Pas Bilong Ol Man

Go Long Narapela Hap Mi gat 14 krismas na mi laik tok tenkyu long yupela long stori “Ol Yangpela i Laik Save . . . Bilong Wanem Mipela Mas Lusim Dispela Hap?” (Novemba 8, 1994) Taim mi gat 9-pela krismas, ol i bin askim papa bilong mi, em wanpela elda, long go long narapela kongrigesen klostu. Mipela stap 4-pela yia pinis long dispela nupela kongrigesen na mipela i amamas tru long stap long en. Nau ol i askim papa long go long narapela kongrigesen. Long de stret ol i askim mipela long go long narapela kongrigesen dispela nius Kirap! i kamap. Em i bin stretim tingting bilong mitupela brata bilong mi. Mipela save em i wanpela gutpela samting sapos Sosaiti i askim mipela long go long narapela kongrigesen, tasol em i no isi long tok gutbai long ol pren mipela save laikim tumas.

L. B., long Inglan

Birua Long Narapela Lain Nau tasol mi kaunim Jun 8, 1994, Kirap! bilong yupela. Em i gat ol stori “Olgeta Lain Inap Kamap Wanbel?” Mi kirap nogut tru na amamas long ol dispela gutpela stori, long wanem, yupela i kamapim stretpela tingting na stori gut long as bilong dispela bikpela hevi. Nau tasol mi pinisim wanpela kos long koles i stori long ol samting i bin kamap bipo. Tasol 9-pela pes bilong dispela Kirap! i stori gut na i no hatwok long kisim save long ol samting i bin kamap bipo, na as bilong dispela hevi, na rot bilong stretim! Nius i winim olgeta buk skul na tok ol tisa i kamapim insait long 6-pela mun mi kisim kos.

R. J., long Amerika

Stori Bilong Ol Animal Tenkyu tru long stori “Bikpela Bea Bilong Not Kanada.” (Oktoba 8, 1994) Em i gutpela stori tru. Ol samting yupela i kamapim long stori i helpim mi long pilim gutpela pasin sori bilong Jehova long wokim ol animal bilong yumi ken amamas long ol.

D. C., long Amerika

Mi amamas tru long pasin bilong yupela long skelim “Ol Pasin Hait Bilong Maleo.” (Julai 8, 1994) Maleo i truim tok bilong Baibel olsem God i wokim olgeta samting, na daunim tok bilong ol man i bilip long evolusen olsem olgeta samting i kamap nating.

C. S. S., long Brasil

Giaman Long Bihainim Stretpela Pasin Tenkyu tru long kamapim stori “Ol Yangpela i Laik Save . . . Giaman Long Bihainim Stretpela Pasin i Gutpela o Nogat?” (Ogas 8, 1994) Mi gat 15 krismas na mi go bikpela olsem wanpela Kristen. Tasol mi no givim bel tumas na mi pilim olsem isi isi mi wok long go slek. Wanpela as bilong dispela hevi bilong mi em papamama. Tupela i save putim strongpela lo long mi, olsem na planti taim mi laik mekim ol samting ol i tambuim mi long mekim, maski mi save i no stret. Taim mi kaunim dispela stori mi save em rot bilong Jehova long helpim mi. Mi save i no mi tasol i save giamanim papamama. Tasol taim mi kaunim dispela stori mi kirap nogut long save, planti narapela i gat wankain tingting olsem tingting bilong mi. Mi save bai mi hatwok, tasol mi laik Jehova i helpim mi long senisim wokabaut bilong mi.

K. J., long Amerika

Mi laik tok tenkyu long yupela long dispela stori. Taim mi gat 16 krismas mi kirap long dring na smok na raun wantaim ol boipren. Papamama i no save. Dispela stori i helpim mi long save, i no gat wanpela samting i stap hait long God.

T. T., long Fiji