Sapos Famili i No Gat Televisen Ol Inap i Stap Amamas Moa?

LONG Februeri, 1994, wanpela nius (The Wall Street Journal) i putim stori olsem: “No Gat Televisen: Dispela i Helpim Sampela Famili Long i Stap Gutpela.” Nius i tok: “Ol wan wan famili long Amerika i lusim televisen olgeta​—ol i no lus​—ol i stap amamas.”

I no longtaim i go pinis na ol i bin wokim bung bilong tingim namba wan taim wanpela man i bin ran spit tru na inapim wanpela mail insait long 4-pela minit. Dispela man em Roger Bannister na em i mekim 40 yia bipo. Long dispela bung sampela tok i kamap long ol samting televisen i mekim long famili. Wanpela hapman tru bilong ran spit inap wanpela mail long 1960 samting, em Jim Ryun, em i tok Roger i bin stori long televisen taim tupela i kaikai wantaim paslain long bikpela resis Olimpik long 1968.

Ryun i tok: “Long dispela taim mitupela meri bilong mi Anne i pasim tok pinis long marit, olsem na Roger i tokim mipela em i bin kisim save long wanpela samting i helpim famili bilong em long pas gut wantaim. Mitupela i laik save long dispela samting. Em i tok, em i bin rausim televisen long haus na dispela i mekim na famili i gat taim bilong bung wantaim, na toktok wantaim, na kaunim buk wantaim.”

Ryun i tok: “Mitupela i pilim tru tok bilong em, na mipela i kisim tingting olsem mipela i no gat wok long televisen.”

Planti man i kisim wankain tingting. Bilong wanem ol i kisim tingting olsem? Long wanem, televisen i save kalabusim ol man, na i kalabusim moa yet ol yangpela. Wanpela mama long Merilan, long Amerika, em i tok taim em i sindaun lukim televisen na givim susu long liklik pikinini meri bilong em, “pikinini i save lusim susu na tanim het kwik na ai bilong em i pas long televisen. Mipela i tingting, sapos em i mekim olsem taim em i bebi yet, olsem wanem long taim em i go bikpela?” Olsem na famili i rausim televisen.

Sapos yu no rausim televisen olgeta, tasol yu bosim gut, bai yu bihainim gutpela tingting, a? Karen Stevenson em i namba wan meri blakskin i winim bikpela prais (Rhodes Scholarship) bilong skul long Yunivesiti Oksfot long Inglan, na em i stori long taim em i stap pikinini yet na em i tok: “I tambu long mipela i lukim televisen Mande i go Fraide. Sapos i gat wanpela program mipela i laik tru long lukim . . .  mipela mas tokim [mama] long Sande paslain na redi bambai mipela inap lukim.”

Olsem wanem long famili bilong yu? Yupela i save lukim televisen? Yu save i gutpela yu bosim gut, o inap liklik taim yu lusim olgeta?