Planti Taim Misin i Bruk
TAIM misin i bruk, em i save kamap tupela o planti lain, na ol dispela narapela lain i bosim ol yet long ol samting bilong lotu.
Yia 330: ‘Misin i bruk long lain Grik na lain Latin. Ol i makim Konstantinopel long kamap “nupela Rom” (yia 330), na “olpela Rom” i no stap moa olsem namba wan biktaun em pop i sindaun long en. Dispela samting i as na bihain kros i kamap namel long ol bikpela pris samting bilong Misin Katolik long hap bilong Is, olsem Grik, na bilong Latin long hap bilong Wes, olsem narapela i laik winim narapela.’—The Encyclopedia of Religion.
Yia 330-867: ‘Taim Konstantinopel i kamap namba wan biktaun bilong Pop na i kam inap long taim misin i bruk bikpela tru long 867, planti taim i gat kros samting i kamap na lain bilong misin i no stap wanbel. Insait long dispela 544 yia (yia 323 i go inap 867) misin long Konstantinopel i bruk [long misin long Rom, long wanem ol i no wanbel long sampela bilip bilong misin, olsem tok bilong God Triwan na pasin bilong lotuim ol piksa samting].’—The Catholic Encyclopedia.
Yia 867: ‘Long taim bilong Potius, misin i bruk gen, na pop long Konstantinopel i gat strong yet long sakim Rom. Pop Nikolas Namba 1 i gat tok long Potius i kamap nambawan bilong misin long Konstantinopel, tasol Potius i bikhet na i no laik lusim dispela namba, olsem na Nikolas i rausim Potius long misin. Orait, nau Potius i kirap na em i rausim Nikolas long misin. Bikpela tok i kamap namel long tupela pop, em tupela i laik i stap nambawan long misin olsem pop, na tupela i no wanbel long sampela pasin bilong mekim lotu na ol strongpela lo misin i putim long ol pris samting.’—The New Encyclopædia Britannica.
Yia 1054: ‘MISIN LONG IS NA WES I BRUK—Dispela samting i mekim na bihain ol lotu Kristen long hap bilong Is [Otodoks] na Misin [Katolik bilong Rom] long hap bilong Wes i bruk olgeta.’—The New Encyclopædia Britannica.
Yia 1378-1417: ‘MISIN LONG HAP BILONG WES I BRUK—insait long dispela taim Misin [Katolik] long hap bilong Wes i bruk na ol i gat tupela pop, na bihain ol i bruk gen na i gat tripela pop [wanpela pop i stap long Rom, na wanpela long Avinyon (Frans) na wanpela long Pisa (Itali)].’—New Catholic Encyclopedia.
Yia 1500 samting: ‘Taim Misin Katolik i bruk na Misin Talatala i kamap, Misin Katolik i no laik tok olsem em i bruk—em i tok dispela lain Talatala i lusim bilip.’—Théo—Nouvelle encyclopédie catholique.
Yia 1870: ‘Taim ol i wokim Namba 1 Kibung Bilong Misin Katolik, ol i kamapim bilip olsem pop i ‘no inap popaia’ long ol samting bilong lotu. Orait dispela samting i mekim na lain bilong “Olpela Misin Katolik” i bruk.’—La Croix (em wanpela nius Katolik bilong Paris).
Yia 1988: Asbisop Lefebvre i bruk long Misin Katolik taim em i ‘bikhet long Pop na long tok bilong Namba 2 Kibung Bilong Misin Katolik; em i ting ol Talatala em ol lain bilong lusim bilip, na em i ting, wok bilong bungim olgeta lotu Kristen wantaim Misin Katolik em i wok bilong Satan, na em i no orait liklik long i go bek insait long wanpela misin i bihainim “nupela tingting,” maski em i stap ausait yet long Misin na em i dai.’—Catholic Herald.