Wanpela Mama i Pas Gut Long Ol Pikinini
EM I wanpela pusi i no gat man i lukautim em. Gras bilong em i sotpela, na em i no gat nem, na em i gat 5-pela pikinini. Em i hatwok long abrusim bagarap long ol rot bilong Is Nu Yok, em ol man long dispela hap i stap nogut na i gat planti pipia nabaut. Pusi i bin wokim haus bilong em insait long wanpela pipia haus ka em ol man i bin lusim longtaim pinis. Planti taim paia i kirap long dispela haus ka na polis i no save long as bilong en. Pusi i save raun raun nabaut bilong painim pipia kaikai bilong givim long ol pikinini bilong em.
Long Mas 29, 1996, long 6 klok moningtaim sindaun bilong dispela pusi mama i laik senis. Kwiktaim tru paia i kamap long haus ka. Sori tru, haus bilong pusi i paia. Ol paiaman bilong Lata Kampani 175 i kamap long dispela paia na kwiktaim ol i daunim. Wanpela paiaman, em David Giannelli, em i harim singaut bilong ol pikinini pusi. Em i painim 3-pela pikinini ausait long haus ka, na narapela klostu long hapsait bilong rot, na namba 5 pikinini long arere bilong rot. Giannelli i save ol pikinini yet i no inap lusim dispela paia, long wanem, ol i liklik tru. Na Giannelli i lukim skin bilong olgeta pikinini i bagarap, tasol skin bilong sampela i bagarap moa, long wanem, mama inap karim wanpela pikinini tasol—ol narapela i mas wetim em i kam helpim ol.
Wanpela nius bilong Nu Yok, em Daily News bilong Epril 7, 1996, i stori long dispela mama na ol samting i bin painim em. Nius i tok: “Giannelli i painim mama long wanpela hap graun nating klostu. Em i bagarap na kisim pen, olsem na em i slip long graun. Giannelli i lukim dispela pusi na em i sori tru. Smok bilong paia i mekim na ai bilong em i solap na em i no inap opim. Skin aninit long lek bilong em, paia i bin kukim nogut tru. Na pes, yau, lek, em paia i bin kukim. Giannelli i painim wanpela katon na isi isi em i putim pusi mama na ol pikinini insait long en. Giannelli i tok: ‘Mama i no inap opim ai bilong em, tasol em i putim han bilong em i go long ol pikinini—i olsem em i laik save—ol i stap o nogat.’ ”
Taim ol i kamap long wanpela klinik bilong lukautim ol animal (North Shore Animal League), ol dokta i no save—pusi mama bai stap laip o nogat. Nius i stori moa: “Ol i givim marasin long em, long wanem, skin bilong em i guria. Na long rot bilong rop gumi ol i givim marasin antibaiotik long dispela strongpela pusi. Long ol hap bilong skin em paia i kukim, ol i rapim isi isi marasin antibaiotik. Nau ol i putim em insait long wanpela liklik rum oksijen bilong helpim em long pulim win. Em nau, ol dokta na nes samting bilong klinik i wet . . . Insait long 48 aua pusi i kirap sindaun. Maski ai bilong em i solap yet, em inap opim na ol dokta i kisim save olsem ai i no bagarap.”
Inap liklik taim tingim pasin bilong dispela strongpela pusi mama. Ol pusi i save pret long paia, tasol dispela mama i go insait long haus i paia na smok i pulap long en bilong kisim ol pikinini bilong em, em ol i singaut bilong kisim helpim. Bilong i go insait long haus i paia inap wanpela taim tasol bilong kisim ol liklik pikinini i bikpela samting; tasol bilong i go insait 5-pela taim, na olgeta wan wan taim em i go insait, paia i kukim lek na pes na givim pen long em, em narapela kain samting tru ating yumi no inap tingim! Ol i givim nem Retpela long dispela strongpela animal, long wanem, ol hap bilong skin em paia i kukim i retpela.
Klinik i kamapim dispela stori long redio na televisen, olsem na ol man long olgeta hap i kisim save long dispela mama i pas gut long ol pikinini bilong em. Telefon bilong klinik i krai krai—no gat malolo. Winim 6,000 manmeri i bin telefon bilong save long sik bilong Retpela, na sampela bilong ol i telefon long ol longwe hap olsem Japan, Netelan, Saut Afrika. Na inap 1,500 bilong ol dispela manmeri ol i laik kisim Retpela na ol pikinini bilong em. Bihain wanpela pikinini pusi i dai.
Planti manmeri long olgeta hap i bin pilim tru pasin bilong Retpela. Tasol olsem wanem long ol planti milion mama long nau em ol i save rausim bel o ol i mekim nogut long pikinini bihain liklik long ol i karim na pikinini i dai? Pasin bilong Retpela long pas gut long ol pikinini bilong em, em i sutim bel bilong ol o nogat?
[Piksa Kredit Lain long pes 26]
North Shore Animal League