‘Pasin Giaman i Kamap Long Bikpela Skul’
LONG Janueri 25, 1992, wanpela nius (New Scientist) long Inglan i stori olsem: “Inap 6-pela mun pinis, wanpela lain bilong skelim ol akaun, olsem mani, ol i wok long skelim akaun bilong 14 yunivesiti long Amerika, nogut ol dispela yunivesiti i bin singautim nating mani long gavman. Na ol i tok, ‘Mipela i painim olsem ol dispela 14 yunivesiti i bin kisim nating K20,400,000 long gavman.’ ”
Ol dispela lain bilong skelim akaun em ol i wok long gavman, ol i kisim save olsem Yunivesiti bilong Stanford i kisim nating K25 milion long gavman. Ol i mekim wok long dispela mani long mekim pati bilong marit, na bekim dinau long bot, na bilong lukautim wanpela supamaket. Presiden bilong yunivesiti, em Donald Kenedi, em i save long ol dispela samting i kamap, olsem na em i tok, ‘em bai pasim yunivesiti long tromoi mani long ol samting em planti man bai i no orait long en sapos ol i save long en.’ Wanpela nius (Boston Herald) bilong Janueri 1, 1992, i stori long tok dispela man i mekim, na nius i tok: “I olsem em i tok, i gat wanpela hevi tasol i stap. Em olsem: Ol man nating i no go long bikpela skul, ol i no inap save long wok ol gutpela stretpela saveman bilong yunivesiti i wok long mekim.”
Taim ol dispela pasin giaman bilong skul yunivesiti i kamap ples klia, dispela i kirapim ol man bilong gavman long skelim ol akaun bilong 14-pela yunivesiti, na ol i kisim save olsem ol dispela yunivesiti i bin stilim K20,400,000 long gavman. Ol bikpela skul olsem Yunivesiti bilong Misigen, na Jons Hopkins, na Yel na Emri, ol i insait long dispela pasin giaman. Ol dispela 14-pela yunivesiti i singautim gavman long ‘baim tiket bilong balus bilong ol meri bilong ol presiden; baim tiket bilong ol man long i go long wanpela miting bilong ol bisnisman; mani bilong i go long ol pilai ragbi; mani bilong baim rot bilong kamap memba bilong ol klap samting.’
Taim gavman i tok ol i laik skelim akaun bilong Yunivesiti Masatuses na Yunivesiti Havat, kwiktaim tru dispela tupela yunivesiti i tok gavman i no ken givim K731,000 long ol, na Havat i no singaut moa long K500,000. Na Yunivesiti Duk i tok, ol i ‘popaia’ na ol i singaut long sampela mani moa. Yunivesiti Kal Tek i pasim tok long ol i no ken singautim mani long gavman long kamap memba long klap. Na Yunivesiti bilong Pitsbek i tok gavman i no ken baim tiket bilong balus bilong presiden na meri bilong em bilong i go long Ailan Keman o long i go lukim ol pilai samting.
Wanpela nius (Boston Herald) i tok, “Pasin giaman i as tru bilong ol dispela samting. I olsem wanpela man i tanim wanpela ston na olgeta man i lukim samting nogut i stap hait aninit. . . . Pasin bilong tromoi nating mani, olsem i kamap long Yunivesiti Stanford na ol narapela bikpela skul em i samting nogut. Tasol samting em i nogut moa em olsem: Ol dispela man i no wok strong long bihainim stretpela pasin. Ol man i lukim ol dispela samting i kamap ol i mas kamapim long ples klia kros bilong ol na mekim bikpela tok long en, na i mas i gat ol senis i kamap insait long yunivesiti—ating dispela tasol inap pasim dispela pasin nogut.”