Washi—Pepa Bilong Bipo Ol Japan i Wokim Long Han

Wanpela man long Japan i raitim dispela stori bilong Kirap!

TAIM yu go insait long wanpela haus bilong Japan, bai yu go insait long wanpela kain dua yu subim i go i kam. Insait long haus, ating bai yu lukim wanpela liklik banis ol inap brukim i go liklik o opim, na i gat ol gutpela bilas long en. Na tu, bai yu lukim kain kain bilas olsem​—ol doli, o ol pepa i hangamap na ol i gat ol piksa o naispela hap rait long en, o karamap bilong lam samting, na ol bokis samting olsem bilas. Ol dispela kain kain bilas ol i bin wokim long wanpela samting tasol​—em wanpela kain pepa bilong Japan ol i wokim long han na ol i kolim washi.

Em i Bin Kamap Bipo Tru

Long yia 600 samting, ol Japan i kisim save long ol Saina long pasin bilong wokim dispela kain pepa. Winim wan tausen yia i no gat narapela kain pepa long Japan​—dispela pepa washi em tasol. Bipo long sampela hap bilong Japan, olgeta manmeri long ol ples i bin wokim pepa washi olsem wok mani bilong ol, na sampela i kisim nem, long wanem, ol i save tru long wokim dispela kain pepa.

Klostu olsem long yia 1870 samting long Japan, ol gutpela samting i kamap long dispela wok bilong wokim washi. Long olgeta hap bilong kantri ol i kamapim wan tausen haus faktori samting bilong wokim dispela pepa. Tasol taim ol man i kirap mekim wok long kain kain masin samting, ol i no wok bisnis tumas long wokim pepa washi na ol narapela samting ol i wokim long han olsem ol i bin mekim bipo. Tasol inap long nau long sampela hap bilong Japan ol i wokim yet pepa washi long han bilong ol.

Pasin Bilong Wokim Pepa Washi

Bipo ol Saina i save wokim pepa bilong ol long ol laplap slika, na laplap linen, na ol olpela hap pipia laplap, na umben, na skin bilong diwai malberi. Taim ol Japan i kirap long wokim pepa, ol i mekim wok long ol dispela wankain samting olsem ol Saina i mekim wok long en. Bihain ol i traim ol narapela samting i stap long hap bilong ol, olsem skin bilong diwai mitsumata (em wanpela kain diwai malberi), na diwai gampi (em wanpela liklik diwai bilong Japan i save stap long ol maunten), na tu, ol i mekim wok long mambu.

Taim ol i bungim pinis ol samting, ol i memeim pastaim. Dispela em bikpela wok tru; ol i mas paitim paitim i go, na putim long smok bilong hat wara, na skrapim, na larim i stap insait long wara liklik taim, na mekim planti narapela narapela samting. Nau ol i putim dispela meme i go insait long wara na bai ol liklik tret o rop i trip insait long wara.

Long ol woksop bilong wokim pepa long diwai gampi, ol meri i brukim skru na sindaun arere long ol traipela dis diwai em wara i pulap long en. Long han ol i brukbrukim na klinim ol liklik tret o rop bilong diwai gampi inap long ol i pas stret wantaim.

Narapela meri bai putim traipela waia olsem siv ol i bin pasim long diwai samting insait long traipela dis. Waia o siv i wokabaut na pulim dispela meme bilong pepa na bihain em i apim dispela siv na nau wara i lusim na i go daun insait long dis, olsem na ol liklik rop i stap long waia bilong siv na ol i pas gut wantaim na i kamap olsem pepa washi. Man i gat save tru long dispela wok bai tokim yu olsem, gutpela pepa i kamap sapos i gat liklik meme tasol insait long wara na man bilong wokim i putim siv planti taim insait long wara, no ken putim wanpela taim tasol long wara i gat planti meme tumas long en.

Bihain ol i kapsaitim siv antap long wanpela bikpela tebol. Na isi isi wokman i rausim siv na bai pepa washi i no drai yet i stap long tebol. Bihain ol i mekim wankain pasin tasol na lainim nupela pepa antap long dispela ol i bin wokim pastaim. Ol i hipim olsem i go.

Ol i no laik bai ol dispela pepa i no drai yet i pas wantaim, olsem na ol i putim wanpela kain marasin i gat wel (ol i kolim tororo) i go long wara; ol i wokim dispela marasin long rop bilong plaua haibiskus. Na dispela samting i mekim na wara i no ron hariap taim ol i sivim, olsem na ol liklik rop i pas gut. Wokman i save gut long dispela wok em inap holim ol liklik rop na save em gutpela o nogat.

Bipo tru ol wokman i save slipim wan wan pepa washi antap long narapela long ol plang na putim long san bambai ol i ken drai. Sampela i wok yet long mekim olsem, tasol planti faktori bilong wokim pepa washi ol i no lainim ol pepa long ol plang, nogat, ol i lainim long ain em ol i bin hatim pastaim.

Dispela Pasin i Stap Yet

Ol Japan i mekim wok yet long pepa washi tasol ol i no mekim bikpela wok long en olsem ol i bin mekim bipo. Ol i wokim ol kain samting olsem doli, na fen, na ol samting bilong bilas, o ol i bilasim sampela samting long dispela kain pepa.

Ol i wokim naispela piksa bilong ol plaua, na ol diwai, na ol pisin, na ol naispela gaden samting taim ol i pasim ol wan wan liklik pepa washi i gat kain kain kala. Planti man i save gut long wok bilong tupela Japan (Hiroshige na Hokusai), em tupela i save tru long wokim ol naispela piksa long pepa washi. Ol man i mekim wok long dispela kain pepa bilong wokim ol paus, na fen, na ambrela, na ol liklik lam olsem bilas, na ol doli, na ol kain samting olsem. Tasol ol i wokim ol bikpela samting tu long dispela pepa, olsem ol liklik banis insait long rum na bai hap rum i hait i stap. Bilong kirapim ol man long tingim yet dispela kain pepa, ol i makim wanpela taim na soim ol man long ol samting ol i bin wokim. Na tu, ol man i gat save long wokim pepa washi ol i wokim sampela skul bilong lainim ol man long rot bilong wokim ol dispela samting.

Bipo tru pepa washi i bikpela samting long sindaun bilong ol Japan, tasol nau i gat wan wan tasol i wokim, na dispela ol samting ol i wokim long pepa washi i wok yet long amamasim ol man.

[Ol Piksa long pes 25]

Samting ol i wokim long pepa “washi”:

pes 23, piksa bilong maunten ol i wokim long skin pas;

pes 24, ol doli ol i wokim long pepa, stik bilong kaikai ol i bilasim long “washi,” liklik pepa bilong putim insait long buk bilong makim pes;

pes 25, pisin “origami”, fen, na bilas bilong klos Japan ol i kolim “kimono”