Sampela Tok i Kam Long Olgeta Hap
Ol i Popaia Long Blut i Gat Sik AIDS
Long nau Dipatmen bilong Helt na Welfe long Japan i askim ol haus sik long salim ripot i kam long ol dokta o nes i mekim wok long blut i gat jem bilong sik AIDS na planti taim popaia i kamap. Dispela dipatmen i laik save long ol popaia i bin kamap long 10-pela yia i go pinis i kam inap long nau. Nius The Daily Yomiuri i tok, 276 haus sik i bin salim ripot na i tok, ‘i gat 12,914 popaia i kamap taim dokta o nes i givim sut, na 2,997 popaia i kamap taim dokta o nes i holim skin bilong wanpela sikman bilong stretim sik bilong em, na nau liklik hap blut i pas long han bilong dokta o nes.’ Long dispela bikpela lain man, winim 100 i bin kisim blut i gat jem bilong sik AIDS. Tasol inap long nau taim ol dokta i glasim skin bilong dispela lain man, i no gat blut bilong wanpela i makim olsem em i kisim jem i save kamapim sik AIDS.
Sik Kensa i Wok Long Bagarapim Man
Wanpela lain (Skin and Cancer Foundation) long Ostrelia i skelim sik kensa ol man i kisim long skin na ol i tok, nau planti man long Ostrelia i gat dispela kain kensa, winim ol narapela kain kensa. Ol i ting long olgeta yia inap 1,000 manmeri long Ostrelia i save dai long sik kensa long skin. Wanpela nius (The Daily Telegraph Mirror) bilong Sidni i tok: ‘Bipo planti man long Ostrelia i no tingting planti long san na mekim wanpela samting na san i no inap holim skin bilong ol, olsem na nau sik kensa i bagarapim ol.’ Planti bilong ol dispela man i dai long kensa long nau, em ol man i bin slip long san na larim san i holim skin bilong ol taim ol i yangpela yet long yia 1960 i go inap long yia 1980 samting.
Samting Bilong Helpim Man i No Inap Slip
Sampela saveman long Harvard Medical School i bin raitim wanpela lista i gat ol tok bilong helpim ol man i hatwok tru long slip. Wanpela nius (The Harvard Mental Health Letter) i stori long sampela man ol i hatwok long slip—80 minit samting i mas pinis pastaim na ol inap slip. Tasol taim ol i bihainim ol samting lista i stori long en, pasin bilong ol long slip i wok long senis na kamap gutpela liklik. Inap sampela wik ol dispela man i bihainim tok bilong lista na 75 pesen bilong ol inap slip insait long 19 minit tasol. Lista i tok olsem: No ken winim 7-pela aua long slip long bet; no ken winim wanpela aua moa long taim tru bilong yu long kirap; long olgeta de yu mas kirap long wankain taim, maski em Sarere Sande; taim skin i laik slip yu mas go na slip, no ken go sapos skin i no laik slip; sapos yu go slip tasol 20 minit bihain ai i no slip yet, orait kirap na mekim wanpela samting i save helpim yu long stap bel isi na mekim inap long taim skin i laik slip gen.
Kros Pait Long Ol Meri
Wanpela nius (The Globe and Mail) i kamapim ripot long wanpela lain i bin givim askim long ol meri. Ripot i tok olsem: 51 pesen bilong ol meri long Kanada, em olsem 5 milion meri, na ol i winim 16 krismas, man i bin paitim ol inap wanpela o sampela taim. Nius i tok, planti bilong ol dispela meri i tok, man i paitim ol em ‘boipren, o poroman marit, o wanpela pren, o wanblut, o wanpela man i save gut long ol.’ Inap 10 pesen bilong ol dispela meri i bin kisim hevi long 1993, na long olgeta 5-pela 5-pela, wanpela i kisim bagarap long skin. Planti meri i tok, poroman marit o man ol i sindaun nating wantaim, em i subim ol, o holimpas ol, o solapim ol, o kikim ol, o kaikaim ol, o paitim ol.
Ol i Lusim Tingting Long Planti Tausen Diwai Sayor
Wanpela lain (UN Food and Agriculture) i tok: ‘Bipo tru ol man i bin kaikai sampela tausen diwai sayor samting, tasol nau ol man i planim na lukautim 150 kain tasol. Na 3-pela tasol bilong ol dispela 150 kain diwai sayor i save kamapim 60 pesen gris na marasin protin man inap kisim long ol diwai sayor.’ Long olgeta hap ol saveman bilong skelim pasin didiman ol i save truim dispela tok. Long nau ol man i save kaikai tasol ol samting ol i save gut long en olsem rais, kon, wit. Ol dispela kaikai i olsem namba wan kaikai bilong ol, na ol i sakim ol planti tausen gutpela diwai sayor samting i gat ol gutpela marasin bilong helpim skin.
Korona Long Liklik Video
Wanpela pris Katolik bilong Itali i bin wokim wanpela nupela kain Korona i stap long video i gat musik na ol imis bilong lotu i wokabaut. Wanpela nius (Il Resto del Carlino) bilong Bolonya i stori long dispela samting na tok, video i wok long bateri na ‘i no olsem man i mas mekim planti samting bilong mekim wok long en, na em inap slip insait long poket o paus bilong man.’ Na sapos sampela i laik kolim kolim beten taim ol i draivim ka, video i gat ‘wanpela kain samting man inap subim i go insait long ples bilong laitim smok long ka.’ Na man i bilip long Korona inap makim wanem wanem hap bilong Korona em i laik kolim. Olsem: Sapos man i laik harim beten bilong “Ave Maria,” orait em i ken subim wanpela baten long video na dispela beten bai kamap wantaim rait bilong en. Dispela nius i tok moa olsem: ‘Sapos skin bilong man i les taim ol beten i no pinis yet, em inap pasim video na taim em i laik harim gen, em i ken opim long wankain hap em i bin lusim,’ long wanem, video i gat liklik samting insait long en bilong tingim bek ol samting.
Ol i No Inap Bosim Sindaun Bilong Ol
Wanpela lain bilong Yunaitet Nesen em UN Development Program, i kamapim wanpela ripot ol i kolim Human Development Report 1993, na dispela ripot i tok, maski planti gavman long nau i kamap gavman demokratik, 90 pesen bilong ol man i no inap bosim sindaun bilong ol. William Draper bipo em i bos bilong dispela lain UN Development Program, na em i bin kamapim sampela tok long tok i go pas long dispela ripot. Em i tok: Sindaun bilong planti man i bagarap yet, long wanem, ‘ol samting i stret ol i mas kisim olsem graun, wara, wok mani, hap graun bilong wokim haus samting, na ol samting bilong helpim sindaun bilong ol, olsem welfe samting, ol i hatwok long kisim.’ Dispela ripot i tok, ‘ol liklik lain bilong kain kain ples, na ol rabisman, na ol man bilong bus, na ol meri, na ol man i gat sampela bagarap long skin, planti taim ol i no gat rot long senisim sindaun bilong ol.’
Ol Pris i Save Mekim Pasin Sodom
Inap planti yia nau kibung bilong misin Evanjelikal Luteran Bilong Hanova, long Jemani, i orait long ol pris i save mekim pasin sodom i mekim wok bilong ol sapos ol i no gat wanpela poroman olsem. Tasol wanpela nius (The Week in Germany) i tok, planti tok kros i kamap, long wanem, inap 4-pela yia i go pinis ol i bin rausim wanpela pris i save mekim pasin sodom. Dispela nius i tok, nau ol bikman bilong misin long Hanova i orait long ‘ol pris na poroman bilong ol long pasin sodom na ol i “sindaun wantaim,” ol i kisim wok long misin, na tu, mekim wok pris.’
Ples i Kol Nogut Tru
I no longtaim i go pinis na ol saientis i tok, mak bilong kol i kamap olsem 0.000,000,000,28 Kelvin [em kol nogut nogut tru]. I no gat narapela taim o ples mak bilong kol i bin kamap olsem. Dispela mak bilong kol i antap liklik tasol long samting ol i kolim kol olgeta. Dispela kol nogut tru i bin kamap we? Nius New Scandinavian Technology i tok, em i kamap long Finlan, ples bilong lain Nodik. Tasol planti man long Finlan i no save long dispela samting, long wanem, i olsem giaman kol ol saientis yet i bin kamapim insait long wanpela laboritori (Low Temperature Physics Laboratory) long University of Technology, Helsinki. Tasol maski ol saientis i wok long kamapim mak bilong kol olgeta, ol i no bin mekim inap long nau. Nius New Scandinavian Technology i stori long kol olgeta olsem: ‘Dispela kol bai mekim na i no gat wanpela liklik hap hat insait long liklik samting tru ol i kolim atom.’
Windo i Gutpela Samting
Sampela saveman long Yunivesiti Bilong Misigen, Amerika, i skelim ol man i wok mani na ol i gat windo bilong lukluk i go long ol samting long ausait. Ol i tok, ol dispela man i save wok gut, winim ol man i no gat windo long ples wok. Planti man i ting sapos i gat windo i stap, man i no inap wok gut, em bai lukluk i go ausait na tingting bilong em bai wokabaut. Tasol dispela tingting i no stret. Nius Business Week i tok, ol i bin skelim 1,200 man na kisim save olsem: ‘Ol man i gat windo na ol inap lukluk long ol samting long ausait, ol i givim bel long wok, na ol i no bel hevi o kros kwik, na ol i putim gut tingting long wok, na ol i no sik planti.’ Tasol ol man i wok long liklik rum i no gat windo, ‘ol i no tingting gut na ol i save kros long ol liklik samting,’ na ol i no inap putim gut tingting long wok bilong ol.
Pasin Raskol Long Solwara i Go Bikpela
Ofis bilong lain International Maritime Organization i stap long Landon. Em wanpela lain bilong Yunaitet Nesen i save kamapim ol lo bilong ol samting long wara. Dispela lain i wok strong long pinisim pasin bilong ol man i raun olsem raskol na hansapim ol sip na stil long en. Ol man bilong dispela lain i tok: ‘Nau dispela pasin i go bikpela moa na pasin nogut ol i mekim long boskru i moa nogut.’ Ol i tok ol stilman i bin hansapim 400 sip na planti bilong ol dispela sip i bin raun long Stret Bilong Malaka long hap bilong Saut-is Esia taim ol stilman i hansapim ol. Tasol ol i no raun long dispela hap bilong solwara tasol na stil, nogat; ol i raun long nambis bilong wes Afrika na long nambis bilong not-is bilong Saut Amerika. Wanpela nius (UN Chronicle) i tok, pasin raskol long solwara ‘i wok long kamap long olgeta hap.’