Narapela Kain Mumut—Gutpela Liklik Animal i Gat Save
Stori bilong wanpela man bilong raitim nius Kirap! long Saut Afrika
YU TING wanem kain animal em Baibel i tok “ol i gat gutpela tingting tru. . . . [na] ol i save wokim haus namel long ol bikpela ston”? Baibel i kolim olsem mumut, tasol ol i no kain olsem mumut bilong Papua Niugini—ol i narapela kain.—Sindaun 30:24-26.
Dispela kain mumut i stap long sampela hap tasol bilong Afrika na long saut-wes bilong Esia. Long Afrika long hap bilong saut i gat planti, na ol i kolim dasi. Sampela i kolim baja.
Dispela liklik animal i olsem bikpela rat, tasol em i no wanpela rat. Wanpela man bilong saiens, nem bilong em Gerrie de Graaff, em i tok, tit bilong dispela liklik mumut i olsem bilong rat, tasol tupela bikpela tit bilong en i olsem bilong animal ol i kolim raino, na rop bilong blut i olsem bilong ol weil, em ol traipela samting bilong solwara, na han lek bilong en i olsem bilong elefan! Ol man bilong saiens i gat save long ol animal ol i kirap nogut long dispela kain mumut.
Ol i no save wokabaut hariap, na ol i no save tumas long pait na lukautim ol yet, olsem na ol i save stap klostu long ol ples hait insait long ol bikpela ston long maunten, em gutpela ples bilong hait long win na ren na ol birua. Olsem na taim ol i raun bilong painim kaikai, ol i no save go longwe—ol i stap klostu long ples hait bilong ol. Ol i save kaikai tupela taim long olgeta de.
Tasol taim ol i kaikai, ol i mekim save tru! Ol i liklik animal tasol, tasol ol i save kaikai planti gras samting, na ol i daunim hariap hariap. Olsem na long ol wan wan de ol i save kaikai inap olsem wanpela aua tasol! Bilong ol i ken mekim olsem, bel bilong ol i narapela kain. Wanpela saveman bilong ol animal, em J. J. C. Sauer, em i tok, i no gat narapela animal i gat kain bel olsem dispela liklik mumut.
Tarangau i Hatwok long Holim
Planti taim ol dispela mumut i save sindaun nabaut long ol bikpela ston na bai san i ken holim skin bilong ol. Tasol ol tarangau i save laikim tru ol mumut, em nambawan abus bilong ol. Tasol tarangau i hatwok long holim ol dispela mumut. Ai bilong mumut i sap tru na em inap lukim samting i meknais, maski em i stap longwe inap wanpela kilomita! Na sapos tarangau i flai antap na i stap long ai bilong san, mumut bai lukim—san i no inap sutim ai bilong en, long wanem, ai bilong en i gat wanpela kain skin i save pasim hap strongpela lait bilong san na bai mumut i ken lukluk stret i go long san, na san i no ken bagarapim ai bilong en. Taim ol mumut i sindaun nabaut ausait long ples klia, wanpela i save was i stap, na sapos em i lukim wanpela tarangau o narapela birua i kam, em i save singaut na wantu ol mumut i sut i go daun insait long ol ston. Sori tumas, tarangau i lus, na em i mas traim gen long painim kaikai.
Ol i Pren Gut Wantaim
Long nait ol i save pas wantaim na bai ol i no ken kol tumas—ol i slip wantaim na narapela i hatim skin bilong narapela. Pes bilong olgeta i lukluk i go long wanpela hap tasol na ol i bung i stap. Sampela i slip antap long ol narapela, na sampela taim inap olsem 25 i hip i stap, olsem na bai ol i no ken kol.
Tasol sampela taim dispela pasin inap kamapim kros namel long ol, long wanem, narapela i save subim narapela na ol i no stap isi. Tasol long kain taim olsem, gutpela tingting i helpim ol na ol i no pait tumas. Wanpela saveman, em P. B. Fourie, em i tok, taim ol i slip, narapela i save givim baksait long narapela, tasol sapos wanpela i mas wokabaut i go klostu long narapela, em i save mekim ol liklik singaut na bai narapela i no ken kros long em. Krai bilong ol i no bikpela tumas na i go inap long sampela mita tasol, olsem na ol inap toktok isi wantaim na ol birua i no inap harim.
Gutpela Liklik Animal
Dispela mumut i save ran i go antap long ol bikpela ston, na rot em i ran long en i save go antap stret na i no slip liklik, na ston i wel olsem glas. Tasol mumut i no save pundaun, long wanem, aninit long han lek bilong en i gat strongpela skin i save pas gut long ol ston na i no wel. Na tuhat i save kamap long dispela skin, na long ol narapela hap nogat, na dispela tuhat i save helpim mumut long holimpas ston, olsem glu samting.
I no hatwok long lainim dispela kain mumut long i stap long ples. Em i klinpela animal—em i gat wanpela nil i stap long lek bilong en na oltaim em i save klinim skin bilong en long dispela nil na rausim ol laus na komim gras bilong en.
Ol dispela kain mumut i save makim wanpela hap i olsem toilet bilong ol, na olgeta i save go long dispela hap tasol bilong pekpek. Dispela man Fourie i stori long wanpela mumut ol i kisim i kam long ples na em i tok, i no hatwok long lainim em long go long ples toilet. Na wanpela meri nem bilong em Joy Adamson i gat wanpela mumut na em i tok, taim ol i stap long haus, mumut i save go long toilet long taim em i laik pekpek na em i save sindaun antap long toilet! Tasol taim ol i save raun long bus samting na ol i kisim mumut i go wantaim ol, ol i mas wokim liklik toilet bilong en.
Bihain bai yumi amamas long save gut long ol dispela animal Jehova i bin wokim na “ol i gat gutpela tingting tru!”