Wanpela Niusman Bilong Kiev i Litimapim Nem Bilong Ol Witnes
WANPELA niusman, nem bilong em Oleksa Kurpas, i raitim ol gutpela tok long kibung bilong ol Witnes Bilong Jehova long Kiev, long Yukren. Kibung i bin kamap long Ogas 5-8, 1993. Long wanpela nius bilong Kiev (Democratic Ukraine, bilong Ogas 10), em i tok:
‘Inap longpela taim planti man olsem i no bin bung long Ripabliken Stediam. Tingim: Inap 64,000 manmeri (planti tausen em ol man bilong ol narapela kantri) ol i slip long ol haus pasindia, na ol i raun long ol stua, na ol i kalap long ol bas samting. Planti gutpela samting i bin kamap long kibung bilong ol Witnes Bilong Jehova. Taim olgeta wan wan tok bilong kibung i pinis, ol i paitim strong han, na aiwara bilong mi i kapsait.
‘I no olgeta man i save long dispela lotu. Bilip bilong ol i no olsem bilip bilong lotu Otodoks. Ol Witnes i bilip olsem Krais Jisas em i Pikinini bilong God na spirit holi em i strong bilong God (ol Witnes i no bilip long God Triwan). Ol i tok i no gat bikpaia. Na taim God i kotim pinis ol man, graun bai kamap wanpela paradais ol stretpela man bai stap long en, tasol ol man nogut bai bagarap. Famili i bikpela samting long ol man i insait long dispela lotu. Famili i wanpela gutpela samting, na samting i holi, na i no gat narapela gutpela samting olsem i stap long graun. Ol i mekim gutpela pasin pren long ol brata sista bilong ol (na wanpela samting i narapela kain tru—ol i mekim gutpela pasin long ol man bilong narapela lotu). Mi no bin lukim dispela kain pasin bipo.
‘Narapela kain samting i bin kamap long Sarere, Ogas 7. Long dispela de long Kibung Intenesenel bilong ol Witnes Bilong Jehova, 7,402 i kisim baptais; i no gat narapela taim bipo em planti man olsem i bin kisim baptais. Bilong mekim dispela bikpela samting ol i bin putim 6-pela tang wara bilong ol man i laik kisim baptais. Na 60 strongpela man Kristen ol i putim ol dispela nupela man bilong autim gutnius insait long wara bilong baptaisim ol. Tupela aua na 15 minit i lus na olgeta i baptais pinis.
‘Taim ol nupela disaipel i wokabaut i kam long 5-pela hap bilong stediam ol Witnes Bilong Jehova long kibung i paitim han. Long 1958 long wanpela kibung intenesenel long Nu Yok, 7,136 i bin kisim baptais, tasol ol man i kisim baptais long Kiev i winim dispela namba. Oganaisesen bilong ol Witnes Bilong Jehova i wok gut na ating bihain planti man ol i bin stap longpela taim long lotu Otodoks bai ol i insait long lain Witnes.
‘Nogut ol bikman bilong ol lotu i bel hevi long tok bilong mi, tasol sapos ol i no pinisim ol tok pait i stap namel long ol, planti handet tausen man bilong lotu bai lusim lotu bilong ol. Dispela kibung i kamapim klia olsem, bel isi na pasin wanbel inap kamap namel long olgeta lain man.’
[Piksa long pes 24]
Em sampela bilong ol 7,402 i bin kisim baptais long kibung long Kiev, Yukren