Pas Bilong Ol Man
Kisim Amamas Mi wanbel long tok bilong yupela olsem i gat planti gutpela samting ol yangpela i ken mekim bilong kisim amamas, olsem stori “Ol Yangpela i Laik Save . . . Olsem Wanem Mi Ken Kisim Amamas?” i kamapim. (Oktoba 8, 1996) Mipela inap go long wanpela haus tumbuna o banis bilong ol animal o wokim piknik o bung wantaim bilong kisim amamas. Sampela bilong mipela i no gat planti mani, tasol mipela inap kisim amamas taim mipela i singautim ol narapela yangpela i kam long haus bilong mekim ol pilai o bilong kaikai samting.
V. A., long Brasil
Strongpela Pusi Mi mas tokim yupela olsem mi bin laikim tru dispela stori “Wanpela Mama i Pas Gut Long Ol Pikinini,” em i bin kamap long Kirap! bilong Oktoba 8, 1996. Mi stap long wanpela kantri em planti i insait tru long pasin pamuk na planti yangpela meri i no surik long rausim bel. Mi ting dispela pusi mama em ol i givim nem Retpela long en, em i stap olsem wanpela strongpela mama i tingim gut ol pikinini.
E. B., long Mali
Mi bin amamas tru long kaunim stori long Retpela, olsem em i no bin pret long helpim ol pikinini bilong em taim haus ka i paia. Mi pilim tru pasin dispela pusi i bin mekim na dispela inap skulim gut planti manmeri. Mi ting em gutpela tru yupela i kamapim ol kain stori olsem.
D. W., long Jemani
Stori bilong yupela long Retpela na ol pikinini bilong em i wanpela gutpela stori i sutim tru pasin bilong rausim bel na i winim ol narapela stori mi bin kaunim na i stori long pasin bilong rausim bel.
J. G., long Amerika
Mi no inap pasim aiwara bilong mi taim mi kaunim dispela stori. Mi save laikim olgeta kain animal na pilim tru ol samting Jehova i save skulim yumi long en long rot bilong ol animal. Mi bel hevi long save olsem ol man i gat “tingting” ol i no save bihainim wankain pasin bilong ol animal long tingim na lukautim pikinini bilong ol.
C. C., Amerika
Sori i Save Pasim Ol Gut Wantaim Mi laik tok tenkyu long yupela ol brata long kamapim stori “Baibel i Tok Wanem? Sori i Save Pasim Ol Gut Wantaim.” (Oktoba 8, 1996) Long ol yia i go pinis, planti samting i bin kamap na i traim bilip bilong mi. Wanpela bilong ol dispela traim em papamama bilong mi i bin i dai wantu tasol. Tasol wanpela bikpela traim tru i winim ol narapela, em taim wanpela insait long kongrigesen i bin givim hevi long mi. Dispela stori i bin strongim na mekim gut bel bilong mi taim mi save olsem Jehova i save long bel hevi bilong mi na long as na mi krai. Mi kisim save olsem aposel Pol tu i bin kisim wankain ol hevi. Mi bilip olsem bihain Jehova bai stretim ol hevi bilong mi.
S. B., long Kanada
Long dispela taim bilong ol pasin nogut, i no hatwok long wanpela i lusim tingting long ol samting bilong spirit. Dispela stori i bin kirapim na strongim mi tru. Long dispela taim, ol hevi i save painim mi long olgeta de ol i daunim mi tru. Dispela stori i helpim mi long pilim tru olsem em i bikpela samting long larim sori bilong Jisas i helpim yumi, na yumi no ken ting pasin na tingting bilong yumi ol man i gat sin inap strongim yumi.
A. M., long Amerika
Mi save bel hevi, long wanem, sampela kain marasin insait long skin bilong mi i no wok gut. Dispela stori i bin helpim mi long kamap strong moa long karim bel hevi bilong mi.
B. U., long Amerika