Baibel i Tok Wanem?

Yu Ting God i Amamas Long Olgeta Bikpela De Bilong Lotu?

Winim 20,000 Katolik i mekim bikpela bung Misa namel long taun. Taim lotu i pinis, olgeta i wokabaut mats i go. Taim ol i wokabaut i go, namba bilong ol man i go bikpela moa inap 60,000. Ol i bihainim piksa bilong Nosa Senhora Aparesida, em “santu” bilong Brasil. Long belo, klostu long haus lotu, ol i pairapim paura.

OL DISPELA bikpela de bilong lotu em pasin bilong mats wantaim piksa samting i save kamap long planti hap bilong graun. Tasol wanem samting i kirapim ol man long insait long mats? Tupela samting i kirapim ol Katolik na ol Buda na sampela narapela lotu long mekim, olsem: Ol i givim bel long dispela lotu, na tu, em i pasin bilong lotu. Wanpela buk (The World Book Encyclopedia) i tok, long bipo “planti bikpela de bilong lotu i kamapim amamas tasol. Ol i kirapim ol man long lusim tingting long ol hevi i save painim ol.” Wankain samting i save kamap tu long nau. Olsem: Long Brasil, i gat kain kain bikpela de bilong amamas na lotu, na ol i bungim dispela wantaim ol samting bilong spirit nogut. Sampela mats long bikpela de bilong lotu em samting bilong amamas, na sampela nogat.

Wanpela man i lukim kain mats olsem long Brasil, em i tok: “Sampela man i singsing na sampela i wokabaut tasol bihainim piksa bilong santu em ol pris i holim. Tasol ol man i mats, i olsem ol i sori long wanpela man i dai na ol i mats i go.” Na narapela man i tok: ‘Olsem mi bin mekim bipo, ol man i wok long painim rot bilong stretim sik o wanpela hevi long famili samting. Planti taim ol man i givim bel long santu na kis long en, o ol i wokabaut long skru bilong lek i go antap long lata, o wokabaut inap longwe.’

Ol man i no bilip long dispela samting bai ting pasin bilong ol dispela man em pasin longlong. Tasol ol man i insait long mats i ting ol i amamasim God. Baibel yet inap helpim yumi long save, ol dispela bikpela de bilong lotu i amamasim God o nogat.

God i Amamas Long Ol Dispela Samting?

Baibel i tok, lain Israel i save amamas long taim bilong ol bikpela de bilong lotu. Ol dispela bikpela de i bilong givim biknem long God. (Lo 16:​14, 15) Wanpela buk (The Illustrated Bible Dictionary) i stori long ol bikpela de bilong lotu long Baibel na buk i tok, ol man i save pilim tru long bel na ol i amamas. Tasol maski ol i mekim ol dispela bikpela bung, ol pris na lain Israel i no tingim moa ol samting bilong spirit. (Aisaia 1:​15-17; Matyu 23:23) Tasol yumi gat askim olsem: Ol Kristen bilong pastaim i save mats long taim bilong ol bikpela de bilong lotu, o nogat?

Tru, Jisas i bin tingim sampela bikpela de bilong lain Israel, tasol em wantaim ol aposel bilong em i no bin kirapim pasin bilong pulim bikpela lain na mats i go. Wanpela buk (The Encyclopædia Britannica) i tok olsem: “Ating pasin bilong mats long taim bilong ol bikpela de i kamap long yia 1300 samting, taim King Konstantin i orait long lotu Kristen i kamap long hap bilong em.” Na narapela buk (The World Book Encyclopedia) i tok: “Ol bikpela de bilong lotu [em ol mats i insait long en] i kamap narapela kain, long wanem, ol i bungim wantaim ol bilip giaman.”

I no hap wok lotu bilong yumi ol Kristen long insait long ol dispela kain bikpela de bilong lotu na insait long ol mats bilong ol. Pol i stori long ol bikpela de bilong lotu em lo bilong God i tok ol lain Israel bilong bipo i mas mekim, na em i tok: “Olsem na yupela i no ken larim wanpela man i sutim tok long yupela, na tok yupela i no bihainim ol lo bilong kaikai na dring na ol lo bilong ol bikpela de bilong lotu na bilong ol lotu bilong nupela mun na bilong de Sabat. Dispela ol samting ol i olsem ol piksa nating bilong ol samting i laik kamap long bihain. Tasol Krais em i samting tru.” (Kolosi 2:​16, 17) Pol i tokim ol Kristen long Kolosi long ol i no ken larim wanpela man i skelim wok Kristen bilong ol long rot bilong ol bikpela de bilong lotu bilong Lo Bilong Moses.

Samting i Winim Pasin Bilong Mats Samting

Sapos ol Kristen long Kolosi i laik bungim bilip Kristen wantaim pasin bilong olpela lotu, i olsem ol i kalabus gen long olpela lotu. Pol i mekim dispela tok, long wanem, em i ting olsem: Bilong wanem yumi mas bihainim piksa tasol, sapos samting tru, em Krais, i kamap pinis? Olsem na sapos yumi strong long bihainim ol samting em tok profet i kolim olsem piksa tasol, i olsem yumi pasim ol samting tru bilong spirit. Bilong wanem yumi tok olsem? Long wanem Pol i tok, “samting tru i stap wantaim Krais.” Olsem na ol dispela kain bikpela de bilong lotu long nau i no hap bilong trupela lotu Kristen.

Ol Kristen i no aninit moa long ol bikpela de bilong lotu em God i as bilong en long bipo, na ol i mas klia long ol bikpela de bilong lotu em ol haiden i as bilong en na ating ol i save mekim wok long ol imis samting. (Song 115:​4-8) Aposel Pol i tok olsem: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i stap wanbel wantaim Satan, a?” (2 Korin 6:​14, 15) Sapos yumi laik amamasim God, yumi no ken bungim lotu giaman wantaim lotu i tru.​—Matyu 7:21.

God i no save orait long ol bikpela de bilong lotu na mats bilong en em ol haiden i as bilong en. Baibel i tok ol dispela pasin bilong lotu i save daunim nem bilong Jehova na ol bai bagarap. Baibel i tok biktaun Babilon bilong bipo i as bilong lotu giaman na ol pasin bilong en. Em i tok: “Wanpela strongpela ensel i kisim wanpela ston i wankain mak olsem ol bikpela ston bilong wilwilim wit. Em i litimapim dispela ston na i tromoi i go daun long solwara. Na em i tok olsem, ‘Long dispela pasin tasol ol bai i kisim dispela bikpela taun Babilon na tromoi i go daun strong tru, na ol man bai i no inap lukim em moa. Olsem na, Babilon, krai bilong ol gita na bilong ol mambu na biugel na bilong ol kain kain musik, em bai i no kamap moa insait long banis bilong yu.’ ” (KTH 18:​21, 22) Nau yu save, God i no amamas long ol bikpela de bilong lotu em Babilon i as bilong en, olsem na bai yu mekim wanem?

Sapos yu mas i go kamap long wanpela hap tasol yu paul long rot, na wanpela man i soim rot long yu, bai yu amamas, a? Nau yu save long tingting bilong God long ol bikpela de bilong lotu, olsem na yu mas kisim save long Baibel long ol samting God i save amamas long en. Sapos yu bihainim ol dispela tok bilong Baibel bai yu pas gut wantaim God​—dispela i winim pasin bilong tingim ol bikpela de bilong lotu na ol mats bilong en.​—Jon 17:3.

[Piksa Kredit Lain long pes 20]

Dutch Easter procession, Harper’s, 19th century