Junio

Lu tuwa kitaxtunima uma puskat: ni kgalhi tumin xlakata natamawa tuku maklakaskin. Pero talakatsuwi niku mujukan tumin chu ni lakaskin naʼakxilhkan, muju okgxtiy laktsu tumin nema ni lhuwa xtapalh, chu max lu kaj tsinu makasanankgo akxni tajuyacha. Pero Jesús katsi tuku mujulh: okgxtiy leptones, tumin nema ni lhuwa xtapalh xwanit. Asta ni xakchan xlakata nalitamawakan tantum gorrión. Jesús lu kaks lilakawan tuku tlawalh. Wa xlakata katasani xtamakgalhtawakgen, kamasiyani uma puskat chu kawani: «Uma puskat tiku ni lhuwa tuku kgalhi tiku ninita xchixku tlakg lhuwa mujulh nixawa amakgapitsin». Chu kawanipara: «Amakgapitsin [liwaka tiku kgalhikgo lhuwa tumin] mujukgolh tuku xkaʼakgataxtuni, pero xla, maski ni lhuwa tuku xkgalhi, mujulh putum tuku xkgalhi» (Mar. 12:43, 44). Akxni uma puskat mujulh xaʼawatiya tumin nema xkgalhi, limasiyalh pi xlipawan pi Jehová xʼama kuentajtlawa (Sal. 26:3). w21.04 6:17, 18

Akxni Jesús xlama kKatiyatni, xatapaxuwan lichuwinalh Dios, chu lakaskin pi kstalaninanin nachuna katlawakgolh (Juan 4:35, 36). Akxni xkatalamajku, kstalaninanin xatapaxuwan xlichuwinankgo Dios (Luc. 10:1, 5-11, 17). Pero akxni chipaka chu makgnika xmakgalhtawakgenakan nialh lichuwinamputunkgolh (Juan 16:32). Akxni Jesús xlakastakwananita kamakgpuwantinilh chuntiya nalichuwinankgo. Chu akxni xʼanita kʼakgapun, xlakan lu xatapaxuwan lichuwinankgolh Dios pi asta xtalamakgasitsin kawanikgolh tuku wan texto xala uku. Kxapulana siglo Jesús kapulalilh kstalaninanin, chu xlakata Jehová kasikulunatlawalh, lhuwa latamanin kakgaxmatnikgolh. Akgtum liʼakxilhtit, kPentecostés kata 33, tamunukgolh 3,000 latamanin (Hech. 2:41). Talhuwilh kstalaninanin Cristo (Hech. 6:7). Pero Jesús lichuwinalh pi kxaʼawatiya kilhtamaku tlakg lhuwa tiku xʼamakgo makgamakglhtinankgo xatlan tamakatsinin (Juan 14:12; Hech. 1:8). w21.05 14:1, 2

¿Lakapastaka la makgkatsi akxni katsi pi xtekgsnita xaxlikana? Xlakpuwana pi putum latamanin na max xkatsiputunkgo. Xkatsiya pi tamakatsin xalak Biblia xʼama kamaxki akgtum xatapaxuwan latamat la uku chu akgtum lu xatlan takgalhkgalhin (Sal. 119:105). Xlakata lu xpaxuwapat, tsuku kalitachuwinana miʼamigos chu mifamilia tuku xkatsinipat. Pero lu nitlan limakgkatsi pi ni kgaxmatputunkgolh. Ni kaks kililakawanatkan pi anan tiku lakgmakgankgo tamakatsin nema lichuwinanaw. Akxni Jesús latamalh kKatiyatni tlawalh milagros nema xlimasiya pi Jehová xmakgtayama, pero lhuwa latamanin lakgmakgankgolh. Akgtum liʼakxilhtit, akxni malakastakwanilh Lázaro, xpulalinanin takanajla ni kanajlakgolh pi Jesús Mesías xwanit, pero nila xwankgo pi ni xlikana tuku xtlawanit. Wata lakkaxwilikgolh namakgnikgo Jesús chu Lázaro (Juan 11:47, 48, 53; 12:9-11). w21.05 2:1, 2

Lu kiliskujatkan naʼanaw ktamakxtumit xlakata uma kinkamakgpuwantiniyan chu anta tlakg kalakgapasaw kinatalankan. Kiʼamigoskan kakalimaxtuw natalan, maski ni watiya kata kgalhikgo la akinin o tanu xtalismaninkan. Biblia kinkamalakapastakayan pi «kgalhikgo liskgalala tiku linkgoya kata» (Job 12:12). Tiku linkgoya kata, na lhuwa tuku nakatsinikgo xlakata lakgkgawasan tiku ni makgxtakgkgo Dios. Jonatán lu lhuwa kata xlipulani David, pero lu tlan amigos litaxtukgolh (1 Sam. 18:1). Xchatiykan lamakgtayalh chuntiya kskujnanikgolh Jehová maski xtitaxtumakgo tuku tuwa (1 Sam. 23:16-18). Irina, chatum tala tiku kaj xla xtatayana Jehová kxfamilia, wan: «Kinatalankan litaxtukgo la kifamiliajkan. Jehová kamaklakaskin xlakata nakinkamakgtayayan». Kiʼamigoskan kinkamakgtayaputunkgoyan, pero talakaskin nakawaniyaw la natlawakgo. w21.06 10, 11:9-11

Jesús lichuwinalh chatum mapakgsina chu chatum kskujni. Mapakgsina tapatilh kskujni tuku xlaklini chu nikxni la xʼama xokgo, pero uma skujni ni tapatiputulh xtaskujni tuku ni lhuwa xlaklini. Alistalh, mapakgsina tamaknulh kpulachin tiku ni lakgalhamanalh. Tuku tlawalh skujni ni kajwatiya nitlan kitaxtunilh, nachuna amakgapitsin. Nitlan likatsinilh xtaskujni chu tamaknulh «kpulachin asta akxni kxokgokgolh putum tuku xlaklini». Akxni amakgapitsi akxilhkgolh tuku xtlawanit, nitlan limakgkatsikgolh. Jesús wa: «Akxni xtaskujnin akxilhkgolh tuku xlanit, lu lilakgaputsakgolh» (Mat. 18:30, 31). Xtachuna uma, tuku tlawayaw, tlan o nitlan nalimakgkatsikgo amakgapitsin. Komo ni natapatiputunaw chatum tala, max nitlan namakgkatsi, max ni katilimasiyaniw tapaxkit chu max ni katitachuwinamputuw. Nachuna, nitlan kamamakgkatsiniyaw natalan akxni akxilhkgo pi nitlan talalinaw chatum tala. w21.06 22:11, 12

Latamanin kinkatlawakan chuna la likatsi Dios, pero Satanás lakgati katlawaw tuku nitlan. Kxkilhtamaku Noé, «Jehová akxilhli pi tuku nitlan [...] xtalhuwima», «nitlan limakgkatsilh xlakata xmalakatsukinit chixku kkatiyatni; chu lu katsanilh xnaku» (Gén. 6:5, 6, 11, nota). La uku, kakilhtamaku chuna wilapa. Akgskgawini lakgati pi talhuwinit talakgxtumit xalimaxana, chuna la akxni chatum puskat tatalakgxtumi xtapuskat o chixku tatalakgxtumi xtachixku (Efes. 4:18, 19). Lu lipaxuwa akxni chatum kskujni Jehová tlawa akgtum talakgalhin. Kxkakilhtamaku Satanás, chixku ni kajwatiya «akgchipanit chixku xlakata natlawani tuku nitlan», wata na ni kuenta tlawanit Katiyatni chu animales chuna la Jehová xlakaskin (Ecl. 8:9; Gén. 1:28). ¿Tuku kitaxtunit? Científicos wankgo pi kkilhtamaku nema aku mima, latamanin namalakgsputukgo lhuwa mil animales chu tuwan xlakata tuku tlawamakgo. w21.07 12:13, 14

Makgapitsi kskujnin Dios lu lilipuwankgo tuku nitlan tlawakgolh makgasa. Xnakujkan nitlan kamamakgkatsini chu kamakanajli pi Jehová nikxni katikatapatilh. Komo chuna makgkatsiya, lu namakgtayayan komo naʼakgatekgsa pi Jehová limasiyaniputunan xtapaxkit nema ni makgxtakgnan. Uma tlan chuna la xlakata «xkgalhni Jesús, xKgawasa, kinkalimaskulunkiyan xliputum talakgalhin» (1 Juan 1:7). Komo lilakgaputsayaw xlakata tlawaw talakgalhin, kalakapastakwi pi Jehová katapatiputun tiku xlikana nitlan limakgkatsikgo xtalakgalhinkan. David tamalakxtumilh tapaxkit nema ni makgxtakgnan chu tapatinankan. Xla tsokgwililh: «Chuna la tlakg talhman wi akgapun nixawa katiyatni, chuna xlilanka xtapaxkit nema ni makgxtakgnan nema kakgalhini tiku pekuanikgo. Chuna la xlimakgat lawilanikgolh niku taxtu chichini chu niku tatsekga, chuna xlimakgat wilinit kintalakgalhinkan» (Sal. 103:11, 12). w21.11 5, 6:12, 13

Chixku xlimaxkit kakni xpuskat (1 Ped. 3:7). Tlakg xlakaskinka naʼakxilha xpuskat nixawa amakgapitsin chu tlan nalikatsini. ¿La tlan chuna natlawa? Nalimasiyani pi lu xtapalh akxilha, ni naskini tuku ni matlani chu ni nakatamalakxtumi amakgapitsin lakpuskatin. ¿Tuku xkitaxtulh komo chuna xtlawalh? Kaʼakxilhwi tuku titaxtulh chatum tala tiku wanikan Rosa. Xchixku, tiku ni xtatayana Jehová, lismaninit tamalakxtumi amakgapitsi lakpuskatin. Lixkajni tachuwin wani chu uma tlawanit pi tuwa namakgkatsi nakanajla komo wi tiku xlikana paxki. Xla wan: «Ankgalhin klakaskin nakimalakapastakakan pi Jehová xtapalh kiʼakxilha». Chixku tiku kstalanina Cristo, maxki kakni xpuskat xlakata ni namakgalipuwan chu tlan natalalinkgo Jehová. Tlan lichuwinan xpuskat, wani pi paxki chu wani pi tlan tuku tlawa. w21.07 22:7, 8

¿Lilakgaputsayaw akxni ni lakapala chin tuku lu maklakaskimaw? Pero ¿chu komo xkinkawanikan pi anan tuku xlakata nina chin? Max tlakg xatapaxuwan nakgalhkgalhiyaw. Anta kProverbios 13:11 wi akgtum liʼakxilhtit nema masiya pi lu xlakaskinka xatapaxuwan nakgalhkgalhinanaw. Wan: «Tuku lhuwa xtapalh nema lakapala maʼakgstokgwilikan lakapala nalakgsputa, pero nema tsinu tsinu namaʼakgstokgwilikan nalhuwan». ¿Tuku kinkamasiyaniyan uma versículo? Pi limasiyamaw nawan liskgalala komo akxni wi tuku natlawayaw, tsinu tsinu chuna natlawayaw. Proverbios 4:18 wan pi «xtijikan tiku xaʼakgstitum xtachuna xkgakganat xala tsisa, nema tsinu tsinu tlakg makaxkgakgenan asta akxni liwana kaxkgakgakgo». Umakgolh texto kinkamasiyaniyan pi Jehová tsinu tsinu masiyani xkachikin xtalakaskin. Pero na kilhchani la staka xtakanajla chatum kstalanina Cristo. Lin kilhtamaku, nila malakapalikan. w21.08 8:1, 3, 4

Lisputni talakatsuwima chu lhuwa tuku kilitlawatkan (Mat. 24:14; Luc. 10:2; 1 Ped. 5:2). Kimputumkan skujnaniputunaw Jehová chuna la matlaniyaw. Lhuwa tiku maliwakamakgo la skujnanikgo Dios, makgapitsi precursores litaxtuputunkgo, amakgapitsin skujputunkgo kBetel o niku katlawakan Pukgalhtawakga, chu lhuwa natalan liskujmakgo xlakata siervos ministeriales o lakgkgolotsin nalitaxtukgo (1 Tim. 3:1, 8). Xlikana pi Jehová lu makgapaxuwa akxni akxilha pi kskujnin lu skujniputunkgo (Sal. 110:3). Pero ¿taxlajwaninitaw xlakata ni makgantaxtiw tuku xlakkaxwilinitaw? Komo chuna, kalitachuwinaw Jehová la makgkatsiyaw (Sal. 37:5-7). Kakatakgalhchuwinaw natalan tiku lhuwata tuku titaxtukgonit xlakata nakinkawanikgoyan tuku tlan naliskujaw chu chuna katlawaw. Max uma nakinkamakgtayayan namakgantaxtiyaw tuku lakkaxwilinitaw. w21.08 20:1; 21:4

Palakachuwina Ana, tiku xninita xchixku chu xkgalhi 84 kata, putum kilhtamaku xʼan ktemplo. Jehová sikulunatlawalh xlakata ni makgxtakgli chu maxkilh talakaskin naʼakxilha Jesús akxni skgataku xwanit (Luc. 2:36-38). Kkinkilhtamakujkan, lhuwa natalan tiku linkgoya kata tlan liʼakxilhtit kalitaxtunikgo lakgkgawasan. Tlan nakinkakitaxtuniyan komo nakakgalhskinaw tuku tlan titaxtukgonit chu kuenta natlawayaw tuku nakinkawanikgoyan. Kinatalankan tiku laklankata lu xlakaskinka litaxtukgo kxkachikin Jehová. Akxilhkgonit la Jehová kasikulunatlawanit chu la sikulunatlawanit xkachikin. Lhuwa tuku katsinikgonit xlakata tuku nitlan tlawakgonit. Wa xlakata kalitamakgtayaw tuku titaxtukgonit chu xliskgalalakan (Prov. 18:4). Komo nalimaxtuyaw kilhtamaku xlakata liwana nakalakgapasaw, natatliwakglha kintakanajlakan. w21.09 3:4; 4:7, 8; 5:11, 13

Chuna la wa Isaías, xkachikin Jehová tlan maklakaskin putum tuku katsinikgo tlawakgo nema xtachuna «xtsikit kachikinin» (Is. 60:5, 16). Xlakata xtamakgtaykan lakchixkuwin chu lakpuskatin tiku lhuwa xtapalh litaxtukgo, talichuwinama Dios kliwaka 240 países chu kachikinin, chu tlawamaka likgalhtawakga kliwaka 1,000 tachuwin. Kʼuma xaʼawatiya kilhtamaku, xlakata kalakchikimaka kachikinin tlawama pi putum kachikinin wi tuku nalaksakkgo: ¿natatayakgo xTamapakgsin Dios, o nalipawankgo mapakgsinanin xalak kakilhtamaku? Maski xlakskujnin Jehová kgalhakgaxmatkgo limapakgsin xalak kachikin niku lamakgolh, ni makgtanukgo kpolítica (Rom. 13:1-7). Katsikgo pi kajwatiya xTamapakgsin Dios nalakkaxtlawa xtaʼakglhuwitkan latamanin, chu uma Tamapakgsin ni xalak kakilhtamaku (Juan 18:36, 37). w21.09 17, 18:13, 14

Komo chatum tiku paxkiya makgxtakga Jehová, kaliskujti namatliwakglha mintakanajla. Lu xlakaskinka pi wix chu mifamilia namatliwakglhatit la tapalipinatit Jehová. ¿La tlan chuna natlawaya? Chali chali nalikgalhtawakgaya Biblia chu nalilakpuwana, chu napina ktamakxtumit. Kalilakpuwaw Joanna. Xtlat chu xtala tsumat makgxtakgkgolh xaxlikana. Xla wan: «Akxni klikgalhtawakga tuku titaxtukgolh makgapitsi tiku kalichuwinankan kBiblia chuna la Abigaíl, Ester, Job, José chu Jesús, tlan kmakgkatsi. Xliʼakxilhtitkan tlawa pi kkinaku chu kkintalakapastakni naʼanan tlan tapuwan». Akxni lu lakgaputsapat, katlawani oración Jehová. Katasaskini kamakgtayan naʼakxilha tuku lama chuna la xla akxilha chu kaskini kamaxkin taʼakgatekgsni chu kamasiyanin tuku militlawat (Sal. 32:6-8). Xlikana pi max tuwa namakgkatsiya nawaniya putum tuku wi kminaku. Pero Jehová akgatekgsniyan. Xla waniyan pi kawani putum tuku lilakgaputsaya (Éx. 34:6; Sal. 62:7). w21.09 28:9, 10

Akxni xtitaxtunita Pascua xla kata 32, apóstol Pedro, Santiago chu Juan akxilhkgolh tuku lu kaks malakawaninan. Kʼakgtum lanka sipi, max lakatsu ksipi Hermón, Jesús talakgpalilh la xtasiya. Biblia wan: «Xlakan xmalakgachixinan chuna la chichini chu klhakgat lu snapapa tasiyalh chuna la xkgakganat» (Mat. 17:1-4). Apóstoles kgaxmatkgolh akxni Dios wa: «Wa uma kinKgawasa, tiku lu kpaxki, chu lu tlan kimamakgkatsini. Kakgaxpatnitit». Xkgalhtutukan limasiyakgolh kxlatamatkan pi kgaxmatnikgolh Jesús, chu akinin nachuna tlawaputunaw. Lu paxtikatsiniyaw Jehová pi maklakaskima Jesucristo, «xʼakgxakga congregación», xlakata nakinkapulalinan (Efes. 5:23). Xtachuna la Pedro, Santiago chu Juan, kakgaxmatniw xlakata tlan namakglhtinanaw lhuwa tasikulunalin la uku chu nakgalhiyaw tapaxuwan ankgalhin. w21.12 22:1; 27:19

Anta kCorinto xwi chatum kstalanina Cristo tiku xtlawama tuku xalimaxana xlakata xtawi xpuskat xtlat. Apóstol Pablo wa pi xtamakxtuka. Xtayat uma chixku xkalaktlawama tiku xalak congregación. Makgapitsi xlakpuwankgo pi ni lanka talakgalhin xtlawama (1 Cor. 5:1, 2, 13). Alistalh, Pablo katsilh pi talakgpalilh chu nitlan xlimakgkatsi xtalakgalhin chu kawanilh lakgkgolotsin: «Katapatitit chu tlan kamamakgkatsinitit. [...] Xlakata ni lu nalipuwan asta nialh natayani». Pablo lakgalhamalh uma chixku. Ni xlakaskin pi lu xlilakgaputsalh xtalakgalhin chu uma xtlawalh pi nialh xputsalh tamakgtay (2 Cor. 2:5-8, 11). Chuna la Jehová, lakgkgolotsin na lu limasiyakgo talakgalhaman. Palha stakyawanankgo akxni chuna xlilat, pero limasiyakgo talakgalhaman akxni lakgchan. Komo ni kstakyawakgolh tiku lakgalhinama ni xlimasiyakgolh pi lakgalhamanankgo. w21.10 11, 12:12-15

Akxni wi tuku nitlan kinkamamakgkatsiniyan, xtachuna la wi niku takgawinitaw. Akgtum liʼakxilhtit, akxni tlawamaw liwat max natamakachukuyaw tsinu. Xapulana lu nakinkakatsaniyan, pero alistalh napaksa chu nialh katilakapastakwi. Xtachuna la uma, max kiʼamigojkan nawan o natlawa tuku nichuna xlakapastaknit nema nakinkalimakgasitsiyan, pero ni lu tuwa namakgkatsiyaw natapatiyaw. Pero kalakapastakwi komo tlakg pulhman natamakachukuyaw, max makuchina nakinkatsapaniyan chu nakinkawiliniyan venda. Komo chuntiya naxamayaw natlawayaw pi ni tunkun napaksa chu tlakg nitlan katikitaxtulh. Lu nitlan, pero wa uma tuku la akxni wi tiku makgkatsi pi nitlan tuku tlawanikanit. Max chuntiya nalilakapastaka tuku nitlan tlawanikanit chu xtasitsi nitlan tuku natlawani. Tlakg tlan komo namakgantaxtiyaw xtastakyaw texto xala uku. w21.12 12:15

Komo chatum kgolotsin lilakgaputsama la takaxtaya chatum tala, tlan nalakpuwan: «¿Lakatsalama xtastakyaw Biblia xlakata tlan nakstakyawa?». Xlakata ni tlawaputun tuku xʼakstu lakpuwan, tlan naskini xtamakgtay achatum kgolotsin o atanu tala. Naʼakxilhkgo tuku wa Pablo xlakata uma (1 Tim. 2:9, 10). Pablo ni laklhkawililh tuku tlan natlawayaw chu tuku nila. Wata lichuwinalh tuku nakinkapulalinan xlakata nalhakgananaw chuna la xlilat. Xkatsi pi kstalaninanin Cristo tlan nalaksakkgo la natakaxtayakgo, pero ni xlilakatsalat tuku wan Biblia. Wa xlakata lakgkgolotsin kuenta xlitlawatkan komo tiku nastakyawakgo limasiya liskgalala chu lhakganan chuna la xlilat. Kililakapastakatkan pi chatiy natalan max ni lakxtum tuku nalaksakkgo. Pero ni wamputun pi chatum tlan tuku laksaka chu atanu nitlan. Wa xlakata, ni kakawaniw kinatalankan natlawakgo tuku akinin lakpuwanaw pi tlan o nitlan. w22.02 16:9, 10

Libro xla proverbios wan makgapitsi tuku xlakata kilimasiyatkan tapaxkit: «Tapaxkit nema ni makgxtakgnan chu tuku xaxlikana ni kamakgxtakgni [...]; chuna, Dios chu latamanin namakgamakglhtinankgoyan»; «chixku tiku limasiya tapaxkit nema ni makgxtakgnan xʼakstu makgtayakan», chu «tiku lu putsa tuku xaʼakgstitum chu tapaxkit nema ni makgxtakgnan natekgsa latamat» (Prov. 3:3, 4; 11:17, nota; 21:21). Umakgolh proverbios lichuwinan pulaktutu tuku xlakata kilimasiyatkan tapaxkit. Pulana, xlakata xtapalh litaxtuyaw kxlakatin Dios. Xlipulaktiy, kiʼakstukan litamakgtayayaw. Chu, xlipulaktutu, nakgalhiyaw tasikulunalin kkilhtamaku nema aku mima chu latamat nema nikxni sputa. Lhuwa tuku xlakata kilikgalhakgaxmatatkan uma limapakgsin: «Kalalimasiyanitit tapaxkit nema ni makgxtakgnan chu talakgalhaman». w21.11 8:1, 2

Ni kataxlajwani komo tuku titaxtupat o titaxtunita limasiya pi tsankganiyan takanajla. Kamaklakaskinti uma kilhtamaku xlakata tlakg namatliwakglha mintakanajla. Katlawani oración Jehová xliputum minaku, liwaka akxni titaxtupat tuku tuwa. Kamakgamakglhtinanti xtamakgtay Jehová akxni kalimaklakaskin mifamilia o natalan. Komo namaxkiya talakaskin Jehová namakgtayayan la uku, tlakg nalipawana pi xla namakgtayayan kkilhtamaku nema aku mima. Jesús lichuwinalh makgapitsi niku xtalakaskin pi kstalaninanin xmatliwakglhkgolh xtakanajlakan, pero xkanajla pi Jehová xʼama kamakgtaya kxtaʼakglhuwitkan (Juan 14:1; 16:33). Nachuna, xkatsi pi xʼama anan lhuwa latamanin tiku xʼamakgo lakgtaxtunikgo lanka tapatin xlakata kgalhikgo lanka takanajla (Apoc. 7:9, 14). Wix na nalakgtaxtuya komo la uku namatliwakglha mintakanajla (Heb. 10:39). w21.11 25:18, 19

Ni kgalhkgalhiyaw pi Dios natlawa akgtum milagro xlakata nitu nakinkaʼakgspulayan. Pero liwana katsiyaw pi xlakskujnin Dios ni putum kilhtamaku katipatiw tuku nitlan. Nialh makgas naliʼakxilhkan komo xlikana lipawanaw Jehová. Akxni Gog xalak Magog nakinkaʼakgchipaputunan, max nalakpuwanaw pi nakinkamasputukgoyan. Liwana kilikatsitkan pi Jehová nakinkalakgmaxtuyan. Kachikinin nakinkaʼakxilhkgoyan chuna la borregos tiku ni kgalhikgo tiku nakakuentajtlawa (Ezeq. 38:10-12). Nalakpuwankgo pi tlan nakinkaʼakgchipakgoyan xlakata ni katikgalhiw tuku limakgninankan chu ni katsiyaw la talatlawanankan. Xlakan ni katiʼakxilhkgolh tuku akinin liʼakxilhaw kintakanajlakan: lhuwa ángeles tiku nakamakgtayakgo xkachikin Dios chu nakalakgmaxtukgo. ¡Lu kaks nalilakawankgo akxni naʼakxilhkgo pi ángeles nakinkalakgmaxtukgoyan! (Apoc. 19:11, 14, 15). w22.01 6:12, 13

Komo Jehová xlakaskinka kaʼakxilha putum kinatalankan, akinin nachuna kiliʼakxilhatkan. Kilitlawatkan tuku matlaniyaw xlakata nakakuentajtlawayaw. Komo nakatsiyaw pi nitlan mamakgkatsiniw chatum tala, ni kililakpuwanatkan pi nitu lama chu pi ni tayani chu xlipatsankgat uma. ¿Tuku xlakata wi tiku lakapala sitsi? Max xlakata chuna la makgastakkanit lakpuwan pi nitu litaxtu. O max aku lakgapasmakgo xaxlikana chu max nina liwana akgatekgskgo pi amakgapitsin na tlawakgo tuku nitlan. Maski ni katsiyaw tuku xlakata lakapala sitsikgo, kilitlawatkan putum tuku talakaskin xlakata nalakkaxtlawayaw taʼakglhuwit. Chu komo wi tiku lakapala sitsi, xliʼakxilhat pi uma nitlan chu xliskujat xlakata nalakgpali xtayat. Talakaskin lu naliskuja xlakata xla chu amakgapitsin tlan nakakitaxtuni. w21.06 21:7

Jesús akgatekgsa tuku makgkatsiyaw. Akxni lu lakgaputsamaw, lu tlan makgkatsiyaw akxni chatum kiʼamigojkan kinkaʼakgatekgsniyan, liwaka komo na watiya tuku titaxtunit. Jesús wa uma lu xatlan amigo. Katsi la tamakgkatsi akxni xlajwanankan chu akxni maklakaskinkan tamakgtay. Katsi la kinkatlawakanitan chu tlan natlawa pi nakgalhiyaw tamakgtay «kilhtamaku akxni xlilat» (Heb. 4:15, 16). Chuna la Jesús makgamakglhtinalh xtamakgtay chatum ángel kʼGetsemaní, akinin na kilimakgamakglhtinatkan xtamakgtay Jehová, max nalimaklakaskin likgalhtawakga, videos, taʼakgchuwin, o max chatum kgolotsin o chatum kiʼamigojkan nakinkalakgapaxialhnanan (Luc. 22:39-44). Jehová namaxkiyan xtakaksni. Akxni tlawaniyaw oración, kinkamaxkiyan «takaksni nema latamanin nila akgatekgskgo» (Filip. 4:6, 7). w22.01 18, 19:17-19

Jehová ankgalhin tlawa tuku tlan. Pero max tuwa namakgkatsiyaw nakalipawanaw tiku kalaksaknit nakinkapulalinkgoyan. Max akstu nakinkakgalhskinkanan komo xlikana stalanimakgo xtapulalit Jehová. Xla kalipawan tiku kalaksaknit xlakata napulalinkgo xkachikin chu congregación, wa xlakata komo ni kalipawanaw umakgolh lakchixkuwin nila nawanaw pi lipawanaw Jehová. La uku, Jehová maklakaskin «skujni xatalipaw chu xaskgalala» xlakata napulalin xkachikin kkatiyatni (Mat. 24:45). Xtachuna la lakgkgolotsin xalak pulana siglo, uma skujni pulalin taskujut nema tatlawama kxlikalanka katiyatni chu kawani tuku xlitlawatkan lakgkgolotsin xalak congregaciones. Chu lakgkgolotsin akxilhkgo pi namakgantaxtikan kcongregaciones tuku wan skujni xatalipaw. Komo natlawayaw tuku wan xkachikin Dios chu lakgkgolotsin, nalimasiyayaw pi lipawanaw Jehová. w22.02 4:7, 8

¡Kinkamakgapaxuwayan pi akinin xtatayananin Jehová! Paxuwayaw akxni makgtayayaw tiku “makgamakglhtinamputun xaxlikana tuku masta latamat nema ni kgalhi xlisputni” xlakata kskujni Dios nalitaxtu (Hech. 13:48). Makgkatsiyaw la makgkatsilh Jesús akxni xtamakgalhtawakgen litachuwinankgolh la xkakitaxtuninit akxni kilichuwinankgolh Dios (Luc. 10:1, 17, 21). Apóstol Pablo maxkilh uma tastakyaw Timoteo: «Kuentajkatlawa chuna la lipina milatamat chu tuku masiyaya. [...] Komo chuna natlawaya nalakgtaxtuya wix chu nachuna tiku nakgaxmatnikgoyan» (1 Tim. 4:16). Uma masiya pi kalipekua wi xlatamatkan latamanin. Kuenta tlawayaw kintayatkan xlakata tapakgsiniyaw xTamapakgsin Dios. Ankgalhin malankiputunaw Jehová chu limasiyaputunaw pi kanajlayaw xalaktlan tamakatsinin nema lichuwinanaw (Filip. 1:27). Kuenta tlawayaw tuku masiyayaw chu liwana lakkaxwiliyaw tuku nalichuwinanaw chu skiniyaw Jehová pi kakinkamakgtayan. w21.10 24:1, 2

«Xasasti tayat» kilhchani lakpuwankan chu likatsikan chuna la Jehová. ¿La nakgalhiyaw uma tayat? Namastayaw talakaskin pi tayat nema masta espíritu santo nalakgpali kintalakapastaknikan, tuku makgkatsiyaw chu la likatsiyaw. Akgtum liʼakxilhtit, tiku kgalhi «xasasti tayat» paxki Jehová chu xlakskujnin (Mat. 22:36-39). Chuntiya paxuwa maski titaxtu tuku tuwa (Sant. 1:2-4). Makgtayanan naʼanan takaksni (Mat. 5:9). Kgalhkgalhinan chu tlan kalikatsini amakgapitsin (Col. 3:13). Paxki chu tlawa tuku tlan (Luc. 6:35). Limasiya pi kanajlani Jehová (Sant. 2:18). Maski amakgapitsin makgasitsiputunkgo, machokgo xtasitsi (Tito 3:2). Chu ni tlawa tuku nitlan matlawiputunkan (1 Cor. 9:25, 27). Xlakata nakgalhiyaw xasasti tayat, kilikgalhitkan tayat nema lichuwinan Gálatas 5:22, 23 chu amakgapitsi textos xalak Biblia. w22.03 8, 9:3, 4

Lakgkgolotsin ni kajwatiya xlistalanitkan xliʼakxilhtit apóstol Pablo akxni nalichuwinankgo Dios kʼakgatunu chiki, na tlan chuna natlawakgo kaxanikawa natatekgskgo (Efes. 6:14, 15). Chuna la Pablo, akxni akxtum katalichuwinankgo Dios amakgapitsin, chuna la siervos ministeriales, tlan nakamasiyanikgo (1 Ped. 5:1, 2). Maski lakgkgolotsin kgalhikgo lhuwa taskujut, chuntiya naʼankgo lichuwinankgo Dios (Mat. 28:19, 20). Xlakata tlan namakgantaxtikgo tuku xlitlawatkan, namin kilhtamaku natalakaskin nialh namakglhtinankgo lhuwa taskujut. Max naʼakxilhkgo pi komo namakglhtinankgo akgtum taskujut nialhla katimakgantaxtikgolh tuku tlakg xlakaskinka, chuna la takaknin kfamilia, nalichuwinankgo Dios o nakamasiyanikgo xkamanankan la nalichuwinankgo Dios. Jehová akgatekgsa pi makgantaxtiputunkgo putum tuku kalakgayawakanit. w22.03 27:4, 7; 28:8

¿Xpekuanaw akxni xlakpuwanaw pi xtatayananin Jehová xʼamaw litaxtuyaw? Max xlakpuwanaw pi nila xʼamaw lichuwinanaw Dios kʼakgatunu chiki, o xpekuanaw akxni xlakpuwanaw pi kifamiliajkan o kiʼamigoskan xkinkalakatakikgon. Uma nakinkamakgtayayan naʼakgatekgsaw tuku makgkatsikgo kintamakgalhtawakgenkan. Jesús wa pi makgapitsi latamanin xʼamakgolh pekuankgo. Pero kawanilh kstalaninanin pi tapekua ni xtlawalh ni kskujnanikgolh Jehová (Mat. 10:16, 17, 27). Kamasiyaniw kintamakgalhtawakgenkan nalichuwinan tuku katsinima. Max xtamakgalhtawakgen Jesús pekuankgolh akxni kawanilh pi xlichuwinankgolh Dios, pero xla kamakgtayalh akxni kawanilh tiku tlan xkatachuwinankgolh chu tuku xwankgolh (Mat. 10:5-7). ¿La nastalaniyaw xliʼakxilhtit? Kamakgtayaw kintamakgalhtawakgenkan nakatsi tiku nakalitachuwinan Dios. Kakgalhskiw komo lakgapasa tiku katsiputun xlakata Biblia chu alistalh kamakgtayaw nalakkaxwili tuku nawan. w21.06 6:15, 16

«Kaj xalan, niku kstanankan chu edificios nema makgasa xkatlawakanit tsukukgolh talaktilhkgo». «Latamanin lu xpekuankgonit [...]. Lhuwa wankgolh pi kaj ni lhuwa minuto makgapalalh, pero akit klakpuwan pi lu makgas makgapalalh». Chuna lichuwinankgolh makgapitsi tiku lakgtaxtukgolh akxni tachikilh tiyat kNepal kkata 2015. Pero la uku, atanu tuku kinkalakchikiman, uma chuna lama kxlikalanka kakilhtamaku. Palakachuwina Ageo wa: «Wa uma tuku wan Jehová tiku pulalin lhuwa soldados: “Nialh makgas, amakgtum nakkalakchiki akgapun chu katiyatni, pupunu chu xaskakni katiyatni”» (Ageo 2:6). Talakchikit nema lichuwinan Ageo lu tlan kitaxtu, ni xtachuna la akxni tachiki tiyat. Jehová wa: «Nakkalakchiki putum kachikinin, chu putum tuku lhuwa xtapalh xliputum kachikinin natanukgo kʼuma chiki chu naklimatsama likakni». w21.09 14:1-3

Xlakata wi tiku tlan natalalinaw, talakaskin liwana chu ankgalhin natachuwinanaw. Nachuna, akxni waniyaw Jehová tuku makgkatsiyaw, tuku lakpuwanaw chu tuku lilakgaputsayaw, limasiyaniyaw pi lipawanaw chu pi katsiyaw pi kinkapaxkiyan (Sal. 94:17-19; 1 Juan 5:14, 15). Akxtum kakatatawilaw kinatalankan; xlakan xtamaskiwin Jehová (Sant. 1:17). Xlakata kinkamaxkinitan akgtum lanka familia xaʼespiritual, kinkalimasiyaniyan pi kinkapaxkiyan (Prov. 17:17). Kcarta nema kamalakgachanilh colosenses, Pablo kalichuwinalh makgapitsi natalan tiku xmakgtayakgonit: «Xlakan litaxtukgonit tiku tlan kimamakgkatsinikgo» (Col. 4:10, 11). Jesucristo na maklakaskilh chu paxtikatsinilh xtamakgtaykan xʼamigos, chuna la ángeles chu latamanin (Luc. 22:43). Akxni waniyaw tuku lilakgaputsayaw chatum tala tiku tliwakga wi xtakanajla, ni kilhchanima pi ni lakgtliwakgan akinin, wata uma lu kinkamakgtayayan. w21.04 24, 25:14-16

¿Tuku kilitlawatkan komo chatum tala natlawa tuku nalisitsiyaw? Kilitlawatkan putum tuku matlaniyaw xlakata naʼanan takaksni. Katlawaniw oración Jehová chu kawaniw tuku makgkatsiyaw. Kaskiniw pi kakinkamakgtayan naʼakxilhaw xalaktlan xtayat uma tala chu kasikulunatlawalh (Luc. 6:28). Komo nila tapatiyaw tuku nitlan kinkatlawanin, kalilakpuwaw la tlan natachuwinanaw. Kalakpuwaw pi max ni xkinkatlawaniputunan tuku nitlan (Mat. 5:23, 24). Akxni natachuwinanaw, ni kalakpuwaniw tuku nitlan. Pero ¿chu komo ni lakkaxtlawaputun taʼakglhuwit? Biblia wan: «Chuntiya kalatatayanitit». Ni kalakpuwaw pi nikxni tlan natalalimparayaw kintalakan (Col. 3:13). Lu xlakaskinka ni namakiniyaw tasitsi, xlakata chuntiya tlan natalalinaw Jehová. Ni kamastaw talakaskin wi tuku nakinkamakgchakgxayan. Chuna nalimasiyayaw pi paxkiyaw Jehová maski kaxatukawa tuku nakinkaʼakgspulayan (Sal. 119:165). w21.06 23:15