Ol Kristen Long Sili i Kamapim Pasin Sori
Wanpela man long Sili i raitim dispela stori bilong Kirap!
LONG hap not bilong kantri Sili i gat ples wesan nating (Atacama Desert). I no gat planti man i sindaun long dispela ples namel long Solwara Pasifik na ol Maunten Andi. Ren i no save kam daun planti taim, olsem na taim liklik kol i kamap, planti man i tok em ren. Em ples hat, olsem na taim ol i wokim haus, planti ol i no wokim olsem bilong sakim ren, na taim ren i kam daun, olsem long olgeta 5-pela yia samting, planti ol i no bin ting long stretim kapa samting i gat ol liklik hul long en. Ating dispela pasin bilong ol i bin helpim planti lain manmeri long biktaun Antofagasta, inap 250,000 samting, long abrusim bagarap.
Long Mande long nait, long Jun 17, 1991, taim planti manmeri i laik redi long slip, bikpela ren tru i kam daun. Planti ol haus i gat hul long kapa, olsem na ol i no slip, ol i kirap stretim ol dispela hul—na ol i no ting olsem bai i gat bikpela hevi tru i kamap long sampela aua samting bihain.
Long bikmoning tru long de antap, graun i bruk na i surikim planti milion ton graun malumalum i go spit tru inap olsem 30 kilomita samting long wanpela aua, na i kilim i dai inap 85 manmeri, na planti tru olsem 700 samting i kisim hap bagarap, na haus bilong 30,000 manmeri i bagarap olgeta o i bagarap liklik!
Graun Malumalum i Bagarapim Ol Samting
I gat olsem 1,400 manmeri insait long 10-pela kongrigesen bilong ol Witnes Bilong Jehova long biktaun Antofagasta, olsem na mipela i tingting planti long i stap bilong ol. Tasol mipela amamas tru long harim olsem olgeta i stap orait tasol, wanpela sista tasol i kisim birua taim graun malumalum i karim em i go inap 3-pela kilomita samting. Ol man i kam bilong helpim ol man i kisim dispela hevi ol i painim dispela sista na ol i ting em i dai pinis, tasol wanpela nes i lukim olsem em i pulim win yet na taim nes i go klostu long em, nes i harim em i singaut “Jehová, Jehová.” Kwiktaim ol i kisim em i go long haus sik bambai dokta i ken givim marasin long em, long wanem em i bin dring bikpela hap graun malumalum wantaim wara, olsem na nogut bikpela sik i painim em.
Long kongrigesen Oriente, klostu olgeta famili em haus bilong ol i bagarap olgeta o i kisim hap bagarap. Haus bilong ol famili long kongrigesen Kostanera na Korvalis i bin kisim bagarap tu taim graun malumalum i go antap long rup bilong haus o insait long haus bilong ol na pulimapim ol rum inap 1.5 mita samting. Long wanpela haus, wanpela mama wantaim tupela liklik pikinini bilong em i sindaun long bet na trip antap long graun malumalum. Dispela graun i wok long kam insait long haus na i karim ol i go inap long kapa bilong haus na ol i pas long kapa na i no gat rot moa. Tasol papa bilong dispela meri i kam brukim kapa bilong haus na em i kisim ol. Ol narapela i stap long ol hap em dispela graun malumalum i no bagarapim, ol i harim krai na singaut bilong ol man na pairap bilong dispela graun malumalum i wok long i kam olsem tait wara, na ol i ting pinis i klostu tru nau, long wanem, taim dispela graun malumalum i ron i go em i karim olgeta samting i go wantaim.
Samting i Winim Tru Ol Samting Bilong Skin
Ol Witnes i stap bel isi, maski planti samting bilong ol i lus. Ol pren na wanwok bilong wanpela sista i kirap nogut long lukim em i stap amamas na em i no tingting planti long planti kago bilong em i bin lus. Em i tokim ol wanwok, ol mani kago bilong em i no nambawan bikpela samting long em—ol i namba 2 tasol. Em i amamas long em wantaim famili bilong em i abrusim bagarap na i stap laip.
Wanpela sista em i gat sampela pikinini meri na graun malumalum i karim ol i go. Klostu em yet na tupela pikinini i lus. Tasol em i beten long Jehova olsem sapos em i dai, orait, long taim bilong kirap bek em i laik kirap bek hariap, long wanem, em i laik kukim kaikai taim ol narapela i mekim wok bilong stretim bek graun! Tasol em i no dai, em i abrusim dispela hevi na ol i tokim em long wok long wanpela haus kuk ol Witnes i sanapim bilong givim kaikai long ol Witnes Bilong Jehova na long ol narapela man i stap klostu long ol na hevi i bin painim ol tu!
Ol i Kamapim Pasin Sori
Ol narapela Witnes bilong Kalama na Ikike i pilim tru hevi i painim ol dispela lain Witnes na ol i salim ol samting olsem bret, wara, laplap, na ol narapela samting bilong helpim ol brata long Antofagasta. Brens-ofis bilong Sosaiti Was Taua long hap i redim na salim ol laplap, blanket, matres, kaikai na ol samting bilong kukim kaikai na sampela samting moa. Ol brata i kirap nogut, long wanem, planti samting ol i salim i no olpela liklik—ol i nupela olgeta! Kwiktaim tupela trak bilong Sosaiti wantaim wanpela trak bilong Rankagua i bringim ol dispela samting i go long Antofagasta, em i longwe inap 1,400 kilomita long hap not, na hevi bilong ol dispela kago i winim 13 ton. Bihain ol i salim tok long no ken salim moa ol samting, tasol planti planti samting i wok long kamap. Olsem na ol i mas baim narapela trak bilong karim ol dispela kago, hevi bilong en i olsem 14.5 ton! Planti bilong ol dispela samting ol i givim bilong helpim ol narapela man tu em ol i no Witnes.
Haus bilong wanpela famili Witnes i no bin bagarap long taim dispela hevi i kamap, maski haus bilong ol i bin i stap long hap i bin kisim nogut. Kwiktaim ol i kirap mekim pasin sori long ol narapela manmeri i stap klostu long ol. Ol i kisim 9-pela famili Witnes i kam long haus bilong ol, na 70 narapela man i no Witnes. Graun malumalum i karamapim skin bilong ol dispela man na ol i no gat ol laplap samting. Olsem na ol Witnes i givim ol laplap na blanket samting bilong ol long ol dispela man.
Planti ol narapela Witnes i lusim bikpela hap taim na mani samting na strong bilong ol long helpim ol narapela long dispela taim bilong hevi. Em bikpela hevi tru i bin kamap long Sili, tasol dispela i opim rot long lain bilong Jehova long kamapim long ples klia pasin wanbel bilong ol, em ol i tingim tru ol narapela brata bilong ol—olsem sampela lain long longwe ples Teksas, long Amerika, i salim mani bilong helpim ol brata long Sili. Wanpela man i skelim ol dispela samting i bin kamap insait long tupela wik na gutpela pasin ol i bin mekim bilong helpim ol dispela lain long Antofagasta, na em i tok: “Dispela i olsem wanpela kibung i stap inap 13 de, na planti samting i kamap long dispela taim. Em i bin kamapim long ples klia tru bikpela pasin sori bilong ol brata—na planti ol i givim ol yet bilong helpim ol narapela.”