Sampela Tok i Kam Long Olgeta Hap

Liklik Helpim Tasol na i No Kam Hariap

Bikpela hangre i kamap gen long Afrika​—ating dispela hangre bai winim ol bikpela hangre i bin kamap bipo. Wanpela nius bilong Paris (Le Figaro) i tok olsem. Ol i ting dispela bikpela hangre inap painim 20 milion i go inap 29 milion manmeri. Dairekta bilong wanpela lain bilong Yunaitet Nesen (United Nations Children’s Fund) i tok, i mas i gat olsem 100 milion kina bilong baim kaikai bilong ol dispela man i hangre. Tasol ol narapela kantri i no tingting tumas long singaut bilong dispela lain long kisim mani bilong helpim ol man i hangre long Afrika, long wanem, taim ol i singaut long dispela mani, olgeta kantri i tingting planti long hevi i bin kamap long pait bilong Pesan Galf. Olsem na samting bilong helpim ol dispela lain long Afrika i no kamap hariap, na tu, ol dispela kantri i no givim planti mani samting long ol bilong helpim ol. Wanpela nius bilong Frans (Le Nouvel Observateur) i tok, planti taim ol man i lukim piksa bilong ol lain bilong sampela hap ol i dai long hangre, olsem na nau hevi bilong dispela samting i no sutim bel bilong ol olsem bipo.

Finlan i Gat Hevi Long Dring

Kantri Finlan i winim ol narapela kantri long pasin bilong dring planti. Wanpela nius (The European) i tok, ‘man i dring na draivim ka i gat asua long planti bagarap i save kamap, na dispela hevi i wok long i go bikpela tru. Na tu, ol polis i tok, pasin bilong dring longlong i namba wan as bilong kros pait, olsem man i paitim meri bilong em, o ol man i pait long rot na ol kain samting olsem. I gat olsem 5,000 manmeri long Finlan, tasol long yia 1990 ol i bin dring 250 milion lita wain na bia samting. Antap long dispela 250 milion lita wain na bia samting, ol man bilong Finlan i bin baim 50 milion lita wain na bia samting long ol sip ol i bin raun long en na i no gat bikpela pe o takis long en. Dispela nius i tok moa, planti man bilong Finlan i ting, ‘pasin bilong dring planti em i rot bilong i stap gutpela, long wanem, em i ples kol na klostu olsem 6-pela mun insait long wanpela yia, san i no lait na ples i olsem tudak.

[Mep long pes 28]

FINLAN

Hevi Bilong Ol Pris i Gat Tambu Long Marit

Wanpela nius (The Catholic Reporter) i tok, dispela tambu long ol pris i no ken marit, em i kamapim kain kain hevi olsem: ‘Ol i kisim pris i go long kot, long wanem, em i kamap papa bilong wanpela pikinini, o em i gat wanpela meri i stap hait, o em i mekim pasin sem wantaim narapela pris, o em i bel hevi long wanem em i stap wanpis, na sampela taim em i mekim pasin sem long wanpela pikinini.’ Dispela nius i tok, ol dispela tok i insait long wanpela bikpela tok lukaut bilong wanpela man, em Joe Sternak, bipo em i wanpela pris Katolik long Sikago long Amerika. Em i bin mekim dispela tok long wanpela kibung taim em i stori long dispela lo bilong misin long ol pris i no ken marit. Na em i wok long raitim wanpela buk i stori long pasin bilong ol pris em ol i mekim pasin sem long ol pikinini. Dispela man Joe Sternak i tok, long 20 provins long Amerika, bisop bilong ol dispela pris i kisim mani kontribusen bilong misin bilong baim kot bilong ol dispela pris o bilong baim papamama bilong ol pikinini em ol dispela pris i bin mekim pasin sem long ol.

Ol Yangpela Inap Skelim Ol Bikpela Samting?

Olsem wanem? Ol yangpela inap skelim gut na kamapim gut tingting bilong ol long wanem samting ol i laik bai dokta i mekim taim ol i gat sik? Planti taim dispela askim i save kamap taim sampela yangpela Witnes Bilong Jehova i no laik kisim blut. Sampela jas bilong haus kot na sampela dokta i ting ol yangpela i no inap tingting gut na skelim dispela kain samting. Tasol wanpela lain (Carnegie Council on Adolescent Development) i bin tingim dispela samting na ol i kamapim narapela kain tingting. Wanpela nius (Science) i tok, sampela saveman i bin skelim pasin bilong sampela yangpela ol i olsem manki yet, na sampela yangpela i bikpela long ol na olsem wanem ol i bin winim wanpela hevi i kamap long sik samting. Ol dispela saveman i kisim save olsem ol yangpela i gat 14 o 15 krismas i gat klostu wankain tingting olsem bilong ol yangpela i gat 18 i go inap 25 krismas. Ol dispela yangpela i gat 14 o 15 krismas i skelim gut ol samting na mekim gut na kamapim gutpela tingting olsem ol dispela narapela lain yangpela i bikpela long ol.

Sik Hepataitas Long Blut

Nau tasol wanpela lain long Japan i truim tok olsem, man inap kisim sik hepataitas (C) long blut ol i putim i go insait long skin bilong em. Planti man bilong Japan i gat sik kensa bilong lewa, em dispela kain sik hepataitas (C) i as bilong en. Dispela lain i tok, long 962 manmeri i bin kisim blut, klostu olsem 80 i gat dispela sik hepataitas (C) long blut bilong ol. Tasol taim ol i skelim 1,870 manmeri i no bin kisim blut, inap olsem 14 tasol i gat dispela sik long blut bilong ol. Lain Retkros long Japan i bin glasim blut bilong ol man i gat dispela sik hepataitas, na long 40 pesen bilong ol, dispela sik i no kamap ples klia long masin em Retkros i mekim wok long en bilong glasim blut.

Wanpela Samting Bilong Tingim Gut

Long Amerika long olgeta 23 23 minit, wanpela i dai long bagarap i kamap taim man i dring na draivim ka. Olsem na nau ol polis i tingim wanpela rot bilong skulim ol yangpela i save dring na draivim ka na ol i bin bagarapim sampela man long dispela pasin. Dispela skul i bilong kirapim ol dispela yangpela long tingim gut ol hevi ol i bin kamapim long dispela pasin bilong ol. Ol i kisim ol dispela yangpela i go long ples bilong putim ol man i dai pinis. Long Los Anjelis long hap bilong Kalifonia ol i bin mekim dispela samting inap sampela yia pinis. Ol i mekim olsem, long wanem, ol yangpela i dring o kisim drak na ol i draivim ka, ol i gat asua long planti bagarap i kamap long ol ka. Taim ol dispela yangpela i go long ples bilong putim man i bin bagarap na i dai pinis, bihain ol i go long haus sik bilong lukim wanpela video i gat piksa bilong sampela bagarap i bin kamap taim ol man i dring o kisim drak na draivim ka. Dispela i helpim planti yangpela na ol i kisim gutpela tingting na save, olsem pasin bilong ol i no stret na samting ol i mekim inap kamapim dispela samting nogut. Ol polis i bin mekim dispela kain pasin long 375 yangpela na i no gat wanpela bilong ol i bin kamap gen long kot. Olsem na nau ol polis i tingting long mekim olsem long planti hap bilong Amerika.

Ol Wokman i Dring Planti

Wanpela nius (Siiddeutsche Zeitung) i kolim tok wanpela lain wokman long Jemani i mekim em ol i tok olsem, “long olgeta 7-pela 7-pela man i mekim wok mani long hap bilong wes Jemani, wanpela i man bilong dring planti.” Olsem na lain Jemani i save tromoi 28 milion i go inap 68 milion kina samting long olgeta yia long dring. Long 1990 i olsem olgeta wan wan man long Jemani em i dring 4-pela bia samting moa winim long 1950. Wanpela man long dispela lain wokman i tok, dring i kamap olsem wanpela drak “bilong daunim hevi bilong ol na ol i no inap pilim hevi bilong wok mani bilong ol o ol samting long ples wok em ol i no amamas long en.”

Sik AIDS Long Malawi

Wanpela nius bilong Landon (The Daily Telegraph) i kamapim ripot bilong Wol Helt Oganaisesen i tok, nau long dispela taim, long olgeta 100 manmeri long Malawi, inap olsem 37 i gat jem nogut i save kamapim sik AIDS. Olsem na long dispela hap i gat klostu olsem 3 milion i gat jem bilong dispela sik. Winim 7,000 ol i dai pinis long sik AIDS long Malawi. Wanpela meri bilong kisim ol stori bilong dispela nius em i tok, ol i ting olsem klostu olgeta pamukmeri long Malawi (olsem 90 pesen), na planti soldia na polis (olsem 75 pesen), na planti meri i karim nupela pikinini long ol taun (olsem 60 pesen), ol i gat jem bilong dispela sik long blut bilong ol. Dispela niusmeri i go long wanpela haus sik long Malawi long hap bilong saut, na long olgeta 10-pela 10-pela sikman long dispela haus sik, inap olsem 5-pela samting i gat sampela kain sik em dispela sik AIDS i kamapim. Niusmeri i raitim stori bilong dispela na em i tok: long olgeta wan handet wan handet sikman long haus sik, i gat wanpela nes tasol i stap. Olsem na ol nes i no inap lukautim gut ol​—ol i mas i stap nating i go na bihain ol i dai.

Ol Man i Kaikai Sak

Klostu long nambis bilong Ostrelia, Japan, Saut Afrika, Amerika, i no gat planti sak nau. Bilong wanem? Long wanem planti man i laik kaikai mit bilong sak. Wanpela nius (Time) i tok, ‘long Amerika long 1980, ol man i wok bisnis long kisim sak, ol i kisim 450 ton, tasol long 1989, ol i kisim planti tru, inap olsem 6,480 ton.’ Long Esia ol man i laik kaikai sup ol i wokim long pul bilong sak. Sampela haus kaikai long dispela hap i putim pe bilong dispela sup olsem K50 long wanpela plet. Dispela nius (Time) i tok, ol man bilong painim pis sak i mekim wanpela pasin nogut tru. Ol i no kilim sak​—ol i holim tasol na katim na kisim pul bilong en na tromoi dispela sak i go bek long solwara, na sak i save dai long solwara.