Pop i Raun i Go Long Meksiko—Olsem Wanem? Dispela Raun Inap Helpim Misin?
Wanpela man bilong nius Kirap! em stap long Meksiko, em i raitim dispela stori
WANPELA nius bilong pop long tok Inglis (L’Osservatore Romano) bilong Me 7, 1990 i gat het-tok olsem: “ ‘Wok Evanjelis Bilong Pop’ i Go Kamap long Meksiko.” Em namba tu raun bilong Pop John Paul Namba 2 i go long Meksiko. Em i bin mekim namba wan raun bilong em 11-pela yia i go pinis. Pop i karim wanem tok i go? Ol lain bilong Meksiko na Misin Katolik long dispela hap i wetim wanem ol gutpela samting? Olsem wanem dispela raun inap helpim ol man bilong Meksiko?
Sampela nius i stori olsem planti milion milion manmeri ol i rabis tru na ol i kisim hevi long ol lo em gavman i putim long ol, na ol dispela lain i bilip olsem dispela raun inap kirapim tingting bilong ol man i bosim gavman na bai sindaun bilong ol wokman inap kamap gutpela. Wanpela nius bilong Meksiko (El Universal) i gat dispela het-tok: “Lotu Kristen na Ol Man i Stap Rabis Tru long Meksiko.” Dispela nius i stori long wanpela pas em bikpela lain manmeri bilong Misin Katolik i raitim i go long Pop John Paul Namba 2. Sampela hap bilong dispela pas i tok: “Gavman i kirapim ol manmeri long insait long ol wok bilong helpim sindaun bilong olgeta manmeri, tasol long dispela rot gavman i mekim nabaut long ol. Olsem na ol i wetim pop i mekim sampela tok inap strongim bel bilong ol.” Na pas i tok moa long pop olsem: “Mipela i laik bai yu kamap ‘mausman’ bilong mipela. . . . Tokaut strong long gutpela sindaun na stretpela wok jas i mas kamap bilong helpim ol dispela manmeri i stap rabis tru na i kisim hevi long ol lo em gavman i putim.”
Pop i ting olsem wanem long tok bilong dispela pas? Long wanpela bikpela bung long taun Kalko klostu long biktaun Meksiko, winim 2 milion manmeri em planti ol i stap rabis tru, ol i kam harim tok bilong Pop John Paul Namba 2, na em i mekim dispela tok: “Olsem na mi laik kirapim yupela ol Kristen na ol man i belgut long ol long tingting gut na pas gut wantaim; olsem wanem yumi inap i stap bel isi na slip gut long nait sapos planti tausen ol brata na sista bilong yumi i stap klostu na ol i no gat laplap o kaikai samting bilong i stap laip?”
Planti ol nius bilong Misin Katolik i no amamas long dispela tok. Na wanpela nius bilong ol (National Catholic Reporter) bilong Amerika i gat dispela het-tok: “Pop i Hariap Abrusim Ol Rabisman long Meksiko long Ka.” Dispela nius i tok, planti rabisman ol i sanap planti aua long ren bilong lukim ka bilong pop, em i siksti i go abrusim ol. Na wanpela nius bilong Meksiko (La Jornada) i tok: ‘Husat ol i stap insait long bikpela haus [em pop wantaim sampela lain i bung long en]? Ol manmeri i putim ol gutpela gutpela bilas. Na olsem wanem long ausait? Planti tausen manmeri i rabis tru ol i stap long bikpela ren na i brukim skru.’ Sampela ol i belhat na ol i tok pop i toktok tasol wantaim ol bikman bilong gavman na ol bisnisman na em i no toktok o bung wantaim ol wokman o ol man nating.
As Bilong Raun—Misin i Mas Kisim Strong Gen
Tasol namba wan bikpela tingting bilong Misin Katolik long Meksiko em olsem: Em i laik kisim bek sampela strong na biknem bilong en, em ol i bin lusim inap 150 yia i go pinis. Long dispela taim bipo wanpela man Indian bilong Saut Amerika em i bin skul gut, nem bilong em Benito Juárez, i kirapim ol man long insait long wanpela lain em yet i bin kamapim bilong senisim sindaun bilong ol manmeri. Bihain em i kamap presiden bilong Meksiko. Sampela lo bilong dispela taim bipo i stap yet na Misin Katolik i hevi long ol dispela ‘Lo bilong Kamapim Senis’ em gavman yet i bin strongim na putim long Lo Konstitusen bilong kantri long 1917, long wanem, Misin Katolik i ting ol dispela lo i pasim ol long mekim wok bilong ol.
Ol pris samting bilong misin i no laikim Lo Namba 3, em i tok long olgeta lotu, na lotu Katolik tu, i no ken insait long wok bilong kirapim na lukautim ol skul em gavman i putim. Lo Namba 5 i tok ol lotu i no ken kamapim wanpela lain bilong lotu i gat ol bruder na sister samting long en na ol i stap long haus bruder samting. Lo Namba 27 i tok, ol misin i no ken baim graun samting; olgeta haus lotu i bilong gavman tasol. Lo Namba 130 i tok, lo yet i no litimapim nem bilong wanpela lotu na daunim narapela; nogat. Olgeta i wankain. Dispela lo i tok olsem tu long ol pris bisop samting bilong lotu. Na lo i tok ol i no ken tok bilas o toknogutim ol lo bilong gavman.
Misin Katolik i tingim ol dispela lo, na nau em i laik bai gavman i senisim ol dispela lo na misin inap kisim bek strong na mekim sampela wok moa. Olsem na raun bilong pop i bilong kirapim dispela tingting. Ol narapela lotu i lukim dispela samting i kamap namel long Misin Katolik na gavman na ol i ting sapos gavman i orait long Misin Katolik i mekim sampela wok moa, ating dispela i makim olsem gavman bai orait tu long ol narapela lotu. Tasol long Mas 1990, wanpela bikman bilong gavman, nem bilong em Fernando Gutiérrez Barrios, i tokaut klia olsem wok bilong lotu na gavman bai wok yet long stap narapela narapela, na tu gavman i no ken tok bilas o bagarapim ol bilip na pasin bilong ol man long kamapim tingting bilong ol yet.
Tasol maski ol dispela samting i kamap, taim presiden bilong Meksiko, nem bilong em, Carlos Salinas de Gortari, i bungim na tok amamas long pop long ples balus na bihain ol i go long haus bilong presiden, ol lain Katolik i ting dispela samting i kamap i olsem wanpela gutpela mak tru. Ol i ting olsem i stap bilong pop na ol bikpela bung bilong lotu em gavman i orait long en i makim olsem gavman i gat tingting long senisim sampela lo bilong en. Na nius bilong pop (L’Osservatore Romano) i tok olsem taim presiden bilong Meksiko i kam bungim pop long ples balus dispela i kamapim long ples klia olsem Misin na Gavman i kirap long pas gut wantaim isi isi.
Ol pris bisop samting na ol man i laik litimapim nem bilong Misin Katolik i laik mekim na long ai bilong ol manmeri dispela raun bilong pop i kamap bikpela samting tru. Siaman bilong wanpela lain (Episcopal Commission for Social Communications), nem bilong em Alamilla Arteaga, i tok: “Dispela raun bilong pop i bikpela samting tru long olgeta man. Em i bikpela tru na i kirapim olgeta lain manmeri long pas wantaim na givim bel long wanpela laik . . . em laik bilong wanpela bikpela lain manmeri, long wanem yumi save lain Katolik i bikpela lain long dispela kantri.”
Wok Evanjelis na Ol Narapela Lotu Kristen
Taim pop i stap long Meksiko, em i kirapim ol man long tingim wok evanjelis o wok bilong autim tok bilong God. Wanpela as bilong raun bilong pop em bilong strongim Misin Katolik long Meksiko, olsem na wanpela man i raun wantaim pop, em Girolamo Prigione, i tok dispela raun i bilong “kirapim ol man long tingim ol samting bilong spirit.” Taim Pop John Paul Namba 2 i kirapim raun bilong em long Meksiko long Me 6, em i tok: ‘Bikpela . . . i orait long wok bilong mi na em i laik bai mi kamap pop bilong wok evanjelis, na mi mas raun i go long olgeta hap bilong graun na karim dispela gutnius bilong kisim laip. . . . Mi laik tokaut long olgeta lotu i stap long Saut Amerika long kisim dispela nupela wok bilong autim tok.’
Em i tokim ol bisop bilong em olsem: “Yupela i mas was gut long ol ‘nupela lotu,’ ol i wok long paulim tingting bilong ol man i stap gut long Misin Katolik . . . Pasin bilong ol long mekim wok, na mani na laplap na kaikai samting ol man i givim nating long ol bilong mekim dispela wok, na pasin bilong ol long wok strong long mekim wok long kamapim disaipel, i kirapim tingting bilong planti man i lusim ples i go sindaun long taun. Tasol yumi no ken lusim tingting olsem ol dispela nupela lotu inap mekim olsem long wanem ol pikinini man na pikinini meri bilong Misin Katolik i lusim wok lotu bilong ol, na pasin bilong ol i kamapim olsem ol i no save bihainim pasin Kristen.”
Pop i mekim wanem bilong kisim bek ol dispela manmeri i lusim Misin Katolik? Olsem wanem? Em i kirapim ol long stadi long Baibel? Taim em i mekim wanpela tok long ples Villahermosa, em i tok: “Kam bek long Mama bilong yupela, em Misin Katolik! Em Nupela Meri bilong ples Gwadelup, em i sori tru long yupela na em i laik helpim yupela long i go long Pikinini Man bilong em.” Olsem na em i no tokaut long tok bilong God—em i kamapim tasol ol switpela tok bilong lotu long kisim bek ol manmeri i lusim Misin Katolik.
Olsem na wankain olsem em i bin mekim long ol narapela raun bilong em, Pop John Paul Namba 2 i kamapim bilip bilong em long God Triwan—em i litimapim Maria olsem “Mama bilong God.” Em i kirapim tok olsem: “Pop i kam bilong brukim skru na lotu long strongpela piksa bilong Nupela Meri bilong ples Gwadelup na askim em long helpim mi na lukautim wok misin bilong ol pop yet . . . na bilong putim wok misin bilong Saut Amerika long han bilong em.”
Tasol planti manmeri i askim ol yet, tru ol dispela tok bilong pop i bilong strongim wok evanjelis, o olsem wanem? I tru planti man i givim bel long ol tok pop i mekim, tasol sampela i pilim olsem Misin Katolik i stori moa yet long mani kago samting, na wok politik, na tok pait long ol gavman long helpim ol man i stap rabis, na i no tromoi bikpela taim long stori long Tok bilong God. Ating dispela samting i kirapim wanpela nius (El Universal) bilong Me 8, 1990, na em i stori olsem: “Ol man i gat tingting ol i laik save, bai gutpela samting i painim Misin Katolik? O ol Katolik bai stap olsem tasol, olsem ol i bin mekim bihain long namba wan raun bilong pop?”
Olsem wanem? Bai ol manmeri i kisim ol kaikai bilong spirit em ol i sot long en? Planti handet tausen manmeri bilong Meksiko i gat gutpela bel ol i wok nau long kisim kaikai bilong spirit long wok bilong ol Witnes Bilong Jehova long autim tok bilong Baibel. Olsem pop yet i tok, ol manmeri i “nek drai long painim God” i wok long painim trupela God Jehova na Pikinini bilong Em Krais Jisas long rot bilong Baibel. Olgeta dispela manmeri i wok wantaim ol kongrigesen bilong ol Witnes Bilong Jehova, winim 8,000 kongrigesen, na ol i bilip tru long ol tok promis bilong God, olsem em bai kamapim Kingdom bilong bosim olgeta lain manmeri long paradais long graun.—Matyu 6:9, 10; Jon 17:3; Kamapim Tok Hait 21:1-4.
[Ol Piksa long pes 9]
Presiden bilong Meksiko, em Carlos Salinas de Gortari, em i tok amamas long Pop John Paul Namba 2
Sampela man i sanap long rot na baim ol samting i go long ol manmeri, bilong tingim raun bilong pop long Meksiko