Julio

Jehová lakkaxwilinit pi natamakxtukan kcongregación tiku tlawanit talakgalhin xlakata tlan nakitaxtuni congregación, chu na limasiyanikan tapaxkit tiku lakgalhinanit. Max wi tiku nawan pi lakgkgolotsin nitlan tuku tlawakgolh akxni wi tiku tamakxtukgolh kcongregación, pero kalakapastakti pi tiku chuna wan max ni katilichuwinalh tuku nitlan tlawalh tiku tamakxtuka chu akinin ni liwana katsiyaw putum tuku lalh. Wa xlakata tlan nalipawanaw pi lakgkgolotsin stalanikgolh xtastakyaw Biblia chu lakputsanankgolh la Jehová lakaskin (2 Crón. 19:6). Komo natatayaya tuku lakkaxwilikgonit lakgkgolotsin akxni tamakxtukan chatum tiku xalak mifamilia, max namakgtayaya nalakgtaspita Jehová. Elizabeth wan: «Lu tuwa kmakgkatsiw nialh xaktalaliw kinkgawasakan tiku lankata xwanit. Pero akxni lakgtaspittli Jehová, wa pi xlakgchan tamakxtuka. Chu titaxtulh kilhtamaku wa pi xkatsininit lhuwa tuku lu xtapalh». w21.09 28, 29:11, 12

Uma puskat max tlakg xmaxkiputun Jehová. Maski ni lhuwa, maxkilh putum tuku tlakg xtapalh xkgalhi. Chu Jesús liwana xkatsi pi tuku mastalh lu xtapalh xwanit kxlakatin xTlat. Lu xlakaskinka tuku kinkamasiyaniyan: Jehová lakgati namaxkiyaw putum tuku tlakg xtapalh kgalhiyaw, kaskujniw xliputum kinakujkan chu xliputum kilatamatkan (Mat. 22:37; Col. 3:23). Paxuwa akxni tlawayaw putum tuku matlaniyaw, akxni limaklakaskinaw kinkilhtamakujkan chu kilitliwakgakan xlakata nakakninaniyaw, akxni anaw lichuwinanaw xTachuwin o ktamakxtumit. Xliʼakxilhtit puskat tiku xninita xchixku kinkamasiyaniyan pi talakaskin nakalilakpuwanaw makgapitsi natalan tiku talakaskin nakamalakapastakayaw pi Jehová lu lipaxuwa putum tuku tlawakgo. Max chatum tala puskat tiku lina kata chu makgkatsi pi nitu litaxtu xlakata nialhla lichuwinan Dios chuna la xapulana. w21.04 6, 7:17, 19, 20

Jehová katsi tuku kilhtamaku namasputu uma xalixkajni kakilhtamaku. Xlakata kgalhkgalhinan, la uku lhuwa millones latamanin skujnanimakgo chu malankimakgo. Putum umakgolh latamanin paxtikatsinikgo Jehová xlakata asta la uku tayaninit, chu chuna tlan lakachinkgolh, katsinikgonit la napaxkikgo chu makamaxkikgonit xlatamatkan. Akxni namakglhtinanaw kintatlajakan xlakata tayaniw, Jehová liwana nalimasiya pi lu tlan kitaxtulh xlakata tayaninit. Maski Satanás malakatsukinit lhuwa takatsanajwat chu tapatin, Jehová chuntiya «xapaxuwana Dios» litaxtu (1 Tim. 1:11). Na tlan nalimasiyayaw tapaxuwan chuna la kgalhkgalhimaw pi Jehová kamasantujlilh xtukuwani, kalimasiyalh pi wa lakgchan namapakgsinan chu kamasputulh tuku nitlan. Chuntiya katayaniw chu kalilakpuwaw pi kinTlatkan xalak akgapun na tayanima. w21.07 13:18, 19

Kxapulana siglo lhuwa latamanin lakgmakgankgolh Jesús. Xlakpuwankgo pi kaj xkgawasa xwakna xlitaxtu. Nachuna, xalak Nazaret xwanit, akgtum kachikin nema ni lu xlakaskinka xliʼakxilhkan. Asta Natanael tiku kstalanina Jesús litaxtulh, milh kilhtamaku wa: «¿Wi tuku xatlan nataxtuyacha kNazaret?». Max xla xlilakpuwama tuku wan Miqueas 5:2, niku wan pi Jesús xʼama lakachin kBelén chu ni kNazaret. Palakachuwina Isaías lichuwinalh pi xtalamakgasitsin Jesús ni xʼamakgolh katsiputunkgo «xlakata xkilhtsukut [Mesías]» (Is. 53:8). Komo xlakputsananikgolh tuku xlama, xkatsikgolh pi Jesús lakachilh kBelén chu xminitancha kxfamilia mapakgsina David (Luc. 2:4-7). Niku lakachilh Jesús xtatalakxtumi tuku wan Miqueas 5:2. Pero ¿tuku xlakata ni kanajlanikgolh? Xlakata ni limaxtukgolh kilhtamaku nalakputsananikgo putum uma, lakpuwankgolh tuku ni xlilat. Akgchakgxkgolh chu lakgmakgankgolh Jesús. w21.05 2, 3:4-6

Biblia kalichuwinan tiku makgamakglhtinankgolh tastakyaw chu Dios kasikulunatlawalh. Kalichuwinaw Job. Maski xla xmakgapaxuwaputun Dios, makglakgalhina xwanit. Akxni xtitaxtuma tuku tuwa, wa ni xatlan tachuwin. Wa xlakata Elihú chu Jehová stakyawakgolh. ¿Tuku tlawalh Job? Taktujulh chu makgamakglhtinalh tastakyaw. Wa: «Kchuwinalh maski nitu xakʼakgatekgsa [...]. Lu nitlan klimakgkatsi tuku kwa chu asta klaktawila pokgxni chu lhkaka» (Job 42:3-6, 12-17). Job taktujulh chu makgamakglhtinalh xtastakyaw Elihú maski xla tlakg kgawasaku xwanit (Job 32:6, 7). Taktujut na kinkamakgtayayan nastalaniyaw tastakyaw nema kinkamaxkikanan, maski lakpuwanaw pi ni xmaklakaskinaw o akxni tiku kinkastakyawaman tlakg aktsujku nixawa akinin. Kimputumkan maklakaskinaw naliskujaw xlakata nakgalhiyaw tayat nema masta espíritu santo chu tlakg tlan makgalhtawakgenanin nawanaw. w22.02 11:8; 12:12

Kimputumkan tlan namakgtayananaw naʼanan takaksni chu tapaxkit kcongregación. Chuna niti katimakgkatsilh pi xʼakstu wi. Tuku wanaw chu tuku tlawayaw tlan nakamakgpuwantini amakgapitsin. ¿La nakamakgtayayaw natalan tiku xfamiliajkan ni skujnanikgo Jehová namakgkatsikgo pi makgtapakgsikgo kcongregación? Kaliskujwi kiʼamigoskan nakalimaxtuyaw. Xatapaxuwan kakamakgamakglhtinaw tiku aku tsukumakgo ankgo kcongregación (Rom. 15:7). Pero ni kajwatiya xatapaxuwan nakamakgachipayaw, wata kiʼamigoskan kakalimaxtuw. Tlan kakalikatsiniw chu kakalimasiyaniw pi kalilakgaputsayaw. Kaʼakgatekgswi tuku tuwa titaxtumakgo, pero ni kamakgtanuw kxlatamatkan. Wi tiku tuwa makgkatsikgo nawankgo tuku makgkatsikgo, ni nakamafuerzajliniyaw nakinkawanikgoyan, wata kuenta katlawaw tuku nakakgalhskinaw chu kaks kakakgaxmatniw. Max tlan nakakgalhskinaw la katsinikgolh xlakata Jehová. w21.06 11:13, 14

¡Paxtikatsiniyaw Jehová pi makxtum skujniyaw chu “kaj chatum kimapuchwayanakan”! Libro Organizados para hacer la voluntad de Jehová, página 165, wan: «Kinkalakgchanan naliskujaw xlakata makxtum natawilayaw. [...] Tlan nakatalalinaw kinatalankan komo nakaʼakxilhaw chuna la kaʼakxilha Jehová». Xla lanka xtapalh kinkaʼakxilhan chuna la “laktsu xkamanan”. Chuna kiliʼakxilhatkan kinatalankan. Xla xtapalh akxilha putum tuku tlawayaw xlakata nakakuentajtlawayaw (Mat. 10:42). Kapaxkiyaw kinatalankan. Wa xlakata, liskujputunaw «ni natlawayaw tuku namaʼakgchakgxni chatum tala o natlawa pi naʼakgtsankgataya» (Rom. 14:13). Kinatalankan tlakg xlakaskinka litaxtukgo nixawa akinin chu xatapaxuwan katapatiputunaw. Ni kamastaw talakaskin pi tuku nitlan tlawakgo amakgapitsin nakinkamakgchakgxniyan. Wata kaputsaw tuku namakgtayanan tlan nakatalalinaw chu “tuku tlan nalalimatliwakglhaw kinchatunukan” (Rom. 14:19). w21.06 24:16, 17

Komo likgalhtawakgayaw chu lilatamayaw xtastakyaw Biblia chu xkachikin Dios, tsinu tsinu nakgalhitilhayaw xtayat Cristo chu tlakg nalakgapasaw Dios. Kʼakgtum parábola, Jesús tamalakxtumilh tamakatsinin nema lichuwinanaw, akgtum talhtsi nema tsinu tsinu staka kxnakujkan latamanin tiku tlan likatsikgo. Xla wa: «Talhtsi punkgo chu talhman stakkgo, pero xla [chanana] ni katsi chuna la stakma. Tsinu tsinu tiyat tlawa pi nastaka: xapulana taxtu xakiwi, alistalh niku tanu xatawakat, xaʼawatiya niku tanu xatawakat staka xatalhtsi» (Mar. 4:27, 28). Jesús wa pi tiku makgamakglhtinan tamakatsin xla Tamapakgsin, staka xtakanajla chuna la kgantum tuwan: tsinu tsinu. Uma akxilhaw akxni tiku kalimakgalhtawakgeyaw Biblia, talakatsuwinitilhakgo Jehová chu tsukuyaw akxilhaw talakgpalit kxlatamatkan (Efes. 4:22-24). Pero kililakapastakatkan pi wa Jehová tiku tlawa pi talhtsi nastaka. w21.08 8, 9:4, 5

Komo kgalhiputunaw tapaxuwan, kililakanatkan niku xlilat. Lataman tiku lipaxuwa «tuku akxilha lakgastapu» tlan limakgkatsi tuku kgalhi, akgtum liʼakxilhtit, tuku tlan tlawa la uku. Pero lataman tiku anu anu an xlakata wi tuku lakaskin, ankgalhin kgalhiputun tuku nila kgalhi. ¿Tuku kinkamasiyaniyan uma? Komo paxuwaputunaw wa kililakpuwanatkan tuku kgalhiyaw chu ni wa tuku nila makgantaxtiyaw. Kimputumkan lakgatiyaw akxni kinkamatlawikanan tuku tsinu tuwa makgkatsiyaw. Wa xlakata, ¿tlan nalipaxuwayaw tuku kgalhiyawa? Chuna. ¿La tlan chuna natlawayaw? Xlakata nakatsiyaw, kaʼakxilhwi parábola xla talentos nema lichuwinalh Jesús chu wi kMateo 25:14-30. Nakatsiniyaw tuku tlan natlawayaw xlakata nakgalhiyaw tapaxuwan chu tlan namaliwakayaw kintapaxuwankan maski tanu tanu la tatekgsaw. w21.08 21:5, 6

Jehová lu kalilakgaputsa «tiku lipuwankgo». Kimputumkan, tlan nakamakgpuwantiniyaw kinatalankan. Pulaktum tuku tlan natlawayaw wa pi nakalilakgaputsayaw. Jehová lakaskin pi kakalimasiyaniw la kapaxki (Prov. 19:17). Na tlan nakamakgtayayaw akxni nataktujuyaw chu ni nalakpuwanaw pi putum tlan tlawayaw. Ni lakaskinaw pi tlakg xlakaskinka nakinkaliʼakxilhkanan xlakata ni lakaskinaw pi amakgapitsi nakinkasitsinikgoyan. Wata maklakaskimputunaw tuku tlan tlawayaw chu tuku katsiniyaw xlakata nakamakgpuwantiniyaw amakgapitsin (1 Ped. 4:10, 11). Nakatsiniyaw la nakalikatsiniyaw amakgapitsin akxni naʼakxilhaw la xlikatsi Jesús. Maski xla xlakaskinka xlitaxtu, “ni xaluku xwanit chu xtaktuju” (Mat. 11:28-30). Akxni xmasiya, xlimaklakaskin ni laktuwa tachuwin chu liʼakxilhtit nema xkalakgchan xnakujkan latamanin tiku ni tlankajwa xwankgonit (Luc. 10:21). w21.07 23:11, 12

Kakatalakatsuwiniw chu kakatachuwinaw kinatalankan tiku linkgoya kata. Max nialh liwana akxilhkgo chuna la makgasa, max lakgasiyu tlawankgo chu nialh lu takgaxmata la chuwinankgo. Pero chuntiyaku skujnaniputunkgo Dios chu kgalhikgo «tlan tukuwani» kxlakatin Jehová (Ecl. 7:1, nota). Kalakapastakwi tuku xlakata Jehová xtapalh kaliʼakxilha chu kakamaxkiw kakni. Kalikatsiw chuna la Eliseo, tiku ni makgxtakgli Elías chu wa pi anta xʼama tatamakgxtakga. Makgtutu wanilh: «Ni ktimakgxtakgni» (2 Rey. 2:2, 4, 6). Kakalimasiyaniw kinatalankan pi kalilakgaputsayaw akxni tlawayaw takgalhskinin (Prov. 1:5; 20:5). Tlan xkakgalhskiw: «Akxni nina xlipina kata, ¿tuku makgtayan nakatsiya pi xtekgsnita xaxlikana?», «¿Tuku makgtayanitan tlakg natalakatsuwiniya Jehová chu xatapaxuwan naskujnaniya?» (1 Tim. 6:6-8). Alistalh kaks kakakgaxmatniw. w21.09 5:14; 7:15

Akxni lu liskujaw nalichuwinanaw Dios chu nakamakgtayayaw latamanin kstalaninanin Cristo nalitaxtukgo, limasiyayaw pi paxkiyaw Dios (1 Juan 5:3). Kalilakpuwaw uma: tapaxkit nema kgalhiniyaw Jehová tlawanit pi nalichuwinanaw xtachuwin kʼakgatunu chiki. ¿Tuwa makgkatsiw nakgalhakgaxmataw uma limapakgsin? Max tuwa. Xlikana pi max pekuaw akxni xapulana tlakgwi malakcha. Pero chuna tlawaw xlakata xkatsiyaw pi Jesús chuna lakaskin. Max la uku nialh lu tuwa makgkatsiyaw nalichuwinanaw Dios, pero ¿chu akxni matsukikan akgtum takgalhtawakga? Maski kaj lilakpuwanaw max pekuanaw. Pero komo naskiniyaw Jehová tamakgtay xlakata ni napekuanaw chu namatsukiyaw akgtum takgalhtawakga, nakinkamakgtayayan chuna natlawayaw. w21.07 3:7

Makgasa, lakskujnin xkawilinikan lilhka xlakata xkatsika tiku xtapakgsinikgo. Xtachuna la uma, kkinkilhtamakujkan mapakgsinanin skinkgo pi putum latamanin kakgalhikgolh akgtum lilhka kxmakankan o kxmunkan. Uma wamputun, pi latamanin nalimasiyakgo kxlatamatkan pi tapakgsinikgo mapakgsinanin xalak kakilhtamaku. Chu akinin, ¿namakglhtinanaw uma lilhka chu nakatatayayaw mapakgsinanin? Tiku ni namakglhtinamputunkgo tuwa tuku natitaxtukgo. Libro xla Apocalipsis wan pi nitila «natamawanan o nastanan, kajwatiya tiku kgalhi lilhka» (Apoc. 13:17). Pero kskujnin Dios katsikgo tuku nakaʼakgspula tiku nakgalhikgo lilhka nema lichuwinan Apocalipsis 14:9 chu 10. Wa xlakata, ni katimakglhtinankgolh lilhka, wata xtachuna xtsokgwilikgolh kxmakankan: «Tapakgsini Jehová» (Is. 44:5). La uku talakaskin nalimasiyayaw pi wa tatayayaw Jehová, chu chuna namakgapaxuwayaw. w21.09 18:15, 16

Natalan tlan nakinkamakgtayakgoyan namakgantaxtiyaw kintaskujutkan. Pablo masiyanilh Timoteo la xla xmasiya chu xlichuwinan Dios, chu makgpuwantinilh nakalimakgtaya uma amakgapitsin (1 Cor. 4:17). Akinin na tlan nalitamakgtayayaw tuku katsinikgo natalan. Na katlawaw oración xlakata Jehová nakinkapulalinan. Komo ni xkinkamakgtayan xʼespíritu santo nila tuku xtlawaw (Sal. 127:1; Luc. 11:13). Liwana kawaniw Jehová tuku lakaskinaw. Akgtum liʼakxilhtit, kaskiniw pi kakinkamakgtayan natekgsaw tiku nakgaxmatputun chu namakgamakglhtinamputun xaxlikana. Na kalimaxtuw kilhtamaku xlakata kiʼakstukan nakgalhtawakgayaw. Xtachuwin Dios wan: «Xlakata tlan liwana nalakgapasatit xtalakaskin Dios, nema xatlan, nema xaʼakgstitum, chu nema xla tlan akxilha» (Rom. 12:2). Akxni tlakg liwana nalakgapasaw Dios tlakg ni tuwa katimakgkatsiw nakalitachuwinanaw amakgapitsin. w21.05 17, 18:14-16

¿Chu komo wi tiku limakgalhtawakgeyaw Biblia, pero ni staka xtakanajla maski lu liskujaw chu xaʼawatiya max natalakaskin namakgxtakgaw? ¿Chu komo nipara chatum makgtayanitaw natamunu? ¿Nalakpuwanaw pi akinin linaw kuenta chu pi Jehová ni sikulunatlawama kintaskujutkan? Tuku Jehová tlakg xlakaskinka akxilha wa la tayaniyaw chu la liskujaw. Jehová akxilha pi tlan kinkakitaxtuniman komo lu liskujaw chu limasiyayaw tapaxkit akxni chuna tlawayaw, maski latamanin nakgaxmatkgo o ni. Pablo tsokgli: «Dios xaʼakgstitum chu xla nikxni katipatsankgalh mintaskujutkan chu tapaxkit nema limasiyanitit xtukuwani; uma chuna limasiyapatit xlakata kamakgtayapatit xasantos natalan asta la uku» (Heb. 6:10). Jehová ni patsankga tapaxkit nema limasiyayaw chu la palha skujaw, asta maski kintaskujutkan nitlan kitaxtuma. Wa xlakata, na tlan nakinkawanikanan tuku Pablo wa ktexto xala uku. w21.10 25:4-6

Jesús kalimasiyanilh tapaxkit chu tlan kalikatsinilh kstalaninanin. Xkatsi pi ni putum tlan xtlawakgo chu ni lakxtum la xtatekgskgo, wa xlakata ni lakxtum tuku tlan xlakgatayakgolh chu ni lakxtum la kskujnanikgolh Dios. Pero Jesús lanka xtapalh xʼakxilha tuku xtlawakgo xliputum xnakujkan xchatunukan. Kparábola xla talentos lichuwinalh chatum malana tiku wi tuku kalakgayawalh kskujnin «chuna la xkatsi pi tlan xliskujkgolh». Xlikana pi chatiy kskujnin tiku makgantaxtikgolh xtaskujutkan, chatum tlakg tlajalh nixawa achatum. Pero malana xchatiykan kawanilh: «¡Lu kimakgapaxuwaya, xatlan skujni chu xatalipaw!» (Mat. 25:14-23). Jesús kinkalimasiyaniyan tapaxkit chu tlan kinkalikatsiniyan. Katsi pi ni putum tlan tlawayaw chu ni lakxtum la tatekgsaw, makgapaxuwa akxni tlawayaw tuku matlaniyaw. Talakaskin nakalikatsiniyaw amakgapitsin chuna la Jesús. w21.07 23:12-14

Mapakgsina David ni putum kilhtamaku limasiyalh talakgalhaman. Akxni Nabal, nitlan likatsinilh chu ni kamaxkilh liwat xla chu ksoldados, David lu sitsilh chu wa pi xʼama makgni Nabal chu putum lakchixkuwin xalak xchik. Xlakata Abigaíl, xpuskat Nabal, tlan likatsilh, David ni makgnilh Nabal chu tiku xalak xchik (1 Sam. 25:9-22, 32-35). Akxilhaw pi akxni David makgatlajalh xtasitsi, wa pi Nabal chu putum tiku xalak xchik xkalakgchan nanikgo. Chu alistalh David wa pi chixku tiku Natán lichuwinalh kxliʼakxilhtit xlinit xwanit xlakata tuku xtlawanit. Uma max kinkamalakpuwaniyan: ¿tuku xlakata tiku ankgalhin tlan xlikatsi, nitlan tuku kalakpuwanilh amakgapitsin? Kalilakpuwaw tuku xtitaxtuma David. Xlin akgtum lanka takuka xlakata xtlawanit lanka talakgalhin. Komo lismaniyaw malakatsaliyaw tuku kalakpuwaniyaw amakgapitsin limasiyayaw pi nitlan wi kintakanajlakan. w21.10 12:17, 18; 13:20

Texto xala uku kinkamasiyaniyan pi tlan nastalaniyaw xliʼakxilhtit Jehová, tiku xasanto. Maski makglakgalhinanin akinin, tlan xasantos nawanaw. Apóstol Pedro makglhuwa tlawalh tuku nitlan, pero xliʼakxilhtit kinkamasiyaniyan pi tlan xasantos nawanaw. Lhuwa latamanin lakpuwankgo pi tiku xasanto nikxni lakalitsin, ankgalhin lipuwama chu maklakaskin lhakgat nema limasiya pi makgtapakgsi kʼakgtum takanajla. Pero uma nichuna. Biblia wan pi Jehová, tiku santo, «xapaxuwana Dios» (1 Tim. 1:11). Chu tiku kakninanikgo na paxuwakgo (Sal. 144:15). Jesús wa pi nitlan tuku xtlawamakgolh lakgtsokgkinanin tiku laklhman klhakganankgo chu xtlawakgo tuku tlan kaj xlakata amakgapitsin xkaʼakxilhkgolh (Mat. 6:1; Mar. 12:38). Kstalaninanin Cristo katsiyaw tuku kilhchanima santo nalitaxtukan. Chu xapaxkina kiDioskan nikxni kintikaskinin natlawayaw tuku nila katitlawaw. w21.12 2:1, 3

Pulaktum tlakg xalanka tamaskiwin nema kinkamaxkinitan Dios, wa chuna la kakninaniyaw. Akxni kgalhakgaxmataw xlimapakgsin limasiyayaw pi paxkiyaw (1 Juan 5:3). Pulaktum limapakgsin wa tuku wa Jesús, pi nakamakgtayayaw latamanin natamunukgo chu kstalaninanin nalitaxtukgo (Mat. 28:19). Jesús na kinkalimapakgsin nalapaxkiyaw kinchatunukan (Juan 13:35). Tiku kgalhakgaxmatkgo, Jehová nakamakgamakglhtinan xlakata namakgtapakgsikgo kxfamilia (Sal. 15:1, 2). Tayat nema tlakg litalakgapasa Jehová wa tapaxkit (1 Juan 4:8). Akxni nina xlakgapasaw xla kinkapaxkin (1 Juan 4:9, 10). Stalaniyaw xliʼakxilhtit akxni kapaxkiyaw amakgapitsin (Efes. 5:1). Pulaktum la tlan nalimasiyayaw pi kapaxkiyaw latamanin wa akxni kamakgtayayaw nalakgapaskgo Jehová (Mat. 9:36-38). Chuna kamakgtayayaw namakgtapakgsikgo kxfamilia Dios. w21.08 5, 6:13, 14

Xlakata Jesús lu paxki Jehová makgpuwantinilh wi tuku natlawa xpalakata chu kimpalakatakan (Juan 14:31). Chuna la Jesús lilh xlatamat kKatiyatni limasiyalh tapaxkit chu talakgalhaman, chu kalimasiyanilh uma tayat tiku ni xʼakxilhputunkgo. Limasiyalh uma tapaxkit akxni kalitachuwinalh latamanin xTamapakgsin Dios (Luc. 4:43, 44). Na limasiyalh pi lu xpaxki Dios chu xkapaxki latamanin akxni mastalh talakaskin pi namakgapatinankan chu namakgnikan. Chuna kinkamaxkin takgalhkgalhin xlakata nalatamayaw putum kilhtamaku. Xlakata paxkiyaw Jehová, tamakamastaniw chu tamunuw. Wa xlakata, chuna la Jesús, nalimasiyayaw pi paxkiyaw Jehová chuna la kalikatsiniyaw latamanin. Apóstol Juan tsokgli: «Tiku ni paxki xtala, tiku akxilha, nila paxki Dios, tiku nila akxilha» (1 Juan 4:20). w22.03 10:8, 9

Maski lakgatiyaw limaxtuniyaw kilhtamaku Jehová, lakgachunin makgkatsiyaw pi uma lu tuwa. Lhuwa taskujut kgalhiyaw chu uma tlawa pi ni nalimaxtuniyaw kilhtamaku tuku xla kintakanajlakan. Taskujut, familia chu atanu talakgatay max natlawa pi ni katikgalhiw kilhtamaku xlakata natlawayaw oración, nakgalhtawakgayaw o nalilakpuwanaw. Wi atanu tuku kuenta kilitlawatkan. Max tlawamaw tuku ni tasiya pi nitlan, pero max ni kinkamaxkiyan talakaskin nalimaxtuniyaw kilhtamaku Jehová. Akgtum liʼakxilhtit, kimputumkan lakgatiyaw jaxaw, pero komo ni kuenta natlawayaw, uma natlawa pi nialh katikgalhiw kilhtamaku xlakata kintakanajlakan. Kililakapastakatkan pi jaxkan ni wa tuku tlakg xlakaskinka (Prov. 25:27; 1 Tim. 4:8). w22.01 26:2, 3

Akxni Jehová kalimapakgsilh israelitas pi xkapaxkikgolh xtalatamankan, ni xkilhchanima pi kajwatiya xkapaxkikgolh xtachikikan, o tiku watiya xcolorkan xkgalhikgo. Na kawanilh pi xkapaxkikgolh tiku xalak atanu kachikin xwankgonit. Levítico 19:33, 34 liwana lichuwinan uma. Xliʼakxilhtitkan xwanit «tiku xalak atanu kachikin la chatum israelita». Akgtum liʼakxilhtit, xlimastatkan xwanit talakaskin pi tiku xalak atanu kachikin chu tiku lakglimaxkgenin xwankgonit ksakikgolh tuku xkaʼakgataxtuni kxpukuxtukan (Lev. 19:9, 10). Akinin na kilimakgantaxtitkan uma tastakyaw, nakapaxkiyaw tiku ni kintachikikan (Luc. 10:30-37). ¿La natlawayaw? Lhuwa lamakgo tiku xalak alakatanu kachikinin, chu max makgapitsi lakatsu wilakgolh niku akinin wilaw. Tlan kakalikatsiniw chu nakamaxkiyaw kakni. w21.12 12:16

Komo lu naputsayaw xtapulalit Jehová tlakg nakanajlayaw pi xla nakinkamakgtayayan kkilhtamaku nema aku mima. Akgtum liʼakxilhtit, talakaskin nakgalhiyaw takanajla chu nalipawanaw Jehová akxni naskinaw permiso kkintaskujutkan xlakata naʼanaw klanka tamakxtumit, o nawanaw pi ni lhuwa kilhtamaku katiskujwi xlakata tlan naʼanaw ktamakxtumit chu tlakg nalichuwinanaw Dios. Kalilakpuwaw pi ni kinkamaxkikanan permiso chu makgatsankgayaw kintaskujutkan. ¿Lipawanaw pi Jehová ni kintikamakgxtakgni chu nakinkamaxkiyan tuku namaklakaskinaw? (Heb. 13:5). Lhuwa tiku skujnimakgo Jehová putum kilhtamaku tlan nawankgo la kamakgtayanit akxni tlakg xmaklakaskinkgo. Jehová nikxni makgxtakgnan. Xlakata Jehová kinkatawilan, ni kilipekuanitkan kilhtamaku nema aku mima. Komo wa pulana nawiliyaw kkilatamatkan, xla nikxni kintikamakgxtakgni. w22.01 7:16, 17

Akxni tamakxtukan kcongregación tiku lu tlan talalinaw, max nalitasiya komo kalipawanaw lakgkgolotsin o ni. Max nalilakpuwanaw komo xlikana kuenta tlawakgolh putum tuku lalh o ni lakputsanankgolh chuna la Jehová xtlawalh. ¿Tuku nakinkamakgtayayan naʼakxilhaw tuku laksakkgo chuna la xlilat? Kililakapastakatkan pi Jehová lakkaxwilinit natamakxtukan kcongregación tiku lakgalhinanit xlakata tlan nakitaxtuni congregación chu tiku tlawanit talakgalhin. Komo xmastaka talakaskin pi tiku tlawanit talakgalhin chuntiya xmakgtapakgsilh kcongregación, max xkamatlawilh talakgalhin amakgapitsin (Gál. 5:9). Nachuna, max ni katikatsilh pi lu lanka talakgalhin tlawanit chu xlitalakgpalit xlakata tlan natalalimpara Jehová (Ecl. 8:11). Liwana kakatsiw pi akxni lakgkgolotsin laksakkgo komo chatum lataman natamakxtukan kcongregación o ni, lu kuenta tlawakgo tuku nalaksakkgo. w22.02 5:13, 14

Lu xlakaskinka nalimasiyakan takgalhkgalhin chu tapaxkit akxni tiku stakyawakan xapulana lakgmakgan tastakyaw o ni tunkun makgantaxti. Lakgkgolotsin ni xlisitsitkan komo chuna nala. Kgolotsin tlan naskini Jehová kxʼoraciones pi kamakgtayalh tiku stakyawamaka naʼakxilha tuku xlakata maklakaskin tastakyaw chu nalilatama. Tiku stakyawamaka max namaklakaskin kilhtamaku xlakata nalilakpuwan tuku wanika. Komo kgolotsin kgalhkgalhinan chu limasiya tapaxkit, tiku stakyawaka wa nalilakpuwan tuku wanika chu ni wa la wanika. Xlikana, tastakyaw ankgalhin xlitakilhtiyat kxTachuwin Dios. Kalakapastakwi pi ankgalhin mastaputunaw tastakyaw nema namakgtayanan chu namakgapaxuwa naku (Prov. 27:9). w22.02 18, 19:17, 19

Akxni skiniyaw Jehová litliwakga xlakata natayaniyaw akgtum taʼakglhuwit o namakgatlajayaw tuku nitlan tlawaputunaw, max namakgkatsiyaw pi ni tunkun kinkakgalhtiyan. ¿Tuku xlakata Jehová ni tunkun kinkakgalhtiyan? Oraciones nema tlawayaw limasiyani pi kanajlaniyaw (Heb. 11:6). Nachuna, lu katsiputun komo xlikana lilatamaputunaw tuku kinkaskiniyan (1 Juan 3:22). Komo makgatlajaputunaw nixatlan talismanin, max natalakaskin nakgalhkgalhinanaw chu naliskujaw xlakata namakgantaxtiyaw tuku skinaw kkioracioneskan. Jesús wa pi Dios max ni tunkun xʼama kgalhti makgapitsi kioracioneskan, xla wa: «Chuntiya kaskintit, chu nakamaxkikanatit; chuntiya kaputsatit chu natekgsatit; chuntiya kalakgatlakgtit malakcha chu nakamalakkinikanatit; xlakata putum tiku skin maxkikan, chu tiku putsa tekgsa, chu tiku lakgatlakga malakcha namalakkinikan» (Mat. 7:7, 8). w21.08 8:1; 10:9, 10

Xlakata namatliwakglhaw kintakanajlakan, chuntiya kilikgalhtawakgatkan xTachuwin Dios (Jos. 1:8). Kalilakpuwaw tuku Biblia xlichuwinanit pi xʼama la chu kgantaxtukgolh, chu nachuna tiku tsokgwilikgolh Biblia watiya tuku lichuwinankgolh. Uma tlakg kinkamakanajliyan pi chatum xaskgalala chu xapaxkina Malakatsukina matsokgninalh Biblia (2 Tim. 3:14; 2 Ped. 1:21). Akxni nalikgalhtawakgayaw Biblia, kaʼakxilhwi pi xtastakyaw lu makgtayanan. Akgtum liʼakxilhtit, lata makgasa lichuwinalh pi paxkikan tumin lu nitlan kitaxtu chu limin «tipalhuwa takatsanajwat» (1 Tim. 6:9, 10; Prov. 28:20; Mat. 6:24). Xlikana pi uma lu tlan tastakyaw. ¿Lakapastakaw atanu tastakyaw nema kinkamakgtayanitan? Akxni tlakg lhuwa xtapalh liʼakxilhaw xtastakyaw Biblia tlakg lipawanaw xapaxkina kiMalakatsukinakan (Sant. 1:5). Chu chuna tlakg paxuwayaw (Is. 48:17, 18). w21.08 17, 18:12, 13

Komo wix lipinata kata, liwana kakatsi pi Jehová lakapastaka putum tuku tlawanita makgasa. Xatapaxuwan lichuwinanita xatlan tamakatsinin. Tayaninita taputsan, makgapitsi lu nitlan mamakgkatsininitan, kgalhmakgtayanita xtastakyaw Biblia, makgantaxtinita lu xlakaskinka talakgatay chu kamasiyaninita amakgapitsin. Xlakata xkachikin Dios lhuwa tuku lakgpalinit, wix na lu liskujnita natlawaya tuku talakaskin. Na kamakgtayanita chu kamakgpuwantininita tiku skujnanimakgo Dios xliputum kilhtamaku. Jehová lu paxkiyan xlakata ni makgxtakga, chu malaknu pi «ni katikamakgxtakgli tiku ni makgxtakgkgo» (Sal. 37:28). Na waniyan: «Asta akxni naʼaktsasana, akit chuntiya nakmakgtayayan» (Is. 46:4). Ni kalakpuwanti pi xlakata lipinata kata nialh xlakaskinka litaxtuya kxkachikin Jehová. ¡Xlakaskinka litaxtuya! w21.09 3:4

Jehová limasiya talakgalhaman xlakata xliskgalala nema ni anan xtachuna. Biblia wan pi «liskgalala nema minacha kʼakgapun» lu lakgalhamaninan chu matlawinan laktlan tatlaw (Sant. 3:17). Chuna la chatum xapaxkina tlat, Jehová katsi pi xtalakgalhaman kamakgtaya xkamanan (Is. 49:15). Uma kamaxki takgalhkgalhin maski makglakgalhinanin. Xlakata lu skgalala, ankgalhin limasiya talakgalhaman akxni chuna lakgchan. Pero tlawa chuna la xlilat. Xlakata lu skgalala, nikxni masta talakaskin ankgalhin natlawakan tuku nitlan. Kalilakpuwaw pi chatum kskujni Dios laksaka nalin xalimaxana latamat. ¿Tuku tlan xtlawaka? Apóstol Pablo tsokgwililh: «Nialh natalalipinatit» (1 Cor. 5:11). Tiku ni makgxtakgkgo xtalakgalhinkan katamakxtukan kcongregación. Chuna xlitatlawat xlakata nakakuentajtlawakan natalan tiku ni makgxtakgkgo Dios chu nalimasiyakan pi Jehová xasanto. w21.10 9, 10:7, 8

Kakninaniyaw Jehová akxni limakgtayananaw kintuminkan xlakata natatlawa taskujut xla Tamapakgsin. Israelitas xlimakamaxkitkan xwanit Jehová akgtum tamaskiwin akxni xʼankgo kfiestas (Deut. 16:16). Tlan xmakamastakgo tuku xmatlanikgo. Chuna xlimasiyakgo pi xpaxtikatsinikgo putum tuku xmakglhtinankgo xlakata xtakanajlakan. Chu akinin, ¿la tlan nalimasiyaniyaw tapaxkit chu tapaxtikatsinit Jehová? Pulaktum wa akxni xatapaxuwan namastayaw kintuminkan kcongregación chu xpalakata taskujut nema tatlawama kxlikalanka katiyatni. Apóstol Pablo chuna wa: «Akgtum tamaskiwin nema mastakan xliputum naku, wa tuku Dios tlakg tlan akxilha, xlakata Dios lakaskin pi chatum lataman namasta tuku matlani, ni wa namastaputun tuku ni kgalhi» (2 Cor. 8:4, 12). Jehová xtapalh akxilha tuku xatapaxuwan mastayaw maski ni lhuwa (Mar. 12:42-44). w22.03 24:13

Lakgkgolotsin nila masputukgo putum taʼakglhuwit. Pero Jehová lakaskin pi katlawakgolh putum tuku matlanikgo xlakata nakamakgpuwantinikgo chu nakuentajtlawakgo xborregos. Xlakata kgalhikgo lhuwa taskujut, ¿la tlan nalimaxtukgo kilhtamaku nakamakgtayakgo natalan? Nastalanikgo xliʼakxilhtit Pablo. Xla ankgalhin xkamatliwakglha natalan. Lakgkgolotsin na tlan chuna natlawakgo chu nakalimasiyanikgo tapaxkit natalan (1 Tes. 2:7). Pablo kawanilh xnatalan pi xla chu Jehová lu xkapaxkikgo (2 Cor. 2:4; Efes. 2:4, 5). Xʼamigos xkaliʼakxilha chu xkalimaxtuni kilhtamaku. Xkalimasiyani pi xkalipawan akxni xkalitachuwinan tuku xlilakgaputsa chu xmaxlajwani (2 Cor. 7:5; 1 Tim. 1:15). Maski tuwa tuku xtitaxtuma, ni wa lu lilakgaputsalh, wata lilakgaputsalh la nakamakgtaya xnatalan. w22.03 28:9, 10