Rat Snek—Inap Tru Long Go Antap Long Ol Samting
WANPELA buk i gat stori long ol snek long Alabama i stori long rat snek olsem: Em i save tru long go antap long ol samting. Dispela snek hia long piksa i soim save bilong em long go antap long banis brik bilong wanpela haus. Em i yangpela snek, long wanem, skin bilong em inap tru long bihainim ol liklik baret bilong brik. Em i save laik tru long kaikai ol rat.
Wanpela buk i stori long save bilong dispela snek long go antap long ol samting olsem: ‘Long bel bilong ol rat snek i gat wanpela samting olsem bikpela grile. Wanpela wok bilong dispela grile em bilong helpim snek long baut baut long ol kona na go antap na holim gut ol skin bilong diwai samting. Em inap go antap long wanpela traipela diwai taim em i subim em yet insait long ol liklik baret bilong skin bilong diwai na mekim wok long grile bilong bel bilong em.’—The Audubon Society Encyclopedia of Animal Life.
Taim em i stap long diwai, ating ol pisin blu-jei bai kam na singaut na sut nabaut i go daun long em. Taim em i bihainim banis bilong dispela haus i go antap em i no inap painim ol pisin o kiau bilong ol bilong kaikai, tasol em inap painim gutpela ples hat antap long brik bilong slip liklik.