Agosto

Jesús max wa xkakilhchanima soldados romanos tiku xtokgowakakgolh kkgantum kiwi. Ni mastalh talakaskin pi xlisitsilh tuku xtitaxtuma (1 Ped. 2:23). Chuna la Jesús, na lu xlakaskinka natapatinanaw (Col. 3:13). Max makgapitsi latamanin, asta kifamiliajkan, ni kintikaʼakxilhputunkgon xlakata kintakanajlakan chu chuna la linaw kilatamatkan. Max nawankgo taʼakgsanin kimpalakatakan, nakinkamamaxanikgoyan kxlakatinkan amakgapitsin, naxtitkgo kilikgalhtawakgakan o nakinkawiliniputunkgoyan. Pero ni kakasitsiniw, kaskiniw Jehová pi kakamakgtayalh xlakata namin kilhtamaku namakgamakglhtinankgo xaxlikana (Mat. 5:44, 45). Max tuwa namakgkatsiyaw nakatapatiyaw komo kinkatlawanikgonitan tuku lu nitlan. Pero, komo chuntiya nasitsiyaw, max tasitsi nakinkamakgatatatlayan (Sal. 37:8). Akxni tapatinanaw, laksakaw pi ni katimastaw talakaskin pi tuku nitlan kinkatlawanikanan nakinkamakgasitsiyan (Efes. 4:31, 32). w21.04 8, 9:3, 4

Akxni wi tiku tamakxtukan kcongregación, tiku xalak xfamilia lu lilakgaputsakgo. Kalilakpuwaw la limakgkatsilh Jehová akxni lhuwa ángeles, tiku xmakgtapakgsikgo kxfamilia lakgmakgankgolh (Jud. 6). ¿Chu la limakgkatsilh akxni akxilhli pi xkachikin nema lu xpaxki, Israel, makglhuwa lakatakilh? (Sal. 78:41). Komo chatum tiku paxkiya makgxtakga Jehová, kakatsi pi kinTlatkan na katsani. Akgatekgsa pi wix patinampat chu namatliwakglhan, namakgtayayan chuna la namaklakaskina. Akxni chatum kgawasa o chatum tsumat makgxtakga Jehová, lhuwa natlatni lakpuwankgo tuku max tlan xtitlawakgolh xlakata xmakgtayakgolh ni xmakgxtakgli Jehová. Chatum tala wa: «Xaklakpuwan pi akit xaklin kuenta, asta nitlan xakmanixnan». Atanu tala nachuna xtitaxtuma: «Max chatum nitlan tse klitaxtulh. Xakmakgkatsi pi ni lhuwa tuku xaktlawanit xlakata xakmasiyanilh xaxlikana kinkgawasa». w21.09 26:1, 2, 4

Makgapitsi wankgo pi nila masiyayaw tuku xalak Biblia xlakata ni kgalhtawakganitaw kʼakgtum xlakaskinka escuela. Pero xlakan liwana xlilakputsananitkan tuku lanit. Wa uma tuku tlawalh Lucas. Akxni xʼama tsokgwili xʼEvangelio, lakputsananilh putum “chuna la xtitaxtunit lata kxkilhtsukut”. Xlakaskin pi tiku xlikgalhtawakgakgolh xʼEvangelio “xkanajlakgolh pi xlikana” tuku xlichuwinankanit xlakata Jesús (Luc. 1:1-4). Nachuna tlawakgolh judíos xalak Berea. Akxni kgaxmatkgolh tamakatsinin xlakata Jesús, lakputsananikgolh Tatsokgni xaHebreo xlakata xkatsikgolh pi tuku xkawanimaka xlikana xwanit (Hech. 17:11). Xtachuna la uma, talakaskin pi latamanin nalakputsananikgo tuku lanit. Natamalakxtumikgo tuku wankgo xtatayananin Jehová chu tuku wan Biblia. Na tlan nalikgalhtawakgakgo tuku titaxtukgonit xtatayananin Jehová xala uku. Komo liwana nalakputsananikgo, ni wa kuenta katitlawakgolh tuku wankgo amakgapitsin. w21.05 3:7, 8

¿Wi tiku tlan xlikatsiniw kkincongregacionkan? Min kilhtamaku natalan tlakg maklakaskinkgo xkalimaxtuniw kilhtamaku. Akgtum liʼakxilhtit, tiku kgalhikgo xfamiliajkan tiku ni xtatayananin Jehová max tuwa namakgkatsikgo akxni tlawakan paskua o atanu talismanin. Amakgapitsin lu nitlan makgkatsikgo akxni katama akxni nilh tiku xpaxkikgo. Akxni kalimaxtuniyaw kilhtamaku umakgolh natalan, kalimasiyaniyaw pi kalilakgaputsayaw (Filip. 2:20). Lhuwa tuku xtlawalh pi xmakgkatsiw pi kiʼakstukan wilaw. Pero ni kapatsankgaw pi Jehová katsi tuku makgkatsiyaw. Kamaklakaskin kinatalankan xlakata nakinkamakgtayayan (Mat. 12:48-50). Chu akinin, tlan nalimasiyayaw pi paxtikatsiniyaw akxni kamakgtayayaw kinatalankan. Maski namin kilhtamaku namakgkatsiyaw pi lu tuwa tuku titaxtumaw, ni kiʼakstukan wilaw, Jehová kinkatawilan. w21.06 13:18-20

Jesús chuntiya xatapaxuwan lichuwinalh Dios maski makgapitsi latamanin ni kgaxmatniputunkgolh. ¿Tuku xlakata? Jesús xkatsi pi latamanin xmaklakaskinkgo nakgaxmatkgo tuku xaxlikana chu xkamakgtayaputun. Na xkatsi pi makgapitsi tiku xapulana ni xkgaxmatputunkgo, alistalh xʼamakgo kgaxmatkgo. Chuna kitaxtunilh kxfamilia. Akgtutu kata aitat lata xlichuwinama Dios nipara chatum xtala kanajlanilh (Juan 7:5). Pero akxni xlakastakwananita, kstalaninanin litaxtukgolh (Hech. 1:14). Ni katsiyaw tiku namakgamakglhtinan tuku lichuwinanaw. Makgapitsi latamanin tlakg makgapalakgo xlakata nakgaxmatputunkgo xaxlikana. Asta tiku ni kinkakgaxmatniputunkgoyan akxilhkgo xatlan kintayatkan chu pi chuntiya xatapaxuwan lichuwinanaw Dios, chu max alistalh namaxkiputunkgo «kakni Dios». w21.05 18:17, 18

Akxni Jesús xlama kKatiyatni, kawanilh kstalaninanin pi xtlawakgolh pulaktiy xlakaskinka taskujut. Wa pi xlichuwinankgolh xalaktlan tamakatsinin chu kamasiyanilh la natlawakgo (Luc. 8:1). Kawanilh tuku xlitlawatkan xwanit akxni latamanin xmakgamakglhtinankgolh tamakatsinin chu tuku xtlawakgolh akxni ni xkgaxmatputunkgolh (Luc. 9:2-5). Wa asta niku xʼama talichuwinan, xlakata wa pi «natamakatsininan kputum laklanka kachikinin» (Mat. 24:14; Hech. 1:8). Chu kawanilh pi xkamasiyanikgolh latamanin nakgalhakgaxmatkgo putum tuku xla xlimapakgsinanit. Jesús wa pi uma taskujut xʼama tatlawa kkinkilhtamakujkan «asta kxlisputni kakilhtamaku» (Mat. 28:18-20). Chu tuku maʼakxilhnilh Juan, liwana masiyalh pi lakaskin pi putum kstalaninanin kakamakgtayakgolh latamanin nalakgapaskgo Jehová (Apoc. 22:17). w21.07 3:3, 4

Lhuwa latamanin kaxatukawa tuku tlawakgo xlakata nalimasiyakgo pi tlakg xlakaskinka litaxtukgo nixawa amakgapitsin. Max chatum tiku kgalhi akgtum negocio natlawa tuku nitlan xkakitaxtunilh amakgapitsin xlakata lakaskin pi tlakg tlan kakitaxtunilh. Max chatum tiku kgamanan futbol natlawani tuku nitlan achatum kgamana xlakata natlajanan. O max chatum tiku tanuputun kʼuniversidad naʼakgskgawinan akxni natlawa xʼexamen. Kstalaninanin Cristo katsiyaw pi putum uma nitlan, xlakata «xtatlaw xamakglakgalhina makni» (Gál. 5:19-21). Max chuna xkaʼakgspulalh makgapitsi natalan. Lu xlakaskinka nalakapastakaw pi akxni latlajaputunkan ni makgtayanan makxtum natawila congregación. Wa xlakata kakalilakpuwaw xliʼakxilhtitkan makgapitsi xlakskujnin Jehová tiku latamakgolh makgasa chu ni limasiyaputunkgolh uma tayat. w21.07 14:1, 2

Tapaxkit nema ni makgxtakgnan kinkamaʼakgpuwantiniyan nakamakgtayayaw tiku taxlajwanikgonit. Anankgo lhuwa natalan tiku tlan likatsikgo. Xatapaxuwan kamakgtayakgo tiku lu lakgaputsamakgo o taxlajwanikgonit. Kapaxkikgo xnatalankan chu kamakgtayakgo (Prov. 12:25, nota; 24:10). Chuna stalanikgo xtastakyaw apóstol Pablo: «Kakawanitit tachuwin nema tlan nakalimamakgkatsiniyatit amakgolh tiku taxlajwanikgonit, kakamakgtayatit tiku ni lakgtliwakgan, ni lakapala kakasitsinitit putum latamanin» (1 Tes. 5:14). Tlan namakgtayayaw chatum tala tiku taxlajwaninit komo nakgaxmatniyaw chu nawaniyaw pi paxkiyaw. Jehová akxilha tuku tlawayaw xlakata namakgtayayaw chatum kskujni tiku chuna la tantum borrego litaxtu. Proverbios 19:17 wan: «Tiku makgtaya tiku nitu kgalhi, masakwani Jehová, chu xla nalakgxokgoni». w21.11 10, 11:11, 12

¿Tuku natlawayaw la uku nema nakinkamakgtayayan kkilhtamaku nema aku mima? Kalipaxuwaw tuku kgalhiyaw chu pi xʼamigos Jehová litaxtuyaw. Akxni tlakg nalakgapasaw kiDioskan, liwana nakatsiyaw pi nakinkakuentajtlawayan akxni Gog xalak Magog nakinkaʼakgchipaputunkgoyan. Texto xala uku masiya tuku xlakata David xlipawan pi Jehová xʼama makgtaya. Ankgalhin wa xlitatsekga Dios chu xla nikxni makgxtakgli. Akxni tlakg kgawasaku xwanit, David talatlawalh Goliat chu wanilh: «Jehová namakamastayan kkimakan» (1 Sam. 17:46). Akxni kskujnanima mapakgsina Saúl, xla xmakgniputun, pero Jehová «xtawi David» (1 Sam. 18:12). Xlakata David xʼakxilhnit la xmakgtayanit Jehová makgasa, xkatsi pi chuntiya xʼama makgtaya. w22.01 6:14, 15

Akxni Jehová wi tuku tlawa, limaxtu kilhtamaku nema talakaskin chu limasiya pi xakgalhkgalhina. Chuna tlawa xlakata namalanki xtukuwani chu tlan nakakitaxtuni amakgapitsin. Akgtum liʼakxilhtit, akxni Jehová tlawalh Katiyatni xlakata xʼanalh latamat, Biblia wan pi «laklhkawililh», lakkaxwililh “niku namatuti” chu «wililh xapulana tuku tliwakglh litawi» (Job 38:5, 6). Asta limaxtulh kilhtamaku xlakata xlilakpuwa tuku xtlawanit (Gén. 1:10, 12). Ángeles lu xpaxuwakgo akxni xʼakxilhkgo Jehová chuna la xmalakatsukinama, «pixlanka malankikgolh» Dios. Uma kinkamasiyaniyan pi Jehová limaklakaskilh akglhuwa mil kata xlakata namalakatsuki Katiyatni, staku chu tuku staknankgo, chu akxni akxilhli putum tuku xmalakatsukinit, wa pi «lu tlan xwanit» (Gén. 1:31). w21.08 9:6, 7

Anta kxparábola, Jesús lichuwinalh chatum chixku tiku xʼama paxialhnan. Akxni nina xʼan, katasanilh xlakskujnin chu kamaxkilh talentos chatunu chatunu xlakata tlan xliskujkgolh. Chatum kskujni maxkilh akgkitsis talentos, atanu maxkilh akgtiy chu xaʼawatiya maxkilh akgtum, kamaxkilh chuna la tlan xliskujkgolh. Xapulana chatiy xlakskujnin lu liskujkgolh chu malhuwikgolh xtumin xmalanakan. Pero xlikgalhtutu skujni ni maskujulh talento nema xmaxkikanit, wa xlakata malana nialh maskujulh. Xapulana skujni chu xlichatiy skujni xlakaskinka liʼakxilhkgolh tuku kalakgayawaka chu palha skujnikgolh xmalanakan. Wa xlakata, makgtiy malhuwikgolh tuku xkamaxkikanit. Uma lu tlan kitaxtulh, malana lu tlan limakgkatsilh tuku tlawakgolh chu tlakg kamaxkipa taskujut. w21.08 21:7; 22:9, 10

Jehová limasiyanit takgalhkgalhin xlakata ni lakaskin pi wi tiku namalakgsputukan (2 Ped. 3:9). Kamaxkinit talakaskin putum latamanin namakgxtakgkgo tuku nitlan. Pero ni putum kilhtamaku katikgalhkgalhinalh. Tiku ni tatayakgo xTamapakgsin Dios nakakitaxtuni chuna la faraón, tiku Jehová wanilh: «Tlan xaktapakgastonkgli xlakata xaklimalakgaxokgen wix chu minkachikin akgtum tajatat nema lakgnikan, chu xlakgsputti kkatiyatni. Pero kmaxkinitan talakaskin nalatapaya xlakata nakmasiyaniyan kilitliwakga chu xlakata kintukuwani natalichuwinan kxlikalanka katiyatni» (Éx. 9:15, 16). Putum kachikinin nakatsikgo pi kajwatiya Jehová xaxlikana Dios (Ezeq. 38:23). Tuku lichuwinan texto xala uku kilhchanima pi putum kilhtamaku nakamalakgsputukan tiku, chuna la faraón, ni makgamakglhtinamputunkgo Jehová la xmapakgsinakan. w21.09 18, 19:17, 18

¿Lilipuwana xlakata tiku lu xpaxkiya tamakxtuka kcongregación? Chu ¿tuku tlan natlawaya komo wi tiku nawaniyan tuku nitlan namamakgkatsiniyan? Ni kakgalhkgalhiw pi ankgalhin nakinkawanikanan laktlan tachuwin (Sant. 3:2). Kimputumkan makglakgalhinanin, wa xlakata makgapitsi ni katsikgo tuku wakgo nema nakinkalimakgalipuwanan. Kalakapastakti xtastakyaw apóstol Pablo: «Chuntiya kalatatayanitit chu lu kalatapatiputuntit maski wi tuku nakalimakgasitsikanatit» (Col. 3:13). Chuntiya kakamakgtayaw xfamiliajkan tiku katamakxtukanit kcongregación. Maklakaskinkgo kakapaxkiw chu kakamatliwakglhwi (Heb. 10:24, 25). Lakgachunin, xfamiliajkan tiku katamakxtukanit kcongregación akxilhkgonit pi makgapitsi natalan nialh katachuwinankgo, la komo xlakan na katamakxtukanit. ¡Nikxni chuna katlawaw! Kamanan tiku xnatlatnikan katamakxtukanit kcongregación tlakg maklakaskinkgo kakamatliwakglhwi chu kakawaniw laktlan tachuwin. w21.09 29:13, 14; 30:16

Akxni tiku kgawasaku tachuwinan tiku lina kata, xchatiykan lamaʼakgpuwantini (Rom. 1:12). Tiku nina lin kata liwana nakatsi pi Jehová kakuentajtlawa xlakskujnin, chu tiku lina kata namakgkatsi pi paxkikan chu nalipaxuwa akxni nalichuwinan la makgtayanit Jehová. Chuna la titaxtutilha kilhtamaku Jehová tlakg stlan kaʼakxilha xlakskujnin tiku ni makgxtakgkgo (1 Tes. 1:2, 3). ¿Tuku xlakata? Xlakata mastakgonit talakaskin pi xʼespíritu santo Dios nakamakgtaya nakgalhikgo tlan tayat. Akxni tlakg nakalakgapasaw kinatalankan tiku linkgoya kata chu lhuwa tuku nakatsiniyaw xpalakatakan, lu xtapalh nakaliʼakxilhaw. Congregación ni kajwatiya tatliwakglha akxni lakgkgawasan lu xtapalh kaliʼakxilhkgo tiku linkgoya kata, wata na tatliwakglha akxni tiku linkgoya kata lu xtapalh kaliʼakxilhkgo tiku lakgkgawasanku. w21.09 7:15-18

Kiliskujatkan xlakata nalakgalhamananaw chuna la tlawa kiDioskan (Efes. 2:4). Talakgalhaman ni kajwatiya tuku makgkatsikan; kilhchanima wi tuku tlawakan xpalakata amakgapitsin. Kimputumkan tlan nalilakpuwanaw tiku tlan nakamakgtayayaw kkifamiliajkan, kcongregación chu niku lichuwinanaw Dios. Max pulaklhuwa natekgsaw chuna la nakalimasiyaniyaw talakgalhaman. ¿Lakgapasaw tiku maklakaskin takgoxamixat? ¿Wi tiku tlan naliniyaw tuku nawa o tlan atanu la namakgtayayaw? ¿Tlan nakaliniyaw amakgapitsin takgalhkgalhin nema masta laktlan tamakatsinin? (Job 29:12, 13; Rom. 10:14, 15; Sant. 1:27). Komo kuenta natlawayaw, naʼakxilhaw pi niku wilaw tlan pulaklhuwa la nalimasiyayaw talakgalhaman. Komo nalimasiyayaw uma tayat, namakgapaxuwayaw kinTlatkan xalak akgapun, xla chatum Dios tiku «lu lakgalhamanan». w21.10 13:20-22

Anta kSalmo 23, David lichuwinan tuku tlakg xlakaskinka: lhuwa tasikulunalin nema lipaxuwa xlakata Jehová wa xmapuchwayanina. Jehová pulalin «ktiji niku xaʼakgstitum» chu ni makgxtakga akxni titaxtu tuku tlan chu tuku nitlan. David katsi pi maski lama niku wi «xaxtakni sakgat», na nakgalhi taʼakglhuwit. Max min kilhtamaku taxlajwani xtachuna la “lama niku kxakapukswa” chu wan pi nakgalhi xtalamakgasitsin. Pero xlakata Jehová wa xMapuchwayanina, David wan: «Ni ktipekuanilh tuku nixatlan». Wa xlakata, ¿tuku wamputun pi David ni tsankganilh «tuku tlan»? Pi putum xkgalhi tuku xmaklakaskin kxtakanajla. Tuku lhuwa xtapalh ni wa xlimini tapaxuwan. Tlan xlimakgkatsi tuku Jehová xmaxki. Tlakg xlakaskinka xwanit namakglhtinan xtasikulunalin chu xtamakgtay Dios. Tuku wa David kinkamasiyaniyan pi lu xlakaskinka naʼakxilhaw chuna la xlilat tuku lhuwa xtapalh. w22.01 3, 4:5-7

Lhuwa xlakskujnin Jehová kalitachuwinankgonit Dios tiku ni kakgaxmatnikgonit. Akgtum liʼakxilhtit, Noé akglhuwa kata lichuwinalh tuku xa’akgstitum (2 Ped. 2:5). Chu xla xkgalhkgalhi pi latamanin xkgaxmatnikgolh, pero Jehová ni wanilh pi chuna xʼama la. Wata akxni wanilh la xlitlawat xwanit arca, limapakgsilh: «Militanut kʼarca, wix chu minkamanan chu mimpuskat chu xlakpuskatin minkamanan» (Gén. 6:18). Chu, akxni wanilh la xlilanka xʼama wan arca, Noé max katsilh pi kaj ni lhuwa xʼamakgo kgaxmatnikgo (Gén. 6:15). Chu chuna kitaxtulh. Nipara chatum lataman kgaxmatnilh xtamakatsinin (Gén. 7:7). ¿Lakpuwa Jehová pi nitlan taskujut xtlawama Noé? Nichuna. Jehová akxilhli pi taskujut nema xtlawama Noé tlan kitaxtunilh xlakata liwana tlawalh tuku xlimapakgsinit natlawa (Gén. 6:22). w21.10 26:10, 11

¿Tuku makgkatsilh Rut akxni kgaxmatli tuku wa Noemí? Xtlawanit putum tuku xmatlani xlakata xmakgtayalh; xtatasanit, xmakgoxamixinit chu akglhuwa kilhtamaku akxtum xtatlawanit. Maski chuna, Noemí wa: «Jehová tlawanit pi nialhtu naklimin». Maski Rut ni makgxtakgli, xtasiya pi Noemí ni xlakaskinka xʼakxilha xtamakgtay. Uma max lu makgalipuwa Rut, pero xla chuntiya tatamakgxtakgli Noemí (Rut 1:3-18). Max chatum tala tiku taxlajwaninit, nakinkawaniyan tuku nitlan nakinkamamakgkatsiniyan maski makgtayamaw. Pero ni mastayaw talakaskin uma tunkun nakinkamakgalipuwanan. Ni makgxtakgaw chu skiniyaw Jehová pi kakinkamakgtayan nakatsiyaw la tlan namakgoxamixiyaw (Prov. 17:17). Max chatum tala tiku maklakaskin tamakgtay ni katilakaskilh namakgtayayaw. Maski chuna, tapaxkit nema ni makgxtakgnan natlawa pi ni namakgxtakgputunaw (Gál. 6:2). w21.11 11:17-19

Anta kBiblia, tachuwin xasanto chu xaskulunku litaxtukan kilhchanima ni xataxkajwani nalipina milatamat chu tuku xla mintakanajla. Uma tachuwin na kilhchani pi chatum lataman skujnani Dios. Uma wamputun pi xasanto nawanaw komo nitu nalitaxkajwaniyaw kkilatamatkan, komo kakninaniyaw Jehová chuna la xla lakaskin chu komo lu tlan natalalinaw. Lu kaks kinkamalakawaniyan pi maski makglakgalhinanin akinin, tlan xʼamigos Jehová nalitaxtuyaw, tiku lu xaskulunku. Jehová xaskulunku chu nitu litaxkajwani. Wa uma tuku wankgolh makgapitsi serafines, ángeles tiku skujmakgo lakatsu kxputawilh Jehová. Wankgolh: «Santo, santo, santo Jehová tiku pulalin lhuwa soldados» (Is. 6:3). Chu xlakata ángeles tlan natalalinkgo Dios, na xasanto xliwanatkan, chu chuna litaxtukgo. w21.12 3:4, 5

Lakgkgawasan lilakpuwankgo tuku natlawakgo kxlatamatkan. Max xmakgalhtawakgenakan chu xtalilakgapasnikan tiku ni xtatayananin Jehová kawanikgo pi kakgalhtawakgakgolh chu tlakg xlakaskinka kalitaxtukgolh kkakilhtamaku. Komo chuna natlawakgo, max nalimaxtunikgo lhuwa kilhtamaku. Pero xnatlatnikan chu xnatalankan xalak congregación kamakgpuwantinikgo naskujnanikgo Jehová. ¿Tuku nakamakgtaya lakgkgawasan tiku paxkikgo Jehová tlan tuku nalaksakkgo? Tlan nalikgalhtawakgakgo Efesios 5:15-17 chu nalilakpuwankgo. Alistalh tlan nalakpuwankgo: «¿Tuku lakaskin Jehová kimpalakata? ¿Tuku tlakg namakgapaxuwa? ¿Tuku nakimakgtaya tlakg tlan nakmaklakaskin kinkilhtamaku?». Kalakapastakwi pi «lamaw kxakatuwa kakilhtamaku» nema akgchipanit Satanás chu nialh makgas nalakgsputa. w22.01 27:5

¿Tuku kilhtamaku Santiago xtamakgalhtawakgen Jesús litaxtulh? Akxni Jesús xmalakastakwanikanita, «tasiyanilh Santiago chu alistalh putum apóstoles» (1 Cor. 15:7). Uma lakgpalilh xlatamat Santiago. Xkatawi xtamakgalhtawakgen Jesús akxni xtamakxtumikgonit kJerusalén, niku xkgalhkgalhimakgo pi xkamaxkika espíritu santo (Hech. 1:13, 14). Kgalhilh talakgalhaman nakatatapakgsi lakgkgolotsin tiku xpulalinankgo kxapulana siglo (Hech. 15:6, 13-22; Gál. 2:9). Chu kkata 62, Dios matsokgnilh maktum carta nema kamalakgachanilh xatalaksakni natalan. Uma carta kinkamakgtayayan la uku, maski naʼanaw kʼakgapun o nalatamayaw kKatiyatni (Sant. 1:1). Josefo, chatum judío tiku latamalh kxapulana siglo wan pi sacerdote tiku tlakg xkgalhi limapakgsin, Anán, mamakgnininalh Santiago. Pero xla nikxni makgxtakgli Dios maski makgnika. w22.01 9:3, 5

Pulaktum tuku katsiniyaw ktexto xala uku wa pi ni kakgalhkgalhiw pi Jehová ni katimastalh talakaskin pi natitaxtuyaw tuku tuwa. Chuna la Jesús, kilikatsitkan tuku natlawayaw xlakata ni namakgatsankgananiyaw asta maski nakinkalimakgnikanan (Mat. 16:24, 25). Dios ni katimastalh talakaskin nakinkatsakgsakanan asta niku nialh katitayaniw (1 Cor. 10:13). Nachuna, max nakinkatlawanikanan tuku ni xlilat (1 Ped. 2:19, 20). Latamanin ni kinkaʼakxilhputunkgoyan xlakata ni makgtapakgsiyaw kkakilhtamaku chu lichuwinanaw xaxlikana (Juan 17:14; 1 Ped. 4:15, 16). Jesús xʼakgatekgsa tuku xlakata Jehová xmastama talakaskin pi xpatinalh. Pero makgapitsi natalan lilakpuwankgo tuku xlakata Jehová masta talakaskin katitaxtukgolh tuku tuwa (Hab. 1:3). Xlakata xla xalakgalhamanina, akgatekgsa pi maklakaskinkgo takgoxamixat chu nichuna lakpuwankgo kaj xlakata katsankgani takanajla (2 Cor. 1:3, 4). w21.04 11:9, 10

Jehová makgamakglhtinan akxni kakninaniyaw la xla lakaskin chu akxni xliputum kinakujkan chuna tlawayaw. Katsiyaw pi kajwatiya Jehová lakgchan nakakninaniyaw, chu akinin kakninaniputunaw. Pulaktum la maxkiyaw kakni wa akxni tlawaniyaw oración. Biblia tamalakxtumi oración incienso nema liwana xlakkaxtlawakan chu xmakamastakan ktabernáculo, chu alistalh na tsukuka makamastakan ktemplo. Uma incienso lu xmakgapaxuwa Dios. Xtachuna la uma, kioracioneskan nema xliputum kinakujkan tlawayaw «lu makgapaxuwa» Dios (Prov. 15:8; Deut. 33:10). Jehová makgapaxuwa akxni waniyaw pi paxkiyaw chu paxtikatsiniyaw. Xla lakaskin pi kalitachuwinaw tuku lakaskinaw chu tuku lilakgaputsayaw. Wa xlakata, akxni nina tlawaniya oración, ¿tlan liwana xlilakpuwanti tuku nawaniya? Chuna namakamaxkiya minTlat xalak akgapun tlakg xatlan «incienso». w22.03 20:2; 21:7

Anta kʼArmagedón ni kintikalakgchan nalaksakaw tiku namakgamakglhtinan xtalakgalhaman Jehová chu tiku ni (Mat. 25:34, 41, 46). ¿Nalipawanaw pi Jehová xaʼakgstitum chuna la lakputsanan o nalakgmakganaw tuku nalaksaka? Liwana tasiya pi kilimatliwakglhatkan chuna la lipawanaw Jehová la uku xlakata tlan nalipawanaw kkilhtamaku nema aku mima. Kalilakpuwaw la namakgkatsiyaw kxasasti kakilhtamaku. Nialh katiʼanalh ni xaxlikana takanajla nipara laklanka stananin tiku kajwatiya lhuwa tumin tlajaputunkgo chu mapakgsinanin tiku kamakgapatinankgo latamanin. Tiku kapaxkiyaw nialh katitatatlakgolh, nialh katikgolonkgolh chu nialh katinikgolh. Satanás chu xdemonios nakalakgachinukan 1,000 kata. Putum tuku nitlan tlawanit nalakgsputa (Apoc. 20:2, 3). ¡Lu napaxuwayaw xlakata lipawanaw Jehová! w22.02 6, 7:16, 17

Jesús xlipula ni nakatakgalhi taʼakglhuwit amakgapitsin chu xkamakgpuwantini xlakkaxtlawakgolh xtaʼakglhuwitkan. Akgtum liʼakxilhtit, kamasiyanilh pi xlilakkaxtlawatkan xwanit taʼakglhuwit nema xtakgalhikgo xtalakan komo xlakaskinkgo pi Jehová xmakgamakglhtinalh xtakakninkan (Mat. 5:23, 24). Chu kawanilh xʼapóstoles pi nialh xlalitalatlawakgolh tiku xapuxku xwanit (Luc. 9:46-48; 22:24-27). Xlakata naʼanan takaksni, ni kajwatiya talakaskin ni namakgtanuyaw ktaʼakglhuwit. Nalipulayaw nakatalakkaxtlawayaw taʼakglhuwit amakgapitsin chu nakamakgpuwantiniyaw nalakkaxtlawakgo xtaʼakglhuwitkan (Filip. 4:2, 3; Sant. 3:17, 18). Tlan nalilakpuwanaw: «¿Tuku klakpuwanit naklimakgxtakga xlakata nakkatalakkaxtlawa taʼakglhuwit amakgapitsin? Komo chatum tala nitlan kimamakgkatsini, ¿chuntiya ksitsini? ¿Klakpuwan pi tiku ktakgalhi taʼakglhuwit wa nalipula naklakkaxtlawayaw taʼakglhuwit? ¿O akit klipula maski xla lin kuenta?». w22.03 10:10, 11

Biblia lichuwinalh pi xkachikin Jehová xatapaxuwan xʼamakgo skujnanikgo chu xʼamakgo stalanikgo xtapulalit xKgawasa (Sal. 110:3). Uma kgantaxtuma la uku. Xlakskujnin Dios xatapaxuwan limaxtukgo lhuwa horas xlakata nalichuwinankgo xtachuwin chu ni matajinankgo. Na kamaxkikgo xnatalankan tuku maklakaskinkgo, tlan kamamakgkatsinikgo chu kamatliwakglhkgo. Chu, lakgkgolotsin chu siervos ministeriales limaxtukgo lhuwa kilhtamaku nalakkaxwilikgo taʼakgchuwin nema matitaxtikgo ktamakxtumit chu kalakgapaxialhnankgo natalan xlakata nakamatliwakglhkgo. ¿Tuku kamakgpuwantini? Tapaxkit nema kgalhinikgo Jehová chu xtalatamankan (Mat. 22:37-39). Jesús pulana wililh tuku xmaklakaskinkgo amakgapitsin, chu kstalaninanin lu liskujaw nachuna natlawayaw (Rom. 15:1-3). Komo chuna natlawayaw, lu tlan nakinkakitaxtuniyan. w22.02 20:1, 2

Anta kʼIsrael, lhuwa latamanin xchananankgo, chu tiku xkataskujkgo amakgapitsin xkaxokgonikan akxni ksputa akgtum kilhtamaku. Komo chatum skujni ni xmakglhtinan xtatlaja akxni ksputa kilhtamaku, ni xkgalhi tumin nema xmaklakaskilh xlakata xkalimawilh xfamilia uma kilhtamaku. Wa xlakata Jehová wa: «Wi tuku maklakaskin chu xtatlaja wa tuku lilatama» (Deut. 24:14, 15; Mat. 20:8). La uku, lhuwa latamanin max makgtum o makgtiy akgatunu papaʼ kaxokgonikan kxtaskujutkan. Pero tastakyaw xla Levítico 19:13 chuntiya lu xlakaskinka. Makgapitsi malananin nichuna kaxokgonikgo xmakgskujnin chuna la xlilat. Katsikgo pi chuntiya nakataskujkgo maski ni lhuwa nakaxokgonikan. Tlan nawanaw pi umakgolh malananin katamakgxtakgnima «xtatlaja chatum skujni». Komo chatum tala kgalhi akgtum negocio chu kgalhi xmakgskujnin, kuenta xlitlawat nakaxokgoni xtaskujutkan. w21.12 10:9, 10

Xlakata Jesús lu xpatinanit, max lu xkgalhputima chu xmaklakaskin wi tiku xmaxkilh chuchut. Xla ni lakpuwa pi komo xwa tuku xmakgkatsima xlimasiyalh pi ni tliwakga xwanit, chu akinin na nichuna kililakpuwanatkan. Max maxananaw nawanaw tuku makgkatsiyaw. Pero, komo namaklakaskinaw tamakgtay, kaskiw tamakgtay. Akgtum liʼakxilhtit, komo linawa kata o tatatlayaw, max natalakaskin naskiniyaw chatum amigo pi kakinkalin kmakuchina o xlakata natamawananaw. Komo taxlajwaninitaw, max natalakaskin naskiniyaw chatum kgolotsin o atanu tala pi kakinkakgaxmatnin o kakinkawanin laktlan tachuwin nema nakinkamakgpuwantiniyan (Prov. 12:25). Kinatalankan kinkapaxkikgoyan chu kinkamakgtayaputunkgoyan (Prov. 17:17). Pero ni katsikgo tuku wi kkintalakapastaknikan, wa xlakata ni katikatsikgolh akxni maklakaskinaw tamakgtay komo ni nakawaniyaw. w21.04 11, 12:11, 12

Lhuwa akinin tuwa makgkatsiyaw natayaniyaw akxni wi tuku talakgpali. Makgapitsi tiku lhuwa kata kskujnanimakgolh Jehová kalakgayawakanit atanu taskujut. Amakgapitsi max makgxtakgkgonit tuku xlakgayakgo maski xlakgatikgo xlakata linkgoya kata. Tuku nakinkamakgtayayan natayaniyaw wa pi naʼakxilhaw tuku lama chuna la akxilha Jehová. Xla lhuwa tuku tlawama chu kgalhiyaw talakgalhaman akxtum nataskujaw (1 Cor. 3:9). Tapaxkit nema kinkakgalhiniyan Jehová ni talakgpali. Wa xlakata, komo wi tuku talakgpali kxkachikin chu nitlan mamakgkatsiniyan, nialh kalilakpuwanti tuku xlakata chuna tlawaka. Kaskini Dios pi kamakgtayan naʼakxilha tuku tlan kitaxtuma chu nialh kalilakpuwanti «xapulana kilhtamaku» (Ecl. 7:10). Xlakaskinka nakgalhiyaw tlan talakapastakni xlakata chuntiya napaxuwayaw chu ni namakgatsankgananiyaw Jehová maski wi tuku natalakgpali. w22.03 17:11, 12

¿Tiku kalimasiyani Jehová xtapaxkit nema ni makgxtakgnan? Biblia lichuwinan pi pulaklhuwa tuku tlan napaxkiyaw, chuna la «taʼakgastakyaw», «takatsin», «vino chu aceite» chu «liskgalala» (Prov. 12:1; 21:17; 29:3). Nila limasiyanikan tapaxkit nema ni makgxtakgnan tuku ni staknan; kajwatiya kalimasiyanikan latamanin. Jehová ni kaxatikawa kalimasiyani xtapaxkit nema makgxtakgnan. Xla kalimasiyani uma tapaxkit tiku lu tlan talalinkgo. KiDioskan ni kamakgxtakga xʼamigos chu wi tuku natlawa xpalakatakan. Jehová kalimasiyaninit tapaxkit putum latamanin. Jesús wanilh Nicodemo: «Dios lu kapaxkilh latamanin xalak kakilhtamaku, wa xlakata mastalh kaj xachastum xKgawasa, xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni» (Juan 3:1, 16; Mat. 5:44, 45). w21.11 2:3; 3:6, 7

Uma kakilhtamaku lu tuwa, chu max kkilhtamaku nema aku mima natitaxtuyaw tuku tlakg tuwa (Mat. 24:21). Lakaskinaw pi nialh xʼanalh putum uma. Namin kilhtamaku akxni nialh katiʼanalh tuku nitlan chu nialh katilakapastakwi (Is. 65:16, 17). Wa xlakata chuntiya kilikatsinitkan la natayaniyaw. Jesús wa tuku xlakata kilitlawatkan: «Xlakata natayaniyatit [...], namakglhtinanatit milatamatkan» (Luc. 21:19). Pulaktum tuku nakinkamakgtayayan natayaniyaw wa nalilakpuwanaw la amakgapitsin tayanikgo. ¿Tiku tlakg xatlan liʼakxilhtit xlakata tayanikan? Jehová. Kalilakpuwaw uma: kakilhtamaku litsama taʼakglhuwit xlakata wa Akgskgawini akgchipanit, Jehová tlan xmalakgsputulh la uku, pero kgalhima kilhtamaku nema xla lakkaxwilinit (Rom. 9:22). Xlakata nina chin uma kilhtamaku, xla chuntiya tayanima. w21.07 8:2-4