Baibel i Tok Wanem?
Marit o Sindaun Nating Wantaim—Wanem Pasin i Stret?
“WANEM taim bai yumi marit?” Ating bipo, olsem long 35 yia samting i go pinis, dispela askim i save kamap taim man na meri i gat laik long marit. Tasol long nau ating dispela kain askim i save kamap long man na meri taim tupela i sindaun pinis wantaim tasol tupela i no marit. Tingting bilong ol man long nau long marit i narapela kain long tingting bilong ol man long bipo. Tasol wanem rot i gutpela: Marit o sindaun nating wantaim?
Long Brasil, Frans, Swiden, Amerika, na planti ol narapela kantri, ol man i skelim dispela samting ol i tok, dispela pasin bilong man na meri i sindaun nating wantaim na ol i no marit, em pasin tru bilong ol man long nau. Tasol dispela kain pasin i no nupela samting. Nupela samting em tingting bilong ol man long dispela pasin. Bipo sapos man na meri i sindaun nating wantaim, ol man i save tok tupela i mekim rong, tasol nau planti man i orait long dispela samting, na ol i no ting ol i mekim pasin nogut.
Sindaun Nating Wantaim—Gutpela Samting Inap Kamap Long En?
Sampela man i tok pasin bilong sindaun nating wantaim i gutpela, long wanem, narapela bai save gut long pasin bilong narapela paslain long tupela i marit. Na ol i tok, ol narapela gutpela samting, em olsem: Tupela i stap wantaim, tupela inap hapim mani bilong baim haus, paua, kaikai na ol narapela samting; na ol i no stap moa wantaim papamama, olsem na ol i ken bosim laik bilong ol yet; na tu, tupela inap pren gut na mekim maritpasin sapos ol i laik. Ol man na meri i bikpela pinis na ol i sindaun nating wantaim, ol i tok em i gutpela long wanem, i olsem ol i singel na wan wan inap kisim helpim olsem mani samting long gavman, tasol sapos ol i marit dispela mani i no bikpela tumas.
Tasol wanpela bikpela samting i no gutpela long dispela pasin bilong sindaun nating wantaim na no ken marit, em olsem: Man o meri i ken lusim poroman long laik bilong em yet. Wanpela nius bilong Frans (Le Monde) i tok, long Swiden na Nowe, long ol 100 100 man na meri i stap wantaim na ol i no marit, 50 bilong ol i no winim 2-pela yia na bihain ol i bruk na i no sindaun moa wantaim. Na insait long ol 100 100 bilong ol dispela kain man na meri, 60 i go 80 bilong ol i no winim 5-pela yia na ol i lusim poroman bilong ol.
Marit—Em Gutpela Rot
Ol man i tok pasin bilong stap nating wantaim na no ken marit em i moa win long marit, sampela ol i tok pepa bilong marit em pepa nating tasol. Dispela kain tingting i save kamap planti long ol piksa long televisen na piksa wokabaut na long sindaun bilong planti man i gat namba. Tasol nau yumi laik toktok long gutpela samting bilong dispela “pepa bilong marit.”
Taim yu kamapim wanpela bisnis wantaim narapela man o taim yu baim wanpela hap graun, o taim yu givim dinau long wanpela man, bilong wanem yu raitim ol lo samting long wanpela hap pepa na ol i mas bihainim ol dispela lo? Wanpela as bilong dispela samting em olsem: Nau yupela wokim wanpela kontrak na em i gutpela long yutupela wantaim i gat ol lo samting long pepa em yutupela i mas bihainim. Olsem: Sapos wanpela bilong yutupela i dai, o narapela hevi i painim yupela, long ai bilong gavman ol lo bilong kontrak i stap yet. Em i wankain long marit. Sapos poroman marit i dai o tupela i dai, planti kantri i gat lo bilong helpim poroman marit o pikinini i stap laip yet, na ol inap kisim sampela samting olsem mani samting bilong helpim sindaun bilong ol. Tasol dispela ol lo i no stap bilong helpim ol man na meri i sindaun nating wantaim na tupela i no marit. Na pepa bilong marit i helpim tupela long tingting yet olsem tupela i bin tok promis long mekim pasin sori na pasin daun long poroman, na narapela i lukautim gut narapela, na tupela bai tingim ol tok promis bilong tupela i bikpela samting long ai bilong gavman na long ai bilong ol man.
Wanpela meri marit i tok: “Taim mi marit, dispela kontrak bilong marit i helpim mi long stap isi.” God tu i gat wankain tingting taim em i wokim marit bilong Adam tupela Iv, na em i tok: “Olsem na dispela pasin i kamap. Man i save lusim papamama na i pas wantaim meri bilong en, na tupela i kamap wanpela bodi tasol.” Tupela i stap wanpela! Olsem na bilong “kamap wanpela bodi” dispela inap kamap insait long marit tasol—tupela i pas gut wantaim long lo bilong gavman na long ai bilong ol man—i no gat narapela rot.
Tasol sampela man i tok ol i save long sampela i sindaun nating wantaim; tupela i no marit, tasol tupela i sindaun gut tru.
“Ol i Mas Marit”
Tasol Baibel i kamapim gutpela as na man na meri i no ken sindaun nating wantaim—tupela i mas marit. Long Hibru 13:4 Baibel i tok: “Marit i gutpela samting tru, na yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.” Olsem na Baibel i tok klia, sapos man na meri i sindaun wantaim na tupela i no marit, orait tupela i mekim pasin pamuk. Wanpela buk diksenari i tok: “Pasin pamuk em tupela i mekim maritpasin tasol tupela i no marit.” Olsem na sapos yumi laik bai maus bilong bel bilong yumi i no gat tok, yumi mas bihainim tok bilong 1 Tesalonaika 4:3, em i tok: “Laik bilong God em . . . yupela i mas abrusim olgeta kain pasin pamuk.”
Tasol olsem wanem sapos sampela i no inap bosim laik bilong bodi olsem long mekim maritpasin? Aposel Pol i tok: “Sapos ol i no inap bosim gut laik bilong bodi bilong ol yet, orait mobeta ol i marit. Nogut bel bilong ol i skrap long mekim pasin pamuk.” Na em i tok moa: “Sapos laik bilong en i strong tumas, na sapos em i lukim i no gat narapela rot, orait em i ken bihainim laik bilong en na maritim dispela meri.” (1 Korin 7:9, 36) Pol i no tok tupela i ken ‘bihainim laik bilong tupela yet na sindaun nating wantaim,’ nogat. Em i tok: “Maritim dispela meri.”
Nogut yumi ting marit em bilong amamasim laik bilong bodi tasol, nogat. Gutpela sapos narapela i save long narapela paslain long tupela i marit. Tasol olsem wanem yu ken save long narapela sapos yu no stap wantaim? Sapos paslain long marit tupela i ken toktok gut wantaim na kamapim tingting bilong ol, dispela em rot bilong narapela i ken save gut long narapela. Yu yet yu mas ting, yu laik bai marit bilong yu i stap olsem wanem, na yu laik bai poroman marit bilong yu i mekim wanem kain pasin long yu? Yu gat wanem laik long ol samting bilong skin na bilong i stap bel isi, na long ol samting bilong spirit? Dispela poroman yu laik marit long em, em bai inapim ol dispela laik bilong yu o nogat?—Matyu 5:3.
Ating nau sapos yu tingting gut long ol samting yumi bin stori long en, bai yu save, marit i winim tru pasin bilong sindaun nating wantaim. Ol marit i sindaun gut wantaim ol i no pret, long wanem, ol i save ol i bihainim stretpela pasin, na tu, ol i amamas long wanem ol pren na wanblut i save ol i marit gut. Ol pikinini bilong ol bai stap gut, long wanem papamama i bin karim ol taim tupela i marit pinis. Na bikpela samting tru em olsem: Ol marit i amamasim God, long wanem ol i daun long ol lo bilong em long marit.
[Piksa long pes 26]
Wanpela marit long yia 1550 samting
[Kredit Lain]
Peasant wedding, by Pieter Bruegel the Elder, 16th century
With kind permission of the Kunsthistorisches Museum, Vienna