Ol Yangpela i Laik Save . . .

Papamama i Brukim Marit​—Olsem Wanem Mi Ken Winim Dispela Hevi?

“Marit bilong papamama i bruk, olsem na mipela i mas i go long narapela hap. Mipela i no gat ka moa, olsem na mama i mas kalap long bas i go i kam long ol hap em i laik i go long en na em i save lusim mipela wantaim wanpela meri bilong was long mipela. Bihain mipela lukim sampela senis i kamap long haus. Papa em i mas givim sampela mani bilong lukautim mipela, tasol em i no save mekim, olsem na mama i save stretim ol samting. Bihain nau papa i lusim mipela olgeta.”​—Ana.a

WANPELA ten foa krismas i lus pinis nau, na papamama bilong Ana i stap narapela narapela yet tasol ol i no katim marit. Ating yu lukim tu dispela samting i kamap namel long papamama bilong yu, na ating yu save pinis long samting Ana i pilim. Planti wik, na mun, o planti yia i lus na yu wok long wet yet long dispela hevi bai pinis. Tasol ating sampela taim yu tingting planti nau long sindaun bilong yu long bihain. Ol i no tingting long katim marit o ol i no gat tingting long stretim toktok na stap wantaim gen; i olsem wanpela hevi long sindaun bilong yu.

Ating sampela taim yu hevi long yu stap olsem wanpis. Taim marit bilong papamama bilong yangpela man Brad i bagarap, mama bilong em i kisim tupela kain wok mani bilong lukautim ol, na em i save i go long skul bilong lain long sampela kain wok em i ken mekim. Brad i save sotwin long lukim mama bilong em. Em i tok: “Mi laik i go wantaim em long ples wok olsem na wanpela nait mi go hait i stap long ka. Tasol taim mipela kamap pinis long ples wok, mi putim hevi long mama. Olsem na wanpela i mas bringim mi i kam bek long haus.” Narapela yangpela man nem bilong em Maik, i tok: “Narapela meri i kisim papa bilong mipela, na bihain mama bilong mipela i mas mekim wok mani bilong lukautim mipela na em i no save stap tumas long haus.”

Sapos marit bilong papamama bilong yu i bruk, yu mas tingting strong long ol samting yu mas mekim bilong winim sampela ol hevi olsem​—yu tingting planti long i stap bilong yu long bihain, na nau yupela i sot long mani na yupela i mas skelim gut mani bilong yupela. Orait yu inap bihainim wanem gutpela tingting?

Stretim Tingting

Dispela em i olsem pait i kamap insait long tingting na bel bilong yu. Ating yu tingting planti nau, long wanem papamama i no stap wantaim moa, na yu hevi long dispela na ating yu sori long skin bilong yu yet na dispela tingting em i hatwok tru long lusim. Tasol i gat sampela samting yu inap mekim na bai yu no ken tingting tumas long ol hevi.

Taim marit bilong papamama i bruk em i kain olsem long taim nogut bilong bikpela win na ren. Tu, Baibel i stori long aposel Pita taim em i stap long raunwara na bikpela win i kirap. Tasol maski bikpela win, em i lukim Jisas i wokabaut antap long raunwara na i kam! Jisas i singautim Pita long i go long em antap long raunwara. Pita i kirap wokabaut i go, tasol em i no go longwe tumas na em i go daun liklik insait long wara. Bilong wanem?

Matyu 14:30 i tok: “Tasol em [Pita] i lukim win i strong tumas na em i pret, na em i go daun liklik insait long wara.” I no olsem Pita em i pret tru, tasol bilip bilong em i liklik tumas. Taim em i lukim bikpela win tru wantaim si i bruk na i sakim bot, em i pret. Em i lusim tingting long Jisas, dispela man em inap long helpim em na em i no ken go daun insait long wara. I olsem tasol long yu. Sapos yu tingim tumas ol hevi bilong yu, bai ol i olsem ol bikpela bikpela hevi tru. Mobeta yu tingting long rot bilong winim ol dispela hevi.

Wanpela yangpela meri, nem bilong em Meg, marit bilong papamama bilong em i bruk na em i tok olsem: “No ken larim tingting bilong yu i stap long dispela hevi na yu tingim tingim i stap. Yu no inap senisim wanpela samting.” Yangpela man, nem bilong em Randi, i tok: “Taim yu tingting tumas long ol samting yu yet yu save bai i no inap kamap tru, yu wok long tingim tingim ol dispela samting na i olsem yu pas insait long graun malumalum.” Bai yu lusim olsem wanem?

Toktok Wantaim Ol Narapela

Meg i tok moa: “Toktok wantaim wanpela yu save em i save kamapim gutpela tingting na em i stap olsem bikpela man o meri long ol samting bilong spirit, na em inap helpim yu long stretim ol hevi.” Dispela kain pren i ken helpim yu long kisim gutpela tingting. Olsem Sindaun 17:17 i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” Sapos nau papamama bilong yu i stap narapela narapela na yu laik wok strong long winim dispela hevi, tasol yu wanpela yu stap na yu gat hevi, ating yu mas painim ol poroman bilong yu na ol i ken helpim yu.

Tasol was gut. I no olgeta pren bai helpim yu long dispela taim bilong hevi. Sampela bai ol i kamapim sampela hevi moa long yu. Maik i kolim wanpela taim olsem: “Marit bilong papamama i bruk pinis na ol i stap narapela narapela, na mi laik tumas long i stap wantaim ol poroman bilong mi na mi givim bel tru long ol. Mipela i amamas wantaim, tasol planti taim mipela i save insait long kain kain trabel​—olsem kisim drak samting na pait. Long dispela taim mi ting sapos mi lusim ol pren mi lus long olgeta samting tu. Tasol em tingting kranki. Bihain mi save ol i no stap gutpela pren. Ol i bin giamanim mi. Polis i holim wanpela bilong ol, long wanem em i bagarapim ol samting bilong ples skul na taim polis i askim em long dispela, em i kolim nem bilong mi.”

I no olgeta pren i gutpela pren, nogat. Olsem Sindaun 18:24 i tok: “Man i gat planti pren, em bai i bagarap. Tasol sampela man i gat narakain pren na tupela i pas gut na i wanbel. Pasin bilong yupela i winim pasin namel long tupela brata.” Bihain Maik i painim ol gutpela pren. Em i tingim yet wanpela gutpela pren tru na em i stori olsem: “Em i olsem bikbrata bilong mi. Em i save stadi long Baibel wantaim mi, na em i mekim sampela samting wantaim mi. Bihain em i kisim mi i go wok wantaim em long kampani em i wok long en. Na em i no ting olsem mi putim hevi long em. Inap long nau mi pilim tru dispela samting em i mekim. Sapos mi no bin bungim em, mi no save bai mi stap olsem wanem long nau.”

Yu inap painim we dispela kain gutpela pren? Jisas i tok promis long yupela ol yangpela i no gat papamama, olsem yupela inap painim planti “brata, na planti susa na planti mama na planti pikinini” long kongrigesen Kristen. (Mak 10:30) Olsem na Maik i painim sampela pren long ol bung bilong ol Witnes Bilong Jehova.

Tom tu i olsem. Em i tok: “Wanpela brata insait long kongrigesen i kisim mi olsem mi namba wan pikinini man bilong em. Na wanpela lapun sista i kamap olsem tumbuna mama bilong mipela. Olgeta taim kongrigesen i save laikim tru mipela na dispela em i narapela kain long mipela.” Tom i tok moa: “Olsem na sapos yu no gat papa, painim wanpela insait long kongrigesen. Nau sapos yu gat sampela hevi bilong famili, orait stretim dispela samting na pas gut wantaim.” Ol brata na sista na tumbuna papamama, na ol narapela wanblut i ken i stap olsem ol gutpela pren bilong yu na i stap gut long yu.​—Sindaun 13:20.

Tasol Man bilong wokim yu, Jehova, bai i stap gutpela pren tru bilong yu. Taim marit bilong papamama i bruk, tok bilong Baibel long Jems 4:8 i gutpela tru: “Yupela i mas i go klostu tru long God, na em bai i kam klostu tru long yupela.”

Bihainim Ol Samting Bilong Spirit

Taim yu go oltaim long ol miting Kristen, dispela bai helpim yu long mekim olsem​—taim yu kisim save long God, dispela bai helpim yu long i go klostu tru long em. Ol dispela bung bai helpim yu long bungim nupela pren. (Hibru 10:​24, 25) Ol miting Kristen na ol narapela wok Kristen tu i ken givim gutpela rot long yu na gutpela as long i stap bilong yu, na tu, bai yu bihainim gut ol samting yu mas mekim. Dispela i bikpela samting sapos marit bilong papamama i bruk na dispela i bin kamapim planti hevi insait long famili.

Ating yu gat dispela laik long bel bilong yu long sakim ol gutpela samting. Bai yu les long i go long skul. Maik i tok: “Mi kisim tingting olsem, ‘Mi les long ol samting.’ Wok bilong mi long skul i no kamap gutpela, na mi ting, ‘Sapos papamama bilong mi i no ting i bikpela samting long famili i stap wantaim, orait, mi tu mi no ken tingting planti.’ Dispela hevi bilong ol em i as na mi no mekim gut ol wok samting bilong mi.”

Tasol dispela i no gutpela as na yu no mekim gut ol samting bilong helpim yu long bihain. Wanpela buk (Surviving the Breakup) i stori long ol pikinini em papamama i katim marit, na em i tok: ‘Ol i ting skul em i bikpela samting long wanem em i kamapim gutpela samting long bihain . . . Ol samting i kamap long skul i helpim tru ol, maski ol i kisim bikpela save tru long skul o ol i gat planti pren long skul o nogat.’

Skul inap helpim yu long kisim save long ol gutpela pasin yu inap bihainim, na long mekim wok samting tu, na bilong kisim tok bilong stretim yu, olsem na dispela samting inap helpim yu long bihain​—bai em i helpim yu long kisim wok mani samting. Ating hevi bilong papamama i bagarapim ol samting insait long famili, olsem famili i sot long mani kago samting. Orait em i bikpela samting long lainim skin bilong yu long kisim wok mani samting bilong lukautim yu yet long bihain.

Olsem na sindaun bilong yu long bihain i no ken bagarap. Yu inap winim dispela taim bilong hevi bilong papamama bilong yu. Yu inap tru long mekim olsem. Ol man i save skelim ol marit i bruk i tok planti yangpela man na meri ol inap winim dispela taim bilong hevi. Planti i lainim sampela samting long dispela ol popaia bilong papamama bilong ol, na tu dispela i mekim na ol i kisim gutpela save long ol samting ol i mas mekim.

Yu no ken tingting planti long ol samting bai painim yu long bihain. No ken i stap wanpis sapos yu no laik. Sapos yu wok long painim ol gutpela poroman, na yu bihainim tru ol samting bilong spirit na yu no larim tingting bilong yu i stap long ol hevi bilong yu, bai i gat gutpela samting i painim yu long bihain. Bai yu inap i stap longpela taim moa na bai yu inap amamas.​—Sindaun 3:​1, 2.

[Ol Futnot]

[Piksa long pes 12]

Sapos papamama i brukim marit, ating bai yu laik long kisim sampela gutpela pren bilong yu. Yu inap painim ol gutpela pren olsem wanem?