wa ni namakgxtakga Jehová chu namasantujli xtukuwani. Komo akinin nachuna natlawayaw, xla nakinkakgalhtiyan akxni naskiniyaw tamakgtay (Sal. 145:18). w22.01 17, 18:15-17

Lhuwa tiku akgchakgxkgo xlakata ni makgtanuyaw kpolítica. Lakpuwankgo pi kilivotarlinatkan. Pero akinin katsiyaw pi komo xlaksakwi chatum mapakgsina unu kKatiyatni, lakgmakgamaw Jehová (1 Sam. 8:4-7). Na lakpuwankgo pi kilitlawatkan hospitales, escuelas chu atanu tuku nalitamakgtayakgo latamanin. Akgchakgxkgo xlakata kajwatiya lichuwinanaw Dios chu ni lakkaxtlawayaw taʼakglhuwit nema anan. ¿Tuku namakgtayayan ni naʼakgchakgxa? (Mat. 7:21-23). Kalakapastakti pi tuku tlakg xlakaskinka wa natlawayaw taskujut nema Jesús kinkalakgayawan. Ni kamasta talakaskin pi taʼakglhuwit chu política namakglhtikgoyan minkilhtamaku. Xtatayananin Jehová kapaxkiyaw latamanin chu lilakgaputsayaw xtaʼakglhuwitkan, pero katsiyaw pi tuku tlakg tlan natlawayaw xpalakatakan wa nakamasiyaniyaw xlakata xTamapakgsin Dios. w21.05 7:19, 20

Maski mapakgsinanin wankgo pi skujnanikgo Dios, ni makgxtakgputunkgo limapakgsin nema kgalhikgo. Chuna la kxkilhtamaku Jesús, la uku lakatakikgo tiku laksaknit Jehová chu kaputsastalanikgo xlakskujnin (Hech. 4:25-28). ¿La akxilha Jehová? Salmo 2:10-12 wan: «Mapakgsinanin, lakgskgalalan kalitaxtutit; kamakgamakglhtinantit tastakyaw, jueces xalak katiyatni. Kapekuanitit Jehová akxni naskujnaniyatit chu kalimasiyatit kakni akxni napaxuwayatit. Kamaxkitit kakni xakam; komo nichuna natlawayatit, Dios nasitsi chu wixin nanitayayatit, xlakata xla lakapala sitsi. ¡Lu paxuwakgo putum tiku litatsekgkgo!». Jehová lu tlan likatsi chu kamaxki kilhtamaku tiku lakatakinankgo natalakgpalikgo chu namakgamakglhtinankgo xTamapakgsin. Pero kilhtamaku sputma (Is. 61:2). La uku tlakg xlakaskinka pi latamanin natatayakgo Jehová. w21.09 15, 16:8, 9

Tuku Pablo xwamputun wa pi nalipaxuwayaw tuku nakgalhiyaw (Filip. 4:12). Wa uma tuku xtlawa Pablo. Tuku tlakg xtapalh kgalhiyaw wa la talalinaw Dios (Hab. 3:17, 18). Kaʼakxilhwi tuku kawanilh Moisés israelitas akxni xtitaxtunita 40 kata lata xlamakgolh kdesierto: «Jehová miDios sikulunatlawanit mimakan. [...] Uma tipuxam kata Jehová miDios akxtum tatawilanitan. Nitu tsankganinitan» (Deut. 2:7). Umakgolh 40 kata, Jehová kamaxkilh maná, chu klhakgatkan nema tataxtukgocha kʼEgipto, nikxni taxtitli (Deut. 8:3, 4). Jehová lu napaxuwa komo nalipaxuwayaw tuku kgalhiyaw, uma kilhchanima pi lu xtapalh naliʼakxilhaw maski tuku kaj aktsu kinkamaxkiyan. Liʼakxilhaw la akgtum lanka tasikulunalin chu paxtikatsiniyaw xlakata uma. w22.01 5:10, 11

Lakchixkuwin, wixin kalakgchanan nakuentajtlawayatit mifamiliajkan, wa xlakata liskujatit nakamaxkiyatit tuku maklakaskinkgo. Akxni chin taʼakglhuwit max lakpuwanatit pi tlan miʼakstukan nalakkaxtlawayatit. Pero ni kalipawantit militliwakgakan, wata katlawanitit oración Jehová chu kaskinitit xtamakgtay. Kakatatlawatit oración milakpuskatinkan. Kaputsatit xtapulalit Jehová chu kalikgalhtawakgatit xTachuwin chu atanu kilikgalhtawakgakan, chu kalilatapatit xtastakyaw. Max makgapitsi latamanin nitlan katiʼakxilhkgolh pi akxni wi tuku nalaksakatit anta kBiblia nakilhtiyayatit. Max nawankgo pi tuku tlakg nalitamakgtayakgo mifamiliajkan wa tumin chu lhuwa tuku kgalhikan. Pero kalakapastaktit xliʼakxilhtit mapakgsina Jehosafat (2 Crón 20:1-30). Xla limasiyalh pi xlipawan Jehová xlakata tuku tlawalh. Jehová ni makgxtakgli chu na ni katikamakgxtakgni (Sal. 37:28; Heb. 13:5). w21.11 15:6; 16:8

Dios kinkatlawan chuna la xla, ni lakgatiyaw pi katlawaka tuku ni xaʼakgstitum (Gén. 1:26). Pero xlakata makglakgalhinanin akinin, max nalakputsananaw chuna la ni xlilat. Kalakapastakwi tuku akgspulalh Jonás. Xla lu sitsilh akxni Jehová kalimasiyanilh talakgalhaman ninivitas (Jon. 3:10–4:1). Pero xlakata tuku laksakli Jehová, lakgtaxtukgolh liwaka 120,000 ninivitas. Liwana litasiyalh pi wa Jonás tiku nitlan tuku xlakpuwama. Ni talakaskin pi Jehová nakinkawaniyan tuku xlakata wi tuku laksaka. Xlikana pi makgasa Jehová mastalh talakaskin pi makgapitsi xlakskujnin xwankgolh tuku xlakpuwankgo xlakata tuku xlaksaknit (Gén. 18:25; Jon. 4:2, 3). Chu milh kilhtamaku wa tuku xlakata wi tuku xlaksaknit (Jon. 4:10, 11). Pero ni maklakaskin nawaniyaw pi tlan tuku tlawama o tuku tlawanit (Is. 40:13, 14; 55:9). w22.02 3, 4:5, 6

Xlakata nalitaxtuyaw la «tiku xakgawasaku», kililakpuwanatkan pi amakgapitsin tlakg xlakaskinka litaxtukgo (Filip. 2:3). Akxni tlakg naliskujaw xlakata nalikatsiyaw la «tiku xakgawasaku», nakinkamakgtayayan ni nakamakgchakgxniyaw amakgapitsin. Putum kinatalankan wi tuku tlakg tlan tlawakgo nixawa akinin. Uma ni tuwa akxilhkan akxni kuenta tlawayaw laktlan xtayatkan. Kuenta kilitlawatkan uma tastakyaw: «¿Tiku tlawa pi tanu nalitaxtuya nixawa achatum? Xlikana, ¿wi tuku kgalhiya nema ni makglhtinanita? Komo xlikana makglhtinanti, ¿tuku xlakata litlankajwanana xtachuna la ni makglhtinanita?» (1 Cor. 4:7). Wa xlakata, ni kalakpuwaw pi tlakg xlakaskinka akinin. Komo chatum tala lu tlan masta xtaʼakgchuwin o matsuki lhuwa takgalhtawakga xalak Biblia, ankgalhin wa Jehová xlimalankit. w21.06 22:9, 10

Lhuwa xtatayananin Jehová tuwa kakitaxtuni akxni lichuwinankgo Dios xlakata ni katekgskgo latamanin kxchikkan. Makgapitsi wilakgolh klaklanka edificios niku lu kakuentajtlawakan chu ni mastakan talakaskin wi tiku natanu. Na wilakgolh natalan tiku lichuwinankgo Dios klaktsu kachikinin o niku lakgamakgat, niku ni lhuwa latamanin wilakgolh. Max lakgamakgat niku naʼankgo chu akxni chankgo, akxilhkgo pi latamanin niti wilakgolh kxchikkan. Komo chuna tatekgsaw, ni kataxlajwaniw. Tlakg nakatachuwinanaw latamanin komo nalichuwinanaw Dios hora akxni tlan nakatekgsaw kxchikkan. Latamanin chali chali taspitparakgo kxchikkan. Lhuwa natalan lichuwinankgo Dios kakgotanun o katsisni, xlakata chuna tlakg lhuwa latamanin katekgskgo. Uma kilhtamaku max latamanin tlakg tlan wilakgo chu max tlakg kgalhchuwinamputunkgo. w21.05 15:5, 7

¿Nachuna la kkinkilhtamakujkan? Chuna. Lhuwa kinkasitsinikgoyan xlakata ni makgtlawayaw talismanin chuna la tamakatamitat chu talakgatankuwit. Amakgapitsi sitsikgo xlakata ni makgtlawayaw fiestas xalak kachikin chu talismanin nema tlawakan akxni wi tiku niy, xlakata umakgolh lakatsalakgo xTachuwin Dios. Max xlakan tlan naku kgalhikgo chu lakpuwankgo pi Dios makgamakglhtinan tuku tlawamakgo. Pero komo namakgtlawakgo talismanin xalak uma kakilhtamaku chu ni wa tuku masiya Biblia, Jehová ni katimakgamakglhtinalh (Mar. 7:8, 9). ¿Tuku namakgtayayan ni naʼakgchakgxa? Katlawa tuku namakgtayayan napaxkiya xlimapakgsin Jehová (Sal. 119:97, 113, 163-165). Komo paxkiya Jehová, nalakgmakgana kaxatukawa talismanin nema xla ni lakgati. Ni katimasta talakaskin pi atanu tuku tlakg napaxkiya nixawa xla. w21.05 6:15, 16

¿La nastalaniya xtastakyaw apóstol Pablo? Tliwakga kakgalhi mintakanajla, ankgalhin kalikgalhtawakga Biblia, katlawa oración chu taskujut nema kinkalakgayawanitan Jehová (2 Tim. 4:4). Komo kgalhiya takanajla, ni katipekuanti akxni nakgaxpata tuku nitlan (Is. 28:16). Tapaxkit nema kgalhiniya Jehová, xTachuwin chu minatalan, namakgtayayan ni naʼakgskgawikgoyan tiku makgxtakgkgonit tuku xaxlikana. Kxapulana siglo, lhuwa akgchakgxkgolh chu lakgmakgankgolh Jesús, pero lhuwa tiku makgamakglhtinankgolh, chatum wa tiku xmakgtapakgsi kSanedrín chu «lhuwa sacerdotes» (Hech. 6:7; Mat. 27:57-60; Mar. 15:43). La uku millones latamanin na stalanikgo Jesús, xlakata lakgapaskgo tuku xaxlikana wan Biblia chu paxkikgo. Biblia wan: «Tiku paxkikgo milimapakgsin, katapakgsini lhuwa takaksni; nila tuku nakamaʼakgchakgxni» (Sal. 119:165). w21.05 13:20, 21

Apóstol Pablo xkatsi pi wa Jehová xmaxki litliwakga xlakata kskujnanilh. Jehová limatliwakglhli Pablo xʼespíritu santo chu chuna makgantaxtilh xtaskujut maski putsastalanika, tamaknuka kpulachin chu kgalhilh atanu taʼakglhuwit. Timoteo na maklakaskilh xlitliwakga Dios xlakata tlan xmakgantaxtilh xtaskujut. Akgtum liʼakxilhtit, taʼalh Pablo akxni alh lichuwinan Dios. Nachuna, malakgachaka nakalakgapaxialhnan chu nakamakgpuwantini congregaciones (1 Cor. 4:17). Max Timoteo tuwa xmakgkatsi namakgantaxti. Max wa uma tuku xlakata Pablo wanilh: «Nikxni kamasta talakaskin pi wi tiku nalakgmakganan kaj xlakata kgawasaku wix» (1 Tim. 4:12). Timoteo xkgalhi akgtum lhtukun kxmakni. Biblia wan pi ni xmakgasni xtatatla (1 Tim. 5:23). Timoteo xkatsi pi xʼespíritu santo Jehová xʼama maxki litliwakga xlakata chuntiya xlichuwinalh xalaktlan tamakatsinin chu xkaskujnanilh xnatalan (2 Tim. 1:7). w21.05 21:6, 7

Tuku wan Santiago 1:19 kalakgchan tiku mastakgo tastakyaw. Santiago tsokgli: «Putum wixin xlilat lakapala nakgaxpatatit, pero ni lakapala natsukuyatit chuwinanatit chu ni lakapala nasitsiyatit». Kgolotsin ni xlilakpuwanat pi katsi putum tuku titaxtuma tala tiku nastakyawa. Proverbios 18:13 wan: «Akxni wi tiku kgalhtinan akxni nina liwana kgaxmatnit, xatonto chu tamamaxani». Tlakg tlan nakgalhskin tiku nastakyawa, wa xlakata xlimaxkit talakaskin pulana nachuwinan. Kgolotsin tlan nakgalhskin tala: «¿la wila?», «¿la makgkatsiya?», «¿la tlan nakmakgtayayan?». Komo lakgkgolotsin nakatsikgo tuku titaxtumakgo natalan, tlakg tlan nakamakgtayakgo. Ni kajwatiya nalikgalhtawakgayaw makgapitsi textos chu nawanaw tuku xlitatlawat. Natalan xlimakgkatsitkan pi kalilakgaputsayaw, pi kaʼakgatekgsniyaw chu pi kamakgtayaputunaw. w22.02 17:14, 15